Mako 10
10
Volekana mwanalume na mwanakazi
(Mt 19:1-12; Lk 16:18)
1Yesu efuma ku Kapilinamu kutawuka mmana wa Yolodani kufwika ku citwa ca ku Yudeya. Ŵanthu anyinji ewela soti kwa yeve, koma ngani mwaciyoŵelezi, etatika soti kuŵasambizya.
2Apo kwiwela Afalisi ayakine nomukonsha kuti, “Kansi ni cozomelezyewa kuti munthu alekane na mkazi wake?” Pomukonsha teti, enzopangwa kumuyezya.
3Koma Yesu poyasuka elaŵila kuti, “Nga Mose ekulembelani zotyani?”
4 Ŵeve eyasuka kuti, “Mose ecilola kuti munthu akolembela mkazi wake cikalata colekana, pa vuli pake nomufumyapo pa ngʼanda.”
5Yesu elaŵila kuti, “Mose ekulembelani tetulo iyi cikomo ca mitima yanu iyumu na yosasambizyika. 6 Koma potatika pala elenga ŵanthu aŵili, mwanakazi na mwanalume. 7Ni cikomo cake mwanalume akosiya awisi na anyina na kuyolumikizyana na mkazi wake, 8 nipo aŵili aŵa akuŵa muŵili umo. Tetyo, alilini aŵili koma yumo. 9Lomba vonse Mulungu vecilundika pamo, munthu asavipatule.”
10Peciloŵa mu ngʼanda asambili wake, emukonsha soti Yesu va nkhani iyi. 11Yeve eŵawuzya kuti, “Munthu oleka mkazi wake nolungula muyakine, ocita ucende. 12Naye soti mwanakazi keno waleka mwanalume pa vuli pake nolunguliwa na muyakine na yeve, ocita ucende.”
Yesu oshukisha ŵana
(Mt 19:13-15; Lk 18:15-17)
13Ŵanthu ayakine enzoleta ŵana kwa Yesu kuti aŵasinthilile manja pa mutu na kuŵashukisha, koma asambili ŵake eŵazazila avyazi wala. 14Yesu peciwona ivi eŵacimula kuti, “Ŵalekeni ŵana awele kwa newo musaŵaleshe, pakuti Ufumu wa Mulungu ni wa woteti. 15Nukuwuzyani vyendi kuti, wamene ŵatiakanopokelela Ufumu wa Mulungu ngani mwana, wamene uyo akaloŵemolini.” 16Pecilaŵila ivi eŵafukatila ŵana, eŵasanzyika manja noŵashukisha.
Munthu muyakine wolemela
(Mt 19:16-30; Lk 18:18-30)
17Yesu penzofumako ku malo wala, munthu muyakine emuwutukila. Emufukamila nomukonsha kuti, “Asambizyi aweme, kansi nicite vinji kuti nikaloŵe ku moyo wosasila?”
18Yesu emuyasuka kuti, “Uniyitila vinji muweme? Muweme ni Mulungu yeka kwasila. 19 Matetulo uŵaziŵa: Osapaya, osacita ucende, osayiŵa, osacita umboni wa wenye, osatola ciliconse ca mwine monyempha, cinzika auso na anyoko.”
20Wala munthu elaŵila kuti, “Asambizyi, ivi vonse naŵa nuvicita kutatika nikali mwana.”
21Yesu pecimulolesha mwa cinthemwa mu mtima mwake, emuwuzya kuti, “Ukalusoŵa cinthu ciyakine: nkhoya ukasitishe vonse va uli navo. Nipo ndalama zauti ukafwane ukape ŵanthu wotamana, nipo cuma ukacifwane Kululu. Pa vuli pake uwele unikonkhe.”
22Pecimvwa ivi wala munthu ecita citinthi, nofumapo koma enze otamana mu mtima, cikomo enze wolemela ngako.
23Yesu elolesha–lolesha noŵawuzya asambili ŵake kuti, “Ni ca patali kwa ŵanthu ŵa cuma kuti akaloŵe mu Ufumu wa Mulungu.”
24Asambili ŵala ekanganishiwa ngako na malizu ŵake. Yesu ewelezya soti malizu wala elaŵila kuti, “Ni cendi, mwewo mwanamwe ŵangu, ni ca patali kuloŵa mu Ufumu wa Mulungu. 25Ni cipepu kuti ngamila ikapite pa kacibowo ka nsingano, kupula munthu wolemela kuti akaloŵe mu Ufumu wa Mulungu.”
26Nsita yamene iyo asambili ŵala, ici ceŵakanganisha, etatika kukonshana kuti, “Nga watiakapulumuke ni ŵani?”
27Yesu eŵalolesha nolaŵila kuti, “Ici ku ŵanthu ni cosatwesheka, koma na Mulungu ni cotwesheka. Cikomo cakuti vonse na Mulungu ni votwesheka.”
28Petulo elaŵila naye, elaŵila kuti, “Sewo pala tesiya vonse kuti tikukonkheni.”
29Yesu elaŵila kuti, “Nukuwuzyani vyendi kuti aliyense osiya ngʼanda keno akwawo, alongosi, anyina, awisi, ŵana, keno minda cikomo ca newo, koma keno cikomo ca Malizu Aweme, 30munthu uyu pano pansi akapokele vonse mwa winji kupula macezo: ngʼanda, akwawo, alongosi, anyina, ŵana, minda, koma soti manzunzo. Nipo ku nthangu akapokele moyo wosasila. 31Anyinji otatikila lomba akaŵe osililila nipo ali osililila akaŵe otatikila.”
Yesu olaŵila ka citatu va imfwa na kuwuka kwake
(Mt 20:17-19; Lk 18:31-34)
32Penze pa ulwendo wokwezeka kuya ku Yelusalemu, Yesu enzoyenda pa nthangu pa asambili ŵake. Asambili wala enze na wowa ngako. Ŵanthu enzoŵakonkha mu vuli mwawo enze na wowa. Yesu eŵayita soti pa mbali asambili kumi na aŵili wala, nipo eŵawuzya vamene vitivikamucitikile. 33Elaŵila kuti, “Tikuya ku Yelusalemu. Kwamene uko Mwana wa Munthu akatwaliwe kwa Akulu ŵa Ansembe na Asambizyi ŵa Matetulo. Akamupingule kuti akapayiwe, nipo akatwaliwe ku ŵanthu asali Ayuda. 34Ŵanthu aŵa akacite naye msikila, kumutila mata, kumkwapula, nomupaya. Koma pakazopita masiku atatu, yeve azeawuke.”
Vosenga va Yakobe na Yohane
(Mt 20:20-28)
35Yakobe na Yohane, ŵana ŵa Zebedayo ecizouzya Yesu kuti, “Asambizyi, sewo tenze kuti tikusengeni kanthu, mwa mungaticitile?”
36Yesu naye ekonsha soti, “Mwewo mwenzopangwa kuti nimucitileni vinji?”
37Ŵeve elaŵila kuti, “Tenzopangwa kuti mukazowela mu ulemelelo wanu, muzetiyike muyakine ku kwanja kwanu kwendi, muyakine ku kwanja ya manzyele.”
38Yesu elaŵila kuti, “Muziŵalini camusenga. Kansi mwewo mungatweshe kumwa nane pamo nthumo ya matamano yatinikamwe? Kansi mwewo mungatweshe kupokela nane ubatizo wa matamano ŵatinikapokele?”
39Ŵeve ŵala eyasuka kuti, “Eee, tingatweshe.”
Yesu elaŵila kuti, “Ciweme, nthumo itinikamwelemo newo niye itimukamwelemo, nipo ubatizo witinikapokele, namwe mukaupokele. 40Koma newo niliye ulamulilo wosalulila munthu kuti aŵe ku kwanja kwangu kwendi keno ku kwanja ya manzyele. Mulungu niye akupa malo aŵa kwa ŵeve ŵeciwamyila yeve mwine.”
41Asambili ŵala kumi pecimvwa, ecipya mtima na enekwawo aŵili ŵala, Yakobe na Yohane. 42Yesu eŵayita asambili ŵake, noŵawuzya kuti, “Pakati pa ŵanthu ŵa kunja, ŵanthu ŵamene ŵakulaŵila kuti ni wopingula, olyela ŵanthu masuku pa mutu. Acitangulila ali na ulamulilo pa ŵanthu ŵawo. 43Koma pakati panu osati paŵe zoteti. 44Uyo opangwa kuŵa mkulu pakati pa mwewo akokuŵa muzya wa monse. 45Tetyo mwecicitila Mwana wa Munthu: ewela osati kuti ayakine amutumikile yayi, koma kuti yeve aŵe otumikila ŵanthu na kutwala moyo wake kuti anunule ŵanthu anyinji.”
Yesu opozya mphofu
(Mt 20:29-34; Lk 18:35-43)
46Yesu na asambili ŵake pamo na winji wa ŵanthu efwika ku munzi wa Yeliko. Penzofuma mu munzi ukulu wala, efwana mphofu ongosenga–senga mu mbali mwa mseu. Munthu uyu zina yake niye Batimeyo, mwana wa Timeyo. 47Pecimvwa kuti ni Yesu wa ku Nazaleti, eŵilikizya kuti, “Yesu Mwana wa Davide! Municitile lusungu.”
48Ŵanthu anyinji emuzazila kuti aŵe celele. Koma yeve epitilizya kuŵilikizya kuti, “Mwana wa Davide! Municitile lusungu.”
49Yesu epanama, nowuzya ŵanthu kuti, “Muwuzyeni awele kuno.”
Ŵanthu ŵala emuyita mphofu wala nomuwuzya kuti, “Tangʼa mtima, panama okuyita.” 50Tetyo etaya mkhanjo wake nowutukila kwa Yesu.
51Yesu emukonsha kuti, “Kansi upangwa kuti nikucitile cinji?”
Wala mphofu eyasuka kuti, “Asambizyi, nupangwa kuti niwone.”
52Yesu emuwuzya kuti, “Ciweme, nkhoya, cicetekelo cako cakupozya.” Nsita yala ewona nokonkha Yesu pa ulwendo wala.
Currently Selected:
Mako 10: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
