Mat 9

Yesu opozya munthu wa vizo va kufwa

(Mk 2:1-12; Lk 5:17-26)

1Yesu eloŵa mu wato, notawuka cimmana, noluta ku Kapelenamu. 2Kwamene uko ŵanthu ayakine eleta munthu wa vizo va kufwa ali lele pa macila. Nipo powona cicetekelo cawo, Yesu elaŵila kuti, “Tangʼa mtima mwana wangu, macimo ŵako alekelelewa.”

3Asambizyi ŵa Matetulo ayakine ezikonsha mu mtima kuti, “Uyu munthu otafulila.”

4Koma Yesu poziŵa malingililo ŵawo, elaŵila kuti, “Mulingilila vinji viyipa mu mtima mwanu? 5Cipepu ni cotyani: kumuwuzya uyu munthu kuti, ‘Macimo ŵako alekelelewa,’ keno kumuwuzya kuti, ‘Uka, utatike kuyenda?’ 6Koma kuti muziŵe kuti Mwana wa Munthu ali nawo ulamulilo pano pansi wolekelela macimo, wonani.” Pamene apo ewuzya wala wa vizo va kufwa kuti, “Uka, tola macila ŵako, wakuya ku ngʼanda.” 7Pamene apo wala munthu ewuka nakuya ku ngʼanda. 8Ŵanthu wonse ekanganishiwa notwala mcinzi kwa Mulungu, pakupa ulamulilo woteti ku ŵanthu.

Yesu oyita Mateyo

(Mk 2:13-17; Lk 5:27-32)

9Yesu penzoyenda, ewona munthu muyakine woyitiwa kuti Mateyo ali mu ngʼanda yosonkheshelamo msonkho. Yesu emuwuzya kuti, “Nikonkhe.” Mateyo eyima nomukonkha.

10Yesu penzokulya mu ngʼanda mwa Mateyo, ŵanthu anyinji wosonkhesha misonkho na ŵanthu wocimwa ecilya naye pamo na asambili ŵake. 11Afalisi peciwona ivi ekonsha asambili ŵake kuti, “Cikomo ni cinji asambizyi ŵanu akulya na ŵanthu wocimwa na wosonkhesha misonkho?”

12Yesu pecimvwa, eŵayasuka kuti, “Munthu wosalwala angapangwelini ngʼanga, koma wolwala. 13#Hs 6:6 Kamvwishisheni tanthauzo yakuti, ‘Nupangwa lusungu, osati nsembe.’ Pakuti newo niliyowelele kuzoyita ŵanthu olungama, koma wocimwa.”

Konsho pa kulilesha kulya

(Mk 2:18-22; Lk 5:33-39)

14Asambili ŵa Yohane ewela kwa Yesu nomukonsha kuti, “Cikomo ni vinji sewo na Afalisi tulilesha kulya, koma asambili ŵanu olileshalini kulya?”

15Yesu eŵayasuka kuti, “Kansi woyitiwa ku ukwati angalile koma wolungula ali nawo pamo? Nsita ikafwike yakuti wolungula akatolewe kufuma kwa ŵeve, niye patiakalileshe kulya.

16“Paliye angaŵile cigamba ca lomba pa covwala ca kale. Cikomo cakuti cigamba ca lomba cufuma nopangilako cinthuli kuŵa cikulu kupula kale. 17Nipo munthu otilalini vinyu wa lomba mu matumba ŵa cikumba ca kale. Cikomo cakuti akatetyo, vinyu wa lomba wala ungʼamba matumba ŵala. Tetyo, vinyu wala utayike nipo matumba ŵala osila nchito. Koma vinyu wa lomba owutila mu matumba ŵa lomba soti. Nipo vonse viŵili vusungika luweme.”

Yesu owusha kwa akufwa msimbi nopozya mwanakazi muyakine

(Mk 5:21-43; Lk 8:40-56)

18Yesu penzoŵawuzya vinthu ivi ŵala ŵanthu, kwiwela yumo wa akulu ŵa mpingo nofukama pafupi na yeve nolaŵila kuti, “Mwana wangu mwanakazi wamwalila, koma tiyeni mukayike kwanja yanu pa yeve kuti awuke.” 19Pamene apo Yesu eyima nomukonkha, pamo na asambili ŵake.

20Penzokuya ku ngʼanda, mwanakazi enzolwala ulwele wa mlopa kwa vyaka kumi na viŵili, ewela ku vuli kwake nokata msono wa covwala cake, 21pakuti enzolaŵila yeka mu mtima kuti, “Nikakata tyala covwala cake, nipole.”

22Yesu ecewuka, nipo pecimuwona emuwuzya kuti, “Tangʼa mtima, mwana wangu; cicetekelo cako cakupozya.” Pamene apo mwanakazi wala epola.

23Yesu pecifwika ku ngʼanda ya mkulu wa mpingo ewona ŵanthu olizya mitolilo na mpilingu–pilingu wa ŵanthu. 24Yeve eŵawuzya kuti, “Fumamponi, pakuti msimbi uyu aliyowufwe, koma wayingoyona.” Koma ŵala ŵanthu emuseka. 25Pecifumyiwa panja ŵala ŵanthu, Yesu eluta nomukata kwanja wala msimbi, nipo ewuka. 26Mbili yeŵilikila calo conse cala.

Yesu opozya mphofu ziŵili

27Yesu pecifuma kwala, mphofu ziŵili zemukonkha, zenzolila moŵilikizya kuti, “Ticitileni lusungu, Mwana wa Davide.”

28Peciloŵa mu ngʼanda, mphofu zala ziwela kwa yeve nipo ezikonsha kuti, “Mucetekela kuti nitweshe kucita ici?”

Mphofu zeyasuka kuti, “Eee, Asikulu.”

29Tetyo, ekata mu menso mwawo, nolaŵila kuti, “Vikucitikileni ngani mwa cicetekelo canu.” 30Menso ŵawo evulika. Yesu eŵacenjezya kuti, “Osawuzya aliyense va ici.” 31Koma eluta noŵilizya mbili yake ku minzi yonse ya kwala.

Yesu opozya silaŵila

32Penzofuma kwala, ŵanthu eleta munthu wokatiwa na ciŵanda nipo enze silaŵila. 33Nipo pecifumya ciŵanda cala, silaŵila wala elaŵila. Ŵanthu wonse ekanganishiwa nolaŵila kuti, “Mukaliyocitikako voteti mu Isilayeli.”

34Koma Afalisi elaŵila kuti, “Ofumya viŵanda na mphamvu ya mkulu wa viŵanda.”

Lusungu ya Yesu

35Yesu eyendela mizinda na minzi yonse, kusambizya mu makacisi ŵa Ayuda noŵilizya Malizu Aweme olaŵila va Ufumu wa Kululu, nopozya malwele aliwonse na volefuka vawo. 36Peciwona winji wa ŵanthu eŵacitila lusungu, pakuti enzotamana nipo enzeve yavyo, ngani mbelele ziliye ciŵeta. 37Tetyo, ewuzya asambili ŵake kuti, “Munda ni ukulu, koma oseŵenza ni atontho. 38Ni cikomo cake, lombani mosavupa kwa Asikulu ŵene munda kuti atumizye anyanchito mu vitwalo vake.”

Currently Selected:

Mat 9: GMN

Highlight

Copy