Mat 13

Linganizyo ya womwazya mbuto

(Mk 4:1-9; Lk 8:4-8)

1Nsiku yamene iyo, Yesu efuma mu ngʼanda nakuyonkhala ku mbali kwa cimmana. 2Winji wa ŵanthu wewungana nomuzunguluka, tetyo eloŵa mu wato nonkhala pansi, nipo winji wala wepanama pa silya pa cimmana. 3Yesu eŵawuzya vinthu vinyinji mu malinganizyo.

Elaŵila kuti, “Munthu muyakine eluta kuyomwazya mbuto. 4Pecimwazya mbuto mu munda mwake, ziyakine ziponela mu mseu, nipo tunyoni twiwela nakulya. 5Ziyakine ziponela pa myala penzeve lito inyinji. Mbuto zala zimela mmangu cikomo ca lito itontho. 6Koma peyiwela zuŵa, tumumela twala twicipya cikomo cakuti mizyu iliyoloŵe pansi ngako nipo twiyuma. 7Mbuto ziyakine ziponela pa minga, ikula noceneka tumbuto twala. 8Ziyakine ziponela pa lito iweme notwala vitwalo, ziyakine makumi kumi (100), ziyakine makumi asanu na imo (60), ziyakine makumi atatu (30). 9Ali na matu, amvwishishe.”

Cilingo ca linganizyo

(Mk 4:10-12; Lk 8:9-10)

10Pa vuli pake, asambili ŵake emukonsha kuti, “Cikomo ni cinji aŵa ŵanthu muŵalaŵizya mu malinganizyo?”

11Yesu eŵayasuka kuti, “Mwewo Mulungu wakuziŵishani visinsi vonse va Ufumu wa Kululu, koma kwa ŵeve kuliyopewe. 12Pakuti wala ali na vinthu, akamupelepo viyakine, koma wala aliye kalikonse, akamupoke na katontho ka ali nako. 13Niye cikomo cake nulaŵila nawo mu malinganizyo, pakuti kulolesha ololeshalini, kumvwa akumvwalini cukanga kumvwishisha omvwishishalini. 14#Ysa 6:9,10 Nipo mwa ŵeve vinenelo va Mneneli Yesaya vukwanilishika vakuti:

‘Mukokumvwa koma osamvwishisha,

nipo mukololesha koma osawona.

15Cendi mtima wa ŵanthu ŵa mtundu uyu wafunala,

ŵasinkha matu ŵawo,

nipo ŵavala menso ŵawo,

Kuyopa kuti angawone na menso ŵawo,

nipo angamvwe na matu ŵawo,

angamvwishe na mtima wawo,

Noyaluka mwa newo kuti niŵapozye.’

16“Koma ni woshukishiwa menso ŵanu owona na matu ŵanu akumvwa. 17Nukuwuzyani vyendi kuti aneneli anyinji na ŵanthu olungama enzopangwishisha kuwona vamuwona, koma aliyoviwone ŵeve; enzopangwishisha kumvwa vamukumvwa, koma aliyovimvwe.”

Tanthauzo ya linganizyo ya womwazya mbuto

(Mk 4:13-20; Lk 8:11-15)

18“Mvwani lomba tanthauzo ya linganizyo ya womwazya mbuto: 19Aliyense akamvwa malizu ŵa Ufumu koma osaŵamvwishisha, Muyipa wala akuza nofumyapo vokomolewa mu mtima mwawo. Ivi niye vomwazyiwa mu mseu. 20Nipo vomwazyiwa pa myala ni wala akumvwa malizu nosangalala ngako pamene apo, 21koma aliye mizyu mwa yeve, oyingonkhala patontho. Nipo matamano na manzunzo akaza cikomo ca malizu, munthu wala otaya cicetekelo. 22Mbuto zenzoponela pa minga, aŵa ni ŵala akumvwa Malizu, koma otangwanishiwa na va pa calo, kutemwa cuma noluŵako Malizu ŵala, tetyo osatwala vitwalo. 23Mbuto zomwazyiwa pa lito iweme ni ŵala akumvwa malizu noŵamvwishisha. Otwala vitwalo, makumi kumi (100), payakine makumi asanu na imo (60) payakine makumi atatu (30).”

Linganizyo ya namsongole na tiligu

24Yesu eŵawuzya linganizyo iyakine, elaŵila kuti, “Ufumu wa Kululu tingaulinganizye na munthu okomola mbuto ziweme mu munda mwake. 25Anyanchito ŵake peenze lele, mulwani wake ewela nokomolamo namsongole pakati pa tiligu nofumako. 26Mbuto zala pezekula notwala vitwalo, namsongole ewonekela. 27Tetyo anyanchito eciyowuzya asikulu wawo kuti, ‘Asikulu, kansi muliyokomolemo mbuto iweme mu munda mwanu? Nga muli tyani namsongole?’

28“Yeve eŵayasuka kuti, ‘Mulwani niye wacita tetyo.’

“Anyanchito elaŵila soti kuti, ‘Tilute tikavifumyemo?’

29“Koma yeve eyasuka kuti, ‘Yayi, popangwa kunyula namsongole, munyulile pamo na tiligu. 30Vilekeni vikulile pamo mpaka nsita yowezya, nipo nikawuzye owezya kuti awunjike namsongole nomanga pamo kuti awushoke, koma akawunjike tiligu mu cimphaka cangu.’”

Linganizyo ya kambuto katontho ngako

(Mk 4:30-32; Lk 13:18-19)

31Yesu eŵawuzya soti linganizyo iyakine, elaŵila kuti, “Ufumu wa Kululu tingaulinganizye na kambuto katontho kecikomola munthu mu munda mwake. 32Ni kambuto katontho ngako pa mbuto zonse, koma kakakomolewa kokula ngako kupula va mu munda vonse nipo kokuŵa cimuti, nipo tunyoni twa mululu tuwela nopangamo tuvumbo mu misambo yake.”

33Eŵawuzya soti linganizyo iyake yakuti, “Ufumu wa Kululu uli soti ngani cofufumishila mkate, ceciyavizya na unga unyinji wokwanila miyeso itatu mwanakazi muyakine, mpaka mkate wonse wifufumila.”

34Yesu elaŵila vonse ivi mu malinganizyo kuwuzya ŵanthu; aliyolaŵile kalikonse osaseŵenzesha linganizyo. 35#Ms 78:2 Ivi venzokwanilisha vecilaŵila mneneli Yesaya kuti,

“Nikalaŵile nawo mu malinganizyo;

nikawulule venze vofisika kufuma pecilengewa calo ca pansi.”

Olaŵila tanthauzo ya linganizyo ya namsongole na tiligu

36Pa vuli pake Yesu esiya winji wala, nakuyoloŵa mu ngʼanda. Asambili ŵake emusenga kuti, “Titanthauzileni linganizyo ya namsongole wa mu munda.”

37Yesu eyasuka kuti, “Okomola mbuto iweme ni Mwana wa Munthu. 38Munda ni calo ca pansi, nipo mbuto iweme ni ŵana ŵa Ufumu wa Kululu. Namsongole ni ŵana ŵa Muyipa wala, 39nipo mulwani eŵakomola ni Satana. Nsita yowezya ni posilizyila pa calo, nipo owezya ni angelo.

40“Ngani mwakuwunjikila namsongole nowushoka na mulilo, niye mwaticikaŵele pa kusila kwa calo. 41Mwana wa Munthu akatume angelo, nipo akawunjike kunja kwa Ufumu wake vonse vucimwisha na wonse ofwaya Matetulo, 42noŵapoza mu ngʼanjo ya mulilo. Ku malo ŵala kukaŵe kulila nokukuta menu. 43Apo wolungama akaŵale ngani zuŵa mu Ufumu wa Awusu wawo. Ali na matu, amvwishishe.”

Linganizyo ya cuma cofisika

44“Ufumu wa Kululu uli ngani cuma cofisika mu munda, cakuti munthu muyakine akacikumba ocifisa soti. Nipo na cisangalalo cake, oluta nositisha vonse va ali navo nosita munda wala.

45“Ufumu wa Kululu uli soti ngani wa malonda opangwa viweme vodula. 46Nipo pecivifwana ivi, eciyositisha vonse venze navo nogula vodula ivi.”

Linganizyo ya kombe

47“Ufumu wa Kululu uli soti ngani kombe yepozewa pa cimmana nokata masaŵi osiyana–siyana. 48Nipo peyizula, ŵanthu eyidonsela ku silya nosalula masaŵi. Aweme eŵayika mu ciya, nipo ayipa eŵataya. 49Tetyo, ni pa kusila kwa calo, angelo patiakawele kuzopatula ŵanthu ayipa pa ŵanthu wolungama, 50noŵataya mu ngʼanjo ya mulilo. Ku malo ŵala kukaŵe kulila nokukuta menu.”

Cuma ca kale na ca lomba

51Yesu eŵakonsha kuti, “Mwamvwishisha vonse ivi?”

Nipo asambili ŵake eyasuka kuti, “Eee.”

52Eŵawuzya kuti, “Msambizyi aliyense wasambizyiwa va Ufumu wa Kululu ali ngani asikulu ŵa ngʼanda, oleta vinthu va lomba na va kale kufuma mu cuma cake.”

Yesu okaniwa ku Nazaleti

53Yesu pecisilizya kulaŵila va malinganizyo efumako kwala. 54Pecifwika ku citwa ca kwawo, etatika kusambizya ŵanthu mu kacisi wa Ayuda. Ŵala enzokumvwa ekanganishiwa nolaŵila kuti, “Kansi ezitola kuni nzelu izi na mphamvu? 55Kansi uyu ni mwanalini wa mmisili? Anyina ni Maliyalini? Nipo enekwawo ni Yakobe na Yosefe na Simoni na Yudalini? 56Azilongosi ŵake wonse alilini na sewo? Evifumya kuni vonse ivi?” 57Tetyo emukana#13:57 Tetyo emukana Keno kulaŵila kuti, Tetyo etaya cicetekelo mwa yeve..

Koma Yesu eŵawuzya kuti, “Mneneli opewa mcinzi kulikonse kwangalute, koma okaniwa na ŵa ku munzi kwawo na ŵa ku banja yake.” 58Nipo aliyocite vokanganisha vinyinji kwala, cikomo ca kusacetekela kwawo.

Currently Selected:

Mat 13: GMN

Highlight

Copy