Luka 1
1
1Ateyofilo wocinzikiwa, ŵanthu anyinji eyesa kuyika pamo mbili ya vinthu vicitika pakati pasu. 2Ŵala ewona vonse potatikila, na kuti enze otumikila Malizu, etiwuzya veciwona na menso ŵawo. 3Tetyo, pakuti nane nakonkholola ngako vonse vicitika kufuma potatika, nalingilila kuti ni ciweme nikulembeleni vamene ivo mwa mndandanda. 4Nacita teti kuti muziŵe cendi kuti vecikusambizyani ni vyendi.
Mngelo olaŵililatu va kuvyalika kwa Yohane Mbatizi
5Pa nsita Helode peenze mfumu ya calo ca Yudeya, kwenze wansembe muyakine zina yake Zakaliya, wa umba ya ansembe ya Abiya. Mkazi wake Elizabeti enze wa banja ya Aloni. 6Aŵa wonse aŵili enze ŵanthu wolungama pa menso pa Mulungu, nipo enzokonkha mwa cicetekelo Matetulo na malangizyo wonse ŵa Asikulu. 7Enzeve mwana, cikomo cakuti Elizabeti enze cumba, nipo wonse aŵili enze akulukazi.
8Nsiku iyakine, wansembe Zakaliya enzokata nchito yake ya unsembe pa menso pa Mulungu. 9Kulingana na mwambo wawo wa ansembe, Zakaliya esaluliwa na mayele kuloŵa mu ngʼanda ya Asikulu kuyoshoka lubani. 10Umba yonse ya ŵanthu yenzolombela kunja pa nsita yoshoka lubani.
11Lomba mngelo wa Asikulu, ewonekela kwa Zakaliya. Mngelo wala epanama ku kwanja kwendi kwa guwa yoshokelapo lubani. 12Zakaliya ezizimuka pomuwona, nocita wowa. 13Koma mngelo wala emuwuzya kuti “Usayope, Zakaliya, Mulungu wamvwa lombelo yako. Mkazi wako Elizabeti azeakuvyalile mwana mwanalume, nipo uzeumteye zina yakuti Yohane. 14Uzeukondwele nosekelela, ŵanthu anyinji soti azeasangalale cikomo covyalika kwake, 15pakuti yeve azeaŵe mkulu pa menso pa Asikulu. Awokumwalini vinyu keno cokolwesha ciliconse, nipo aŵe wozuzyiwa na Mzimu Mtuŵa cukanga pa akaliyovyalika. 16Azeayalushe mtima Aisilayeli anyinji kuti awelele kwa Asikulu, Mulungu wawo. 17Motangʼa mtima na mwa mphamvu kulingana na mneneli Eliya, azeatangulile Asikulu akuza, nipo azeayikishe pamo avyazi na ŵana, azeatembenule ŵanthu osamwva kuti aŵe na nzelu ngani za ŵanthu wolungama. Azeawamyile Asikulu ŵanthu owamyiwilatu kuwatumikila.”
18Zakaliya ekonsha mngelo wala kuti, “Kansi niziŵe tyani kuti vamene ivi ni va vyendi? Newo nine mkulukazi, na mwanakazi wangu naye ni mkulukazi.”
19Mngelo wala elaŵila kuti, “Newo nine Gabiliyeli, wamene onkhala pa menso pa Mulungu. Yeve wacitonituma kuti nilaŵile nawe nokuwuzya malizu aweme teti. 20Wewo uliyocetekele vanalaŵila, koma vizecitike pa nsita yake. Ni cikomo cake unkhale celele, ukalaŵilelini, kufwikila nsiku pavitivikacitike ivi.”
21Nsita yonse iyi, ŵanthu enzolindila Zakaliya, enzokanganishiwa kuti camucelwesha ni cinji mu Ngʼanda ya Mulungu. 22Pecifuma, aliyolaŵile nawo. Pamene apo niye peciziŵa kuti wawona mensomphenya mu Ngʼanda ya Mulungu. Yeve elaŵila nawo na manja ŵeka, osati na malizu.
23Pecisila masiku ŵake wotumikila mu Ngʼanda ya Mulungu, eluta kwawo. 24Pa vuli pake mkazi wake Elizabeti eciŵa na pakati, efisa kwa miyezi isanu. 25Elaŵila kuti, “Asikulu anicitila voteti: nsita yamene ino aniwonesha lusungu wawo, anifumya nsoni pakati pa ŵanthu.”
Mngelo Gabiliyeli olaŵililatu va kuyvalika kwa Yesu
26Elizabeti peenze na pakati pa miyezi isanu na umo, Mulungu etuma mngelo Gabiliyeli ku munzi uyakine wa ku Galileya, zina yake Nazaleti. 27Emutuma ku msimbi wosaziŵa mwanalume zina yake Maliya enzoyendelewa na mwanalume zina yake Yosefe, wa ku banja ya mfumu Davide. 28Mngelo wala ewela kwa yeve nolaŵila kuti, “Moni Maliya. Mulungu wakuwamilani mtima. Asikulu aŵe na mwewo!”
29Maliya ezizimuka nawo ngako malizu aŵa, notatika kulingilila kuti kansi moni uyu utanthauza vinji? 30Mngelo emuwuzya kuti, “Musayope, Maliya, Mulungu wakucitilani cisomo. 31Muzaŵe na pakati, nipo muzemuvyale mwana mwanalume, muzemumteye zina yakuti Yesu. 32Azaŵe mkulu, nipo azeayitiwe Mwana wa Mulungu Wopula vonse. Asikulu Mulungu azeamulovye Ufumu wa kolo yake Davide, 33nipo azeaŵe mfumu ya Aisilayeli nsita yonse. Ufumu wake uzesilelini.”
34Koma Maliya ekonsha mngelo wala elaŵila kuti, “Ivi vizevicitike tyani, pakuti newo nuziŵalini mwanalume?”
35Mngelo wala eyasuka kuti,
“Mzimu Mtuŵa azeawele pali mwewo,
nipo mphamvu za Mulungu Wopula vonse zizezimvwinikileni.
Ni cikomo cake Mwana watiazeavyalike akayitiwe Mtuŵa –
Mwana wa Mulungu.
36Wonani, wala mkwanu Elizabeti, naye soti olindila mwana mwanalume ku ukulukazi wake. Ŵanthu enze kuti ni cumba, koma uno ni mwezi wake wa cisanu na umo. 37Paliye kanthu kokangiwa na Mulungu.”
38Apo Maliya elaŵila kuti, “Nine mtumiki wa Asikulu; vicitike ngani mwamwalaŵilila.” Nipo mngelo wala emusiya.
39Pecipita masiku atontho, Maliya eyima nakuya mofulumila ku malo ŵa ku malupili ku munzi uyakine wa ku Yudeya. 40Peciloŵa mu ngʼanda ya Zakaliya ecipa moni Elizabeti. 41Elizabeti pecimvwa moni wa Maliya, mwana etatika kulumpha–lumpha mu mala mwake. Nipo Elizabeti ezuzyiwa na Mzimu Mtuŵa, 42nolaŵila na malizu moŵilikizya kuti, “Nimwe woshukishiwa ngako pakati pa anakazi ayakine wonse, ni woshukishiwa soti mwana wanu. 43Nine ŵani newo kuti mwewo anyina ŵa Asikulu ŵangu, muzemuniyendele? 44Cikomo panamvwa moni wanu, mwana watatika kulumpha–lumpha na cinthemwa mu mala mwangu. 45Nimwe woshukishiwa cikomo cakuti mwicetekela kuti Asikulu vecikuwuzyani, vizecitike cendi.”
Nzimbo ya Maliya yotembezya Mulungu
46Pamene apo Maliya elaŵila kuti,
“Mtima wangu utembezya Asikulu,
47nipo mzimu wangu usangalala mwa Mulungu Mpulumushi wangu.
48Pakuti walolesha kulicefya kwa mtumiki wake.
Ni cendi kutatika lomba
ŵanthu ŵa luko yonse azeaniyite woshukishiwa.
49Pakuti wa mphamvu wanicitila vikulu,
nipo zina yake ni ituŵa.
50Oŵacitila lusungu ŵanthu ŵa luko na luko
ŵala omupa mcinzi,
51Wacita va mphamvu na kwanja kwake;
wamwazyisha ŵanthu ŵa mtima womeka.
52Waselusha mafumu ŵa mphamvu pa mipando yawo ya cifumu;
ŵanthu tyala aŵakweza.
53Wakutisha ŵanthu na viweme;
ŵanthu wolemela owawezya osaŵapa kanthu.
54Azeayavye ŵanthu ŵake Aisilayeli,
pokumbuka lusungu yake.
55Ivi niye vecilayizya
kuti akaŵacitile makolo ŵasu ŵa macezo ŵala,
Abulahamu na azikulu ŵake mpaka nsita zonse.”
56Maliya eciŵa na Elizabeti myezi itatu nowelela kwawo.
Kuvyalika kwa Yohane Mbatizi
57Nsita yakuti Elizabeti awone mwana ikumana, nipo evyala mwana mwanalume. 58Ayake na enekwawo pecimvwa kuti Asikulu amucitila lusungu ikulu yoteti, esekelela naye pamo.
59Pa nsiku ya cisanu na citatu mwana wala pecivyalika, ewela naye kuti amusilimule, nopangwa kumuteya zina ya awusu wake Zakaliya 60Koma anyina wake ekana, elaŵila kuti, “Yayi, mumuteye Yohane.”
61Pamene apo ŵanthu emuwuzya kuti, “Koma pakati ponekwanu paliye ali na zina yoteti.”
62Tetyo, elaŵila na awisi na manja, emukonsha kuti, “Mupangwa kuti timuteye zina yanji?”
63Zakaliya esenga colembelapo, na kuti elemba kuti, “Zina yake ni Yohane.” Ŵanthu wonse ekanganishiwa. 64Pamene apo Zakaliya etatika soti kulaŵila, notatika kutembezya Mulungu.
65Ayawo wonse ekatiwa na wowa, nipo mbili iŵilikila ku mbali konse kwa malupili ŵa ku Yudeya. 66Ŵanthu wonse ecimvwa, enzozilingilila mu mitima mwawo nozikonsha kuti, “Kansi mwana uyu azeaŵe munthu wotyani?” Pakuti venzowonekelatu vocitika kuti Asikulu ali naye.
Nzimbo ya Zakaliya
67Zakaliya, awisi wa Yohane wala ezuzyiwa na Mzimu Mtuŵa, etatika kulaŵila malizu ofumila kwa Mulungu. Elaŵila kuti,
68“Atembezyewe Asikulu, Mulungu wa Aisilayeli,
cikomo cakuti ecizoŵayavya ŵanthu ŵawo, noŵapulumusha.
69Ewusha muyakine, wa mtundu wa mtumiki wake Davide,
kuti aŵe Mpulumushi wasu wa mphamvu.
70Ivi niye vecinenelatu yeve macezo
kupitila mwa aneneli ŵake atuŵa mtima.
71Elayizya kuti azeatipulumushe kwa alwani wasu,
na kwa wonse otitinkha.
72Tetyo, yeve eŵacitila lusungu makolo wasu ŵa macezo,
nipo wakumbuka umvwano wake utuŵa.
73Umvwano wecimvwana nolumbila kwa kolo yasu Abulahamu,
kuti atipe,
74kuti azeatipulumushe kwa alwani wasu,
kuti tomutumikila paliye wowa,
75kuti tiŵe atuŵa mtima na wolungama pa menso pake,
masiku wonse ŵa moyo wasu.
76“Lomba wewo mwanawe,
uzeuyitiwe mneneli wa Mulungu Wopula vonse,
cikomo uzeuthangule pa menso pa Asikulu,
kuti uwamyiletu njila zawo.
77Uzeuziŵishe ŵanthu ŵawo kuti Mulungu azeaŵapulumushe
poŵalekelela macimo ŵawo.
78Cikomo ca lusungu yake ikulu,
azeatitumizyile kuŵala kwa zuŵa ya mmawa kufumila Kululu.
79Kuŵala kwake kuzesanikile wonse
onkhala mu mfinzi ngani imfwa,
kuzotithangulila pa njila ya mtendele.”
80Mwana wala Yohane enzokula nakuŵa na unkhalo wa mphamvu. Pa vuli pake enkhala ku cipululu kufwika nsiku yeciziwonesha patuŵa pakati pa Aisilayeli.
Currently Selected:
Luka 1: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.
