Yh 5

Yesu opozya munthu ku Betisaida

1Pa vuli pake kwenze cisangalalo ca cilambilo ca Ayuda, nipo Yesu elutako ku Yelusalemu kwala. 2Kwala kwatola, zina yake mu Ciyuda ni Betisaida. Tenga iyi ili pafupi na Mulyango wa Mbelele, nipo ni yozungulukiwa na malukolo wovimbiwa asanu. 3Mu malukolo mwala mwenzolala ŵanthu anyinji olwala: amphofu, wolemala mendo, na wa vizo va kufwa. [Ŵeve enzolindila kuti manzi avunduliwe. 4Pakuti nsita ziyakine mngelo wa Asikulu enzoselukila mu tenga mwala novundula manzi ŵala. Wotatika kuloŵamo manzi akavunduliwa, enzopola cukanga aŵe na ulwele wotyani.] 5Pakati pa ŵanthu olwala ŵala penze muyakine elwala vyaka makumi atatu na mphuzyo zisanu na zitatu (38).

6Yesu emuwona ali lele, noziŵa kuti elwala nsita itali. Lomba emukonsha kuti, “Kansi upangwa kupola?”

7Wolwala wala elaŵila kuti, “Asikulu, niliye munthu woniloŵesha mu tenga umu manzi akavunduliwa. Nikatiniloŵemo, muyakine waloŵa kale.”

8Yesu elamula kuti, “Uka, tola mphasa yako yenda.” 9Pamene apo munthu wala epola cendi, notakula mphasa yake notatika kuyenda. Nsiku yala yenze ya Sabata.

10Tetyo, Akulu ŵa Ayuda ewuzya munthu wala epola kuti, “Lelo ni pa Sabata. Matetulo ŵasu ololalini kutakula mphasa yako.”

11Koma yeve elaŵila kuti, “Wanipozya waniwuzya kuti, ‘Takula mphasa yako, yenda.’”

12Ŵeve emukonsha kuti, “Munthu uyo ni ŵani wakuwuzya kuti utakule mphasa yako?” 13Koma wopola wala aliyomuziŵe, pakuti Yesu enzeloŵelela mkati mwa ŵanthu anyinji enze pamene apo.

14Pa vuli pake Yesu efwana wopola wala mu Ngʼanda ya Mulungu, nomuwuzya kuti, “Wona, wapola lomba! Osati ukacimwe soti, kuti cingakuponele coyofya ciyakine kupula pamene apa.” 15Munthu wala eluta nowuzya Akulu ŵa Ayuda kuti Yesu niye wamupozya.

16Pakuti yenze nsiku ya Sabata Yesu pecicita ivi, ŵala akulu etatika kumutamanisha. 17Koma Yesu eŵawuzya kuti, “Atata oseŵenza mpaka lomba, nane soti nuseŵenza.” 18Pamene apo niye pecipitilizya kupangwa kumupaya ŵala Akulu ŵa Ayuda. Enze kuti Yesu ofwaya tetulo yokumya ku Sabata, nipo soti polaŵila kuti Mulungu ni Awusu ŵake, enzozilingilila kuti ni Mulungu.

Ulamulilo wa Mwana wa Mulungu

19Lomba Yesu elaŵila kuti, “Kulaŵila vyendi Mwana angacitelini kanthu pa yeve yeka, koma oyingocita vakuwona kuti Awisi ocita. Vinthu vakucita Awisi, Mwana ovicita soti vala. 20Pakuti Awisi otemwa Mwana, nomuwonesha vonse ŵeve vakucita. Awisi azeamuwoneshe soti nchito zopula izi, kuti mwewo muzemukanganishiwe. 21Keno Awisi owukisha akufwa, noŵapa moyo, tetyo soti Mwana okupa moyo kwa ŵakupangwa. 22Awisi opingulalini munthu aliyense, koma eyika Mwana wake kuti aŵe wopingula pa vonse. 23Awisi opangwa kuti ŵanthu wonse awocinzika Mwana, ngani mwakucinzikila Awisi. Munthu ocinzikalini Mwana, ocinzikalini soti emutuma.

24“Nulaŵilisha cendi kuti munthu akumvwa malizu ŵangu, nocetekela yeve enituma, wamene uyo ali na moyo wosasila. Yeve azeapewelini mlandu, nipo wafuma kale mu imfwa, noloŵa mu moyo wa cendi. 25Nulaŵila soti kuti, ikuza nsita, nipo yafwika kale, ŵanthu akufwa patiazamvwe lizu ya Mwana wa Mulungu, nipo watiazeaŵacetekele azaŵe na moyo. 26Ngani Awisi ali na moyo mwa yeve yeka, motetyo, soti eyika Mwana wake naye kuŵa na moyo mwa yeve yeka. 27Nipo ecipa Mwana wala ulamulilo wopingula ŵanthu, cikomo ni Mwana wa Munthu. 28Okanganishiwa navo ivi, pakuti ikuza nsita ŵanthu wonse ali mu manda patiazeamvwe malizu ŵake nakuzofuma. 29Ŵanthu ecita viweme, azeawukishiwe kuti azaŵe na moyo, koma ŵala ecita viyipa, azeawukishiwe kuti azeapinguliwe mlandu.”

Ocitila Yesu umboni

30“Newo ningatweshelini kucita kanthu pa neka. Nupingula ngani mwakuniwuzyila Atata. Nipo nupingula molungama, pakuti nukonkhalini vanupangwa newo neka, koma vakupangwa Atata enituma. 31Keno nuzicitila neka umboni, umboni wangu ni wosakwanila. 32Atata onicitila umboni, nipo nuziŵa kuti umboni wakunicitila ŵeve ni wa vyendi. 33Mwewo mwituma atumiki ŵanu kwa Yohane Mbatizi, nipo yeve epanga umboni wa vyendi. (34Niye kuti newo numekelalini umboni wa munthu, koma nulaŵila ivi kuti mwewo mupulumuke.) 35Yohane enze ngani nyale yoyaka na yoŵala, nipo mwewo mwisangalala na kuŵala kwala pa kansita katontho. 36Koma newo nili na umboni wopula wa Yohane. Atata enipa nchito zanuwamila kucita, nipo nchito izi zanucita zusimikizya kuti Atata niye enituma. 37Nipo Atata enituma, onicitila umboni. Koma mwewo muliyoumvwe lizu yawo, na mawonekelo ŵawo muliyoŵawone. 38Muzomelalini malizu ŵawo mu mitima mwanu, cikomo mucetekelalini wecituma Atata. 39Musambila ngako Malembo ŵa Mulungu, cikomo mulingilila kuti mufwanamo moyo wosasila. Nipo ni Malembo awo onicitila umboni! 40Koma mwewo mupangwalini kuwela kwa newo kuti muŵe na moyo.

41“Nupangwalini mcinzi wa ŵanthu yayi. 42Koma nukuziŵani kuti mutemwalini Mulungu mu mtima mwanu. 43Newo niwela mu zina ya Atata, nipo mwewo muliyonipokele. Koma muyakine akawela mu zina yake yeka, wamene uyo niye wamungapokele. 44Keno mupana mcinzi mweka–mweka musangalala, koma mupangwalini kupokela mcinzi kwa Mulungu yeka. Nga mungacetekele tyani newo? 45Musalingilile kuti ni newo watiazemutanikileni kwa Atata, yayi. Watiazemutanikileni alipo – ni Mose wala wamumekela mwewo. 46Koma kuti mwimucetekela Mose mu vyendi, sembe mwicetekela soti newo, pakuti yeve elemba va newo. 47Koma keno mucetekelalini vecilemba yeve wala, nga mungacetekele tyani malizu ŵangu?”

Currently Selected:

Yh 5: GMN

Highlight

Copy