Nengeulaula 6

Is Kebpilia te Pitu he Ibpeelima te Menge Tumutuu

1Ne zutun he timpu ed-iseg ebmezakel is menge tumutuu ki Jesus. Is menge tumutuu he Hudiyu he Gerisyahanen is kineg̵iyan dan, duen ibmezaat te g̵ehinawa zan te zuma he menge tumutuu he Hudiyu. Egkag̵i haazà is menge Gerisyahanen he kenà pudu egkeveg̵ayan is kandan he menge valu he vahi ke ebpeneltelazen te kada andew is idtavang dutun te menge valu he vahi. 2Ne zutun midtig̵um te menge epustul is langun he menge tumutuu ne ke sikandan te, “Kenà meupiya ke sikami is menge epustul, emun ed-engkezan dey is kebpenurù te Lalag te Megbevayà wey zey mevahinbahin is ibpenavang. 3Umba, menge suled,” ke sikandan, “meupiya ke ebpilì kew te pitu he menge zuma niw he telehuzen. Kinahanglan he iyan ebpilien is menge maama he memetau he netuenan niw he nepurung sikandan ulini te Wag̵as he Mulin-ulin. Ne ibeg̵ey zey ziyà te kandan is keg̵ehem te kebahinbahin. 4Ne sikami mulà, is menge epustul, egkehimu he ebpurungan dey is baal zey te ked-ampù wey kebpesavut te Lalag te Megbevayà.” 5Ne hein nezineg haazà te menge tumutuu, nengesuat dan dutun te sambag te menge epustul. Ne mibpilì dan si Esteban. Ne si Esteban, utew mezesen is kedtuu zin wey nepurung sikandin ulini te Wag̵as he Mulin-ulin. Ne elin dutun te nepilì dan si Felipe, si Pukuru, si Nikenur, si Timen, si Perminas, wey si Nikulas he tig-Entiyukya. Ne haazà si Nikulas, kenà Hudiyu, iyan, neketuu zengan te tinuuwan te menge Hudiyu. 6Ne impeetuvang dan diyà te menge epustul haazà is nengepilì dan ne in-ampù sikandan te menge epustul ne midepenetan sikandan dutun te menge epustul su iyan haazà paag̵i te kebeg̵ayi kandan te keg̵ehem.

7Ne impeiseg dan is kedweliya zan te Lalag te Megbevayà diyà te mezakel he menge etew. Ne utew mahabet is menge tigHiruselim he nemeketuu ki Jesus. Ne mezakel zaan is menge memumuhat he nemeketuu.

Is Kedekepa ki Esteban

8Ne si Esteban, midtuvazan sikandin te Megbevayà ne zekelà is gehem din. Mezakel is menge egkein-inuwan wey menge singyal he ingkepeehè din diyà te menge etew. 9Ne zuen daan menge kuntada ni Esteban. Iyan is menge Hudiyu he ziyà edsimba te egngezanan te Simbahan te menge Uripen he Nengevelukasan. Is duma kandan ne menge tigSirini, tig-Elihendriya, tigSilisya, wey tig-Asya. Ne ebpekidlewanè dan ki Esteban. 10Iyan, mibeg̵ayan si Esteban te ketau te Wag̵as he Mulin-ulin umba wazè dan igkelawan te ketezengan din. 11Ne zutun duen menge etew he midsuhulan dan wey zan meulug̵i si Esteban te salà, ne egkag̵i haazà is menge etew te, “Nezineg dey is menge lalag din he supak te kesug̵uan ni Moises wey supak daan te Megbevayà,” ke sikandan. 12Ne pinaag̵i zutun te menge etew nengepeukan si Esteban te menge etew, menge ebmeg̵urangen, wey menge menunudlù te kesug̵uan. Ne mibeyaan dan si Esteban ne midakep dan ne impeetuvang dan diyà te menge punuan. 13Ne zutun duen impeseled dan he menge etew he ibpeulug dan te salà ki Esteban. Ne migkag̵i haazà te, “Heini si Esteban, kenà ed-engked he edsudì kayi te simbahan tew he Valey te Megbevayà ne edsumpeliten din is kesug̵uan he imbilinbilin kenitew ni Moises. 14Su nezineg dey sikandin is egkag̵i he is simbahan tew he Valey te Megbevayà, edrundusen ni Jesus he tigNeserit ne ed-ilisan daan ni Jesus is langun he menge vetasan tew he imbilinbilin kenitew zengan ni Moises.” 15Ne midtengtengan si Esteban te langun he menge punuan dutun ne is paras din dutun ne henduen be te paras te velinsug̵uen te Megbevayà tenged te ked-ulini kandin.

Currently Selected:

Nengeulaula 6: mbbNT

Highlight

Copy