Mātiú 7

Ko e Fakamāu‘i e Kakai Kehe

(Luk 6.37,38,41,42)

1‘OUA te mou fakaanga, na‘a anga‘ia kimoutolu. 2He ko e fakaanga ‘oku mou fakaanga ‘aki, ko ia pē ‘e fakaanga ‘aki kiate kimoutolu; pea ko e fua ‘oku mou fua ‘aki, ko ia pē ‘e fua ‘aki kiate kimoutolu.#Ma‘ake 4.24 3Pea ko e hā ‘oku ke tokanga ai ki he malamala‘i ‘akau ‘oku ‘i he mata ‘o ho kāinga, ka ko e fu‘u lalango na ‘oku ‘i ho mata ‘oku ‘ikai te ke ‘ilo ki ai? 4Pea te ke lea fēfē ki ho kāinga, ‘Ē, tuku ke u to‘oa mai ‘a e malamala‘i ‘akau mei ho mata: ka tā ko e fu‘u lalango ‘ena ‘i ho mata ‘o‘ou? 5‘a e ‘afungi, motu‘a to‘o mai mei ho‘ou mata ‘a e lalango; pea te ke toki sio totonu ke to‘o ‘a e malamala mei he mata ‘o ho kāinga.

6‘Oua na‘a ‘ange ‘a e ngaahi me‘a tapu ki he fanga kulī, pe laku ho‘omou ngaahi mata‘itofe ki he fanga puaka: na‘a ‘iloange te nau a‘a ai, pea foki mai ‘o tui‘i kimoutolu.

Kole, Kumi, Tukituki

(Luk 11.9-13)

7Kole, pea ‘e foaki kiate kimoutolu: kumi, pea te mou ‘ilo: tukituki, pea ‘e to‘o kiate kimoutolu: 8he ‘ilonga ‘a ia ‘oku ne kole ‘oku ne ma‘u, pea ko ia ‘oku kumi ‘oku ne ‘ilo, pea ko ia ‘oku tukituki ‘e to‘o kiate ia. 9He ko e tangata fē ‘iate kimoutolu, ka kole ki ai ‘e hono foha ha fo‘i mā, te ne ‘ange koā ha fo‘i maka? 10Pea ka kole ki ha ika, te ne ‘ange ha ngata? 11pea kapau ā ‘oku mou ‘ilo ke foaki me‘a‘ofa lelei ki ho‘omou fānau, neongo ko e fa‘ahinga kovi kimoutolu, huanoa ho‘omou Tamai ‘oku ‘i Hēvani, ha‘ane foaki me‘a lelei kiate kinautolu ‘oku kole kiate ia.

12Ko ia, ‘ilonga ha me‘a ‘oku mou loto ke fai ‘e he kakai kiate kimoutolu, fai pehē foki kiate kinautolu: he ko e Lao ia mo e Tohi Palōfita.#Luk 6.31

Ko e Matapā Fāsi‘i

(Luk 13.24)

13Mou hū ‘i he matapā fāsi‘i: he ‘oku fālahi ‘a e matapā, pea ‘atā ‘a e hala, ‘oku fakatau ki mala, pea tokolahi ‘a e kakai ‘oku hū atu ai: 14koe‘uhi ‘oku fāsi‘i ‘a e matapā, pea ‘efi‘efi ‘a e hala ‘oku fakatau ki he mo‘ui; pea toko si‘i ‘a e kakai ‘oku ‘ilo ia.

Ko e Fu‘u ‘Akau mo Hono Fua

(Luk 6.43-44)

15Ka mou lamalama ‘a e kau palōfita loi, ‘a e fa‘ahinga ‘oku ha‘u kiate kimoutolu ‘oku nau kofu hangē ha sipi, ka ‘i loto ko e fanga ulofi fekai kinautolu. 16Ko honau ngaahi fua te mou ‘ilo lelei ai kinautolu. He ‘oku toli kālepi mei he vao talatala, pe ko e fiki mei he ngatae? 17Pehē, ‘ilonga ha ‘akau lelei ‘oku ne fua ‘aonga: ka ‘ilonga ha ‘akau tamaki ‘oku fua kovi. 18‘Oku ‘ikai lava ‘e he ‘akau lelei ke fua kovi, pe ko e ‘akau tamaki ke fua ‘aonga. 19‘Ilonga ha ‘akau ‘oku ‘ikai fua ‘aonga, ‘oku tā ‘o laku ki he afi.#Māt 3.10; Luk 3.9 20‘Āua, ko honau ngaahi fua te mou ‘ilo lelei ai kinautolu.#Māt 12.33

Ko e Fakatokanga

(Luk 13.25-27)

21‘Oku ‘ikai ko ia pē ‘oku ne lau mai, ‘Ēī, ‘Ēī, te ne hū ki he Pule‘anga ‘o Hēvani; ka ko ia ‘oku ne fai ‘a e finangalo ‘o ‘eku Tamai ‘oku ‘i Hēvani. 22Ko e tokolahi te nau lea mai ‘i he ‘aho ko ē, ‘o pehē, ‘Ēī, ‘Ēī, ‘ikai ko ho huafa na‘a mau palofisai ai? Pea ko ho huafa na‘a mau kapusi tēvolo ai? Pea ko ho huafa na‘a mau feia ai ‘a e ngaahi mana lahi? 23Pea te u toki vete kiate kinautolu hoku loto, ‘o pehē, Te‘eki te u ‘iloa kimoutolu: ‘alu meiate au, ‘a e kau maumau lao.#Saame 6.8

Ko e Ongo Tufunga Fale

(Luk 6.47-49)

24Pea ko ia, ‘ilonga ‘a ia ‘oku ne fanongo ki he ngaahi tala ni ‘a‘aku, mo ne fai ki ai, te u fakatatau ia ki he tangata fakapotopoto, ‘a ia na‘a ne langa hono fale ki he maka: 25pea na‘e tō ‘a e ‘uha, pea tafe mai ‘a e ngaahi vai, pea angi ‘a e ngaahi matangi, ‘o nau fa‘afa‘aki ki he fale ko ia: ka na‘e ‘ikai holo, he ne tu‘unga ki he maka.

26Ka ‘ilonga ‘a ia ‘oku ne fanongo ki he ngaahi tala ni ‘a‘aku, kae ‘ikai fai ki ai, ‘e fakatatau ia ki he tangata vale, ‘a ia na‘a ne langa hono fale ki he ‘one‘one: 27pea na‘e tō ‘a e ‘uha, pea tafe mai ‘a e ngaahi vai, pea angi ‘a e ngaahi matangi, ‘o nau tuki ki he fale ko ia, pea holo ia: pea ko e holo ‘o e fale ko ia ko e holo lahi.

28Pea ‘i he faka‘osi ‘e Sīsū ‘a e ngaahi tala ni, na‘e to‘oa ‘a e kakai ‘i he‘ene fai:#Ma‘ake 1.22; Luk 4.32 29he ko e anga ‘o ‘ene faiako kiate kinautolu na‘e ngali ko ha pule ia, ‘o ‘ikai hangē ko ‘enau kau sikalaipe.

Currently Selected:

Mātiú 7: TMB

Highlight

Copy