Luké 18
18
Ko e Uitou mo e Fakamaau
1PEA ne lea‘aki ha fakatātā kiate kinautolu ke fakahā, ko hono tonu ke nau lotu ma‘u pē, ‘o ‘oua na‘a fiu: ‘o ne pehē. 2Tokua na‘e nofo ‘i he kolo ‘e taha ha fakamaau, ‘a ia na‘e ‘ikai te ne ‘a‘apa ki he ‘Otua, pe toka‘i ‘a e tangata. 3Pea na‘e ai ha fefine uitou ‘i he kolo ko ia, ‘a ia na‘e fa‘a ha‘u kiate ia he‘ene pehē, Ke ke sauni ma‘aku mo fakahaofi au mei hoku fili. 4Pea fuoloa mo e ‘ikai te ne tali: ka na‘e faifai pea ne pehē ‘i hono loto, Neongo ‘oku ‘ikai te u ‘a‘apa ki he ‘Otua, ‘uma‘ā ha‘aku toka‘i ha tangata. 5Ka koe‘uhiā ko e fakafiu mai ‘a e uitou ni te u taukapo‘i ia, na‘a toutu‘u mai ia ‘o ta‘engata, pea u kina ai.
6Pea folofola ‘a e ‘eiki, Fanongo ā ki he lau ‘a e fakamaau kākā. 7Pea ‘e ‘ikai koā ke fai ‘e he ‘Otua ‘a e sauni ma‘a hono kakai fili, ‘a ia ‘oku nau tangi kiate ia ‘i he ‘aho mo e pō, neongo ‘ene fakatotoka ange? 8Tala atu, te ne fai pē ha sauni ma‘anautolu, pea ‘e vave. Ka ‘oka hoko mai ‘a e Fanautama ‘a Tangata, te ne ‘ilo koā ha kei tui pehē ‘i māmani?
Ko e Fālesi mo e Tangata Tānaki Tukuhau
9Pea na‘a ne lea‘aki mo e fakatātā ko eni ke tau ki ha ni‘ihi na‘e ‘afungi ‘oku nau mā‘oni‘oni, mo nau fakasīkaka‘i hono toe ‘o e kakai: 10Tokua ko ha ongo tangata na‘a na ō hake ki he Temipale ke fai ‘ena lotu; ko e Fālesi ‘a e taha pea ko e taha ko e pōpilikane. 11Ko e Fālesi na‘a ne tu‘u taha atu, ‘o ne lotu,#18.11 tu‘u… lotu; ‘Oku pehē ‘i hono ngaahi hiki fuoloa ‘e ni‘ihi: tu‘u hake ‘o lotu pē kiate ia. ‘o pehē, ‘E ‘Otua, ‘oku ou fakafeta‘i atu, ‘oku ‘ikai te u hangē ko hono toe ‘o e kakai, ‘a e kau fakamālohi, mo e kau kākā, mo e kau fe‘auaki, kae‘uma‘ā ha‘aku hangē ko e pōpilikane ko eni. 12‘Oku ou ‘aukai tu‘o ua ‘i he uike, ‘oku ou ‘atu ki he siasi hono vahehongofulu ‘o e me‘a kotoa ‘oku ou ma‘u ‘i he‘eku ngāue. 13Ka ko si‘i pōpilikane na‘a ne tu‘u pē mei ha potu, ‘o mama‘o atu, pea na‘a mo hono mata na‘e ‘ikai te ne fa‘a hiki ki he langi; ka ka sī fatafata pē ia, ‘o ne pehē, ‘E ‘Otua, ke ke fakamolemole au, ‘a au angahala. 14Tala atu, na‘e ‘alu atu ‘a e toko taha ko ia ki hono ‘api, kuo ne ma‘u ha tonuhia na‘e lahi ‘i he tonuhia ‘a e tangata ‘e taha: he ko ia ‘oku ne hākeaki‘i ia, ‘e fakavaivai‘i; pea ko ia ‘oku ne fakavaivai‘i ia, ‘e hākeaki‘i.#Māt 23.12; Luk 14.11
Ko e Tāpuaki‘i ‘e Sīsū ha Fānau Iiki
(Māt 19.13-15; Ma‘ake 10.13-16)
15Pea na‘e ‘omi ‘e he kakai kiate ia ‘enau kau valevale foki, koe‘uhi ke ne ala kiate kinautolu: pea ‘i he vakai ki ai ‘e he kau ako na‘a nau kamata lolomi ‘a e kakai. 16Ka ka ui ange ‘e Sīsū ‘a e kau valevale, ‘o ne pehē, Tuku pē ‘a e kau tamaiki ke nau ha‘u kiate au, pea ‘oua ‘e ta‘ofi kinautolu: he ‘oku ma‘a e fa‘ahinga ko ia ‘a e Pule‘anga ‘o e ‘Otua. 17Ko au ē, ‘oku ou tala atu, Ko ia ‘e ‘ikai te ne tali ‘a e Pule‘anga ‘o e ‘Otua ‘o hangē ko ha tamasi‘i, ‘e ‘ikai ‘aupito hū ia ki ai.
Ko e Tangata Koloa‘ia
(Māt 19.16-30; Ma‘ake 10.17-31)
18Pea fakafehu‘i kiate ia ‘e ha toko taha, ‘a ia ko ha pule, ‘o ne pehē, ‘A e Tangata‘eiki lelei, ko e hā te u fai kae tō mo‘oku ‘a e mo‘ui ta‘engata?
19Pea pehē ‘e Sīsū kiate ia, Ko e hā ‘oku ke ui ai au ko e lelei? ‘Oku ‘ikai ha taha ‘oku lelei, ngata pē ‘i he ‘Otua toko taha. 20‘Oku ke ‘ilo pē ‘a e ngaahi fekau, ‘Oua na‘a ke fe‘auaki, ‘Oua na‘a ke fakapō, ‘Oua na‘a ke kaiha‘a, ‘Oua na‘a ke tukuaki, Faka‘apa‘apa ki ho‘o tamai mo ho‘o fa‘ē.#‘Eki 20.12-16; Teu 5.16-20
21Pea pehē ‘e ia, Ko e ngaahi lao ko ia kuo u tauhi ki ai kotoa pē talu ‘ete tamasi‘i.
22Pea ‘i he fanongo ki ai ‘e Sīsū, na‘a ne pehē kiate ia, ‘Oku kei toe ha me‘a ‘e taha ke ke fai: fakatau atu ‘a e me‘a kotoa pē ‘oku ke ma‘u, pea tufa hono pa‘anga ki he masiva, pea ‘e ai ha fu‘u koloa ‘e fa‘oaki ma‘au ‘i Hēvani: pea ke ha‘u, ‘o kau ‘i hoku lahi. 23Pea ‘i he‘ene fanongo ki he lea ko ia, na‘a ne mamahi lahi: he ko e toko taha ia na‘a ne koloa‘ia ‘aupito.
24Pea ‘i he sio kiate ia ‘e Sīsū na‘a ne pehē, Hono ‘ikai faingata‘a ki he kakai ma‘u pa‘anga ke a‘usia ‘a e Pule‘anga ‘o e ‘Otua! 25He ‘oku faingofua ke hū ha kāmeli ‘i ha ava‘i hui tuitui, ‘i he hū ‘a ha koloa‘ia ki he Pule‘anga ‘o e ‘Otua.
26Pea ko kinautolu na‘e fanongo ki ai na‘a nau pehē, Pea ko hai nai ‘e ala mo‘ui?
27Ka ka pehē ‘e ia, Ko e ngaahi me‘a ‘oku ‘ikai fa‘a lava ‘i he vakai ‘a e tangata, ‘oku malava pē ki he ‘Otua.
28Pea lea ‘a Pita, Vakai, ko kimautolu kuo mau li‘aki ‘a e ngaahi me‘a tonu ‘amautolu, ‘o mau muimui kiate koe.
29Pea ne pehē kiate kinautolu, Ko au ē, ‘oku ou tala atu, ‘oku ‘ikai ha taha kuo ne li‘aki ha fale, pe ha uaifi, pe ha ngaahi tokoua, pe ha mātu‘a, pe ha fānau, koe‘uhiā ko e Pule‘anga ‘o e ‘Otua. 30Ka te ne toe ma‘u mai ‘o lōlahi ‘i he nofo ko eni, pea ‘i he maama ka ha‘u ko e mo‘ui ta‘engata.
Ko e Fakahā ‘e Sīsū ‘Ene ‘Amanaki Pekiá.
(Māt 20.17-19; Ma‘ake 10.32-34)
31Pea ne ‘ave ‘a e kau Hongofulumāua, ‘o ne pehē kiate kinautolu, Ko eni, ‘oku tau ‘alu hake ki Selusalema, pea ‘e lava ai ‘a e ngaahi me‘a kotoa pē na‘e tohi ‘i he kau Palōfita ma‘a e Fanautama ‘a Tangata. 32He ‘e tuku atu ia ki he kau Senitaile, pea ‘e taukaea ia, mo pā‘usi‘i, mo ‘anuhia: 33pea te nau haha ia, mo tāmate‘i; pea ‘i hono tolu ‘o e ‘aho te ne toetu‘u.
34Ka ko kinautolu, na‘e ‘ikai ke momo‘i o‘o ki ai ha me‘a ‘e taha ‘o e ngaahi me‘a ko ia: pea na‘e mo‘u pulia ‘a e lea ni meiate kinautolu, ‘o nau ta‘elavea ai pē ‘a e ngaahi me‘a ‘oku lau.
Ko e Fakamo‘ui ‘e Sīsū ha Tangata Kolekole Na‘e Kui
(Māt 20.29-34; Ma‘ake 10.46-52)
35Pea ‘i he faifai ‘o ne fakaofiofi ki Selikō, tokua na‘e nofo mei he ve‘ehala ha motu‘a kui, ko e fai ‘ene kole. 36Pea ‘i he‘ene fanongo ki he ‘alu ange ha fu‘u kakai, na‘a ne fehu‘i pe ko e hā nai ia.
37Pea nau tala ki ai, Ko Sīsū mei Nāsaleti ‘oku me‘a mai.
38Pea ne kalanga ange, ‘o pehē, Sīsū ē! Hako ‘o Tēvita, ‘alo‘ofa mai!
39Pea ko kinautolu na‘e mu‘omu‘a na‘a nau kamata lolomi ia ke ne tuku: ka ko e motu‘a, na‘e fakautuutu ai ‘ene kalanga, Hako ‘o Tēvita ē, ‘alo‘ofa mai!
40Pea tu‘u ai ‘a Sīsū, ‘o fekau ke taki mai ‘a e motu‘a: pea ‘i he‘ene ofi mai, na‘a ne fehu‘i kiate ia. 41Ko e hā ‘a e me‘a ‘oku ke holi ke u fai ma‘a u?
Pea ne pehē, ‘Eiki, ke u ‘ā mu‘a.
42Pea folofola ‘e Sīsū kiate ia, Ke ke ‘ā; kuo fakamo‘ui koe ‘e ho‘o tui.
43Pea ne ‘ā leva; ‘o ne muimui ki ai, mo fakamālō‘ia ‘a e ‘Otua. Pea ko e kau Siu kotoa ‘i he‘enau sio ki ai, na‘a nau vīkiviki ki he ‘Otua.
Currently Selected:
Luké 18: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
