Luka 12

Yesu ocenjezya va cinyengo

1Nsita yamene iyo umba ya ŵanthu myanda na myanda peciwungana pamo, kotetyo kuti ŵanthu ŵala enzoyingokandana, Yesu etatika kulaŵila na asambili ŵake potatika, elaŵila kuti, “Nkhalani celu na cofufumishila mkate ca Afalisi, cili cinyengo. 2Pala cinthu ciliconse cofisika cizeciwululike, nipo va cisinsi vizeviziŵike. 3Ni cikomo cake vonse vamwalaŵila mu mfinzi, vizevimvwike patuŵa, nipo vonse vamwaŵeleŵesha ŵanthu mkati mwa ngʼanda, vizeviwoneshewe patuŵa.”

Wowamila kumuyopa

(Mt 10:28-31)

4“Nukuwuzyani mwewo, wotemweka ŵangu, kuti osayopa ŵanthu angapaye muŵili weka, pa vuli pake paliye ciyakine cangacite. 5Koma nikucenjezyeni: wamuwamila kuyopa ni Mulungu. Yeve akatola moyo wa munthu, ali nazo soti mphamvu zomupoza ku malo ŵa cilango. Ni cendi ni wamene uyo wamuwamila kuyopa.

6“Kansi anyankalemya asanu ni wositiwalini pa tundalama tuŵili? Cukanga kamo koluŵikalini pa menso pa Mulungu. 7Nipo na sisi yanu eyiŵelenga yonse. Tetyo, osati mwakuyopa yayi. Mwewo nimwe ŵa mtengo ngako kupula tunyoni tunyinji.”

Kuzomelezya Kristu pa menso pa ŵanthu

(Mt 10:32-33; 12:32; 10:19-20)

8“Kulaŵila vyendi, aliyense wonizomelezya pa menso pa ŵanthu, Mwana wa Munthu naye soti azeamuzomelezye pa menso pa angelo ŵa Mulungu. 9Koma wala onikana pa menso pa ŵanthu, akakaniwe pa menso pa angelo ŵa Mulungu.

10“Aliyense olaŵila lizu yosushana na Mwana wa Munthu, Mulungu azeamulekelele, koma wotafulila Mzimu Mtuŵa na malizu ŵa msikila, Mulungu azeamulekelelelini.

11“Akazokutwalani ku milandu ku kacisi ŵa Ayuda, keno ku mafumu nipo soti kwa akulu ŵa boma, osaŵa na nkhawa kuti, ‘Kaya niyasuke tyani? Nikalaŵile vinji?’ 12Pakuti Mzimu Mtuŵa azeakuziŵisheni pa nsita yamene iyo vamuwamila kulaŵila.”

Linganizyo ya munthu wolemela wopusa

13Munthu muyakine pa winji wa ŵanthu wonse ŵala esenga Yesu kuti, “Asambizyi, nkhoyani mukaniwuzyileko mkwasu kuti aniyaŵileko ndalama zecisiya atata pecifwa.”

14Koma Yesu elaŵila kuti, “Wewo munthu, ni ŵani enipa nchito yokupingulani keno yokugaŵilani ndalama za nchete?” 15Pecicita tetyo ewuzya ŵala ŵanthu kuti, “Nkhalani na celu, nipo mupewe kutemwa kuŵa na cuma cinyinji. Pakuti moyo wanu wa vyendi, ulupangiwelini na vinthu va muli navo, cukanga nimwe wolemela tyani.”

16Tetyo, Yesu eŵawuzya linganizyo. Elaŵila kuti, “Penze munthu wolemela mu munda mwake mwitwala vinthu vinyinji. 17Niye yeve wala etatika kulingilila kuti, ‘Nicite tyani pakuti niliye mosungila vakulya vangu vanawezya?’

18“Tetyo, elaŵila kuti, ‘Nicite teti: nipasule vimphaka vangu nomanga viyakine vikulu, nipo nizenisungile vanawezya vangu vonse na cuma cangu mwamene umu.’ 19Nipo niwuzye mtima wangu kuti, ‘Lomba nili na cuma cinyinji cawanipa Mulungu cikwanile vyaka vinyinji. Upumule, wakulya, wakumwa nosangalala.’

20“Koma Mulungu emuwuzya kuti, ‘Wewo wopusa! Usiku wamene uno nikupoke moyo wako. Nga vonse ivi vawavisunga vizeviŵe va ŵani?’

21“Vutetyo na munthu oziwunjikila cuma, koma ni wa cumalini pa menso pa Mulungu.”

Osacita nkhawa

(Mt 6:25-34)

22Yesu ewuzya asambili ŵake kuti, “Ni cikomo cake nukuwuzyani osacitila nkhawa moyo wanu, kuti mulyenji, keno muŵili wanu, kuti muvwalenji. 23Pakuti moyo upula cakulya, nipo muŵili upula vovwala. 24Wonani vikwalala, vukomolalini, keno kuwezya viliye vimphaka mosungilamo vakulya, koma Mulungu ovilyesha. Ngako–ngako mwewo muvipula kutali vinyoni ivo. 25Ni ŵani mwa mwewo na malingililo ankhawa angatweshe kuyangizyila cukanga nsiku imo pa umoyo wake? 26Lomba keno mungatweshelini kucita kanthu katontho koteti, ni cikomo canji mucita nkhawa pa vinthu viyakine voteti?

27“Wonani maluŵa mwakukulila. Oseŵenzalini, keno kusoka nyula, koma nukuwuzyani, cukanga mfumu Solomoni wamene, mu ulemelelo wake wonse, enzovwalalini iweme kulingana na imo yeka ya maluŵa aŵa. 28Koma keno Mulungu ovwalika uzu wa ku sanga uli na moyo lelo yeka, nipo mailo ukapozewe mu mulilo, kansi mwewo angalekelenji kukuvwalikani? Muli na cicetekelo citontho! 29Ni cikomo cake osacita nkhawa nosakila vakuti mulye, keno vakuti mumwe. 30Pakuti ŵa kunja osakila vonse ivi vinthu, nipo Awusu wanu woziŵa kuti muvipangwa. 31Tetyo, sakilani Ufumu wake, nipo ivi vikayikiliwepo pa mwewo.”

Cuma ca Kululu

(Mt 6:19-21)

32“Mwewo mbelele zangu, cukanga muli atontho, osayopa, pakuti kwiwamila Awusu wanu kuti akupeni Ufumu wake. 33Sitishani vonse va muli navo, nipo ndalama zake mupe wozingwa. Zipeni matumba ŵa ndalama ŵamene ni wosatulika, noziwunjikila cuma cosasila Kululu; kwamene akawalala angafwikekolini, nipo muswe ungacenekelini. 34Pakuti kuli cuma cako, mtima wako soti ukuŵa kwamene uko.”

Kutumikila kwa anyanchito akuŵa menso

35“Ŵani okonzeka kutumikila, nipo nyale zanu ziŵe zoyaka. 36Nkhalani ngani anyanchito olindila asikulu ŵawo wofuma ku malyelelo ŵa ukwati kuti pati afwike nokonkhosha, ŵeve amuvulile mmangu. 37Ni woshukishiwa anyanchito ŵamene asikulu ŵawo pofwika, aŵafwane ali menso. Ni cendi nulaŵilisha kuti asikulu azealikonzekele, na kuzoŵankhazika polyela, nipo akawele na kuzoŵatumikila. 38Ni woshukishiwa anyanchito ŵala asikulu ŵawo akazoŵafwana ali tetyo patiakafwike, cukanga pakati pa usiku keno mu matemwakuca.

39“Koma ziŵani kuti, mwine wa ngʼanda kuti enzeeziŵilatu nsita yofwikilamo kawalala, sembe aliyozomezye kuti atyole ngʼanda yake. 40Namwe ŵani wokonzeka, pakuti Mwana wa Munthu akawele pa nsita yatimukomulindilalini.”

Nyanchito wocetekeleka na muyakine wosacetekeleka

(Mt 24:45-51)

41Pamene apo Petulo elaŵila kuti, “Asikulu, kansi linganizyo iyi muwuzya sewo seka, keno muwuzya wonse?”

42Asikulu elaŵila kuti, “Ŵani ngani kapitawo wocetekeleka na wa nzelu, asikulu ŵake azeamuyike kuti azololesha wonse ŵa mu ngʼanda mwake, noŵayaŵila cakulya cawo pa nsita yake. 43Ni woshukishiwa nyanchito wamene uyo, keno asikulu pofwika azeamfwane ocita ivo. 44Nulaŵila vyendi kuti azeamuyike wololesha cuma cake conse.

45“Koma keno nyanchito, mu mtima mwake akolaŵila kuti, ‘Asikulu ŵangu acelwa kuwela.’ Niye akatatike kunyata anyanchito ayake, analume na anakazi, nipo soti nakulya, na kumwa nokolwa. 46Tetyo, asikulu ŵake akawele pa nsiku patiakomulindilalini na pa nsita yasaziŵa. Azeamusangʼanthe nomutaya ku malo ŵa ŵanthu osacetekeleka.

47“Nyanchito oziŵa vakupangwa asikulu ŵake, koma osakonzekela kuvicita, azeamkwapule ngako. 48Koma nyanchito oziŵalini vakupangwa asikulu ŵake koma ocita vowamila kumulanga navo, azeamkwapule patontho. Aliyense epokela vinyinji, owamila kuwezya vinyinji. Nipo esungizyiwa vinyinji, azeamuwuzye kuwezya vinyinji vopula.”

Kupatukana kwa ŵanthu cikomo ca Yesu

(Mt 10:34-36)

49“Niwela kuzopoza mulilo pa calo ca pansi, nipo ningaŵe wosangalala kuti wiyaka kale. 50Koma nuwamila kutatika naloŵa mu ubatizo wa manzunzo akulu, nipo mtima wangu unkhazikikelini mpaka vikacitike. 51Kansi muyesa kuti nawela kuzoleta mtendele pa calo? Yayi, kulaŵila vyendi, osati mtendele koma kupatukana. 52Kutatika lomba mu banja imo muzemuŵe ŵanthu asanu opatukana, atatu azeakangane na aŵili, nipo aŵili azeakangane na atatu. 53Wisi azeakangane na mwana wake mwanalume, mwana mwanalume azeakangane na awisi. Anyina azeakangane na mwana wawo mwanakazi, mwana mwanakazi azeakangane na anyina. Anyavyala azeakangane na mwanakazi wa mwana wawo, nipo mwanakazi wala azeakangane na anyavyala ŵake ŵala.”

Kuziŵa va nsita

(Mt 16:2-3)

54Yesu ewuzya ŵanthu ŵala wonse kuti, “Mukawona mkumbi ukwela ku mcingulo, pamene apo mukuti, ‘Mvula ikuza.’ Nipo yuwela cendi. 55Mphepo ya ku mmwela ikatatika kukuntha, mukuti, ‘Kukupye.’ Nipo kukupya cendi. 56Mwewo wolipazya, mutwesha kuziŵa mawonekelo ŵa calo ca pansi na kululu, ni cikomo canji muziŵalini tanthauzo ya va lomba?”

Kuyanjana na muyako wa mlandu

(Mt 5:25-26)

57“Cikomo ni cinji musimikizyalini mweka vowamila kucita? 58Ngani pawukuya na muyako wa mlandu ku wopingula, uyesesha kuwamya mlandu pa ukali pa njila, kuyopa kuti angakutwale ku wopingula, nipo wopingula wala angakutwale kwa msilikali, nipo msilikali wala angakupoze mu jele. 59Nukuwuzyani kuti mukafumemolini mpaka mukalipile vonse vosalako.”

Currently Selected:

Luka 12: GMN

Highlight

Copy