Yh 21

Yesu owonekela kwa asambili asanu na aŵili

1Pa vuli pake Yesu eliwonesha soti kwa asambili ŵake ku Cimmana ca Galileya#21:1 Galileya keno kulaŵila kuti Tibeliyasi.. Eliwonesha moteti: 2Simoni Petulo, Thomasi woyitiwa Mapasa, Nataniyele ofumila ku munzi wa Kana mu calo ca Galileya, Yakobo na Yohane (ŵana ŵa Zebedayo), nipo soti asambili ayakine aŵili, enze pamo. 3Simoni Petulo eŵawuzya kuti, “Newo nikuyokata masaŵi.”

Ŵeve elaŵila kuti, “Nase soti tukuya nawe.” Eyima nakuyoloŵa mu wato. Koma usiku wamene wala aliyokatepo kanthu.

4Pekwecica Yesu epanama pa silya. Koma mphela asambili ŵala aliyoziŵe kuti ni Yesu. 5Lomba yeve eŵakonsha kuti, “Kansi mwe ayasu, mwakatako angani?”

Ŵeve elaŵila kuti, “Yayi cendi, tawelako tyala.”

6Yesu eŵawuzya kuti, “Pozani kombe ku kwanja kwendi kwa wato, mukateko kanthu.”

Ŵeve epoza cendi, nipo aliyotweshe kuyidonsa soti cikomo ca kupaka kwa masaŵi. 7Pamene apo msambili wala, wenzotemwa ngako Yesu, ewuzya Petulo kuti, “Ni Asikulu!” Pamene apo Simoni Petulo ecimvwa kuti ni Asikulu, evwala mkhanjo wake (cikomo enzeewuvula), nipo elumphila mu cimmana.

8Koma asambili ayakine ŵala ewela na wato ku silya odonsa kombe yozula na masaŵi. Enzelini kutali na ku silya, koma pafupi, ngani mamita makumi kumi. 9Pecifwika ku silya, ewona mulilo wa malasha, pali masaŵi, nipo soti mkate. 10Yesu eŵawuzya kuti, “Welani nawo masaŵi ayakine ŵamwakata.” 11Pamene apo Simoni Petulo eloŵa mu wato mwala nodonsela kombe yala ku silya, yozula na masaŵi akulu okumana makumi kumi na makumi asanu na mphuzyo zitatu (153). Cukanga kuti masaŵi wala enze anyinji tetyo, kombe iliyongʼambike.

12Yesu eŵawuzya kuti, “Welani mulye.” Koma mwa asambili ŵala penzeve cukanga yumo eyuma mtima kumukonsha kuti, “Nimwe ŵani?” Pakuti eziŵa kuti ni Asikulu. 13Yesu ewela notola mkate wala noŵapa. Ecita soti tetyo na masaŵi ŵala.

14Aka kenze ka citatu kuti Yesu awonekele kwa asambili ŵake yeve peciwukishiwa kwa akufwa.

Lyesha mbelele zangu

15Ŵeve pecisilizya kulya, Yesu ekonsha Petulo kuti, “Wewo Simoni, mwana wa Yohane, kansi unitemwa cendi kupula mwakunitemwela aŵa?”

Yeve elaŵila kuti, “Eee Asikulu, muziŵa kuti nukutemwani.”

Yesu emuwuzya kuti, “Samala mbelele zangu.”

16Yesu emukonsha soti ka ciŵili kuti, “Wewo Simoni, mwana wa Yohane, kansi unitemwa cendi?”

Yeve elaŵila kuti, “Eee Asikulu, muziŵa kuti nukutemwani.”

Yesu emuwuzya kuti, “Samala mbelele zangu.”

17Yesu emukonsha ka citatu kuti, “Wewo Simoni, mwana wa Yohane, kansi unitemwa?” Petulo etatika kumvwa citinthi kuti Yesu omukonsha ka citatu kuti, “Kansi unitemwa?”

Nipo elaŵila kuti, “Asikulu, muziŵa vonse. Muziŵa kuti newo nukutemwani.”

Yesu emuwuzya kuti, “Samala mbelele zangu. 18Pewenze mulumbwana, wenzozivwalika weka nakuya kulikonse kwewenzopangwa kuya. Koma kulaŵila vyendi ukazokulukazya, uzeutambulule manja wako, nipo muyakine azeakumange nakuya nawe kwawusapangwa.” 19(Yesu elaŵila vamene ivi popangwa kuŵaziŵisha mwatiazeafwile nocinzika Mulungu Petulo.) Pecilaŵila tetyo, ewuzya Petulo kuti, “Unikonkhe.”

20Petulo pecicewuka, ewona msambili wala Yesu wenzotemwa oŵakonkha. Niye msambili wala esamila pa nganga pa Yesu pa malyelelo ŵala nomukonsha kuti, “Asikulu, watiazemutwaleni kwa alwani ŵanu ni ŵani?”

21Petulo peciwona msambili wala, ekonsha Yesu kuti, “Asikulu, nga uyu tyani?”

22Yesu emuwuzya kuti, “Keno nupangwa kuti yeve aŵe moyo mpaka nikawele soti, ni vinji kwa wewo? Wewo unikonkhe.”

23Cikomo ca ici mbili imvwika pakati pa enekwawo kuti msambili muyawo wala azafwelini. Koma Yesu aliyomuwuzye kuti azafwelini yayi, koma elaŵila kuti, “Keno nupangwa kuti yeve aŵe moyo mpaka nikawele soti, kansi ni vinji kwa wewo?”

24Uyo niye msambili wala ocitila umboni vicitika vala, nipo niye evilemba. Tuziŵa kuti umboni wake wala ni wa vyendi.

25Koma vilipo viyakine vinyinji venzocita Yesu. Kuti vilembewa vonse ivi, nulingilila kuti pa calo conse ca pansi sembe paliye malo okwanila mabuku wonse olembewa ŵala.

Currently Selected:

Yh 21: GMN

Highlight

Copy