Luké 16
16
Ko e Pule Kākā
1PEA ne lea foki ki he kau ako, ‘o pehē, Tokua na‘e ai ha tangata koloa‘ia, mo e matāpule na‘e tauhi ‘ene koloa: pea na‘e faka‘ilo ‘a e matāpule kiate ia, tokua ‘oku ne toloveka ‘aki ‘ene koloa. 2Pea ne ui ia, ‘o ne pehē ki ai, Ko e hā ‘a e me‘a ni ‘oku ou fanongo ki ai ‘oku kau kiate koe? tuku mai ‘a e tohi ‘o ho‘o tauhi koloa, he tala‘ehai ‘e lava ke ke toe tauhi. 3Pea pehē ‘e he tauhi koloa ‘i hono loto, Ko e hā ‘aku ai ‘e fai? he ‘oku to‘o meiate au ‘a e lakanga ‘e he‘eku ‘eiki: ‘oku ‘ikai te u mafai ke keli; pea ‘oku ou mā ke mo‘ui faka‘atukai. 4‘ā ‘oku ou ‘ilo pē ‘a e me‘a te u fai kae fiema‘u au ‘e he ni‘ihi ki ho‘onautolu fale, ‘oka hifo au mei he lakanga. 5Pea ne ui ange tāutaha ‘a e kakai na‘e mo‘ua ki he‘ene ‘eiki, ‘o ne pehē ki he ‘uluaki, ‘oku fiha ho mo‘ua ki he‘eku ‘eiki?
6Pea ne tali, Ko e pōkete lolo ‘e teau. Pea pehē ‘e ia ki ai, Ko ena ho‘o ngaahi tohi, pea ke nofo leva ‘o tohi ai ke nimangofulu pē.
7Hili ia na‘a ne pehē ki ha taha, Mo koe foki, ‘oku fiha ho‘ou mo‘ua?
Pea ne pehē, Ko e tangai uite ‘e teau.
Pea ne lea ki ai, Ko ena ho‘o ngaahi tohi, pea ke tohi ai ke valungofulu pē.
8Pea fakamālō ‘e he‘ene ‘eiki ki he tauhi–koloa kākā, koe‘uhi ko e ngali poto ‘ene fai: he ko e fānau ‘a e maama ko eni, ‘i he fai mo ho‘onautolu fa‘ahinga, ‘oku ngali poto ange ‘enau tō‘onga ‘i he tō‘onga ‘a e fānau ‘a e maama.
9Pea ko au foki ‘oku ou pehē atu, Mou ngāue ‘aki ‘a e koloa kākā ke tupu ai ha kakai ‘e ‘ofa mai; koe‘uhi ‘oka ‘unu ia, pea nau fiema‘u kimoutolu ki he ngaahi tēniti ta‘engata. 10Ko ia ‘oku ne lototō ‘i he me‘a ‘oku si‘i, te ne lototō foki ‘i he me‘a ‘oku lahi: pea ko ia ‘oku ne kākā ‘i he me‘a ‘oku si‘i, te ne kākā foki ‘i he me‘a ‘oku lahi. 11‘Io, pea kapau kuo ‘ikai te mou lototō ‘i he fai ki he koloa kākā, ko hai te ne falala kiate kimoutolu ‘o ‘atu ‘a e koloa mo‘oni? 12Pea kapau kuo ‘ikai te mou lolotō ‘i he ngāue‘aki ‘a e koloa ‘a ha taha kehe, ko hai ‘e ‘atu ho‘omou koloa ‘amoutolu?
13‘Oku ‘ikai ke lava ‘e ha tamaio‘eiki ke ‘eiki ‘aki ha ‘eiki ‘e toko ua: he te ne fehi‘a ki he taha, kae ‘ofa‘i ‘a e taha; pea te ne piki ki he taha, kae ta‘etoka‘i ‘a e taha. ‘oku ‘ikai te mou lava ke ‘eiki ‘aki ‘a e ‘Otua pea mo Koloa, fakatou‘osi.#Māt 6.24
Ko ha Toe Ngaahi Fakahinohino ‘a Sīsū
(Māt 11.12,13; 5.31,32; Ma‘ake 10.11,12)
14Pea na‘e fanongo ki he ngaahi me‘a ko ia ‘e he kau Fālesi, ‘a ia ko e fa‘ahinga ‘ofa ki he pa‘anga; pea nau fingofingo kiate ia. 15Pea ne pehē kiate kinautolu, Ko kimoutolu ia ‘oku mou ngāue pē ke hā totonu ki he kakai; ka ‘oku mea‘i ‘e he ‘Otua homou loto: he ko e me‘a ‘oku fungani ‘i he lau ‘a e kakai ko e fakalielia pē ia ‘i he vakai ‘a e ‘Otua.
16Na‘e ‘i ai ‘a e Lao mo e kau Palōfita ‘o a‘u kia Sione: talu mei ai mo e ongoongoa ‘o e Pule‘anga ‘o e ‘Otua, kae ‘ohofia ia ‘e he kakai takitaha.#Māt 11.12-13 17Ka ‘oku faingofua ke mole ‘a e langi mo māmani ‘i he tō kelekele ha fo‘i kohi ‘e taha ‘o e Lao.#Māt 5.18
18‘Ilonga ha taha ‘oku ne li‘aki hono uaifi, ‘o mali mo ha fefine kehe, ‘oku ne fe‘auaki: pea ko ia te ne mali mo ia kuo li‘aki ‘e hono husepāniti, ‘oku ne tono fefine.#Māt 5.32; 1 Kol 7.10-11
Ko e Tangata Kolekole mo e Tangata Tu‘umālie
19Ko eni: Tokua ko e tangata ‘e taha na‘e koloa‘ia, pea na‘a ne ‘ai ma‘u pē ‘a e kofu kulokula mo e līneni mahu‘inga, pea ne kai kātoanga ‘i he ‘aho kotoa pē. 20Pea ai mo ha motu‘a masiva, ko hono hingoa tokua ko Lāsalosi, kuo lī atu ia fe‘unga mo e hū‘anga ‘o e fale ‘o e matāpule, ko e toko taha na‘e papala fu‘u. 21Pea faka‘amu ia ke ‘omi ‘a e ngaahi me‘a na‘e ngangana mei he tēpile ‘a e koloa‘ia ke ne mākona ai; ka ko e fanga kulī foki na‘a nau omi, ‘o ‘emohia hono papala. 22Pea faifai pea pekia ‘a si‘i masiva, pea fata ange ia ‘e he kau ‘āngelo ki he fatafata ‘o ‘Epalahame: na‘e pekia foki ‘a e matāpule koloa‘ia, pea tanu. 23Pea ‘i he‘ene ‘i Hētesi#16.23 Hētesi; Ko e nofo‘anga??? ia ‘o e kakai kuo maté. na‘a ne hanga hake ke vakai, he kuo ne mo‘ua ‘i he ngaahi mamahi; pea ne ‘ilo ‘a ‘Epalahame ‘oku nofo mama‘o atu, pea mo Lāsalosi ‘oku faaki ki hono fatafata. 24Pea kalanga ‘e ia ‘o ne pehē, ‘Alā ‘Epalahame, ‘alo‘ofa kiate au, mo ke fekau mai ‘a Lāsalosi ke ne unu hono mu‘a tuhu ki he vai, mo fakamokomoko hoto ‘elelo ‘o‘ota ni; he ‘oku ou mamahi ‘i he afi ni. 25Ka ka pehē ‘e ‘Epalahame, Nga‘ata, manatu na‘a ke ma‘u kātoa ‘a ho‘o ngaahi me‘a lelei ‘i ho‘o mo‘ui; pehē foki na‘e ma‘u ‘e Lāsalosi ‘a e ngaahi kovi: ka ko eni, ‘i he potu ni, ‘oku ne ma‘u ‘a e fiemālie, ka ko koe ‘a e mamahi. 26Kae‘uma‘ā, ‘i he vaha‘a ‘onautolu mo koe ‘oku ‘i ai ha fu‘u vanu kuo ma‘uma‘uluta hono fokotu‘u: koe‘uhi ke ‘ilonga kinautolu ‘oku fie ‘alu atu mei heni kiate kimoutolu ke ‘oua te nau lava; ‘uma‘ā ha laka mai kiate kimautolu mei hena.
27Pea tali ‘e ia, Kapau ko ia, pea ko ‘eku kole kiate koe, ‘alā, ke ke fekau ia ki he ‘api ‘o ‘eku ‘eiki: 28he ‘oku ai hoku fototehina ‘e toko nima; koe‘uhi ke ne lea fakapatonu kiate kinautolu, ke ‘oua na‘a toe ha‘u mo kinautolu ki he potu fakamamahi ko eni.
29Ka ka pehē ‘e ‘Epalahame, ‘oku nau ma‘u ‘a Mōsese mo e kau Palōfita; nau tokanga mu‘a ki he ngaahi tohi ko ia.
30Ka ka pehē ‘e ia, Fakamolemole, ‘alā ‘Epalahame, ka ‘o kapau ‘e ‘alu ange ha taha ‘iate kinautolu kuo pekia, kuo pau te nau fakatomala.
31Ka ka tali ‘e ia, Kapau ‘e ‘ikai te nau tokanga kia Mōsese mo e kau Palōfita, ‘e ‘ikai fakaloto‘i kinautolu neongo ‘e toetu‘u ha taha mei he pekia.
Currently Selected:
Luké 16: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
