Mat 26
26
Kaupo kopangana kupaya Yesu
(Mk 14:1-2; Lk 22:1-2; Yh 11:45-53)
1Yesu pecisilizya kulaŵila vonse ivi, ewuzya asambili ŵake kuti, 2“Pakayingopita masiku aŵili, cisangalalo ca Pasaka citatike, nipo Mwana wa Munthu akatwaliwe kuti akapanyikiwe pa mtanda.”
3Akulu ŵa Ansembe na Akulu ŵa Ayuda ekumana mu ngʼanda ya Mkulu wa Ansembe wonse, zina yake yenze Kayafa. 4Epangana pamo njila yofisika yomumangila Yesu na kuti amupaye. 5Koma elaŵila kuti, “Osati pa nsita ya cisangalalo yayi, pangazokuŵa vyongo pakati pa ŵanthu.”
Mwanakazi muyakine ozoza Yesu ku Betaniya
(Mk 14:3-9; Yh 12:1-8)
6Lomba Yesu enze ku Betaniya, mu ngʼanda ya Simoni woyitiwa wa Mambombo. 7Penzokulya, kwiwela mwanakazi muyakine enzotakule nsupa ya mafuta onunkhila ŵa mtengo ngako. Etatika kutila mafuta ŵala pa mutu pa Yesu. 8Koma asambili peciwona ici ekalipa nolaŵila kuti, “Cikomo ni cinji kuceneka? 9Pakuti mafuta aŵa sembe asitishiwa na ndalama zinyinji nakupa wozingwa.”
10Yesu poziŵa ivi, eŵakonsha kuti, “Cikomo ni cinji muzingwisha mwanakazi uyu? Pakuti wacita cinthu ciweme ngako kwa newo. 11Muli na ŵanthu wozingwa nsita zonse, koma newo mukokuŵalini nane nsita zonse. 12Potila mafuta aŵa pa muŵili wangu, wacita ici kukonzekela kuyikiwa kwangu. 13Nulaŵila vyendi kuti kulikonse kwatiakoŵilizyiwa Malizu Aweme aŵa calo conse, cawacita cukoŵilizyiwa, kuti ŵanthu akomukumbukila.”
Yudasi opangana na Akulu ŵa Ayuda kutwala Yesu
(Mk 14:10-11; Lk 22:3-6)
14Yumo mwa ŵala kumi na aŵili, zina yake yenze Yudasi Isikaliyoti, eluta kwa Akulu ŵa Ansembe 15noŵakonsha kuti, “Mukanipe vinji nikazomutwala uyu kwa mwewo?” Emulipila ndalama za siliva makumi atatu (30). 16Lomba kutatikila pamene apo etatika kusakila mpata wakuti amutwalilemo kwa ŵeve.
Yesu ocita malyelelo ŵa Pasaka na asambili ŵake
(Mk 14:12-21; Lk 22:7-14,21-23; Yh 13:21-30)
17Lomba pa nsiku yotatika ya cisangalalo ca mkate uliye cofufumishila, asambili ŵake ewela kwa Yesu nomukonsha kuti, “Kansi tikakuwamyileni kuni malo olyelako cisangalalo ca Pasaka?”
18Yesu eŵayasuka kuti, “Nkhoyani mu mzinda, ku munthu muyakine, mukamuwuzye kuti, ‘Msambizyi walaŵila kuti, “Nsita yangu ili pafupi. Nizenilyele cisangalalo ca Pasaka na asambili ŵangu mu ngʼanda mwanu.”’” 19Asambili ecita ngani mweciŵawuzyila Yesu, nipo ewamya malyelelo ŵa Pasaka.
20Pekwefipa, Yesu na asambili ŵake kumi na aŵili enzokulya. 21Yesu eŵawuzya kuti, “Nulaŵila vyendi, yumo wa mwewo anitwale kwa alwani ŵangu.”
22Asambili ŵake enze na citinthi ngako notatika kukonsha yumo–yumo, “Kansi ni newo Asikulu?”
23Eyasuka kuti, “Watoŵela kwanja kwake mu mbale umu pamo na newo niye watiazeanitwale. 24Mwana wa Munthu akuyopayiwa kulingana na mwakulaŵilila Malembo pa va yeve. Koma ali na shamu munthu watiakatwale Mwana wa Munthu. Cenze ciweme kuti munthu woteti aliyovyalike.”
25Yudasi, enzokuyotwala Yesu, emukonsha kuti, “Kansi ni newo, Asambizyi?”
Yesu emuyasuka kuti, “Walaŵila weka.”
Cakulya cosilizya ca Asikulu
(Mk 14:22-26; Lk 22:15-20; 1Ak 11:23-25)
26Lomba penzokulya, Yesu etola mkate, notembezya Mulungu, nowusuna–suna noyaŵila asambili ŵake, nipo elaŵila kuti, “Aneni, lyani; uyu ni muŵili wangu.” 27Nipo etola nthumo, notembezya Mulungu noŵapa, nolaŵila kuti, “Mwamoni monse umu; 28uyu ni mlopa wangu wosimikizyila cipangano ca Mulungu, wotiliwila wonse kuti macimo ŵawo alekelelewe. 29Nukuwuzyani vyendi kuti nizamwelini soti vinyu kufwikila pa nsiku yatinizamwe namwe wa lomba mu Ufumu wa Atata.”
30Peciyimba nzimbo, efuma nakuya ku Lupili ya Olivi.
Yesu olaŵililatu kuti Petulo azeamukane
(Mk 14:27-31; Lk 22:31-34; Yh 13:36-38)
31 Pa vuli pake Yesu eŵawuzya asambili ŵake kuti, “Usiku wa lelo mwewo monse muniwutuke nonisiya neka. Pala Malembo olaŵila kuti,
‘Nipaye ciŵeta,
kuti mbelele zikamwazyike.’
32Koma nikazowukishiwa, nizenikutagulileni ku Galileya.”
33Petulo elaŵila kuti, “Cukanga wonse awutuke nokusiyani, newo nizekusiyenelini.”
34Yesu emuwuzya kuti, “Nukuwuzya vyendi kuti lelo, yamene na usiku wamene uno, kombwe akaliyolila, unikane katatu kuti uniziŵalini.”
35Koma Petulo eyasuka kuti, “Cukanga nikafwile namwe pamo, nikakukanenilini!” Asambili wonse elaŵila cimozi–mozi.
Yesu olomba mu Gesemani
(Mk 14:32-42; Lk 22:39-46)
36Yesu peciya nawo ku malo oyitiwa Gesemani, nipo elaŵila kwa asambili ŵake kuti, “Nkhalani pano, panikuya kwala kuyolomba.” 37Etola Petulo na ŵana aŵili ŵa Zebedayo, etatika kuŵa na citinthi notamana 38Eŵawuzya kuti, “Mu mtima mwangu muli citinthi ngako, cakufwa naco. Nkhalani pano, ŵani menso.”
39Peciya pa nthangu patontho, eliponesha pansi ca pa nganga nolomba kuti, “Atata, keno ni cozomelezyewa, iyi nthumo ya matamano inipitilile. Koma osati mu kupangwa kwangu, koma mu kupangwa kwanu.”
40Peciwelela kwa asambili efwana ali mtulo. Nipo ekonsha Petulo kuti, “Kansi wakangiwa kuŵa menso kwa kansita katontho? 41Ŵani menso mwewo, mwakulomba, kuti mungapone mu mayezyelo. Mtima upangwisisha, koma muŵili ni wovupa.”
42Soti ka ciŵili, eluta nolomba kuti, “Atata, iyi nthumo ya matamano inipitililelini mpaka niyimwe, kupangwa kwanu kucitiwe.” 43Peciwela soti eŵafwana ali mtulo, pakuti vikope vawo venze volema.
44Tetyo, eŵasiya soti, eluta kuyolomba ka citatu, kulaŵila malizu ŵamo na ŵamo. 45Pa vuli pake ewela kwa asambili noŵawuzya kuti, “Kansi mukalilele nopumula? Wonani, nsita yafwika. Mwana wa Munthu otwaliwa ku ŵanthu wocimwa. 46Ukani, tiyeni takuya. Wala wonitwala wafwika.”
Kutwaliwa nokatiwa kwa Yesu
(Mk 14:43-50; Lk 22:47-53; Yh 18:3-12)
47Yesu akalulaŵila teti, Yudasi, yumo wa asambili kumi na aŵili, ewela. Ewela na winji wa ŵanthu alutakule vingwandali na nkholi, efuma kwa Akulu ŵa Ansembe na Akulu ŵa Ayuda. 48Lomba wala wakuzomutwala enze eŵapa ciziŵikilo, cakuti, “Watinikafyomfyone niye watimukakate.” 49Lomba Yudasi eyingofwikila pa Yesu elaŵila kuti, “Moni asambizyi!” Nipo emumfyomfyona.
50Yesu emuwuzya kuti, “Muyangu, cita cawawelela.”
Pamene apo ewela nomukata Yesu. 51Yumo mwa ŵala enze na Yesu esolola cingwandali cake, notenda kwatu ya nyanchito wa Mkulu wa Ansembe wonse. 52Koma Yesu emuwuzya kuti, “Wezya cingwandali mu malo mwake. Pakuti wonse oseŵenzesha cingwandali, azeafwe na cingwandali. 53Kansi uyesa kuti newo ningasengelini Atata, nipo ŵeve pa nsita yamene iyo anganitumizyile winji wa ankhondo ŵa angelo wopula kumi na aŵili? 54Nga lomba cingaŵe tyani kuti Malembo akwanilishiwe, kuti ciŵe tetyo?”
55Pamene apo Yesu eŵakonsha kuti, “Ni cinji mwawela na mikondo na nkholi kuzokata newo ngani mukuyokata nyankapondo? Nsiku zonse nenzokuŵa mu Ngʼanda ya Mulungu, koma muliyonikate. 56Koma vonse ivi vacitika kuti Malembo ŵa aneneli akwanilishiwe.”
Pamene apo asambili ŵake wonse ŵala ewutuka, nomusiya yeka.
Yesu kwa Kayafa
(Mk 14:53-65; Lk 22:54-56,63-71; Yh 18:12-14,19-24)
57Lomba ŵala ekata Yesu nomutwala kwa Kayafa, Mkulu wa Ansembe wonse, kwiwungana Asambizyi ŵa Matetulo na Akulu ŵa Ayuda. 58Koma Petulo enzomukonkha patali, kufwikila ku ngʼanda ya Mkulu wa Ansembe. Eloŵa mkati mwa mpanda nonkhala pamo na olonda kuti awone nsilizyilo.
59Lomba Akulu ŵa Ansembe na wonse ŵa mu Kaupo Kakulu ka Ayuda enzosakila umboni wa wenye kuti amupaye Yesu. 60Koma aliyowufwane, cukanga pewela mboni zinyinji za wenye. Posilizyila aŵili ewela 61nolaŵila kuti, “Uyu munthu elaŵila kuti, ‘Newo nutwesha kuceneka Ngʼanda ya Mulungu, noyimanga soti mu masiku atatu.’”
62Tetyo, Mkulu wa Ansembe wonse epanama nipo ekonsha Yesu kuti, “Kansi uliye coyasuka? Ni vinji aŵa ŵanthu vakukulaŵilila?” 63Koma Yesu eciŵa celele. Mkulu wa Ansembe elaŵila soti kuti, “Nukuwuzya, mu zina ya Mulungu wa moyo, tiwuzye keno niwe Mesiya Mpulumushi Wolayizyiwa wala, Mwana wa Mulungu.”
64Yesu eyasuka kuti, “Mwalaŵila tetyo. Koma nukuwuzyani, kufuma lomba muwone Mwana wa Munthu ali nkhezi ku kwanja kwendi kwa Mulungu wa mphamvu, akuza mu mikumbi.”
65Pamene apo Mkulu wa Ansembe engʼamba vovwala vake nipo elaŵila kuti, “Walaŵila malizu wotafulila. Kansi tingapangwe soti umboni wotyani? Mwazimvwila mweka mitafu yake. 66Upinguzi wanu ukuti tyani?”
Kaupo konse keyasuka kuti, “Owamila kufwa.”
67Pamene apo emutila mata pa menso nomunyata, 68nomukonsha kuti, “Nenela, wewo Kristu! Ni ŵani wakunyata?”
Petulo okana Yesu
(Mk 14:66-72; Lk 22:56-62; Yh 18:15-18,25-27)
69Lomba Petulo enze nkhezi panja pa luŵanza. Nyanchito msimbi ewela kwake nolaŵila kuti, “Namwe soti mwenze na Yesu wa ku Galileya.”
70Koma Petulo ekana pa menso pa wonse nolaŵila kuti, “Nuziŵalini vamulaŵila.”
71Peciya kunja ku mulyango, nyanchito msimbi muyakine emuwona, nipo elaŵila kwa ŵala enze peneme kuti, “Uyu munthu enze na Yesu wa ku Nazaleti wala.”
72Nipo Petulo ekana soti molapila, “Numuziŵalini uyu munthu.”
73Pepepita kansita katontho ŵala enze peneme ewela nolaŵila kwa Petulo kuti, “Mwewo soti nimwe ŵamo wa aŵa, cikomo ca malaŵililo ŵanu.”
74Etatika kulishamika nolapila kuti, “Numuziŵalini uyu munthu.”
Pamene apo, kombwe elila. 75Petulo ekumbuka malizu ŵa Yesu ŵakuti, “Kombwe akaliyolila, unikane katatu.” Efuma panja nolila ngako.
Currently Selected:
Mat 26: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
