Mat 19

Volekana mwanalume na mwanakazi

(Mk 10:1-12; Lk 16:18)

1Yesu pecisilizya kulaŵila ivi, efumako ku Galileya noloŵa mu Yudeya kutauka Yolodani. 2Winji wimukonkha, nipo eŵapozya kwamene kwala.

3Afalisi ayakine ewela nomukonsha momuyezya kuti, “Ni cozomelezyewa kuleka mwanakazi pa cikomo ciliconse?”

4 Yesu eyasuka kuti, “Muliyoŵelenge kuti Nyamalenga potatika ‘elenga ŵanthu aŵili mwanakazi na mwanalume,’ 5 nolaŵila kuti, ‘Ni cikomo cake mwanalume akosiya awisi na anyina na kuyolumikizyana na mkazi wake, nipo aŵili aŵa akuŵa muŵili umo.’ 6Tetyo, alilini aŵili koma yumo. Lomba vonse Mulungu vecilundika pamo, munthu asavipatule.”

7Afalisi emukonsha kuti, “Nga Mose elaŵililanji kuti akokupa cikalata colekana nomuŵinga?”

8Yesu eyasuka kuti, “Cikomo ca mitima yanu iyumu, Mose ekuzomelezyani kuti muleke anakazi ŵanu. Koma kufuma potatika cenzelini teti. 9Nipo nukuwuzyani kuti aliyense oleka mkazi wake, osati cikomo ca ucende, nolungula muyake, ocita ucende.”

10Asambili emuwuzya kuti, “Keno vili tetyo pakati pa mwanalume na mkazi wake, ni ciweme kusalungula.”

11Yesu eŵawuzya kuti, “Ni aliyenselini angapokele ici, koma tyala ŵala opewa. 12Pakuti pali vikomo vosiyana vangalungulilelini: ayakine evyalika tetyo, ayakine epangiwa na ŵanthu, nipo ayakine olungulalini cikomo ca Ufumu wa Kululu. Aliyense angamvwishe acite tetyo.”

Yesu oshukisha ŵana atontho

(Mk 10:13-16; Lk 18:15-17)

13Ŵanthu ayakine eleta ŵana kwa Yesu kuti aŵasinthilile manja pa mitu noŵalombela, koma asambili eŵazazila. 14Yesu eŵawuzya kuti, “Ŵalekeni ŵana awele kwa newo musaŵaleshe, pakuti Ufumu wa Kululu ni wa woteti.” 15Nipo esinthilila manja ŵake pa tuŵana nofumako.

Mulumbwana wolemela

(Mk 10:17-31; Lk 18:18-30)

16Mulumbwana muyakine ewela kwa Yesu nolaŵila kuti, “Asambizyi, nicite viweme votyani kuti niŵe na moyo wosasila?”

17Yesu emuyasuka kuti, “Unikonshela vinji va viweme? Pali tyala yumo muweme. Keno upangwa kuyoloŵa ku moyo wosasila, sunga Matetulo.”

18 Ekonsha kuti, “Matetulo wotyani?”

Yesu eyasuka kuti, “‘Osapaya, osacita ucende, osayiŵa, osacita umboni wa wenye, 19cinzika auso na anyoko,’ nipo ‘ukotemwa muyako ngani mwaulitemwela wemwine.’”

20Mulumbwana wala elaŵila kuti, “Vonse ivi nevisunga. Ni cinji casalapo canisaziŵa?”

21Yesu emuwuzya kuti, “Keno upangwa kuŵa luweme ngako, nkhoya, ukasitishe vonse va uli navo, ukape wotamana, ukaŵe na cuma Kululu, nipo uzenikonkhe.”

22Koma pecimvwa ivi wala mulumbwana eluta na citinthi, pakuti enze wolemela ngako.

23Yesu ewuzya asambili ŵake, “Nukuwuzyani vyendi kuti ni motamanila kuti munthu wolemela akaloŵe mu Ufumu wa Kululu. 24Nukuwuzyani soti kuti ni cipepu kuti ngamila ikapite pa kacibowo ka nsingano, kupula munthu wolemela kuti akaloŵe mu Ufumu wa Mulungu.”

25Pecimvwa ivi asambili ekanganishiwa nokonshana kuti, “Nga watiakapulumuke ni ŵani?”

26Yesu eŵalolesha nolaŵila kuti, “Ici ni cotamanisha ku munthu, koma kwa Mulungu vinthu vonse ni votwesheka.”

27Petulo emuyasuka kuti, “Onani, tasiya vonse nokukonkhani. Nga sewo tikaŵe na vinji?”

28Yesu eŵawuzya kuti, “Nukuwuzyani vyendi kuti mu calo ca lomba, Mwana wa Munthu patiakaŵe pa mpando wake wa cifumu, monse mukonkha newo mukaŵe pa mipando ya cifumu kumi na iŵili, kupingula mikoka kumi na iŵili ya Isilayeli. 29Nipo aliyense esiya ngʼanda, keno enekwawo na azilongosi, keno awisi na anyina, keno ŵana, keno minda cikomo ca newo, akapokele vinyinji, nipo soti moyo wosasila. 30Anyinji ali wotatikila lomba akaŵe osililila, nipo ali wosililila akaŵe otatikila.”

Currently Selected:

Mat 19: GMN

Highlight

Copy