Juan 8

1ne si Jesus, midtekezeg sikandin diyà te vuvungan he egngezanan te Ulivuwan. 2Ne hein nepawà dutun, midhendiyè en maan si Jesus te simbahan he Valey te Megbevayà, ne hein midtig̵um diyà te kandin is langun he menge etew, mibpinuu zutun ne mibpenurù din sikandan. 3Ne is menge Perisiyu wey menge menunudlù te kesug̵uan, mid-uwit dan diyà te kandin is bahi he nesekazan dan dutun te kedselselai zin te esawa zin. Ne impeetuvang dan ki Jesus dutun te teliwazà te menge etew haazà is bahi. 4Ne migkeg̵iyan dan si Jesus te, “Menunudlù, heini is bahi, nesekazan dey sikandin he edselselaan din is esawa zin. 5Ne sumalà is kesug̵uan tew he insurat dengan ni Moises, kinahanglan he edhimetayan pinaag̵i te kedtulenga kandin te vatu. Ne hengkey is kenikew he kukuman kayi?” 6Iyan ingkeg̵iya zan dutun su ebpen-ahaan dan si Jesus te sayep su wey zan ikesumbung sikandin. Iyan, midtikintikin si Jesus dutun, ne insurat din is tezù din diyà te tanà. 7Ne g̵eina te kenè dan ed-engked he ed-insà, midhitindeg sikandin ne migkag̵i te, “Is sevaha keniyu he wazà mekevaal te mezaat te minsan keenu, iyan medhuna medtuleng kandin te vatu.” 8Ne hein nekag̵i ni Jesus haazà, midtikintikin en maan, ne midsurat en maan diyà te tanà. 9Ne hein nezineg te menge Perisiyu haazà is migkag̵i zin, nemen-awè dan dutun he tigseselimbaha. Midhuna is utew meg̵urang ne henduen dà duen. Ne hein naamin dan en, netag̵ak haazà is bahi ziyà te etuvangan ni Jesus. 10Ne midlingahà ni Jesus haazà is bahi ne ke sikandin te, “Bayi, hendei en sikandan is midsumbung kenikew? Wazè bes ebpeketuleng kenikew te vatu?” 11Ne midtavak sikan is bahi te, “Wazè en, su migenat dan en.” Ne migkag̵i si Jesus te, “Siak, kenà a zaan edhukum kenikew te kemetayen. Ulì ke en ne kenè kad maan mebaal te mezaat.”

Is Kelig-enan te Kebpenistig̵us ni Jesus

12Ne mid-uman megkag̵i si Jesus diyà te menge etew, ke sikandin te, “Iyan a sikan is kerayag he ebpeketayew te isip te tivuuk he menusiyà. Ne is etew he edsundan kediey, kenà en sikandin egkesakup te g̵ehem te kerusireman, kekenà, egketeyawan is kedsavut din te kerayag he ebpekeveg̵ay te untung he wazà pidtemanan.” 13Ne hein nezineg heini te menge Perisiyu, migkag̵i zan te, “Kenà egkeserig̵an is kebpenistig̵us nu te keugelingen nu. Umba kenè key ebpeketuu te lalag nu su iyan ka ebpenistig̵us te keugelingen nu.” 14Ne midtavak si Jesus te, “Minsan ke iyan a ebpenistig̵us te keugelingen ku, egkeserig̵an is kebpenistig̵us ku su netuenan ku ke hendei a ebpuun wey ke hendei a ebpevayà. Iyan, sikiyu, kenè niw egketuenan ke hendei a ebpuun wey ke hendei a ebpevayà. 15Emun edsusi kew te ulaula te etew, kenà egkeserig̵an is kedhukum niw, su pinaag̵i te kelibutanen dà he isip is kedhukum niw. Siak, kenà a edhukum te minsan hentei. 16Ne minsan ke zuen ibpezayag ku he kedhukum, egkeserig̵an mulà is kedì su kenà kediey zà he kedhukum, kekenà, hukum he ziyà ebpuun te Megbevayà he iyan midsug̵ù kediey. 17Duen insurat diyà te kesug̵uan niw he edhenduen te, ‘Egkeserig̵an is kebpenistig̵us te zezuwa emun egkeuyun.’ 18Ebpenistig̵usan ku is keugelingen ku, ne is Amey ku he midsug̵ù kedì, ebpenistig̵usan e zin daan.” 19Ne migkag̵i kandin is menge Perisiyu te, “Hendei is Amey nu?” Ne midtavak si Jesus te, “Wazè niw metueni ke hentei is Amey ku, ne siak daan, kenè niw egketuenan ke hentei a. Angin ke netuenan niw ke hentei a su egketuenan niw zaan ke hentei is Amey ku.”

20Heini migkag̵i ni Jesus dutun te kebpenurù din diyà te simbahan he Valey te Megbevayà, diyà te rug̵u he egngezanan te Selevukà te Lugbak. Wazà midakep kandin dutun su wazè pa itug̵ut te Megbevayà.

21Ne mid-uman megkag̵i si Jesus diyà te menge egalen te menge Hudiyu, ke sikandin te, “Ed-ewaan ku sikiyu ne ebpen-ahaan a keniyu, iyan, ebpematey kew zà duen he kenà egkepeseylu is menge salè niw. Ne ke hendei a ebpekepevayà kenè kew ebpeketelukun.” 22Ne zutun mibpein-inseey zan te, “Kela ke edhiket su maan is egkag̵i sikandin te ke hendei sikandin ebpevayà, kenè kiw ebpeketelukun?” 23Ne migkag̵i en maan si Jesus te, “Meg̵inged kew zini te kelibutan; siak, meg̵inged a ziyà te langit. Dini kew ebpuun te tanà, iyan, siak, diyà a ebpuun te zivavew. 24Umba migkag̵i ku keniyu he ebpematey kew he kenà egkepeseylu is menge salè niw su tutuu iyan haazà emun kenè kew edtuu he iyan a sikan is mibpilì te Megbevayà he ibpahadì.” 25Ne migkag̵i zan te, “Hentei ka?” Ne midtavak si Jesus te, “Iyan a sikan is layun ku en egkeg̵iya keniyu puun pa te puunà te kebpenurù ku kayi. 26Mezakel pa pezem,” ke si Jesus, “is menge lalag ku keniyu mehitenged te menge ulaula niw wey niw mesavut he mezaat is menge vaal niw, iyan, iyan dà ibpesavut ku zè pa te menusiyà is nezineg ku ziyà te midsug̵ù kedì, ne egkeserig̵an is menge lalag din.”

27Wazà dutun mesavut te menge Hudiyu ke hentei is midsug̵ù kandin he egkeg̵iyen din; wazè dan mesavut he iyan kes Amey zin he Megbevayà. 28Ne tenged dutun migkag̵i en maan si Jesus te, “Siak is Kakey te Menusiyà, dutun te kedrensanga niw kedì keuzemà diyà te kayu he ibpehitindeg, egketuenan niw human he iyan a sikan is mibpilì te Megbevayà he ibpahadì. Egketuenan niw zutun he is langun he mibeelan ku, impeveelan kedì te Amey ku he Megbevayà wey is ibpekag̵i zin kedì, iyan nekag̵i ku. 29Ne is Amey ku he midsug̵ù kedì, duma ku zaan; kenè e zin ed-ewaan su kenà a ed-engked he edtuman te egkesuatan din.” 30Ne zutun te kegkeg̵iya zin kayi, mezakel kandan is nemeketuu kandin.

Is Edsunud ki Setanas

31Ne migkeg̵iyan ni Jesus is menge Hudiyu he nemeketuu kandin, ke sikandin te, “Emun kenè niw ed-engkezan is kedtumana niw te menge penurù ku keniyu, ne human tutuu he menge sumusundan ku sikiyu. 32Egketuenan niw is tutuu he tuluuwen, ne pinaag̵i kayi egkengevelukasan kew.” 33Ne midtavak dutun is menge punuan te, “Iyan kepuun dey si Abraham, ne wazè key meuripen te minsan hentei; maan is migkag̵i nu he egkevelukasan key?” 34Ne midtavak si Jesus te, “Utew venar is egkeg̵iyen ku keniyu he is minsan hentei he ebaal te mezaat, uripen iyan sikandin te mezaat he ulaula. 35Ne is uripen, egkehimu he ibpaawà sikandin dutun te valey he ed-ubpaan din, iyan, is anak te teg̵ivaley, kenà mulà ibpaawà. 36Umba, ke ebelukasan kew te Anak te Megbevayà, tutuu iyan he kenè kew en maan egkeveyveyaan te zaan he teg̵iuripen keniyu. 37Netuenan ku he menge kevuwazan kew ni Abraham; ne minsan pa zutun edhimetayan a pezem keniyu su kenà ed-ereg diyà te g̵ehinawa niw is ibpenurù ku keniyu. 38Is impaahà kedì te Amey ku, iyan egkeg̵iyen ku, ne sikiyu, ebeelan niw mulà is nezineg niw ziyà te keniyu he amey.”

39Ne midtavak dan te, “Iyan kepuun dey si Abraham.” Ne migkag̵i si Jesus te, “Angin ke tutuu kew he kevuwazan ni Abraham su ebeelan niw is mibeelan dengan ni Abraham. 40Siak, impenurù ku keniyu is tutuu he tuluuwen he impesavut kediey te Megbevayà, ne nasì a edhimetayi keniyu, iyan, wazà mid-ulaula ni Abraham he iring dutun! 41Iyan ebeelan niw is mibeelan dengan te amey niw.” Ne mibensag dan te, “Wazè key ikeg̵ingey zà! Sikami, netuenan dey he sebsevaha zà is Amey zey he iyan is Megbevayà!” 42Ne migkag̵i kandan si Jesus te, “Angin pezem ke amey niw is Megbevayà su mahal a g̵eina ziyan te g̵ehinawa niw su te kedhendini ku, diyà a ebpuun te kandin. Kenà kediey zà he suat is kedhendini ku, kekenà, midsug̵ù e zin. 43Umba kenè kew ebpekesavut te egkeg̵iyen ku su kenè niw egkesuatan te edtuman is ibpenurù ku. 44Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù. 45Tutuu mulà is kediey he lalag keniyu, ne tenged kayi kenè niw edtuuwan is egkeg̵iyen ku. 46Ne hentei keniyu is ebpeketistig̵us te mezaat he mibeelan ku? Wazà! Emun tutuu is egkeg̵iyen ku, maan is kenè kew ebpeketuu? 47Emun anak te Megbevayà is etew, ebpeming̵en din is menge lalag te Megbevayà. Umba kenè niw ebpemineg̵en su kenè kew menge anak din.”

Is Lavew Pa ki Abraham

48Ne zutun midtavak ki Jesus is menge punuan he menge Hudiyu, ke sikandan te, “Tutuu ves iyan he tigSemarya ka he memeremerik is betasan! Kela ke midsuukan ka te mezaat he mulin-ulin!” 49Ne midtavak daan si Jesus te, “Wazà a suuki. Emun ebentug̵en ku is Amey ku he Megbevayà, maan is edsulaan a keniyu? 50Kenà a ebpevantug te minsan hentei, iyan, egkesuatan te Megbevayà he ebentug̵en a te menusiyà. Ibpeehè din he venar is menge ketezengan ku. 51Utew venar is egkeg̵iyen ku keniyu he is minsan hentei he edtuman te ibpenurù ku kandin, kenè en ebpekeag̵i te kemetayen!” 52Ne migkag̵i kandin is menge Hudiyu te, “Netuenan dey he tutuu iyan he edlelungen ka te mezaat he mulin-ulin! Minsan si Abraham wey is langun he menge ebpeneuven dengan te Megbevayà, minatey zan en pudu, ne maan is egkag̵i ka he is minsan hentei he edtuman te ibpenurù nu kandin, kenè en ebpekeag̵i te kemetayen! 53Lavew ke ve te kepuun dey zengan he si Abraham? Sikandin wey is menge ebpeneuven dengan, nemematey zan gihapun. Ne sikew, kunaan nu vuwa ke ebpekelavew ka kandan.” 54Ne midtavak si Jesus te, “Emun ebpevantug a wazà pulus te kegkevantug kedì. Iyan ebantug kedì is Amey ku he Megbevayà. Egkeg̵iyen niw he iyan niw sikandin ed-ezapen, 55iyan, wazè niw metueni ke hentei sikandin. Siak mulà, netuenan ku ke hentei sikandin. Ke migkag̵i ku he wazè ku sikandin mekilala, teruen a iring keniyu. Iyan, netuenan ku ke hentei sikandin ne edtumanen ku is menge lalag din kediey. 56Sikan is kepuun niw he si Abraham, utew sikandin nelipey zengan su netuenan din he ibpehendini a te kelibutan umba nelipey sikandin su ebpeebuten e zin.” 57Ne zutun migkag̵i ki Jesus haazà is menge Hudiyu te, “Wazè pa megkelimahan he tuig is penuig̵en nu, ne hengkey is kegkeseuta nu ki Abraham?” 58Ne midtavak si Jesus te, “Utew venar is egkeg̵iyen ku keniyu he te wazè pa ianak si Abraham daan e en.” 59Ne zutun migkuwa zan te menge vatu su idtuleng kandin su edhimetayen dan pezem, iyan, mid-eles si Jesus ne mid-awà dutun te simbahan he Valey te Megbevayà.

Currently Selected:

Juan 8: mbbNT

Highlight

Copy