Sioné 18
18
Ko Hono Lavaki‘i mo Hono Taki Atu ‘o Sīsuú
(Māt 26.47-56; Ma‘ake 14.43-50; Luk 22.47-53)
1PEA hili ‘ene folofola pehē ‘a Sīsū, Na‘a ne ‘alu atu mo ‘ene kau ako, ‘o ne laka ki he tu‘a vai-uinitā ko Kitilone; pea ko e potu ko ia na‘e tu‘u ai ha ngoue tapu, pea ne hū ki ai, ‘e ia mo ‘ene kau ako. 2Ka ko Siutasi foki, ko hono lavaki, na‘a ne ‘ilo ki he potu: he na‘e fa‘a fakataha ki ai ‘a Sīsū mo ‘ene kau ako. 3Pea kuo ma‘u leva ‘e Siutasi ‘a e vāhengatau, pea mo ha kau ‘ōfisa mei he hou‘eiki taula‘eiki mo e kau Fālesi, pea ne ha‘u ki he potu ko ia mo e ngaahi tūhulu mo e ngaahi maama mo e mahafu. 4Pea ko Sīsū, neongo na‘a ne mea‘i ‘a e ngaahi me‘a kotoa pē ‘oku tu‘unuku mai kiate ia, ka na‘a ne hā‘ele atu pē, ‘o ne folofola kiate kinautolu, Ko hai ‘oku mou kumi ki ai?
5Pea nau tali ki ai, Ko Sīsū mei Nāsaleti.
Pea folofola ia kiate kinautolu, Ko au ‘eni. (Pea na‘e tu‘u mo kinautolu foki ‘a Siutasi ko hono lavaki.)
6Pea ‘i he‘ene me‘a ko ia kiate kinautolu, ‘o pehē, Ko au ‘eni, na‘a nau holomui, ‘o tō ki he kelekele. 7Pea ne toe fehu‘i ai kiate kinautolu, Ko hai ‘oku mou kumi ki ai?
Pea nau pehē, Ko Sīsū mei Nāsaleti.
8Pea tali ‘a Sīsū, Ne u tala kiate kimoutolu, Ko au ‘eni: ko ia kapau ko au ‘oku mou kumi ki ai, pea tukuange ‘a e tu‘unga me‘a ni ke nau ‘alu. 9Ko e fai ia koe‘uhiā ke fakamo‘oni ki he folofola na‘e ne fai, ‘o pehē, Ko kinautolu kuo ke foaki mai, ne ‘ikai te u tuku hanau taha ke mole.
10Pea ko Saimone–‘a Maka foki–‘a ia kuo ma‘u heletā, na‘a ne unuhi ia, ‘o ne taa‘i ‘a e tamaio‘eiki ‘a e Taula‘eiki Lahi, ‘o ne tu‘usi hono lau‘i telinga to‘omata‘u, Ko e hingoa ‘o e tamaio‘eiki ko Malikusi. 11Pea me‘a ‘a Sīsū kia Pita, ‘ai ‘a e heletā ki hono ‘ai‘anga: ko e pehē koā ke ‘oua na‘a ku inu ‘a e ipu kuo tuku mai ‘e he Tamai!#Māt 26.39; Ma‘ake 14.36; Luk 22.42
Ko e Fehangahangai ‘a Sīsū mo ‘Ānasi
12Ko ia ko e vāhengatau mo e ‘eikitau mo e kau ‘ōfisa ‘a ha‘a Siu na‘a nau puke ‘a Sīsū, ‘o ha‘i ia: 13‘o nau motu‘a taki ia kia ‘Ānasi, he ko e tamai ia ‘a e uaifi ‘o Kaiafasi, ‘a ia na‘e Taula‘eiki Lahi ‘i he ta‘u ko ia. 14Pea ko Kaiafasi foki ia na‘a ne fale‘i ‘a ha‘a Siu, ‘o pehē, Ko hono lelei ke mate ha tangata ‘e taha koe‘uhi ko e fa‘ahinga tapu.#Sioné 11.49-50
Ko e Fakafisinga‘i ‘e Pita ‘a Sīsū
(Māt 26.69,70; Ma‘ake 14.66-68; Luk 22.55-57)
15Pea na‘e muimui kia Sīsū ‘a Saimone Pita, pea pehē mo ha tama ako ‘e taha: pea ko e tama ako ko ia ko e fe‘iloaki ‘o e Taula‘eiki Lahi, pea hū fakataha ia mo Sīsū ki he loto‘ā ‘o e Taula‘eiki Lahi. 16Ka ka tu‘u ‘a Pita ‘i tua‘ā, ‘i he matapā, Ko ia na‘e ‘alu atu ‘a e tama ako ‘e taha, ‘a ia ko e fe‘iloaki ‘o e Taula‘eiki Lahi, ‘o ne lea ki he fefine na‘e le‘o matapā, ‘o ne fakahū mai ‘a Pita. 17Pea lea ai kia Pita ‘e he kaunanga na‘e le‘o matapā, Ko koe foki ko e taha ‘i he kau ako ‘a e tangata na, ‘o?
Pea pehē ‘e ia, ‘Oku ‘ikai.
18Pea na‘e tutu‘u ai ‘a e kau tamaio‘eiki mo e kau ‘ōfisa, kuo nau tafu ha afi malala; he na‘e momoko: pea nau mūmū ai: pea na‘e ‘iate kinautolu ‘a Pita foki, ‘oku ne tu‘u ‘o mūmū.
Ko Hono Faka‘eke‘eke ‘e he Taula‘eiki Lahí ‘a Sīsū
(Māt 26.59-66; Ma‘ake 14.55-64; Luk 22.66-71)
19Pea fakafehu‘i ‘e he Taula‘eiki Lahi kia Sīsū, ki he‘ene kau ako, pea mo ‘ene tokāteline. 20Pea tali ‘e Sīsū ki ai, Ko e toko taha au kuo u lea ‘asi, ‘o fai ki māmani; ko ‘eku ako na‘e fai ma‘u pē ‘i ha falelotu, kae‘uma‘ā ‘i he Temipale, ‘a e potu ‘oku fakataha ki ai ‘a ha‘a Siu kotoa; pea na‘e ‘ikai te u fai fūfūnaki ha momo‘i lea. 21Ko e hā ‘oku ke fehu‘i ai kiate au? fehu‘i pē kiate kinautolu kuo fanongo kiate au, pe ko e hā ‘eku lea na‘e fai kiate kinautolu: ‘ē, ‘oku lāu‘ilo ‘e kinautolu ni ‘a e ngaahi me‘a kuo u lea‘aki.
22Pea ‘i he‘ene me‘a pehē, pea ko e toko taha ‘i he kau ‘ōfisa na‘e tu‘u ai na‘a ne ‘ai ha pekalae ‘o Sīsū, ‘o ne pehē, ‘Oku pehē koā ho‘o tali ki he Taula‘eiki Lahi?
23Pea tali ‘e Sīsū ki ai, Kapau kuo kovi ha‘aku lea, pe‘i fakahaa‘i ‘a e kovi: ka ‘o kapau kuo lelei, pea ko e hā kuo ke taa‘i ai au?
24Pea fekau ai ‘e ‘Ānasi ke ‘ave ha‘isia ia kia Kaiafasi ko e Taula‘eiki Lahi.
Ko e Toe Fakafisinga‘i ‘e Pita ‘a Sīsū
(Māt 26.71-75; Ma‘ake 14.69-72; Luk 22.58-62)
25Pea lolotonga ia mo e tu‘u ‘a Saimone Pita, ‘o mūmū.
Pea nau pehē ai kiate ia, Ko koe foki ko e toko taha ‘i he‘ene kau ako, ‘o?
Ka ka faka‘ikai ‘e ia, ‘o ne pehē, ‘Oku ‘ikai.
26Pea lea ha toko taha ‘o e kau tamaio‘eiki ‘a e Taula‘eiki Lahi, ‘a ia ko e toko taha na‘e kāinga mo e tangata ne tu‘usi hono telinga ‘e Pita, ‘o ne pehē, ‘Ikai na‘a ku mātu‘aki sio kiate koe ‘i he ngoue tapu fakataha mo ia?
27Pea toe faka‘ikai ai ‘e Pita: pea ‘u‘ua leva ‘a e moa.
Ko e Fakamāu‘i ‘e Pailato ‘a Sīsū
(Māt 27.1-2,11-14; Ma‘ake 15.1-5; Luk 23.1-5)
28Pea nau taki ai ‘a Sīsū mei he fale ‘o Kaiafasi ki he Palasi: pea na‘e kei hengihengi; pea na‘e ‘ikai te nau hū ‘e kinautolu ki he Palasi, koe‘uhi ke ‘oua te nau ta‘ema‘a ai, ka nau kai ‘a e Pāsova. 29Ko ia na‘e ‘alu atu ai ‘a Pailato ki tu‘a kiate kinautolu, pea ne pehē, Ko e hā ‘a e talatalaaki ‘oku mou ha‘u mo kimoutolu ki he tangata ni?
30Pea nau tali ‘o nau pehē kiate ia, Ka ne ‘ikai ko e siana fai kovi ia, tala‘ehai te mau tukuange kiate koe.
31Pea me‘a ai ‘a Pailato kiate kinautolu, Pe‘i ‘ave ia ‘e kimoutolu, ‘o mou fakamaau ‘o fakatatau ki ho‘omou lao.
Pea lea ai kiate ia ‘e ha‘a Siu, Ka ‘oku ‘ikai ngofua ‘emau tāmate‘i ha taha–
32ko e fai pē ke fakamo‘oni ki he folofola ‘a Sīsū, ‘a ia ne ne fai, he‘ene fakatātā atu ‘a e mate‘anga te ne pekia ai.#Sioné 3.14; 12.32
33Ko ia na‘e toe hū ai ‘a Pailato ki he Palasi, ‘o ne ui ange ‘a Sīsū, ‘o ne pehē ki ai, Ko koe ko e Tu‘i ‘o e kakai Siu, ‘ō?
34Pea tali ‘e Sīsū, Ko ho‘o lea pehē ‘iate koe, pe ‘oku ‘i ai ha ni‘ihi kuo nau fakahā pehe‘i au kiate koe?
35Pea tali ‘a Pailato, He ko e Siu au? Ko ho kakai ‘o‘ou mo e hou‘eiki taula‘eiki kuo nau tuku koe kiate au. Ko e hā kuo ke fai?
36Pea tali ‘e Sīsū, Ko hoku pule‘anga ‘oku ‘ikai ‘o e maama ko eni: ka ne ‘o e maama ko eni ‘a hoku pule‘anga, pehē ‘e tau ha‘aku kau ‘ōfisa ke ta‘ofi hoku tukuange ki ha‘a Siu: ka ko eni, ko hoku pule‘anga ‘oku ‘ikai ‘o ‘eni.
37Ko ia na‘e lea ai ‘a Pailato kiate ia, pea tā ko e tu‘i koe, ‘ō?
Pea tali ‘e Sīsū, Ko ia pē ‘oku ke me‘a: ko e tu‘i au. Ko e me‘a ko ia na‘e fanau‘i ai au, pea ko e me‘a ko ia kuo u ha‘u ai ki māmani, koe‘uhi ke u fakahaa‘i ‘a e mo‘oni. Ko ia kotoa pē ‘oku ‘o e mo‘oni ‘oku ne tokanga ki hoku le‘o.
38Pea me‘a ‘e Pailato kiate ia, Ko e hā tū ‘a e mo‘oni? Pea ‘i he‘ene lea pehē, na‘a ne toe ‘alu kitu‘a ki ha‘a Siu, ‘o ne pehē kiate kinautolu, Ko au ‘oku ‘ikai te u momo‘i ‘ilo ha hia ‘a e tangata ni.
Ko Hono Hilifaki ‘ia Sīsū ‘a e Tautea Maté
(Māt 27.15-31; Ma‘ake 15.6-20; Luk 23.13-25)
39Ka ko eni, ‘oku ‘i ai homou anga foki, ke u vete atu ha pōpula ‘e taha ‘i he Pāsova: pea ko homou loto koā ke u vete atu ‘a e Tu‘i Siu?
40Pea nau toe kalanga ai kotoa pē, ‘o pehē, ‘Oua ‘e tuku mai ‘a e siana na, ka ko Palāpasa. Pea ko eni ko Palāpasa ko ha kaiha‘akau ia.
Currently Selected:
Sioné 18: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
