Nengeulaula 5

Is Kedtarùtarù ni Eneniyas wey ni Sepira

1Ne zuen maama zutun he egngezanan ki Eneniyas. Is esawa zin, egngezanan ki Sepira. Imbelegyè din is tanè dan, 2iyan, midtipig̵an din is bahin dutun te halin. Ne haazà, ingkesuat daan te esawa zin. Ne is wazè din tipig̵i, mid-uwit din ne imbeg̵ey zin te menge epustul, ne migkag̵i zin he iyan en haazà kes tivuuk he halin duen te tanè din. 3Ne migkeg̵iyan sikandin ni Pedro te, “Eneniyas, maan is ebpevayàbayè ka ki Setanas su edlimbungan niw is Wag̵as he Mulin-ulin su kenè niw id-amin is selapì. 4Te wazè niw pa ivelegyà, kenè be keniyu he tanà? Ne minsan dutun te ingkevelegyè niw en, kenè be keniyu pa he vayàbayà is selapì? Ne maan is neisip niw heini is mezaat he ulaula? Kenà etew zà is edlimbungan niw, kekenà, iyan is Megbevayà.” 5,6Ne te kegkezineg̵a ni Eneniyas kayi he lalag, midsilutan te Megbevayà ne zutundutun nepiley sikandin ne minatey. Ne zutun mibeyaan sikandin te menge menguhed he maama ne mibukusan dan is lawa zin ne mid-uwit dan ne inleveng dan. Ne utew nengehandek is langun he nekezineg kayi te neulaula.

7Ne te menge tetelu he uras dutun nekeuma is esawa ni Eneniyas. Wazè din pa metueni is nehitavù ki Eneniyas. 8Ne mid-insà si Pedro te, “He Bayi, heini is selapì, iyan dè be heini nezawat niw te kebelegyaa niw te tanè niw?” Ne midtavak haazà is bahi te, “Es, uya, iyan dà heeyan.” 9Ne migkag̵i en maan si Pedro te, “Maan is mid-uyunan niw he ebpenggezaman niw is Wag̵as he Mulin-ulin? Ebpekeume en maan kes menge maama he midleveng te esawa nu. Ne ed-uwiten ke zan daan su idleveng ka.” 10Ne zutundutun nepiley si Sepira ne minatey. Ne hein nekeseled haazà is menge maama ne neehè dan sikandin he minatey. Ne mid-uwit dan ne inleveng dan diyà te zurug te leveng te esawa zin. 11Ne tenged dutun utew en nengehandek is langun he menge tumutuu wey minsan hentei he nekezineg dutun te neulaula.

Is Egkengein-inuwan he Mibeelan te Menge Epustul

12Ne is menge epustul, mezakel is menge singyal wey egkein-inuwan he impeehè dan te menge etew. Ne is langun he menge tumutuu, diyè dan layun egketig̵um te egngezanan te Helungà ni Hadì Sulumun. 13Ne is kenà menge tumutuu, kenà edtampu kandan su egkengehandek, asal is langun he tigHiruselim, edtehuzen dan is menge tumutuu. 14Ne layun ed-iseg is kegkeumani te menge tumutuu. Ne tenged dutun utew zan en mezakel is menge maama wey vahi he nemeketuu te Nengazen he si Jesus. 15Ne tenged te menge egkein-inuwan he nehimu te menge epustul, mid-uwit te menge etew is menge egkengezeruwan ne impenavuk dan diyà te kilid te menge kersada he impemehizeg̵à diyà te menge ikam wey hizeg̵aan dan su wey melembungi sikandan te alung ni Pedro ke edsag̵ad. 16Ne is menge meg̵inged te menge inged he ziyà te uvey te Hiruselim, midhendiyè dan te Hiruselim is ebpemen-uwit te menge egkengezeruwan wey ebpenlelungen te mezaat he mulin-ulin ne nengeulian is langun kandan.

Is Kebpesipelahi te Menge Epustul

17Ne zutun he timpu, is lavew he memumuhat wey menge zuma zin he menge Sedusiyu, utew zan nengesina zutun te menge epustul. Ne midwaleng dan dà 18ne midakep dan is menge epustul ne mibpirisu zan. 19Ne zutun te mezukilem, netekewtekew puwasi te velinsug̵uen te Nengazen haazà is pirisuwan ne impaawè din dutun is menge epustul 20ne migkeg̵iyan din sikandan te, “Hendiyè kew te Valey te Megbevayà ne ipenurù niw te langun he menge etew heini is beg̵u he untung.” 21Ne hein nepawà dutun, midhendiyè dan te simbahan he egngezanan te Valey te Megbevayà ne mibpenurù dan.

Ne nekeuma zutun te simbahan is lavew he memumuhat wey menge zuma zin, ne mibpenenawag haazà is lavew he memumuhat he medtig̵um is menge ebmeg̵urangen wey is menge punuan te menge Hudiyu, ne zuen daan midsug̵ù din diyà te pirisuwan su ebpeveyaan sikan is menge epustul. 22Ne hein nekeuma ziyà te pirisuwan haazà is menge pulis, wazè dan naahà. Ne midlikù dan ne midtudtul zan ke hengkey is nehitavù, ke sikandan te, 23“Hein nekeuma key ziyà te pirisuwan, neehè dey he nepurungan melekevi is gemawan ne is menge vantey, dutun dan te uvey te g̵emawan, iyan, te kebpuwas dey wazè dey naahà diyà te seled,” ke sikandan. 24Ne hein nezineg haazà te kepitan te guwardya ziyà te simbahan wey te menge punuan he memumuhat, neked-iinseey zan ke hendei vuwa is menge epustul. 25Ne zutun duen midseled he etew he egkag̵i te, “Sikan is mibpirisu niw, kayi zan te simbahan is ebpenurù te menge etew.” 26Ne zutun mibeyaan haazà is menge epustul zutun te kepitan wey menge pulis ne mid-uwit dan sikandan diyà te menge punuan, ne wazà bug̵ela zutun te pulis haazà is menge epustul su nahandek dan te menge etew su kela ke tulenga sikandan te vatu.

27Ne hein nekeuma zan en, in-etuvang dan haazà is menge epustul ziyà te menge punuan. Ne migkeg̵iyan sikandan dutun te lavew he memumuhat, 28ke sikandin te, “Imbelaud dey keniyu he kenè niw ipenurù is kedtuu te ngazan ni Jesus. Ne hengkey heini is mid-ulaula niw? Insangyew niw is penurù niw zini te tivuuk he Hiruselim ne kenà taman dà kayi is mid-ulaula niw, kekenà, iyan key pa keniyu ebesulan te kedhimetayi ki Jesus.” 29Ne zutun midtavak si Pedro wey is duma he menge epustul te, “Kinahanglan he edtumanen dey is sug̵ù te Megbevayà kenà is menge sug̵ù he mibeelan te etew. 30Mibunù niw si Jesus su inransang niw te krus, iyan, is Megbevayà he edsimbahan te menge kepuun tew, mibanhew zin si Jesus. 31Ne midtulus din en ne ziyè en sikandin te zapit te egkekewanan te Megbevayà. Sikitew is menge kevuwazan ni Israyil, egalen tew sikandin wey iyan kenitew edlibri te silut. Ne ebpeiniyug̵an din kenitew is mezaat he ulaula ne ebpeseyluwen kiw zin. 32Ne sikami, ebpeketistig̵us key he nengeulaula heini is langun. Ne ebpirmahan daan heini te Wag̵as he Mulin-ulin su mibpeulinan kandin te Megbevayà is langun he edtuman te menge sug̵ù din.”

33Ne hein nezineg heini te menge punuan, utew zan nengepauk ne ed-isipen dan en edhimetayi is menge epustul. 34Iyan, duen duma zan he egngezanan ki Gemelil. Perisiyu sikandin he menunudlù te kesug̵uan wey telehuzen te langun he menge etew. Ne midhitindeg heini ne insug̵ù din he ed-uwiten dè pa ziyà te g̵awas haazà is menge epustul. Ne hein diyè dan en te g̵awas, 35migkeg̵iyan ni Gemelil haazà is menge zuma zin te, “Sikiyu is menge zuma ku he kevuwazan ni Israyil, kenè tew edegdeg̵usuwan ke hengkey is ed-ul-ulahan tew kayi te menge etew su kela ke mesayep ki. 36Su zengan duen etew he egngezanan ki Tiyudas he mibpetuu he kenà etew zà duen sikandin. Menge heepat he g̵atus he menge maama is midsundan kandin. Iyan, dutun te kegkepetaya kandin ne nekedsusuwey is menge sumusundan din ne nahanew en haazà is ed-ul-ulahan dan. 37Ne zutun nekesunud si Hudas he tigGeliliya zutun te timpu te kedsinsusa te gubirnu te tivuuk he menge etew. Ne zuen dutun nemekesundan daan kandin, asal midhimetayan daan sikandin ne nemekedsusuwey zaan haazà is menge sumusundan din. 38Ne tenged dutun iyan sambag ku keniyu g̵untaan is: kenè tew en edhilevetan heini is menge etew, kekenà, ebpesegdanen tew su emun diyè dà ebpuun te etew zà duen is ebeelan dan wey ibpenurù dan, egkehanew zed gihapun. 39Iyan, ke ziyà ebpuun te Megbevayà, ne kenè tew egkezaag. Ne kenà dutun dà taman su egkekuntada tew is Megbevayà!” ke si Gemelil. Ne zutun mibpezumdumahan haazà te menge punuan is sambag ni Gemelil, 40iyan, impeseled dan en maan haazà is menge epustul ne impevug̵el zan. Ne migkeg̵iyan dan haazà is menge epustul he kenè dan ipenurù is kedtuu te ngazan ni Jesus ne zutun impaawè dan. 41Ne is menge epustul, migenat dan ne utew zan nelipey su mid-isip sikandan te Megbevayà he meinentusen te ked-el-eleza kandan tenged te kedtuu zan ki Jesus. 42Ne te kada andew ziyè dan gihapun te simbahan wey ziyà te menge valey is ebpenurù te Meupiya he Tudtulanen te keag̵i ni Jesus, sikan is mibpilì te Megbevayà he ibpahadì.

Currently Selected:

Nengeulaula 5: mbbNT

Highlight

Copy