Sioné 21

Ko e Hā ‘a Sīsū ki He‘ene Kau Ako ‘e Toko Fitu

1HILI ‘a e ngaahi me‘a ko ia, na‘a ne toe fakahā ia ki he kau ako ‘i he Tahi ‘o Taipiliō: pea ko eni ‘a e anga ‘o ‘ene fai. 2Na‘e ‘i ai fakataha ‘a Saimone Pita, mo Tōmasi ‘a ia ‘oku ui ko Titimasi, mo Nātaniela ‘a e tama mei Kena ‘i Kāleli, mo e ongo foha ‘o Sēpeti, pea mo ha toko ua kehe ‘o ‘ene kau ako. 3Pea lea kiate kinautolu ‘a Saimone Pita, Te u ‘alu au ‘o toutai.#Luk 5.5 Pea nau pehē kiate ia, Te tau ō foki mo koe. Pea nau ‘alu atu ‘o heka vaka; pea ko e pō ko ia na‘e ‘ikai te nau momo‘i ma‘u ha me‘a.

4Pea ‘i he‘ene hengihengi hake, na‘e tu‘u ‘a Sīsū ‘i he matātahi: ka na‘e ‘ikai ‘aupito ‘ilo ‘e he kau ako ko Sīsū ia. 5Pea lea ‘a Sīsū kiate kinautolu, Tamaiki, ‘oku ai ha‘amou kiki?

Pea nau tali ki ai, ‘Oku ‘ikai.

6Pea pehē ‘e ia kiate kinautolu, ‘a‘au ‘a e kupenga ki he mata‘u ‘o e vaka, pea te mou ola. Pea nau ‘a‘au ai, pea ‘ikai ai ke nau matoho ‘eni, koe‘uhi ko e lahi ‘o e ika.

# Luk 5.6 7Ko ia na‘e pehē kia Pita ‘e he ako ko ia na‘e ‘ofa ai ‘a Sīsū, Ko e ‘Eiki pē. Pea ko Saimone–‘a Maka foki–‘i he‘ene fanongo leva ko e ‘eiki ia, na‘a ne nono‘o hono kofu, (he na‘e vala pē ‘o ne hopo ki tahi. 8Ka ka omi ‘a e kau ako kehe ‘i he ki‘i vaka; (he na‘e ‘ikai te nau loko mama‘o mo ‘uta, fe‘unga nai mo ha kiupite ‘e uangeau ‘o nau taulani mai ‘a e kupenga mo e ika. 9Pea ‘i he‘enau hifo ai ki ‘uta, na‘a nau vakai ki ha afi malala ‘oku tu‘u ai, mo ha mata‘i ika kuo fakaheka ki ai, mo ha fo‘i mā. 10Pea me‘a ‘e Sīsū kiate kinautolu, Mou ‘omi ha ni‘ihi mei ho‘omou ika kuo mou toki ma‘u ni.

11Pea heka ki vaka ‘a Saimone Pita, ‘o ne toho ‘a e kupenga ki ‘uta, kuo fonu ‘i he ngaahi ika lalahi, ko hono lau ko e ika ‘e teau mo e ika ‘e nimangofulu mo e ika ‘e tolu: pea neongo hono lahi, ka na‘e ‘ikai mahae ‘a e kupenga. 12Pea me‘a ‘a Sīsū kiate kinautolu, Mou omi ‘o fai ho‘omou pelekifasi. Pea na‘e ‘ikai ha taha ‘i he kau ako ‘e fakato‘oto‘a ke huhū ange kiate ia, ‘o pehē, Ko hai tū koe? He na‘a nau ‘ilo ko e ‘Eiki ia. 13Pea me‘a mai ‘a Sīsū, ‘o ne to‘o ‘a e fo‘i mā, ‘o ‘ange kiate kinautolu, pea pehē foki mo e mata‘i ika.

14Ko hano tu‘o tolu ‘eni ‘o ‘ene ha ‘a Sīsū ki he kau ako, hili ‘ene toetu‘u mei he pekia.

Ko Sīsū mo Pita

15Pea kuo fai leva ‘enau pelekifasi, pea me‘a ‘e Sīsū kia Saimone Pita, Saimone, foha ‘o Sione, ‘oku ke ‘ofa kiate au ‘o lahi ‘i ha‘anautolu ni?

Pea ne pehē ki ai, ‘Io, ‘Eiki; ‘oku ke mea‘i ‘oku ou ‘ofa mo‘oni kiate koe. Pea ne folofola ki ai, Fafanga si‘eku fanga lami.

16Pea ne toe me‘a kiate ia, ko hono tu‘o ua, Saimone, foha ‘o Sione, ‘oku ke ‘ofa kiate au?

Pea ne pehē kiate ia, ‘Io, ‘Eiki; ‘oku ke mea‘i ‘oku ou ‘ofa mo‘oni kiate koe. Pea ne folofola ki ai, Tauhi ‘eku fanga sipi.

17Pea ne me‘a kiate ia, ko hono tu‘o tolu, Saimone, foha ‘o Sione, ‘oku ke ‘ofa mo‘oni kiate au? Pea mamahi ‘a Pita ‘i he tu‘o tolu ‘ene pehē mai, ‘Oku ke ‘ofa kiate au?

Pea ne pehē ange, ‘Eiki, ‘oku ke ‘afio‘i ‘a e me‘a kotoa pē; ‘oku ke mea‘i ‘oku ou ‘ofa mo‘oni kiate koe.

Pea folofola ‘a Sīsū kiate ia, Ke ke fafanga si‘eku fanga sipi.

18Ko au ē, ko au ē, ‘oku ou tala atu, ‘I ho‘o talavou na‘a ke ‘ai ‘e koe ho no‘o, pea ke ‘eve‘eva ki ha potu pē te ke loto ki ai; ka ‘oka ke ka motu‘a, te ke mafao atu ho ongo nima, kae nono‘o koe ‘e ha taha kehe, pea te ne fua koe ki ha potu ‘oku ‘ikai te ke loto ki ai. 19Na‘a ne lea pehē, ko ‘ene fakatatau atu ‘a e anga ‘o e mate‘anga te ne fakaongoongolelei ai ‘a e ‘Otua. Pea hili ‘ene lea ko ia, na‘a ne folofola kiate ia, Muimui mai kiate au.

Ko Sīsū mo e Toko taha Na‘á ne ‘Ofa Taha ai He‘ene Kau Akó.

20Pea tafoki ange ‘a Pita, ‘o ne vakai ki he ako na‘e ofa ai ‘a Sīsū ‘oku ne muimui mai, (‘a e toko taha ko ia ne tokoto foki ‘i he kai, ‘o faaki ki hono fatafata, mo pehē kiate ia, ‘Eiki, ko hai ia ho lavaki?),#Sioné 13.25 21ko ia, ‘i he mamata ‘e Pita ki he toko taha ko ia, na‘a ne pehē kia Sīsū, ‘Eiki, ka ko e hā ‘a e tangata ni ia?

22Pea folofola kiate ia ‘e Sīsū, Kapau ko hoku loto ke nofo pē ia kae‘oua ke u ha‘u, ka he ‘oku ke kau ai? fai pē ho‘o muimui ‘au kiate au.

23Ko ia na‘e, mafola ki he kāinga ‘a e tala ko eni, tokua ‘e ‘ikai pekia ‘a e ako ko ia: kae tala‘ehai ko e folofola ‘a Sīsū kiate ia na‘e pehē, ‘e ‘ikai te ne mate; ka ko eni pē, Kapau ko hoku loto ke nofo pē ia kae‘oua ke u ha‘u, ka he ‘oku ke kau ai?

24Ko eni ia ‘a e ako ‘oku ne fakamo‘oni ki he ngaahi me‘a ni, pea na‘a ne tohi ‘a e ngaahi me‘a ko ia: pea ‘oku mau ‘ilo ‘oku mo‘oni ‘ene fakamo‘oni.

Ko e Tātuku

25Pea ‘oku ‘i ai mo e ngaahi me‘a lahi ne fai ‘e Sīsū; ‘a ia ka ne tohi takitaha, ‘oku te pehē, na‘a mo māmani ‘e ‘ikai hao ai ‘a e ngaahi tohi ‘e fai.

Currently Selected:

Sioné 21: TMB

Highlight

Copy