Mateo 21

Is Kedhendiyà ni Jesus te Hiruselim

(Mateo 21:1-11; Marcos 11:1-11; Lucas 19:28-40; Juan 12:12-19)

1Ne hein uvey zan en diyà te inged he Hiruselim su uvey zan te inged he Bitpagi, ne uvey zaan te vuvungan he egngezanan te Ulivuwan, migkeg̵iyan ni Jesus is dezuwa zutun te sumusundan din, 2ke sikandin te, “Hendutun kew te inged he egkeumahan tew. Ne egkeehè niw zutun is intagkes he asnu he zuen din nati. Hekazi niw ne uwita niw zini zuma is nati zin. 3Ne ke zuen ed-insà keniyu ke maan is edhekazan niw, ne ke sikiyu te, ‘Egkinehenglanen heini te egalen tew he si Jesus.’ Ne segugunà idtug̵ut dutun te ed-insà keniyu he uwita niw haazà is asnu zuma is nati zin,” ke si Jesus.

4Umba egkeulaula heini is migkag̵i ni Jesus su egketuman kes netagnà te ebpeneuven te Megbevayà dengan he edhenduen te,

5“Tudtuli niw is menge meg̵inged

diyà te Siyun te,

‘Ebpekeume en guntaan is hadì niw.

Kenà meinit is kedhadì din keniyu

ne ed-untud sikandin te nati te asnu;’ ”

iyan heini lalag dutun te ebpeneuven.

6Ne migenat haazà is midsug̵ù ni Jesus ne mid-ulaula zan is insug̵ù din. 7Ne hein neuwit dan en haazà diyà te ki Jesus is asnu wey nati zin, mibelhenan dan te menge kumbalè dan ne mid-untud dutun si Jesus. 8Ne is utew mezakel he menge etew zutun, tenged te zekelà is kedtahud dan ki Jesus impendempas dan is impenamput dan diyà te ibayà ni Jesus. Ne is duma zutun, mibpenamped dan te menge zehunen he rasang ne in-eneb dan ipendempas dutun te zalan he ibayà ni Jesus. 9Ne mezakel he menge etew is midhuna ki Jesus, ne mezakel zaan is ebpemeninundug kandin, ne ke sikandan is ebpemengulahì te, “Edtehuzen tew is kevuwazan ni Hadì David. Delig̵a is nekeuma he midsug̵ù te Nengazen. Sikiyu is diyà te langit, tehuza niw zaan sikandin!”

10Ne hein nekeuma si Jesus diyà te Hiruselim, mibmeg̵urub is menge meg̵inged dutun. Ebpein-inseey zan ke, “Hentei sikandin?” 11Ne midtavak is mezakel he menge etew he nemenduma ki Jesus te, “Iyan sikandin sikan is ebpeneuven te Megbevayà he si Jesus he tigNeserit diyà te Geliliya.”

Is Kedseled ni Jesus Diyà te Valey te Megbevayà

(Mateo 21:12-17; Marcos 11:15-19; Lucas 19:45-48; Juan 2:13-22)

12Ne midseled si Jesus diyà te Valey te Megbevayà ne mibpenegseg din dutun is menge limbungan he etew zutun he ebpememelegyà wey ebpememasa. Mibpemiley zin is menge lemisahan te ebpemenliwà te menge selapì wey is menge pinuuwà te menge ebpememelegyà te ibpemuhat he merepatik. 13Migkag̵i sikandin diyà te kandan te, “Duen insurat he Lalag te Megbevayà he edhenduen te, ‘Is baley ku, ne egngezanan he valey he elempuanan.’ Ne sikiyu,” ke si Jesus, “nasì niw veeli he ubpeey te ebpemenlimbung.”

14Ne nemenelavuk kandin dutun te Valey te Megbevayà is menge lakap wey menge piang ne nengeulian din sikandan is langun. 15Nengepauk is menge lavew he memumuhat wey menge menunudlù te kesug̵uan dutun hein neehè dan is egkengein-inuwan he mibeelan ni Jesus wey nezineg dan is menge vatà diyà te Valey te Megbevayà he ebpemenhabet egkag̵i te, “Tehuza is kevuwazan ni Hadì David!” 16Ne tenged dutun migkag̵i zan diyà te ki Jesus is egkengepauk te, “Egkezineg nu ve heini is egkeg̵iyen dan?” Ne midtavak si Jesus te, “Egkezineg ku. Wazè niw ves mevasa sikan is insurat he tagnà te ebpeneuven te Megbevayà he edhenduen te, ‘Mibpenurù nu is menge vatà wey mehustu is kedelig̵a zan kenikew.’ ”

17Ne mid-ewaan din sikandan ne mid-awà sikandin dutun te inged he Hiruselim ne midhendiyà te inged he Bitanya, ne zutun medhizeg̵à.

Is Kegkeg̵angu te Kayu he Igira

(Mateo 21:18-22; Marcos 11:12-14,20-24)

18Ne te nepawà dutun te ziyà ensi Jesus te zalan su edlikù dan diyà te Hiruselim, egkevitil sikandin. 19Ne te uvey zutun te zalan neehè din is kayu he igira. Mibeyaan din haazà, iyan, wazà beg̵as he neehè din su menge zahun dà. Ne migkeg̵iyan din haazà is kayu te, “Kenè ke en mebeg̵as minsan keenu.” Ne wazà metegteg̵aad nelay-ub haazà is kayu. 20Nengeinuinu utew is menge sumusundan ni Jesus dutun hein neehè dan is nehitavù dutun te kayu. Ne ke sikandan te, “Maan is segugunà nelay-ub heini is kayu he igira?” 21Ne midtavak si Jesus te, “Tipig̵i niw heini ziyà te isip niw he ke edsarig kew te Megbevayà te kenà duwazuwa, egkehimu niw heini is midhimu ku kayi te kayu he igira. Ne kenà kayi zà taman su minsan pa ke ekeg̵iyan niw heeyan is buntud te, ‘Med-awè ka keniyan ne agbur ka ziyà te zag̵at,’ ne ebpemineg̵en kew zin. 22Emun edsarig kew te Megbevayà, ke ed-ampù kew, egkezawat niw is ebuyuen niw.”

Is Ketenged ni Jesus

(Mateo 21:23-27; Marcos 11:27-33; Lucas 20:1-8)

23Midlikù si Jesus diyà te simbahan he Valey te Megbevayà ne mibpenurù din is menge etew zutun. Ne nemekeuma is menge lavew he memumuhat wey menge ebmeg̵urangen te menge Hudiyu zutun ne mid-insè dan ki Jesus te, “Heini is langun he ed-ul-ulahan nu zini te simbahan, duen nu ve ketenged te ked-ulaula kayi, wey hentei is mibeg̵ey kenikew te ketenged wey nu meulaula heini?” 24Ne midtavak si Jesus te, “Duen daan id-insè ku keniyu, ne emun edtevaken a keniyu, edtevaken ku zaan sikiyu ke hengkey is kediey he ketenged te ked-ulaula ku kayi te langun. 25Hentei is mibeg̵ey ki Juan Megbebewtismu te ketenged din te kebpemewtismu? Megbevayà be wey ke etew zà?” Ne zutun mibpein-inseey sikandan is egkag̵i te, “Emun egkeg̵iyen tew he Megbevayà, ed-insà sikandin ke maan is wazè tew tuuwi si Juan. 26Ne emun egkeg̵iyen ta he etew zà, ebpemiligru ki te menge etew su midtuu zan he ebpeneuven si Juan te Megbevayà.” 27Umba, iyan tavak dan dutun ki Jesus is, “Hanew ta.” Ne migkag̵i si Jesus diyà te kandan te, “Kenè ku zaan egkeg̵iyen keniyu ke hengkey is ketenged ku te kebaal kayi te langun,” ke sikandin.

Is Dezuwa he Midsug̵ù

28Ne mid-uman megkag̵i si Jesus diyà te kandan te, “Hengkey is isip niw kayi? Duen etew he zezuwa is anak din he maama. Mibeyaan din is kakey ne migkeg̵iyan din te, ‘Diyè ka g̵untaan, Mama, terebahu te perasan.’ 29Ne midtavak haazà is anak din te, ‘Es! kenà a egkesuat.’ Asal netegteg̵aad dutun neisip-isip din haazà, ne mibmezaat is gehinawa zin dutun te keberawa zin te amey zin ne zutun midtuman din haazà is ebpeveelan kandin. 30Ne mibeyaan daan dutun te etew is hazi ne iyan ded daan insug̵ù din haazà is insug̵ù din duen te sevaha he anak din. Ne mid-uya haazà is hazi zutun te migkag̵i kandin, iyan, wazè din beeli haazà is ibpeveelan kandin.” 31Ne ke si Jesus te, “Hentei zutun te zezuwa he telesuled is hustu he neketuman te sug̵ù te Amey zan?” Ne ke sikandan diyà te ki Jesus te, “Iyan haazà is kakey.” Ne ke si Jesus dutun te, “Benar iyan he edhuna keniyu is menge mezaat he etew iring te menge menunukut te vuhis wey is menge vahi he ibpenapì dan is dengeg dan su edewaten sikandan te Megbevayà wey zin mehedii kenà sikiyu. 32Su nekeuma si Juan, ne impeehè din keniyu is paag̵i wey kew mebmetazeng ne wazè niw sikandin tuuwi, iyan, midtuuwan mulà sikandin te menge limbungan he menunukut wey menge vahi he ebpemenapì te zengeg dan. Ne minsan te netuenan niw heini, wazè niw iniyug̵i is memezaat he ulaula ne wazè kew zaan medtuu kandin.”

Is Sempità Mehitenged te Impeelima te Perasan

(Mateo 21:33-46; Marcos 12:1-12; Lucas 20:9-19)

33Ne migkag̵i si Jesus te, “Pemineg̵a niw is selakew pa he sempità he egkeg̵iyen ku keniyu mehitenged te ed-ul-ulahan te Megbevayà. Duen etew he zuen din pemuleey he mibpemulaan din te menge g̵awed he paras. Mid-alad din haazà, ne mibudsiyan din te meluag is dekelà he vatu su ebeelan din he keresà te wahig dutun te veg̵as te paras. Ne midlelawig sikandin te ebpeubpaan din te ebantey zutun te perasan. Ne mibpeelimahan din haazà is perasan ne zutun midhendiyà te sengeg̵inhedian. 34Ne hein tirag̵un en dutun, midsug̵ù din is menge sulug̵uen din he ibpekuwa te vahin din dutun te perasan din. 35Ne hein nemekeuma haazà is menge sulug̵uen din, mibpemug̵el zutun te impemeelima zin te perasan is sevaha zutun. Ne is sevaha, midhimetayan dan, ne is sevaha pa zutun, midtuleng dan te vatu. 36Ne mid-uman medsug̵ù heini is etew te mezakel pa kenà is nengehuna he midsug̵ù din. Iyan, iyan ded gihapun mid-ulaula zutun te impemeelima zin te perasan is mid-ulaula zan dutun te nengehuna he sug̵ù din. 37Ne te ketepusan, midsug̵ù kayi te etew is anak din, su egkeisip din is, ‘Kenà egkehimu he kenè dan edtehuzen is anak ku,’ ke sikandin. 38Iyan, hein naahà dutun te impemeelima zin te perasan haazà is anak din, migkag̵i zan te, ‘Na, iyan en heini sikan is anak din; kuwa kew en su edhimetayan tew ne egkeangken tew en heini is perasan din.’ 39Ne migewezan dan haazà ne intimbag dan diyà te g̵awas dutun te perasan ne midhimetayan dan.”

40Ne ke si Jesus te, “Emun ebpekeuma sikan is teg̵ig̵aked dutun te perasan, hengkey is ed-ul-ulahan din dutun te impemeelima zin dutun te perasan?” 41Ne midtavak dan te, “Iyan is: ebpenhimetayan din haazà is impemeelima zin ne ebpeelimahan din maan haazà is perasan te selakew en he menge etew he ebeg̵ey mulà te vahin ke egkeuma is tirag̵un.” 42Ne migkag̵i si Jesus te, “Siguradu nevasa niw en sikan is insurat he Lalag te Megbevayà he edhenduen te,

‘Sikan is batu he himan te valey,

mid-engkezan te menge pandey

su kunaan dan ke wazè din pulus.

Ne heini, nehimu en guntaan he vatu

he iyan dà ebpekepurung te valey.

Ulaula heini te Nengazen,

ne igkeinuinu tew utew.’

43Umba,” ke si Jesus, “benar iyan he kenè kew en maan is menge Hudiyu edhedian te Megbevayà su iyan din edhedian is menge etew he edtuman te egkesuatan din. 44Ne haazà he vatu, ke và dà egkeg̵iya, iyan sikandin kes mibpilì he hadì, ne emun egkeulug̵an te etew haazà, egkepurung egkerupet is egkeulug dutun. Iyan, ke zuen etew he egkeulug̵an dutun te vatu ne egkepurung egkeapug is lawa zutun te egkeulug̵an.”

45Ne heini is menge sempità ni Jesus, nezineg te menge Perisiyu wey menge lavew he memumuhat ne nesavut dan he iyan din sikandan egkeg̵iyen. 46Iyan, hein ed-isipen dan en edekepa si Jesus, kenè dan egkehimu su egkehandek dan te mezakel he menge etew su midtuu is menge etew he ebpeneuven si Jesus te Megbevayà.

Currently Selected:

Mateo 21: mbbNT

Highlight

Copy