Luké 21

Ko e Lī Me‘a‘ofa ‘a e Uitou

(Ma‘ake 12.41-44)

1PEA ‘i he‘ene hanga hake na‘a ne sio kiate kinautolu na‘e lī ‘enau ngaahi me‘a‘ofa ki he seifi, ko e kau koloa‘ia. 2Pea ne sio ki ha fefine uitou masiva ‘oku ne lī ai ha ongo ki‘i pa‘anga kapa. 3Pea pehē ‘e ia, ‘oku ou tala mo‘oni atu, ko e uitou ni, ‘a si‘i masiva ni, ne hulu atu ‘ene lī ‘iate kinautolu kotoa pē: 4he ko kinautolu fuli pē, na‘a nau lī mei he pa‘anga hulu ‘o ‘enau koloa ki he fokotu‘unga me‘a‘ofa na: ka ka fusimo‘omo ‘a si‘i fefine ni, ka ne lī hono kotoa ‘o e me‘a na‘a ne ma‘u ke tauhi ‘aki si‘ene mo‘ui.

Ko e Pau ke Faka‘auha ‘a e Temipalé

(Māt 24.1,2; Ma‘ake 13.1,2)

5Pea ‘i he lau ha ni‘ihi ki he Temipale, ‘a hono fakasani ‘aki ‘a e ngaahi maka matamatalelei, mo e ngaahi me‘a‘ofa, na‘a ne pehē, 6Ko e ngaahi me‘a ko ‘eni ‘oku mou tokanga‘i–‘e, tokaange ha taimi ‘e ‘ikai tuku ‘i heni ha fo‘i maka ‘o ta‘eholoki.

Ko e Fakatokanga he Ngaahi Faingata‘a mo e Ngaahi Fakatanga

(Māt 24.3-14; Ma‘ake 13.3-13)

7Pea nau fehu‘i kiate ia, ‘o pehē, Tangata‘eiki, pea ‘e hoko fakakū ‘a e ngaahi me‘a ko ia? Pea ko e hā ‘a e faka‘ilonga ‘oka ene ‘a e ngaahi me‘a ko ia ke hoko?

8Pea ne pehē, Vakavakai na‘a taki hē kimoutolu; koe‘uhi ‘e ai ha tokolahi te nau ha‘u ‘i he hingoa ‘o‘oku, mo nau pehē, Ko au ia; mo nau pehē foki, Kuo ofi hono taimi: ‘ā, ‘oua te mou muimui kiate kinautolu. 9Pea ‘oka mou ka fanongo ki he ngaahi tau, mo ha ngaahi maveuveu, ‘oua na‘a mou lilika; he kuo pau ke hoko ‘a e ngaahi me‘a pehē; kae ‘ikai hoko leva ‘a e ngata‘anga.

10Ko e taimi ko ia na‘a ne pehē kiate kinautolu, ‘e tu‘u ha kakai ki ha kakai, mo ha pule‘anga ki ha pule‘anga: 11pea ‘e ai ‘a e ngaahi fu‘u mofuike mo e ngaahi honge foki ‘i he ngaahi potu kehekehe mo e ngaahi mahaki faka‘auha; ko e ngaahi fu‘u me‘a fakailifia foki, mo e ngaahi faka‘ilonga ‘e hā mei langi. 12Ka ‘i he te‘eki ke hoko ‘a e ngaahi me‘a ko ia, te nau ala mālohi kiate kimoutolu, pea fakatanga‘i, mo nau faka‘ilo ki he ngaahi fakataha fakasiasi, mo tuku ki he ngaahi pilīsone, pea ‘e takina kimoutolu ki hē ngaahi tu‘i mo e ngaahi kōvana koe‘uhi ko e hingoa ‘o‘oku. 13Ka ‘e iku pē ko e fakamo‘oni ma‘amoutolu. 14Ko ia, tuku pau ‘i homou loto ke ‘oua na‘a tomu‘a fa‘u ha‘amou fakamatala:#Luk 12.11-12 15he te u toki ‘atu kiate kimoutolu ‘e au ha lea mo ha poto, ‘a ia ‘e ‘ikai lava ke tu‘u ki ai, pe tali, ‘e homou ngaahi fili fakataha. 16Pea ‘e faka‘ilo kimoutolu ‘e ho‘omou mātu‘a, ‘e ha tokoua, ‘e ha kāinga, ‘e ha kaume‘a; pea te nau tāmate‘i homou ni‘ihi. 17Pea te mou hoko ko e fehi‘anekina ‘e he kakai kotoa pē koe‘uhi ko e hingoa ‘o‘oku. 18Ka ‘e ‘ikai mole hamou tu‘oni lou‘ulu ‘e taha. 19‘I ho‘omou kītaki te mou ma‘u mai homou laumālie.

Ko e Pau ke Faka‘auha ‘a Selusalema

(Māt 24.15-21; Ma‘ake 13.14-19)

20Ka ‘oka mou ka vakai ki he kapui ‘o Selusalema ‘e he ngaahi matatau, te mou toki ‘ilo kuo ofi hono faka‘auha. 21Pea ke toki hola ki he mo‘unga ‘a kinautolu ‘oku ‘i Siutea; pea ko kinautolu ‘oku ‘i loto kolo ke hiki mei ai; pea ko kinautolu ‘oku ‘i ‘uta ke ‘oua te nau hū ki he kolo. 22He ko e taimi ia ‘o e sauni, ke fakakakato ‘a e ngaahi me‘a kuo tohi.#Hōs 9.7 23‘Oiauē kinautolu ‘oku feitama, mo kinautolu ‘oku toutama, ‘i he taimi ko ia! koe‘uhi ‘e ai ha fu‘u faingata‘a ‘i māmani, mo e houhau ki hē kakai ‘Isileli ni. 24Pea ‘e keina kinautolu ‘e he heletā, pea ‘e taki pōpula kinautolu ki he Senitaile kehekehe; pea ‘e malaki ‘a Selusalema ‘e he Senitaile, kae‘oua ke kakato ‘a e ngaahi kuonga ‘o e Senitaile.

Ko e Hā mai e Foha ‘o e Tangatá

(Māt 24.29-31; Ma‘ake 13.24-27)

25Pea ‘e ai ha ngaahi faka‘ilonga ‘i he la‘ā, mo e māhina, mo e ngaahi fetu‘u; pea ‘i māmani ‘e mamahi ‘a e ngaahi kakai, ko ‘enau puputu‘u ‘i he longoa‘a ‘o e tahi mo e peau:#‘Ais 13.10; ‘Isi 32.7; Sioelí 2.31; Fkhā 6.12-13 26‘e tō ‘a e manava ‘o e kakai ko ‘enau ilifia, mo e fakatu‘atamaki ki he ngaahi me‘a ‘oku hoko hifo ki māmani; koe‘uhi ‘e ngatōtō ‘a e ngaahi mālohinga ‘o e ngaahi langi. 27Pea te nau toki sio ki he Fanautama ‘a Tangata ‘oku hoko mai ‘i he ‘ao, pea ha‘u mo ia ‘a e fakangeingei mo e nāunau lahi.#Tān 7.13; Fkhā 1.7 28Pea ‘i he kamata hoko ‘a e ngaahi me‘a ko ia, mou hiki homou ‘ulu, ‘o hanga hake; he ‘oku ofi ai homou huhu‘i.

Ko e Ako mei he Fu‘u Fiki

(Māt 24.32-35; Ma‘ake 13.28-31)

29Pea ne lea‘aki ha fakatātā kiate kinautolu: Mou vakai ‘a e fiki, mo e ngaahi ‘akau kehekehe: 30ka nau ka talamuka leva, ‘oku mou lāu‘ilo ‘i ho‘omou sio ki ai, ‘oku ofi ‘a e fa‘ahita‘u māfana. 31Pehē foki kimoutolu, ka mou ka vakai kuo hoko ‘a e ngaahi me‘a ko ia, pea mou ‘ilo kuo ofi ‘a e Pule‘anga ‘o e ‘Otua.

32Ko au ē, ‘oku ou tala atu, ‘e ‘ikai ‘aupito mole ‘a e to‘utangata ko ‘eni, kae‘oua ke hoko hono kotoa. 33‘E mole ‘a e langi mo māmani: ka ko ‘eku ngaahi lea ‘e ‘ikai ‘aupito mole.

Ko e Fakatokanga

34Ka mou lamasi kimoutolu, na‘a ‘iloange ‘e mafatukituki homou loto, ko e me‘a ‘i he fa‘a kai, mo e fa‘a inu, mo e fa‘a lotomo‘ua ki he mo‘ui ni, pea lapasi kimoutolu ‘e he ‘aho ko ia ‘o hangē ko ha hele puna: 35hē te ne hoko ki he kakai kotoa pē ‘i he‘enau nofo pē ‘i he funga ‘o māmani kotoa. 36Ka mou ‘ā pē, mo lotu ‘i hē taimi kotoa pē, koe‘uhi ke mou lava ke hao mei he ngaahi me‘a ko ia fuli pē ‘oku ene ke hoko; pea ke tu‘u ‘i he ‘ao ‘o e Fanautama ‘a Tangata.

37Pea ka ‘aho, na‘a ne nofo ‘i he Temipale, ‘o fai ‘ene ako; ka ka po‘uli leva, na‘a ne ‘alu ‘o toka ‘i he mo‘unga ko ‘ōlive.#Luk 19.47 38Pea na‘e fa‘a uhu kiate ia ‘a e kakai kotoa ‘i he‘ene ‘i he Temipale ke fanongo kiate ia.

Currently Selected:

Luké 21: TMB

Highlight

Copy