Yh 20

Yesu owuka kwa akufwa

(Mt 28:1-10; Mk 16:1-8; Lk 24:1-12)

1Pa nsiku yokonkha Sabata ya Ayuda, mu matemwakuca, Maliya Magadalena ewela ku manda ŵa Yesu. Ewona kuti cimwala cala cafumyiwapo kale pa mulyango ŵa manda ŵala. 2Tetyo, ewutuka nakuyofwika kwa Simoni Petulo, na kwa msambili muyakine wala wenzotemwa ngako Yesu. Eŵawuzya kuti, “Afumyamo citanda ca Asikulu mu manda mwala, nipo tuziŵalini kwaciyika!”

3Pamene apo Petulo na msambili muyakine wala efuma nakuya ku manda. 4Wonse aŵili ewutukila pamo, koma msambili muyakine wala ewutuka kupula Petulo, kutatika yeve kufwika ku manda kwala. 5Eŵelama nowona nyula zala za malilo, koma yeve aliyoloŵemo. 6Simoni Petulo pecifwika, eloŵa mu manda mwala. Ewona nyula zala za malilo, 7nipo soti kanyula kenze ku mutu kwa Yesu. Kanyula kala kenzelini pamo na nyula ziyakine zala, koma pa mbali pa keka, kali kopetewa. 8Pamene apo msambili muyakine wala, etatikila kufwika ku manda, naye soti eloŵa; nipo peciwona ivi, ecetekela. (9Mpaka nsita yamene iyo, ŵeve ŵala enzeakaliyomvwisha Malembo ŵakuti Yesu azeawamile kuwuka kwa akufwa.) 10Pa vuli pake asambili ŵala ewelela kwawo.

Yesu owonekela kwa Maliya Magadalena

(Mk 16:9-11)

11Maliya eciŵa mphela peneme panja pafupi na manda, olila. Penzolila tetyo, eŵelama nosonjelela mu manda mwala, 12ewona angelo aŵili wovwala vovwala vituŵa. Angelo ŵala enzeenkhala pansi, muyakine ku mutu, muyakine ku mendo pa malo pala pecenze cilala citanda ca Yesu. 13Ŵeve emukonsha kuti, “Mama, mulila vinji?”

Yeve elaŵila kuti, “Cikomo aŵafumya Asikulu ŵangu, nipo nuziŵalini kwaŵayika.” 14Pecilaŵila ivi ecewuka, nowona Yesu ali peneme pamene apo, koma aliyomuziŵe kuti ni Yesu.

15Lomba Yesu emukonsha kuti “Mama, mulila vinji? Mupangwa ŵani?”

Maliya enzoyesa kuti ni wa ku munda kwala, motetyo, emuwuzya kuti, “Mwepo, keno mwaŵafumya ni mwewo, muniwuzye kwa mwaŵayika, kuti nikaŵatole.”

16Yesu elaŵila kuti, “Maliya!”

Maliya ecewuka, nolaŵila kuti, “Raboni!” (Niye kuti “Asambizyi” mu Ciyuda.)

17Yesu emuwuzya kuti, “Osanikata, pakuti nikaliyokwela kuya kwa Atata. Koma nkhoyani kwa enekwasu, mukaŵauzye kuti, ‘Nukwela kuya kwa Atata, ali Awusu wanu soti; kwa Mulungu wangu, ali Mulungu wanu soti.’”

18Maliya Magadalena wala eluta, nowuzya asambili ŵala kuti, “Naŵawona Asikulu.” Nipo eŵawuzya vecimutuma Asikulu ŵala.

Yesu owonekela kwa asambili ŵake

(Mt 28:16-20; Mk 16:14-18; Lk 24:36-49)

19Mcingulo pekwefipa pa nsiku ya Sondo yamene yala, asambili ŵala enze pamo. Viseko venze vokhoma, cikomo enzoyopa Akulu ŵa Ayuda. Lomba Yesu ewela nopanama pakati pawo nolaŵila kuti, “Mtendele uŵe namwe!”

20Pecilaŵila tetyo, eŵawonesha manja ŵake na mu maŵambo mwake, nipo asambili ŵala etemwa ngako poŵawona Asikulu wala. 21Yesu elaŵila soti kuti, “Mtendele uŵe namwewo. Ngani mwecinitumila Atata, nane nukutumani soti.” 22Pa vuli pake eŵafuzilila mphuye na kuti, “Pokelani Mzimu Mtuŵa. 23Ŵanthu ŵatimuzelekelele macimo ŵawo, azealekelelewe cendi; koma ŵatimuzelekelelelini, azelekelelewelini yayi.”

Kusacetekela kwa Thomasi

24Yumo wa asambili ŵala kumi na aŵili, Thomasi woyitiwa Mapasa#20:24 Mapasa mu Cigiliki niye kuti Didimo enzelini pamo na ayake peciwela Yesu. 25Lomba asambili ayake ŵala emuwuzya kuti, “Sewo tiŵawona Asikulu.”

Koma Thomasi elaŵila kuti, “Nikakana kuwona viŵanga va misumali mu manja mwawo, nopitishamo kwanja yangu mu maŵambo mwawo, ningacetekelelini konse.”

26Pepepita Sondo imo, asambili ŵala enze soti mu ngʼanda mwala, nipo Thomasi enze nawo. Viseko venze vokhoma, koma Yesu ewela, nopanama pakati pawo elaŵila kuti, “Mtendele uŵe namwewo!”

27Pecilaŵila tetyo, ewuzya Thomasi kuti, “Ika cikumo cako apa, wona manja ŵangu. Tambulula kwanja yako, uyipitishe mu maŵambo mwangu umu. Leka kukayika, utatike kucetekela.”

28Thomasi elaŵila kuti, “Asikulu ŵangu! Mulungu wangu!”

29Yesu elaŵila kuti, “Kansi wacetekela cikomo waniwona? Ni woshukishiwa ocetekela cukanga aliyowone.”

Colinga ca buku iyi

30Yesu ecita soti viziŵikilo viyakine vinyinji vokanganisha pa menso pa asambili ŵake, viliyolembewe mu buku iyi. 31Koma ivi vilembewa kuti mucetekele kuti Yesu niye Mpulumushi cendi Wolayizyiwa wala, Mwana wa Mulungu, nipo kuti pocetekela muŵe na moyo mu zina yake.

Currently Selected:

Yh 20: GMN

Highlight

Copy