Marcos 3

Is Kebewii Zuen te Etew he Minatey is Menge Ug̵at te Zivaluy he Velad Din

(Marcos 3:1-6; Mateo 12:9-14; Lucas 6:6-11)

1Ne mid-uman medseled si Jesus duen te simbahan te menge Hudiyu, ne zuen dutun etew he minatey is menge ug̵at te zivaluy he velad din. 2Ne zuen menge kuntada ni Jesus dutun ne mibentayan dan si Jesus su ed-ahaan dan ke ebewian din haazà is etew zutun te andew su Andew te Kedhimeley haazà. Su emun ebewian ni Jesus haazà is etew ne idsumbung dan he midsupak din is Andew te Kedhimeley. 3Ne migkeg̵iyan ni Jesus haazà is etew he nezeetan is belad din te, “Hengkayi ka, Mama, te teliwazà.” 4Ne zutun mid-insaan din haazà is menge kuntada zin te, “Hendei zapit is intug̵ut kenitew zuen te kesug̵uan tew he ed-ul-ulahan tew kayi te Andew te Kedhimeley? Iyan be is kedtavang te etew he edlised wey ke ebpesipelahan be is etew? Iyan be is kedtevangi ta te etew su wey kenà mebpatey wey ke edhimetayan te ve is etew?” Ne wazè dan meketavak dutun. 5Ne te ebpenlangulangu si Jesus dutun te mezakel he menge etew, utew zin egkepeuki sikandan ne utew zaan mibmesakit is gehinawa zin su haazà is menge etew, wazè dan kehizu. Ne zutun migkeg̵iyan din haazà is etew he nezeetan is belad din te, “Ketenga nu, Mama, is belad nu.” Ne migketeng dutun te etew haazà is belad din ne segugunà neulii. 6Ne is menge Perisiyu, nemen-awè dan dutun te simbahan. Ne sikandan wey is menge sakup te upakat he midtukud ni Hadì Hirudis, mibpelelelag̵è dan ke hengkey is paag̵i he mehimu zan he mepatey si Jesus.

Is Kebewii te Menge Etew Ziyà te Beyvey te Ranew

(Marcos 3:7-12; Mateo 12:15,16; Lucas 6:17-19)

7Ne zutun mid-awà si Jesus wey is menge sumusundan din ne midhendiyè dan te veyvey te ranew. Ne nemenduma ki Jesus is utew mezakel he menge etew he ebpuun diyà te prubinsya he Geliliya. Ne is duma kandan, diyà ebpemuun te prubinsya he Hudiya, 8wey ziyà te inged he Hiruselim, wey ziyà te prubinsya he Idumiya, wey ziyà te tanà he zehipag te wahig he Hurdan wey ziyà te menge inged he siringan dutun diyà te inged he Tiru wey Sidun. Utew mezakel he menge etew is midhendiyà te ki Jesus su nezineg dan is menge tudtul mehitenged te menge egkengein-inuwan he mibeelan din. 9Ne migkeg̵iyan ni Jesus is menge sumusundan din he megkuwa zan te avang su wey zin meuntuzi emun egkelipitlipit sikandin te utew mezakel he menge etew. 10Mezakel is nengeulian din en he egkengezeruwan ne tenged kayi, is egkengezeruwan dutun, ebpenlietliet dan en is edteg̵el ed-uvey diyà te ki Jesus wey zan mekezampà kandin su wey zan meulii. 11Ne is menge mezaat he mulin-ulin, hein neehè dan si Jesus, ne nemenluhud sikandan diyà te etuvangan din is ebpemengulahì he egkag̵i te, “Iyan ka iyan kes Anak te Megbevayà!” 12Ne zutun midawey ni Jesus haazà is menge mezaat he mulin-ulin ne migkeg̵iyan din sikandan he kenè dan ipesavut he Anak sikandin te Megbevayà.

Is Kebpilia ni Jesus te Menge Epustul

(Marcos 3:13-19; Mateo 10:1-4; Lucas 6:12-16)

13Ne zutun midtekezeg si Jesus diyà te vuvungan dutun ne mid-umew zin sikan is nengepilì din he mehimu he sinerig̵an din. Ne mid-uvey zan diyà te kandin. 14Ne intezù ni Jesus dutun is sepulù wey zezuwa he medumazuma kandin wey zin ikepehipanew sikandan te kebpesavut te Meupiya he Tudtulanen. 15Ne mibeg̵ayan din sikandan te g̵ehem wey zan mevug̵ew is menge mezaat he mulin-ulin he edlalung te menge etew. 16-19Iyan heini menge ngazan te sepulù wey zezuwa he etew he nengepilì ni Jesus: si Simon he migeraran din ki Pedro, wey si Santiago he anak ni Sibidiyu wey is hazi ni Santiago he si Juan. Heini is dezuwa, migeraran din ki Buwenirgis, he ke và dà egkeg̵iya, mezilapet he etew. Ne elin daan dutun si Andres, si Felipe, si Bartolome, si Mateo, si Tomas, si Santiago he anak ni Alpiyu, wey si Tediyu. Ne elin daan si Simon is sevaha te upakat dengan he egngezanan te Kenenista. Ne elin daan mibpilì ni Jesus si Judas he tigKeriyuti, sikan is mid-akal kandin.

Ne neipus haazà is kebpilia ni Jesus kandan, ne mid-ulì sikandin.

Is Lavew ki Setanas

(Marcos 3:20-30; Mateo 12:22-32; Lucas 11:14-23; 12:10)

20Ne zutun ensi Jesus, wazè dan en timpu minsan te kegkaan su utew mezakel is menge etew he nengeamur-amur ziyà te kandin. 21Ne hein nezineg te menge kezumahan ni Jesus is egkeulaula zin ne mibeyaan dan sikandin su kunaan dan ke neliveg.

22Ne zuen dutun menge menunudlù te kesug̵uan he ebpuun diyà te inged he Hiruselim ne ke sikandan te, “Heini he etew, mid-ulinan sikandin ni Endedaman, sikan is egalen te menge mezaat he mulin-ulin, ne tenged kayi igkepeg̵uwè din puun te menge etew is menge mezaat he mulin-ulin.” 23Ne zutun, migkeg̵iyan ni Jesus haazà is menge etew he med-uvey zan diyà te kandin ne zuen menge sempità he impenurù din kandan. Ke sikandin te, “Kenà egkehimu he ebug̵awen ni Setanas is duma zin he mezaat he mulin-ulin. 24Penenglitan ke zuen hadì ne ebpetebtebekà is menge sakup din, meg̵aan egkeawà is gehem din te kedhadì. 25Ne ke zuen edlingahaan te sengevelayan ne ebpekunkuntedahà is menge sakup din, meg̵aan egkevengkag is upakat dan. 26Umba ke egkuntedahan ni Setanas is menge sakup din, kenà egkeug̵et is keg̵ehem din te kebayàbayà, kekenà, meg̵aan egkeawà ne egkehanew.

27 Nezaag ku en si Setanas umba ebpekepaawà a te menge sakup din su wazà minsan hentei he ebpekeseled te valey te mezesen he etew he ed-ag̵ew te menge azen dutun te mezesen he etew emun kenè din egkehuna egkevakus haazà is mezesen he etew. Kinahanglan he ebekusen din edhunai, ne human din egkeag̵ew is menge azen dutun te mezesen he etew.

28Tentenuzi niw heini,” ke si Jesus, “he egkepesaylu pa te Megbevayà is menge etew te minsan hengkey he menge salè dan wey minsan hengkey he kedsumpalit dan kandin, 29iyan, sikan is edsumpalit te Wag̵as he Mulin-ulin, kenè en egkeawà diyà te kandin haazà is salè din ne kenè en egkepesaylu te minsan keenu.” 30Umba migkag̵i ni Jesus haazà su is menge menunudlù, migkag̵i zan he mezaat he mulin-ulin is Wag̵as he Mulin-ulin he ed-ulin ki Jesus.

Is Mesipeg Diyà te ki Jesus

(Marcos 3:31-35; Mateo 12:46-50; Lucas 8:19-21)

31Ne nekeuma zutun is iney ni Jesus wey is menge hazi ni Jesus he menge maama. Ne ziyè dan dà te g̵awas dutun te valey ne migkeg̵iyan dan is menge etew he ipeg̵awas dan si Jesus. 32Ne utew mezakel is menge etew he ebpememinuu zutun he nekelig̵uy ki Jesus. Ne migkeg̵iyan si Jesus te menge etew te, “Diyà te g̵awas is iney nu wey menge hazi nu ne ibpelig̵awang ke zan.” 33Ne migkag̵i si Jesus te, “Duen ku pa ibpaahà keniyu he iney ku wey menge suled ku.” 34Ne nenlangulangu si Jesus dutun te menge etew he nekelingut kandin ne ke sikandin te, “Heini zed is iney ku wey menge suled ku 35su is minsan hentei he edtuman te egkesuatan te Megbevayà, iyan daan iney ku wey menge suled ku he maama, wey menge etevey ku.”

Currently Selected:

Marcos 3: mbbNT

Highlight

Copy