Mat 25
25
Linganizyo ya asimbi kumi
1“Pa nsita iyo, Ufumu wa Kululu ukalinganizyiwe ngani asimbi kumi etola nyale zawo nakuyocinguzyila wolungula. 2Asanu enze wopusa, nipo asanu enze wocenjela. 3Pakuti ŵala wopusa eyingotola nyale zawo, aliyotole mafuta ayakine ŵa pa mbali, 4koma asanu wocenjela ŵala, etola mafuta ayakine pa mbali mu nsupa zawo. 5Pakuti wolungula ecelwa, wonse ŵala etatika kukusila, nolala tulo.
6“Lomba pakati pa usiku kwimvwika kuŵilikizya kuti, ‘Wolungula wawela! Fumani mukumane naye.’ 7Tetyo, wonse ŵala asimbi ewuka notatika kuwamya nyale zawo zala.
8“Lomba wopusa elaŵila ku wocenjela kuti, ‘Tipenkoni mafuta, wonani nyale zasu zuzima.’
9“Koma wocenjela ŵala eyasuka kuti, ‘Nkhoyani ku wositisha mukalisitile mweka ŵanu, pakuti akwanilelini kwa mwewo na kwa sewo.’ 10Peciyosita, wolungula ewela, ŵala enze wokonzeka eloŵa naye mu malyelelo ŵa ukwati, nipo ku mulyango kwivaliwa.
11“Pa vuli pake asimbi ŵala wopusa ewela, nosenga kuti, ‘Asikulu, asikulu, tivulilenkoni.’
12“Koma eŵayasuka kuti, ‘Nukuwuzyani vyendi, nukuziŵanilini.’”
13Posilizyila Yesu elaŵila kuti, “Tetyo, ŵani menso, pakuti muziŵalini nsiku keno nsita.”
Linganizyo ya anyanchito atatu
(Lk 19:11-27)
14“Ufumu wa Kululu ungalinganizyiwe ngani munthu akuya pa ulwendo, eyita anyanchito ŵake noŵasiyila cuma cake. 15Yumo emupa matumba ŵa ndalama asanu, muyakine aŵili, muyakine imo, aliyense emupa kulingana na mwalili. Nipo eluta. 16Wala epokela matumba asanu eluta nakuyocita malonda nawo, nipo efwana matumba ŵa ndalama asanu ayakine. 17Na wala soti enze na matumba aŵili efwana soti aŵili ayakine. 18Koma wala enze epokela thumba imo eluta nokumba pansi nofisa ndalama za asikulu ŵake.
19“Pepepita nsita itali asikulu wa ŵala anyanchito ewela kuti amvwe mweciseŵenzeshela ndalama zala. 20Nyanchito wala enze epokela matumba asanu, ewela noleta matumba asanu ayakine, elaŵila kuti, ‘Asikulu, mwinipa newo matumba ŵa ndalama asanu. Wonani nepangilapo asanu ayakine.’
21“Asikulu ŵake elaŵila kuti kwa yeve, ‘Wicita luweme niwe nyanchito muweme na wocetekeleka. Waŵa wocetekeleka pa vinthu vitontho; nikuyike kuti uwololesha pa vinthu vinyinji. Wela uzesangalale pamo na newo, asikulu ŵako.’
22“Nipo naye soti enze na matumba aŵili ewela pa nthangu, elaŵila kuti, ‘Asikulu, mwinipa newo matumba aŵili. Wonani nepangilapo aŵili ayakine.’
23“Asikulu ŵake elaŵila kuti kwa yeve ‘Waseŵenza luweme, wewo nyanchito muweme na wocetekeleka. Waŵa wocetekeleka pa vinthu vitontho nikupe ulamulilo pa vinthu vinyinji. Wela uzesangalale pamo na newo, asikulu ŵako.’
24“Wala soti epokela thumba imo ewela pa nthangu, nolaŵila kuti, ‘Asikulu, nikuziŵani kuŵa munthu mukali, kuwezya kwamuliyokomole, nipo nowunjika kwamuliyomwazye mbuto. 25Tetyo niyopa, nipo niciyofisa pansi thumba ya ndalama yanu. Iyi lomba thumba yanu.’
26“Koma asikulu ŵake emuyasuka kuti, ‘Niwe nyanchito muyipa nipo wa ulesi! Kansi wiziŵa kuti nuwezya kwaniliyokomole nipo nuwunjika kwaniliyomwazye mbuto? 27Tetyo, sembe wiyika ndalama zangu kosungila ndalama, kuti powela kwangu sembe nipokela ndalama zangu na ciwongola kwanja cangu.’
28“Asikulu ŵala elamula kuti, ‘Mupokeni ndalama mupe wala ali na matumba kumi. 29Pakuti wala ali na vinthu, akamupelepo vinyinji viyakine, koma wala aliye kalikonse, akamupoke na katontho ka ali nako. 30Lomba, pozani nyanchito uyu aliye phindu kunja ku mfinzi. Ku malo ŵala kukaŵe kulila nokukuta menu.’”
Cipingulo cosilizya
31“Mwana wa Munthu patiakawele mu ulemelelo wake, na angelo ŵake, akaŵe pa mpando wake wa mcinzi. 32Pa menso pake pakawungane ŵanthu ŵa mitundu yonse, noŵapatula ngani ciŵeta mwakupatulila mbelele na mbuzi. 33Akayike mbelele ku kwanja kwake kwendi, koma mbuzi ku kwanja yake ya manzyele.
34“Lomba Mfumu ikawuzye ŵala ali ku kwanja kwake kwendi, ‘Welani mwewo woshukishiwa na Atata, muloŵe mu Ufumu wokonzewa na wa mwewo cikaliyolengewa calo. 35Pala nenze na njala, mwinipa cakulya. Nenze na njota, mwinipa cakumwa. Nenze mulwendo, mwinipokelela luweme. 36Nenze cinthaku, mwinivwalika. Nenze mulwele, mwinitandalila. Nenze mu jele, mwicizonitandalila.’
37“Koma wolungama akamuyasuke, kuti, ‘Asikulu, ni lini petimuwonani na njala nomulyeshani, keno na njota nomupani cakumwa? 38Ni lini pemwenze alwendo nomupokelani, keno cinthaku nomuvwalikani? 39Nipo ni lini patimuwonani mulwele keno mu jele nomutandalilani?’
40“Mfumu ikaŵayasuke, ‘Nulaŵilisha vyendi, keno mwemucitila yumo mtontho mwa aŵa enekwasu, mwicitila kwa newo.’
41“Pa vuli pake akalaŵile kuti kwa ŵala ali ku manzyele kwake, ‘Fumamponi pali newo, mwewo woshamikiwa, muloŵe mu mulilo wosasila weciwamyila Satana na angelo ŵake. 42Pakuti nenze na njala, muliyonipe cakulya. Nenze na njota, muliyonipe cakumwa. 43Nenze mulwendo, muliyonipokele. Nenze cinthaku, muliyonivwalike. Nenzolwala nipo nenze soti mu jele, koma muliyonitandalile.’
44“Pa vuli pake nawo soti akayasuke, kuti, ‘Asikulu, ni lini petemuwonani na njala, keno na njota, keno mulwendo, keno cinthaku, keno mulwele, keno mu jele, na kuti tiliyomutumikileni?’
45“Nipo akaŵayasuke, ‘Nulaŵila vyendi kwa mwewo, pamuliyocite na cimo kwa aŵa atontho, muliyocite kwa newo.’ 46Nipo aŵa akaye ku cilango cosasila, koma wolungama ku moyo wosasila.”
Currently Selected:
Mat 25: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
