Luké 24

Ko e Toetu‘u ‘a Sīsuú

(Māt 28.1-10; Ma‘ake 16.1-8; Sioné 20.1-10)

1PEA lolotonga ‘a e Sāpate na‘a nau mālōlō ‘o hangē ko e tu‘utu‘uni: ka ‘i he ‘uluaki ‘aho ‘o e uike, ‘oku kei hengihengi ‘aupito, na‘a nau ‘alu ki he fonualoto, ‘o ‘ave ‘a e ahi kuo nau teu. 2Pea nau ‘ilo ‘a e maka kuo teka‘i mei he fonualoto. 3Ka ‘i he‘enau hū ki ai, na‘e ‘ikai te nau ‘ilo ‘a e sino ‘o e ‘Eiki ko Sīsū. 4Pea lolotonga ‘enau puputu‘u ‘i he me‘a ko ia, pea tā na‘e tu‘u mai kiate kinautolu ha ongo tangata na‘e huhulu hona kofu. 5Pea ‘i he‘enau manavahē fu‘u, mo fo‘ohifo ki he kelekele, na‘a na pehē kiate kinautolu, Ko e hā ‘oku mou kumi ai ‘a ia ‘oku mo‘ui ki he kau pekia? 6‘Oku ‘ikai te ne ‘i heni, ka kuo toetu‘u: manatu ki he‘ene me‘a kiate kimoutolu ‘i he‘ene kei ‘i Kāleli, ‘o pehē,#Māt 16.21; 17.22-23; 20.18-19; Ma‘ake 8.31; 9.31; 10.33-34; Luk 9.22; 18.31-33 7Kuo pau ki he Fanautama ‘a Tangata ke tukuange ia ki he kakai angahala, pea ke kalusefai, pea ke toetu‘u ‘i hono ‘aho tolu.

8Pea nau manatu ai ki he‘ene ngaahi lea, 9pea nau foki mei he fonualoto, ‘o nau tala ‘a e ngaahi me‘a ko ia ki he kau Hongofulu mā taha, pea mo hono toe ‘o e kakai. 10Pea ko Mele mei Makitala, mo Sioana, mo Mele ko e fa‘ē ‘a Sēmisi, ko kinautolu ia na‘e tala; pea ko hono toe ‘o e kau fefine ‘a ia na‘e kau mo kinautolu, na‘e tala foki ‘e kinautolu ‘a e ngaahi me‘a ko ia ki he kau ‘Aposetolo. 11Ka na‘e hā ‘a e ngaahi lea ko ia kiate kinautolu ‘o hangē ko e muna; pea na‘e ‘ikai te nau tui ki he kau fefine. 12Ka na‘e tu‘u ‘a Pita, ‘o ne lele ki he fonualoto, ‘o ne tulolo ‘o sio ko e ngaahi tupenu pē; ‘o ne ‘alu ki ‘api, ‘oku ne ofoofo ‘i he me‘a kuo hoko.#24.12 ‘Oku ‘ikai ke ‘asi ‘a e vēsíni ‘i he ngaahi hiki fuoloa ‘e ni‘ihi.

Ko e Hā ‘a Sīsū ki he Toko Ua he Kau Akó

(Ma‘ake 16.12-13)

13Pea tā ko honau toko ua na‘e fai hona fononga ‘i he ‘aho ko ia ki he vilisi na‘e hingoa ko ‘Emeasi, ko hono mama‘o mo Selusalema ko e maile ‘e fitu nai. 14Pea na fai‘aki ‘ena talanoa ‘a e ngaahi me‘a kehekehe kuo toki hoko ni. 15Pea lolotonga ‘ena talanoa mo fe‘eke, mo ‘ene fakaofiofi mai ‘a Sīsū ‘e ia, ‘o ō fakataha mo kinaua. 16Ka na‘e ta‘ofi hona mata ke ‘oua te na ‘ilo ko ia. 17Pea ne pehē kiate kinaua, Ko e hā nai ‘a e ngaahi me‘a ‘oku mo fekīhiaki ai ‘i ho‘omo ō ni? Pea na tu‘u ‘oku na fofonga mamahi.

18Pea tali ‘e he toko taha na‘e hingoa ko Kaliopasi, ‘o ne pehē kiate ia, Tā ko e sola ‘apē koe ‘i Selusalema, ‘o ke nofo toko taha, ‘i ho‘o ta‘e‘ilo ‘a e ngaahi me‘a kuo hoko ‘i he ngaahi ‘aho ko eni.

19Pea ne pehē kiate kinaua, ‘a e hā koā?

Pea na pehē kiate ia, ‘a e ngaahi me‘a ‘oku kau kia Sīsū mei Nāsaleti, ‘a ia ko e tangata palōfita na‘e hā ki he ‘Otua mo e kakai kotoa ‘ene mafai ‘i he ngāue mo e lea:

20‘a hono tukuange foki ‘e he hou‘eiki taula‘eiki, mo e kau pule ‘amautolu, ke fakamāumatea, mo nau kalusefai ia. 21Ka ko kimautolu na‘a mau falala tu‘u, ko eni ia ‘oku hapa ke huhu‘i ‘a ‘Isileli. 22Kae‘uma‘ā ‘eni kotoa pē, ‘oku ne ‘i hono ‘aho tolu talu ‘a e fai ‘o e me‘a ko ia; ‘io, pea fakalele mo‘ui kiate kimautolu ‘e ha ni‘ihi ‘i homau kau fefine, ‘a ia na‘a nau uhu ki he fonualoto; 23pea ‘i he ‘ikai te nau ‘ilo hono sino, na‘a nau omi ‘o tala kuo nau sio tokua ki ha vīsone, ko ha ongo ‘āngelo ‘a ia na‘a na fakahā ‘oku ne mo‘ui. 24Pea ‘alu ki he fonualoto ha ni‘ihi ‘iate kinautolu ‘oku mau kau, ‘o nau ‘ilo ‘o hangē tofu pē ko e lau ‘a e kau fefine: ka na‘e ‘ikai te nau sio kiate ia.

25Pea toki me‘a ia kiate kinaua, ‘a e kau ta‘eloto, pea tō‘ohi ke tui ki he ngaahi me‘a na‘e lea‘aki ‘e he kau palōfita! 26‘Ikai na‘e pau ke mamahi pehē ‘a e Mīsaia, ka ne hoko ki he‘ene lāngilangi‘ia? 27Pea ne kamata mei he ngaahi tohi ‘a Mōsese, mo e kau Palōfita kātoa pē, ‘o ne faka‘uhinga mei he Tohi tapu kātoa ‘a e ngaahi me‘a na‘e kau kiate ia.

28Pea na‘a nau a‘u ki he vilisi na‘a na fononga ki ai: pea fai ‘e ia ke mole atu. 29Ka ka ta‘ofi tu‘u ia ‘e kinaua, ‘o na pehē, Afe mai ā mo kimaua: he kuo efiafi ‘eni, pea kuo pale ‘aupito ‘a e la‘ā. Pea ne hū ki he vilisi ke nofo mo kinaua. 30Pea ‘iloange, ‘i he‘ene tokoto mo kinaua ‘i he kai, na‘a ne to‘o ‘a e mā, ‘o ne fai ha tāpuaki, ‘o ne pakipaki ‘o ‘atu kiate kinaua. 31Pea ‘ā ai hona mata, ‘o na ‘ilo tā ko IA; ka ka puli leva ia, ‘o ne mole meiate kinaua. 32Pea na fepehē‘aki, Hono ‘ikai ne vela hota loto lolotonga ‘ene talanoa mai ‘i he hala, mo ‘ene vete kiate kitaua ‘a e Tohitapu!

33Pea na tu‘u hake ‘i he houa pē ko ia, ‘o na foki ki Selusalema; pea ‘i he‘ena a‘u, tā kuo fakatahataha ‘a e kau Hongofulu mā taha mo kinautolu na‘a nau kau. 34Pea nau pehē mai, Kuo toetu‘u mo‘oni ‘a e ‘Eiki, pea kuo hā kia Saimone.

35Pea fakamatala mo kinaua ‘a e me‘a na‘e hoko ‘i he hala, pea mo hono ‘iloa ‘e kinaua ‘i he pakipaki ‘o e mā.

Ko e Hā ‘a Sīsū ki He‘ene Kau Akó

(Māt 28.16-20; Ma‘ake 16.14-18; Sioné 20.19-23; Ngā 1.6-8)

36Pea lolotonga ‘enau talanoa pehē mo ‘ene tu‘u ‘e ia ‘i honau lotolotonga, ‘o ne pehē kiate kinautolu, Si‘oto ‘ofa atu!#24.36 Si‘oto ‘ofa atu!: ‘Oku ‘ikai ke ‘asi ‘a e kupu ko ení‘i he ngahi hiki fuoloa ‘e ni‘ihi.

37Pea nau lilika mo manavahē tu‘u, ko ‘enau mahalo ko ha fa‘ahikehe ‘oku nau sio ki ai. 38Pea ne pehē kiate kinautolu, Ko e hā ‘oku mou puputu‘u ai? pea ko e hā ‘oku ake ai ‘a e ngaahi fifili pehē ‘i homou loto? 39Vakai mai ki hoku ongo nima ni, mo hoku va‘e, ko au mo‘oni ia: fāfā au ‘o ‘ilo; he ‘oku ‘ikai kakano mo hui ha fa‘ahikehe, ‘o hangē ko ia ‘oku mou sio ai ‘iate au.

40Pea ‘i he‘ene lea pehē, na‘a ne faka‘ali‘ali kiate kinautolu hono ongo nima mo e va‘e.#24.40 ‘Oku ‘ikai ke ‘asi ‘a e vēsíni ‘i he ngaahi hiki fuoloa ‘e ni‘ihi. 41Pea ‘i he‘enau kei tuingata‘a, koe‘uhi ko ‘enau fiefia mo ofoofo, na‘a ne toe pehē kiate kinautolu, ‘oku ai ha‘amou me‘akai heni? 42Pea nau ‘ange ki ai ha konga ika tunu. 43Pea ne to‘o ia, ‘o kai ‘i honau ‘ao.

44Pea ne pehē kiate kinautolu, Ko ‘eku ngaahi lea ē na‘a ku fai kiate kimoutolu ‘i he‘eku kei nofo mo kimoutolu, ‘o pehē, Kuo pau ke hoko ‘a e ngaahi me‘a kotoa pē kuo tohi kiate au ‘i he Lao ‘a Mōsese, mo e Tohi Palōfita, mo e Tohi Saame.

45Pea ne toki tatala honau loto ke nau ‘ilo hono ‘uhinga ‘o e Tohitapu; 46‘o ne folofola kiate kinautolu, Na‘e pehē pē hono tohi, ‘e feia ‘a e Mīsaia, pea te ne toetu‘u mei he pekia ‘i hono ‘aho tolu: 47pea ‘e malanga‘aki ‘i hono hingoa ‘a e fakatomala mo e fakamolemole angahala ki he kakai kotoa pē, ‘o kamata mei Selusalema. 48Ko kimoutolu ko e kau fakamo‘oni ki he ngaahi me‘a ni. 49Pea ko au ‘eni ‘oku ou tuku atu ‘a e tala‘ofa ‘a ‘eku ‘eiki kiate kimoutolu: pea ko kimoutolu te mou nofo ‘i Kolo, kae‘oua ke fakakofu ‘aki kimoutolu ha mālohi mei ‘olunga.#Ngā 1.4

Ko e Foki ‘a Sīsū ki Langi

(Ma‘ake 16.19,20; Ngā 1.9-11)

50Pea ne taki atu kinautolu ‘o a‘u ki.

Pētani; pea ne mafao atu hono ongo nima kiate kinautolu, ‘o ne tāpuaki‘i kinautolu.#Ngā 1.9-11 51Pea ‘iloange, lolotonga ‘ene tāpuaki‘i kinautolu, ne mavahe ia meiate kinautolu, ‘o tukutuku hake ki he langi.#24.51 ‘o… langi: ‘Oku ‘ikai ke ‘asi ‘a e kupu ko ení‘i he ngaahi hiki fuoloa ‘e ni‘ihi. 52Pea ko kinautolu, na‘a nau hū kiate ia, ‘o nau foki ki Selusalema ‘oku nau fiefia ‘aupito. 53Pea na‘a nau ma‘unganofo ki he Temipale he‘enau fakamālō‘ia ‘a e ‘Otua.

Currently Selected:

Luké 24: TMB

Highlight

Copy