Nengeulaula 4

Is Kedewaya ki Pedro wey ki Juan

1Ne zutun te kemulu pa egkag̵i si Pedro wey si Juan diyà te menge etew, mibeyaan sikandan te menge memumuhat wey te kepitan te guwardya ziyà te simbahan wey elin daan is menge Sedusiyu. 2Ne heini is menge punuan, neepesan dan is penurù eni Pedro te menge etew su impenurù ni Pedro he is kegkevanhew ni Jesus, iyan timaan he egkengevanhew keuzemà is menge etew. 3Ne midakep dan si Pedro wey si Juan ne g̵eina te mahapun en utew, mibpirisu zan su idtag̵ad dan taman te egkepawà. 4Ne minsan pa zutun, neketuu is mezakel he nekepemineg engki Pedro. Ne tenged dutun is kezakel te menge maama zutun te nemeketuu ki Jesus ne migawhat te lelima he libu.

5Ne hein nepawà nengetig̵um diyà te inged he Hiruselim is menge menunudlù te kesug̵uan wey is menge ebmeg̵urangen wey is menge zuma pa he punuan he menge Hudiyu. 6Ne elin daan dutun si Anas, is lavew he memumuhat wey si Keyipas wey si Juan wey si Alejandro wey menge zuma pa he mesipeg he kezuzumahi ni Anas. 7Ne impeetuvang dan si Pedro wey si Juan, ne mid-insaan dan te, “Hengkey heini he g̵ehem is ingkeulii kayi te kenà ebpekehipanew, ne hentei is mibeg̵ey keniyu kayi te g̵ehem?” 8Ne zutun midtavak si Pedro is nepurung ulini te Wag̵as he Mulin-ulin, ke sikandin te, “Sikiyu is menge punuan wey ebmeg̵urangen dey, 9emun iyan niw id-insà kenami ke mibmenumenu zey is meupiya he midhimu zey kayi te kenà ebpekehipanew, ne emun iyan niw zaan id-insà ke hengkey he g̵ehem is ingkeulii kandin, 10ne sikiyu wey is langun he menge zuma ku he kevuwazan ni Israyil, kinahanglan he sevuta niw heini. Su heini is etew he zini te etuvangan niw, neulian sikandin pinaag̵i te g̵ehem te ngazan ni Jesu Kristu he tigNeserit. Heini si Jesus, inransang niw te krus ne minatey, iyan, mibanhew te Megbevayà. 11Iyan si Jesus kes batu he netagnà te insurat dengan he Lalag te Megbevayà he edhenduen te,

‘Sikan is batu he himan te valey,

mid-engkezan niw te menge pandey

su kunaan niw ke wazè din pulus.

Iyan, nehimu en heini g̵untaan he vatu

he iyan dà igkepurungi te valey.’

12Iyan dà si Jesus ebpekelibri te silut kenitew,” ke si Pedro, “su zini te tivuuk he kelibutan wazè en duma pa he ngazan he etew he ebpemeleveg he imbeg̵ey te Megbevayà.”

13Ne zutun, haazà is menge punuan he menge Hudiyu, hein neehè dan he kenà egkehandek si Pedro wey si Juan he egkag̵i wey hein netuenan dan he kenà metikang is netunghaan dutun te zezuwa ne kenà metikang is pid-etawan dan, ne nengeinuinu zan. Ne human dan dutun mekilala he menge zuma zengan ni Jesus si Pedro wey si Juan. 14Ne edsumpeliten dan pezem haazà is egkein-inuwan he mid-ulaula eni Pedro, iyan, geina te zutun daan kes etew he neulian wazè en egkekag̵i zan. 15Umba, dutun te rug̵u he netig̵uman dan migkeg̵iyan dan ensi Pedro he med-awè dan dè pa. Ne zutun mibitiyara zan, ke sikandan te, 16“Ebmenmenuwen tew heini is menge etew su venar man iyan he egkein-inuwan is nehimu zan, ne nevantug en heini zini te tivuuk he inged he Hiruselim ne kenè tew egkevarew. 17Edewayen tew nasì sikandan he kenè dan en maan ipenurù is kedtuu te ngazan ni Jesus diyà te minsan hentei su wey kenà mekeeneb heini is ibpenurù dan diyà te menge etew.” 18Ne zutun impelikù dan ensi Pedro ne mibpelihandek dan ne migkeg̵iyan dan te, “Kenè niw en maan ipenurù is kedtuu te ngazan ni Jesus.”

19Ne midtavak si Pedro wey si Juan te, “Isipa niw ke hendei zapit is egkesuatan te Megbevayà kayi te zezuwa he paag̵i: ke edtumanen dey ve is sug̵ù niw he kenè dey ibpenurù is ngazan ni Jesus, wey ke edtumanen dey is ebpeveelan kenami te Megbevayà. 20Kenà egehimu he kenè dey idsangyew is nezineg dey wey is neehè dey,” ke si Pedro. 21Iyan, impaawè ded sikandan ne mibeleuzan dan he kenà ipesangyew. Ne haazà is menge ebmeg̵urangen, wazè dan neisip he paag̵i te kedsiluti kandan su nahandek dan te menge etew. Is langun he menge etew, midalig dan is Megbevayà tenged te egkein-inuwan he nehimu, 22su kes etew he neulian, subre en he kepatan he tuig is keg̵urang din, umba nengeinuinu is menge etew.

Is Ked-ampù te Menge Tumutuu

23Ne zutun hein impeg̵uwè en si Pedro wey si Juan, mid-ulì dan diyà te menge zuma zan he tumutuu. Ne mibpenudtul zan haazà is imbelaud kandan te menge punuan he menge memumuhat wey menge ebmeg̵urangen. 24Ne is menge tumutuu, hein nezineg dan haazà, ne mid-amur-amur zan te ked-ampù. Ne iyan heini ked-ampù dan, ke sikandan te, “Megbevayà he Nengazen te langun, nenlimbag ka te langit wey tanà wey zag̵at wey is langun he tag̵ù kayi. 25Iyan ka kes nekekag̵i zengan pinaag̵i te kepuun dey he sulug̵uen nu he si Hadì David, su mid-ulinan sikandin te Wag̵as he Mulin-ulin ne nekag̵i zin he,

‘Maan is utew nengepauk is menge etew

he kenà menge Hudiyu,

wey maan is ebpekeisip sikandan te wazè din pulus?

26Su migkayew en is menge hadì dini te kelibutan

wey nengetig̵um is menge punuan

su edtebeken dan is Nengazen wey egkuntedahan dan

is mibpilì din he hadì.’

27Na,” ke sikandan is ed-ampù te, “netuman en kes migkag̵i nu su zini te Hiruselim mid-uyun is menge Hudiyu wey is kenà menge Hudiyu su si Hadì Hirudis wey si Gubirnedur Pilatu, nesevaha zan he ebpekigkuntada ki Jesus he pinilì nu he sulug̵uen he ibpahadì nu. 28Ne mid-uyunan dan ke hengkey is ed-ul-ulahan dan diyà te kandin sumalà is imbanglis nu he meulaula zan. 29Ne ahaa nu man guntaan, Nengazen, is menge pelihandek dan kenami. Iveg̵ey nu kenami g̵untaan te menge sulug̵uen nu is kevurut wey key kenà mahandek te kedsangyew te lalag nu. 30Ipelepew nu is gehem nu su wey zey meulii is egkengezeruwan, wey zuen daan menge egkein-inuwan wey singyal he igkepeehè dey pinaag̵i te g̵ehem te ngazan ni Jesus he pinilì nu he sulug̵uen nu.” 31Ne hein nekeampù dan, ne neg̵ezam dan he egkehuyung haazà is baley he netig̵uman dan. Ne mibpurungan ulini te Wag̵as he Mulin-ulin is kada sevaha kandan, ne wazè dan ikehandek is kedsengyawa zan te Lalag te Megbevayà.

Is Kedsevahaa te Menge Tumutuu te Menge Azen Dan

32Mezesen is kebpekid-upakat te menge tumutuu su nesevaha zà is isip dan wey g̵ehinawa zan. Wazà minsan sevaha kandan he mid-isip din is menge azen din he iyan dà sikandin ebpehimulus, kekenà, mid-isip dan he sevaha zan dà te azen. 33Ne is menge epustul, utew zekelà is gehem he imbeg̵ey kandan te kedtistig̵us he nevanhew is Nengazen tew he si Jesus, ne zekelà daan is kedtuvazi te Megbevayà te langun kandan te nemeketuu ki Jesus. 34Ne is minsan hentei kandan, kenà edlised te minsan hengkey su is duma zan he zuen din tanà wey ke valey ve, ibelegyè din 35ne ibeg̵ey zin is halin dutun diyà te menge epustul ne ebeg̵ayan te menge epustul is minsan hentei he edlised. 36Ne zuen duma zan he tigSipru he Hudiyu zaan he kevuwazan duen te tipehuna he si Levi. Iyan ngazan din si Jose ne migeraran te menge epustul ki Bernabe he ke và dà egkeg̵iya, ebpekeveg̵ey te kezesen te kedtuu. 37Ne zuen tanà ni Bernabe, ne imbelegyè din haazà. Ne imbeg̵ey zin is halin dutun diyà te menge epustul.

Currently Selected:

Nengeulaula 4: mbbNT

Highlight

Copy