Lucas 2

Is Ked-enaka ki Jesus

(Lucas 2:1-7; Mateo 1:18-25)

1Ne hein iyan pa si Augusto hadì diyà te inged he Ruma, mibaal sikandin te velaud he mebpesinsus is langun he menge etew te seled te menge g̵inhedian he sakup din. 2Ne iyan en haazà aney en he kedsinsusa te etew hein iyan pa si Sirinyu gubirnedur ziyà te prubinsya he Sirya. 3Ne zutun te kedsinsus, ne kinahanglan he ziyà edsinsusa is kada etew te inged te menge kepuun din.

4Umba, si Jose is dutun ed-ubpà te inged he Neserit he ziyà te prubinsya he Geliliya, kinahanglan he edhendiyà te prubinsya he Hudiya, diyà te inged he Bitlihim he iyan inged he mid-enakan ki Hadì David dengan; su si Jose, kevuwazan sikandin ni Hadì David. 5Ne miduma ni Jose si Maria, sikan is bahi he nekeg̵unan din su ebpesinsus dan.

Meg̵ingey zutun si Maria. 6Ne hein diyè dan en te inged he Bitlihim, netuman is ked-anak ni Maria, 7ne in-anak din is maama he iyan en pengenayan. Ne mibukusan din haazà is batà te malung ne impehizeg̵è din diyà te selemakà te kudà su wazè dan ed-ereg̵an dutun te valey he ebpehizeg̵aan te etew su neenget en te etew.

Is Ebpen-elima te Kerehidu Wey Sikan is Menge Velinsug̵uen te Megbevayà

8Ne iyan daan haazà he kezukileman, te uvey zutun he inged duen menge etew ziyà te penebtavà su ibpepenabtab dan is menge ayam dan he kerehidu. 9Ne netekew zan te mibpaahà kandan is belinsug̵uen te Nengazen ne neketayew ziyà te kandan is mekeg̵eg̵ehem he anlag te Megbevayà ne utew zan dutun nengehandek. 10Ne migkag̵i haazà is belinsug̵uen te Megbevayà te, “Kenè kew mahandek su midsug̵ù a zini wey ku sikiyu mepenudtuli te utew meupiya he tudtul he iyan utew igkelipey te tivuuk he menusiyà. 11Su kayi te kezukileman in-anak diyà te Bitlihim he iyan inged ni Hadì David dengan, is Nengazen he iyan kes mibpilì te Megbevayà he ibpahadì. Iyan sikandin edlibri keniyu te silut te Megbevayà. 12Egketuusan niw haazà is batà su emun egkeehè niw is batà he mibukusan te malung ne impehizeg̵à diyà te selemakà te kudà, ne iyan en sikandin,” egkag̵i haazà is belinsug̵uen.

13Ne zutundutun mibpaahà daan is utew mezakel he menge velinsug̵uen te Megbevayà he ebpemendalig te Megbevayà, 14ke sikandan te,

“Edelig̵en tew is Megbevayà he ziyà te langit.

Ne zini te lumpad te kelibutan

mebmelinawen is kebpekesavuk

te langun he menge etew he igkesuat te Megbevayà.”

15Ne zutun mid-ulì diyà te langit haazà is menge velinsug̵uen. Ne hein neipus haazà mibpelelag̵à haazà is menge ebpemepenabtab te, “Kuwà kiw en su ebpehendiyè kiw te Bitlihim su wey tew maahà heini is midtudtul kenitew te velinsug̵uen te Megbevayà.” 16Ne zutun nemenhipanew zan is egkengezegdeg̵usu ne nekeuma zan diyà te ki Jose wey ki Maria ne neehè dan daan haazà is batà he impehizeg̵à diyà te selemakà te kudà. 17Ne zutun te neehè dan haazà is batà midtudtul zan engki Jose sikan is langun he midtudtul kandan te velinsug̵uen te Megbevayà mehitenged dutun te vatà. 18Ne langun dutun te nekezineg kayi te tudtul te menge mibpemepenabtab, ne utew zan nengeinuinu. 19Ne si Maria, wazè din melipati heini is langun he nezineg din, kekenà, mibpurungan din is-isipa. 20Ne haazà is ed-elima te menge kerehidu, mid-ulì dan is utew nengelipey. Ne midalig dan is Megbevayà tenged te langun he nezineg dan wey neehè dan su netuman haazà is langun dutun te migkag̵i te velinsug̵uen te Megbevayà.

Is Kedsirkunsidara ki Jesus

21Ne is menge g̵inikanan dutun te vatà, hein nekewalu en is ked-enaka kandin ne midsirkunsidar zan sikandin sumalà is betasan dan. Ne migngezanan dan sikandin ki Jesus he iyan sikan is inngazan kandin duen te velinsug̵uen te wazè pa sikandin ikeg̵ingey.

Is Kedhelaza ki Jesus Diyà te Megbevayà

22Ne kepatan he andew puun dutun te ked-enaka te vatà, iyan en timpu he edtumanen ni Jose wey ni Maria is betasan te kedlumpiyu sumalà is imbilinbilin ni Moises dengan mehitenged te vahi he sikan pa med-anak. Ne mid-uwit dan haazà is batà diyà te Hiruselim ne midseled dan diyà te simbahan he egngezanan te Valey te Megbevayà su id-etuvang dan haazà is anak dan diyà te Megbevayà. 23Iyan id-ul-ulaha zan dutun su edtumanen dan sikan is insurat dengan duen te kesug̵uan he imbeg̵ey te Megbevayà he edhenduen te, “Is penganey he anak he maama, ne ebpeveyveyaan te Megbevayà.” 24Ne si Maria wey si Jose, duen impemuhat dan dutun su sumalà is insug̵ù dengan te Nengazen ne kinahanglan he zuen dezuwa he limuken ne emun kenà ne zezuwa he merepatik he ibpemuhat te sikan pa med-anak.

25Ne zuen dutun maama he ed-ubpà diyà te Hiruselim he egngezanan ki Simeon. Metazeng haazà he etew he layun edsimba te Megbevayà. Kenà egkeawà diyà te g̵ehinawa zin is kebperetenga zin te kegketuman te midtagnà dengan he zuen timpu he edlibriyen te Megbevayà is nengepilì din he menge etew he menge kevuwazan ni Israyil. Layun ed-ulinan si Simeon te Wag̵as he Mulin-ulin. 26Ne impesavut kandin he zaan te Wag̵as he Mulin-ulin he kenà tekew en ebpatey taman te kenè din pa egkeahà is impenaad he etew he nepilì te Nengazen he ibpahadì din te menusiyà. 27Ne zutun te mid-uwit ni Jose wey ni Maria haazà is anak dan ne midseled dan dutun te simbahan su edtumanen dan sikan is insug̵ù te kesug̵uan, daan en dutun si Simeon te seled su iyan impinted kandin te Wag̵as he Mulin-ulin. 28Ne hein naahà ni Simeon haazà is batà, nesepipi zin ne mibpeselematan din is Megbevayà. 29Ke sikandin te,

“Na, Nengazen, midtuman nu en human is penaad nu kediey.

Ne egkehimu en he idtug̵ut nu en he ebpatey a

su wazè en human edteg̵azan ku.

30Neehè ku en is midsug̵ù nu

he iyan edlibri kenami te menusiyà te silut.

31Iyan sikandin Menluluwas he imbeg̵ey nu he egkeahà

te tivuuk he menusiyà.

32Iyan sikandin idtayew te isip

te menge etew he kenà menge Hudiyu

he wazà mesayud ke hentei ka is tutuu he Megbevayà.

Pinaag̵i kandin edelig̵en key is nengepilì nu

he etew he menge kevuwazan ni Israyil.”

Iyan heini migkag̵i ni Simeon.

33Ne haazà is ginikanan dutun te vatà, utew zan nengeinuinu kayi te migkag̵i ni Simeon mehitenged dutun te anak dan. 34Ne in-ampù daan sikandan ni Simeon he tuvazi sikandan te Megbevayà ne migkeg̵iyan din si Maria, sikan is iney zuen te vatà te, “Heini is anak nu, nepilì sikandin te Megbevayà su wey pinaag̵i kandin mevahinbahin kiw is menge kevuwazan ni Israyil. Ne is edsundan kandin ne egkelibri, ne sikan is kenà edsundan, ne edsilutan te Megbevayà. Egketuusan he sugù sikandin te Megbevayà, iyan, edsumpeliten sikandin te mezakel he menge etew, 35ne pinaag̵i kandin egketuusan is menge mezaat he isip dan. Ne sikew is iney zin, tenged te egkuntedahan sikandin te mezakel, utew ebmesakit is gehinawa nu keuzemà.” Iyan heini migkag̵i kandin ni Simeon.

36Ne zutun te simbahan he Valey te Megbevayà duen meritan he egngezanan ki Ana he ebpeneuven te Megbevayà. Anak sikandin ni Penuwil he kevuwazan ni Asir. Meg̵urang en utew haazà is bahi. Hein menguhed pa sikandin, neesawa, iyan, seled te menge pitu zà he tuig te kegkeesawa zin, ne nevalu sikandin. 37Ne menge keweluwan wey heepat en he tuig is kegkevalu zin. Ne layun sikandin diyà te simbahan su andew wey se mezukilem ne edsimba sikandin te Megbevayà, ne zuen timpu he kenà sikandin egkaan su wey zin utew mepurungi is ked-ampù din diyà te Megbevayà. 38Ne te kemulu pa zutun te simbahan si Jose wey si Maria, nekeuma sikandin ne midalig din is Megbevayà tenged dutun te vatà. Ne impesavut din dutun ke hentei haazà is batà diyà te langun he menge etew he netig̵um dutun he hustu is kebpeebuta zan te kedlibriya te Megbevayà te menge kevuwazan ni Israyil.

39Ne hein nepasad ni Jose wey ni Maria haazà is kedtumana zan te langun he insug̵ù diyà te kesug̵uan he imbeg̵ey te Nengazen, mid-ulì dan diyà te ed-ubpaan dan diyà te inged he Neserit diyà te prubinsya he Geliliya. 40Ne midekelà haazà is batà ne mibmezesen is lawa zin, ne utew sikandin metau he vatà ne midtuvazan sikandin te Megbevayà.

Is Kebpen-ahaa ki Jesus te Menge Ginikanan Din

41Ne kada tuig edhendiyà is menge g̵inikanan ni Jesus te Hiruselim su edtelavuk dan te pista he egngezanan te Kedlevayi. 42Ne hein sepulù en wey zezuwa he tuig is idad ni Jesus midtelavuk dan te pista sumalà is ulaula he neleyaman dan. 43Ne hein netapus haazà is pista migenat dan su ed-ulì dan, ne mibpetag̵ak si Jesus diyà te inged he Hiruselim, iyan, wazà heini metueni te g̵inikanan din. 44,45Kunaan dan ke zutun si Jesus te menge zuma zan te ebpenhipanew med-elupitpit. Ne hein sengeandew en is kedhipanew zan ne human dan meseg̵ipà he wazà dutun si Jesus, ne midsusi zan is menge kezuzumahi zan wey menge emig̵u zan ne neehè dan he wazà dutun iyan si Jesus. Ne zutun midlikù dan diyà te Hiruselim ne mibpengehè dan. 46Ne hein tetelu en he andew is kebpengehè dan, neehè dan sikandin diyà te simbahan he Valey te Megbevayà is ebpemekibitiyara te menge menunudlù te kesug̵uan. Ebpemineg te menge lalag dutun te menge menunudlù ne zuen daan menge insè din kandan. 47Ne utew nengeinuinu is langun he nekezineg te menge tavak din te menge insà kandin su utew sikandin metau. 48Ne si Maria wey si Jose, utew zan neinuinu hein neturedu zan sikandin diyà te simbahan ne migkag̵i is iney zin te, “Mama, maan is mid-ulaula nu kenami heini is utew zey igkeseeng? Su is amey nu wey siak, ne utew key neipeng is ebpen-ahà kenikew.” 49Ne midtavak si Jesus te, “Maan is ebpen-ahaan a keniyu? Wazè niw ve metueni he kinahanglan he zini a te valey te Amey ku?” 50Iyan, wazè dan mesavut ke hengkey is kehulug̵an dutun te migkag̵i zin.

51Miduma kandan si Jesus te ed-ulì diyà te Neserit su mepezumdumahan sikandin te g̵inikanan din. Ne wazà melipati te iney zin haazà is langun he neulaula, kekenà, netipig̵an diyà te isip din. 52Ne midtulin is lawa ni Jesus ne mid-iseg is ketau zin te ked-isip. Inmeupiya sikandin te g̵ehinawa te Megbevayà ne henduen ded daan is etew.

Currently Selected:

Lucas 2: mbbNT

Highlight

Copy