Mako 1

Uŵilizyi wa Yohane Mbatizi

(Mt 3:1-12; Lk 3:1-18; Yh 1:19-28)

1Kutatika kwa Malizu Aweme ŵa Yesu Kristu, Mwana wa Mulungu. 2 Ngani Malembo ŵa Mneneli Yesaya olaŵila kuti,

“Nutuma mtumiki wangu pa nthangu pako,

kuti akawamyiletu njila yakuzopitilamo wewo.

3 Lizu ya oŵilikizya mu cipululu, kuti,

‘Wamyani njila yakuti akapitemo Leza.

Lungamikani njila yakuti azepitemo.’”

4Ivi vecitika cendi pecifwika Yohane Mbatizi mu cipululu, notatika kuŵilizya. Enzowuzya ŵanthu kuti, “Lekani viyipa vanu, mubatiziwe, na kuti Mulungu akulekeleleni ku macimo ŵanu.” 5Ŵanthu ofumila mu calo ca Yudeya na ŵa ku Yelusalemu enzokuya kwake. Ŵeve enzolaŵila kuti akawulula macimo ŵawo, yeve enzoŵabatiza mu mmana wa Yolodani. 6Yohane enzovwala vovwala va usako wa ngamila, nomangila mu luwunda bande wa cikumba, nipo enzokulya zombe na uci wa mu sanga. 7Mu kuŵilizya kwake enze kuti, “Pa vuli pangu alipo akuza wa mphamvu wopula newo, mwakuti newo nine wosawamila kuŵelama nomangulula myando za nkhwaŵilo zake. 8Newo nukubatizani na manzi, koma yeve azekubatizeni na Mzimu Mtuŵa.”

Kubatiziwa na kuyezyewa kwa Yesu

(Mt 3:13—4:11; Lk 3:21-22; 4:1-13)

9Paliyopite nsita ikulu Yesu ewela kufumila ku Nazaleti, ku munzi wa ku Galileya, nipo ebatiziwa na Yohane mu mmana wa Yolodani. 10Penzofuma mu manzi Yesu ewona Kululu kwekezuka, na Mzimu Mtuŵa eseluka pa yeve owoneka ngani nkhunda. 11Tetyo, kwimvwika lizu yofumila Kululu yolaŵila kuti, “Wewo niwe Mwana wangu wotemweka. Nukondwela nawe ngako.”

12Nsita yamene iyo Mzimu Mtuŵa etwala Yesu ku cipululu. 13Kwecinkhala masiku makumi anayi, penzoyezyewa na Satana. Kwenze nyama za mu sanga, koma angelo enzomutumikila.

Yesu otatika nchito yake ku Galileya

(Mt 4:12-22; Lk 4:14,15; 5:1-11)

14Yohane pecipozewa mu jele, Yesu eluta ku Galileya kuyoŵilizya Malizu Aweme ŵa Mulungu. 15Enze kuti, “Nsita yakwana; Ufumu wa Mulungu uli pafupi. Lekani viyipa vanu nocetekela Malizu Aweme aŵa.”

Yesu oyita okata masaŵi anayi

(Mt 4:18-22; Lk 5:1-11)

16Yesu penzoyenda mu mbali mwa Cimmana ca Galileya, ewona ŵanthu aŵili, Simoni na mkwawo Andeleya, enzopoza makombe pa manzi, pakuti enze okata masaŵi. 17Yesu eŵawuzya kuti, “Mwewo munikonkhe, nikakusambizyeni kuŵa okata ŵanthu noŵaleta mu Ufumu wa Mulungu.” 18Nipo pamene apo esiya makombe ŵawo nomukonkha.

19Peciyenda patontho Yesu ewona Yakobe na Yohane ŵana ŵa Zebedayo, aŵa enze mu wato, enzowamya makombe ŵawo. 20Nsita yamene iyo yeve eŵayita. Pamene apo esiya wato na awusu wawo ŵa Zebedayo pamo na ŵanthu aganyu, nokonkha Yesu.

Yesu opozya munthu wokatiwa na ciŵanda

(Lk 4:31-37)

21Wonse aŵa eluta ku Kapilinamu. Peyifwika nsiku ya Sabata, Yesu eloŵa mu kacisi wa Ayuda notatika kusambizya. 22Vosambizya vake veŵakata ngako mtima ŵanthu, cikomo cakuti enzosambizya mowonesha ulamulilo, kusiyana na mwenzocitila Asambizyi ŵa Matetulo.

23Mu kacisi wa Ayuda mwala mwenze munthu wokatiwa na ciŵanda. Elaŵila moŵilikizya kuti, 24“Kansi takuyifyilani cinji Yesu wa ku Nazaleti? Kansi mwewela kuzoticeneka? Nakuziŵani, nimwe Mtuŵa wala wa Mulungu.” 25Koma Yesu ecimula ciŵanda kuti, “Nkhala celele, fuma mwa uyu munthu.” 26Apo ciŵanda cala cemusungʼuzya ngako wala munthu, nipo ceŵilikizya koyofya, nofuma.

27Ŵanthu wonse ŵala etatika kulaŵila, nokonshana kuti, “Kansi ici ni cinji? Kansi ni masambizyo ŵa lomba! Uyu munthu ali na ulamulilo pa viŵanda nipo vumumvwa cendi.” 28Mmangu mbili yake yeŵilikila paliponse ku citwa conse ca ku Galileya.

Yesu opozya ŵanthu anyinji

(Mt 8:14-17; Lk 4:38-41)

29Pa vuli pake Yesu, pamo na Yakobe na Yohane, efuma mu kacisi wa Ayuda nakuyoloŵa mu ngʼanda ya Simoni na Andeleya. 30Anyavyala ŵake wa Simoni enze lele, enzolwala malungo. Yesu pecifwika ŵanthu emuwuzya va ulwele wawo. 31Yesu eluta noŵakata pa kwanja nowawusha, nipo malungo ŵala esila. Pamene apo ŵeve etatika kuŵawamyila cakulya.

32Mcingulo mwamene umo, zuŵa peyiloŵa ŵanthu wonse na ayawo otamana, na okatiwa na viŵanda ewela kwa Yesu. 33Ŵanthu ŵa mu munzi wonse ewunjikana panja pa ngʼanda. 34Yesu epozya anyinji enzotamana na malwele wosiyana–siyana, nipo efumya viŵanda vinyinji. Koma viŵanda vala evilesha kuwulula, cikomo cakuti venzomuziŵa.

Yesu akuyoŵilizya ku Galileya

(Lk 4:42-44)

35Mmamawa, kukaliye kuca, Yesu ewuka noluta kwa yeka kusapita–pita ŵanthu, kwamene uko elomba. 36Simoni na ayakine eciyomusakila. 37Pecimufwana emuwuzya kuti, “Ŵanthu wonse okusakilani.”

38Koma yeve eŵawuzya kuti, “Tiyeni tilute ku minzi iyakine kufupi na kuno, nikaŵilizye malizu nako, pakuti niye cenizila.” 39Tetyo, eluta noŵilizya mu makacisi ŵa Ayuda ku Galileya konse, nipo enzofumya viŵanda.

Yesu opozya munthu wa mambombo

(Mt 8:1-4; Lk 5:12-16)

40Munthu muyakine wa mambombo ewela kwa Yesu. Emufukamila nomusenga. Elaŵila kuti, “Mukapangwa munganisuke#1:40 munganisuke Uyu ulwele wenzopangisha ŵanthu ŵa mambombo kuŵa wosazomelezyewa kuya ku Ngʼanda ya Mulungu, keno kuŵa pamo na ŵanthu osacetekela Mulungu..”

41Yesu emucitila citinthi. Eyimya kwanja nomukumya nolaŵila kuti, “Nupangwa, sukiwa!” 42Pamene apo mambombo ŵala esila, nipo esukiwa cendi.

43Lomba Yesu emuwuzya kuti alute, nipo na malizu ŵa mphamvu 44elaŵila kuti, “Cenjela, usawuzye aliyense va ici, ingoluta kwa wansembe akakuwone, nipo ukatwale nsembe yecilamula Mose. Yamene iyo iŵe mboni yosimikizya kuti wapola cendi.” 45Koma wala munthu pecifuma pala eluta notatika kuŵilizya paliponse va nkhani yala, ni cikomo cake Yesu aliyewonekele soti ku ŵanthu ŵa mu minzi iliyonse. Enzonkhala kuyakine, ku malo kosapita–pita ŵanthu, koma ŵanthu enzokuza mphela kwa yeve kufumila ku vitwa vinyinji.

Currently Selected:

Mako 1: GMN

Highlight

Copy