Juan 7

Is Kenà Kedhendiyà ni Jesus te Edseulug̵an

1Ne hein nepasad ni Jesus haazà is kebpenurù midhendiyà sikandin te prubinsya he Geliliya ne zutun sikandin medrig̵urig̵u. Kenà egkesuat he edrig̵urig̵u ziyà te prubinsya he Hudiya su is menge punuan he menge Hudiyu zutun, ne edhimatey pezem kandin. 2Ne meg̵aan dutun edsilibraha te menge Hudiyu is pista he egngezanan te Pista te Menge Lawig. 3Ne migkeg̵iyan si Jesus te menge hazi zin, ke sikandan te, “Deyzey ke ed-awè ka kayi ne telavuk ka te pista ziyà te prubinsya he Hudiya su wey maahà te menge sumusundan nu ziyà is menge egkein-inuwan he ebeelan nu. 4Su ke zuen etew he egkesuat he egkevantug, kenà egkehimu he id-eles din is menge vaal zin. Su emun egkehimu nu is menge egkein-inuwan, deyzey ke ibpeehè nu ziyà te langun.” 5(Iyan heini menge lalag he idsumpalit dan kandin su minsan pa te menge hazi zin sikandan, wazè dan sikandin tuuwi.) 6Ne migkag̵i si Jesus diyà te kandan te, “Wazè pa metuman is hustu he timpu wey ku ikepaahà is menge vaal ku, iyan, sikiyu, layun niw egkeveeli is egkeisip niw he ebeelan niw. 7Kenè kew egkepeukan te menge etew he kuntada te Megbevayà, iyan, siak, egkepeukan e zan mulà su pinaag̵i te ibpenurù ku egketuenan he mezaat is menge ulaula zan. 8Huna kew en diyà te pista. Kenè e pa edhendiyà su wazè pa metuman is kedì he timpu te kedhendiyà.” 9Ne zutun mibpetag̵ak si Jesus diyà te Geliliya.

10Ne hein migenat en haazà is menge hazi zin he ebpemenelavuk dutun te pista, midtelukun si Jesus, asal wazà mebpekiduma te mezakel he menge etew su kenè din egkesuatan he metueni. 11Ne zutun te pista, ebpen-ahaan sikandin te menge punuan he menge Hudiyu. Ke sikandan te, “Hendei vuwa sikandin?” 12Ne egkesumpakì is mezakel he menge etew he nengetig̵um diyà te inged he Hiruselim. Egkag̵i is duma kandan te, “Meupiya sikandin he etew.” Ne edtavak daan is duma te, “Kenà, su tarù is ibpenurù din te menge etew.” 13Ne g̵eina te egkengehandek is menge etew te menge egalen dan te menge Hudiyu, kenè dan ibpezineg te zuma pa he etew haazà is menge lalag dan.

Is Kebpenurù ni Jesus Diyà te Valey te Megbevayà

14Ne zutun te egkeliwliwazè en is kebibuwan, midhendiyà si Jesus te simbahan he Valey te Megbevayà, ne mibpenurù din is menge etew zutun. 15Utew ingkeinuinu sikandin te menge punuan he menge Hudiyu, ne migkag̵i zan te, “Hendei vuwa ebpuun is ketau kayi he etew su kenè man metikang is netunghaan din?” 16Ne midtavak kandan si Jesus te, “Kenà kediey zà he ketau is ibpenurù ku, kekenà, diyà ebpuun te Megbevayà he iyan midsug̵ù kediey. 17Is etew he egkesuat he edtuman te ebpeveelan te Megbevayà, iyan egkesayud ke ziyè be ebpuun te Megbevayà is ibpenurù ku wey ke zini zè be ebpuun te isip ku. 18Su ke zuen etew he ibpenurù din is kandin dà he isip, ebpevantug dà te menge etew, iyan, is etew he ibpenurù din is kegkevantug te midsug̵ù kandin, egkeserig̵an is lalag din su kenà tarù is ibpenurù din. 19Is apù tew zengan he si Moises, iyan mibeg̵ey keniyu te menge kesug̵uan. Ne netuenan ku he wazà minsan sevaha keniyu he edtuman te kesug̵uan su maan is egkeisip niw he edhimetayan a keniyu?” 20Ne midtavak haazà is menge etew te, “Kela ka midsuukan ka te mezaat he mulin-ulin su wazè man egkesuat he edhimatey kenikew?” 21Ne migkag̵i kandan si Jesus te, “Duen etew he neulian ku te zaru zin, ne pudu kew nengeinuinu su neulian ku te Andew te Kedhimeley. 22Insug̵ù keniyu ni Moises dengan he medsirkunsidar kew te menge anak niw, asal kenà diyè dà ebpuun te ki Moises heini is betasan he kedsirkunsidar su zaan heini he ulaula te menge kepuun tew zengan. Ne egkehimu he edsirkunsidaren niw is etew minsan ke Andew te Kedhimeley. 23Ne emun egkehimu he edsirkunsidaren is lawa te etew te timpu te Andew te Kedhimeley su wey kenà mesupak is insug̵ù kenitew ni Moises, maan is egkepeukan a keniyu tenged te neulian ku is tivuuk he lawa te etew zutun te timpu te Andew te Kedhimeley? 24Kenè niw isipa he mezaat is ulaula te etew emun wazè niw pa mesusi, kekenà, susiya niw is ulaula zin su wey niw metueni is hustu.”

Is Kegkesemberewai Mehitenged ki Jesus

25Ne is duma te menge etew zutun te inged he Hiruselim, hein nezineg dan haazà is migkag̵i ni Jesus, migkag̵i sikandan te, “Kenè be iyan heini sikan is etew he ebpen-ahaan te menge punuan wey zan mehimetayi? 26Ahaa niw man! Ebpenurù ded sikandin te mezakel he menge etew! Kela ke tutuu iyan he netuenan te menge punuan tew he iyan sikandin sikan is netagnà he mibpilì te Megbevayà he ibpahadì su maan is kenè dan edewayen sikandin! 27Iyan, emun iyan en sikandin sikan is hadì ne maan is netuenan tew is ebpuunan din, su emun ebpekeuma haazà is ibpahadì te Megbevayà, kenà egketuenan te minsan hentei ke hendei ebpuun, iyan, heini he etew, netuenan tew ke hendei ebpuun.”

28Ne nezineg ni Jesus haazà, ne zutun te kebpenurù din diyà te simbahan he Valey te Megbevayà mibpekezag̵ing is egkag̵i te, “Kunaan niw ke netuenan niw ke hentei a wey ke hendei a ebpuun, iyan, wazà, su wazà a medhendini te kediey zà he egkesuatan su impehendini a te Megbevayà. Iyan sikandin sikan is tutuu he Megbevayà, iyan, wazè niw metueni ke hentei sikandin. 29Netuenan ku mulà ke hentei sikandin, su ziyà a ebpuun te kandin, ne iyan midsug̵ù kedì.” 30Ne edekepen dan pezem si Jesus dutun, iyan, wazà nekeaku he egawed kandin su wazè pa itug̵ut te Megbevayà. 31Duen mezakel he menge etew he nemeketuu he iyan si Jesus kes netagnà he hadì he mibpilì te Megbevayà. Ke sikandan te, “Iyan si Jesus sikan is hadì su wazà duma he ebpekevaal te lavew pa he menge egkein-inuwan duen te mibeelan din.”

32Ne hein nezineg te menge Perisiyu heini is egkeg̵iyen te menge etew, sikandan wey is menge punuan he memumuhat, midsug̵ù dan is menge guwardya te zekelà he simbahan wey zan mezakep si Jesus. 33Ne migkag̵i si Jesus te, “Kenè en utew egkeug̵et ne ed-ewaan ku sikiyu su ed-ulì a ziyà te Megbevayà he midsug̵ù kedì. 34Ebpen-ahaan a keniyu, iyan, kenà a keniyu egketuredu su kenè kew ebpekehendiyà te egkeubpaan ku.” 35Ne zutun mibpein-inseey is menge Hudiyu, ke sikandan te, “Hendei vuwa ebpevayà sikandin he kenè tew egketuredu? Kela ke edhendiyà te menge inged te kenà menge Hudiyu he mid-ulian te menge zuma tew he Hudiyu, su ebpenurù sikandin te menge etew he kenà menge Hudiyu! 36Su maan is migkag̵i zin he, ‘Ebpen-ahaan a keniyu, iyan, kenà a keniyu egketuredu.’ Ne migkag̵i zaan sikandin te, ‘Kenè kew ebpekehendiyà te egkeubpaan ku.’ Hengkey vuwa pezem is ibpesavut din?” ke sikandan.

37Utew mahal ziyà te menge Hudiyu is ketepusan he andew te kedsilibra zan te pista. Ne hein netuman en haazà, midhitindeg si Jesus ne midhabet megkag̵i te, “Is etew he egkemezahan, medhendini te kediey ne ibpeinum ku sikandin. 38Su,” ke si Jesus, “sumalà is insurat he Lalag te Megbevayà, ‘Ke zuen edtuu kediey, ne edtudà puun te g̵ehinawa zin is wahig he ebpekeveg̵ey te untung he wazà pidtemanan.’ ” 39(Is wahig he ebpekeveg̵ey te untung he migkag̵i ni Jesus iyan is Wag̵as he Mulin-ulin. Egkezawat heini te minsan hentei he edtuu ki Jesus, asal zutun he timpu wazè pa iveg̵ey is Wag̵as he Mulin-ulin su wazè pa si Jesus med-ulì diyà te langit.)

40Nezineg haazà is menge lalag ni Jesus te utew mezakel he menge etew zutun, ne migkag̵i is duma te, “Tutuu iyan he iyan heini he etew sikan is ebpeebuten tew he netagnà he ebpeneuven te Megbevayà!” 41Ne migkag̵i is duma pa kandan dutun te, “Iyan en iyan heini sikandin sikan is hadì he mibpilì te Megbevayà.” Iyan, migkag̵i is duma pa te, “Kenà, su kenà egkehimu he ziyà ebpuun is hadì te prubinsya he Geliliya! 42Su,” ke sikandin, “impesavut te insurat he Lalag te Megbevayà he is hadì he mibpilì te Megbevayà, ne kevuwazan te hadì dengan he si David, ne ziyè kun id-anak te inged he Bitlihim he inged daan dengan ni Hadì David.” 43Ne zutun kenà egkengeuyun is ked-isipa te menge etew mehitenged ki Jesus. 44Ne is duma he etew zutun, egkesuatan dan he mezakep dan si Jesus, iyan, wazà nekeaku he egawed kandin.

Kenà Edtuu is Menge Punuan

45Ne is menge Perisiyu wey menge punuan he menge memumuhat, hein midlikù is menge guwardya he midsug̵ù dan, mid-insaan dan ke maan is wazè dan mezakep si Jesus. 46Ne midtavak is menge guwardya te, “Iyan wazè dey ikezekepa kandin su utew meupiya is kedwali zin; wazè pa etew he nekewali iring te ked-wali zin!” 47Ne migkag̵i kandan is menge Perisiyu te, “Neketuu kew en bes daan te menge tarù din? 48Sikami is menge egalen niw, duen be minsan sevaha kenami he neketuu kandin? Wazà! Duen be Perisiyu he neketuu kandin? Wazà daan! 49Ne heini is menge mezakel he etew he edsundan kandin, wazè dan mesavut is kesug̵uan tew. Id-agbur sikandan diyà te Impirnu!” ke sikandan. 50Ne zutun migkag̵i is sevaha kandan he si Nikudimu. Iyan sikandin kes etew he mibpenumbaley ziyà te ki Jesus hein mezukilem. 51Ke sikandin te, “Wazà itug̵ut kenitew te kesug̵uan tew he edhukuman ta te silut is etew emun wazè te pa mesusi is menge ulaula zin, ne wazè pa sikandin mekepengetezengan.” 52Ne midtavak is menge zuma zin te, “Tulebung ke ves daan he tigGeliliya? Purungi nu susiya is insurat he menge tagnà, ne egketuenan nu he wazà minsan sevaha he ebpeneuven te Megbevayà he ziyà ebpuun te prubinsya he Geliliya.”

Is Bahi he Midselselaan Din is Esawa Zin

53Ne zutun mibpemen-ulì is kada sevaha kandan,

Currently Selected:

Juan 7: mbbNT

Highlight

Copy