Sioné 10

Ko e Talanoa ki he Sipí

1Ko au ē, ko au ē, ‘oku ou tala atu, Ko ia ‘oku ‘ikai hū ‘i he matapā ki he loto‘ā sipi, ka ‘oku ne kaka ‘i ha potu kehe, ko e toko taha ko ia ko e kaiha‘a mo fakamālohi, 2ka ko ia ‘oku hū ‘i he matapā ko ha tauhi ia ‘o e fanga sipi. 3‘Oku to‘o ‘e he le‘o matapā ki ha toko taha pehē; pea ‘oku tokanga ‘e he fanga sipi ki hono le‘o; pea ‘oku ne ui ‘ene fanga sipi ‘a‘ana ‘i honau hingoa takitaha, ‘o ne taki kinautolu ki tua‘ā, 4pea ka ‘osi ‘ene tuku kitua‘ā ‘ene me‘a ‘a‘ana kotoa pē, ‘oku ne ‘alu mu‘omu‘a ia ‘iate kinautolu, pea ‘oku muimui ‘a e fanga sipi kiate ia, koe‘uhi ‘oku nau ‘ilo hono le‘o. 5Ka ‘e ‘ikai ‘aupito te nau muimui ki ha kehe, ka te nau hola meiate ia; koe‘uhi ‘oku ‘ikai te nau ‘ilo ‘a e le‘o ‘o e kehe.

6Ko e fakatātā ko eni na‘e fai ‘e Sīsū kiate kinautolu: ka na‘e ‘ikai ‘ilo ‘e he fa‘ahinga ko ia pē ko e hā ‘ene lea ‘oku fai mai.

Ko Sīsū ko e Tauhi Sipi Lelei

7Ko ia na‘e toe folofola ‘a Sīsū, Ko au ē, ko au ē, ‘oku ou tala atu, Ko au ko e matapā ‘o e fanga sipi. 8Ko kinautolu kotoa pē na‘e ha‘u mu‘omu‘a ‘iate au, ko e kau kaiha‘a kinautolu mo fakamālohi: ka na‘e ‘ikai tokanga kiate kinautolu ‘e he fanga sipi. 9Ko au pē ko e matapā: ka kuo hū ha taha ‘iate au ‘e fakamo‘ui ia, pea te ne hū atu, pea te ne hū mai, ‘o ma‘u me‘akai. 10Tala‘ehai ‘oku ha‘u ‘a e kaiha‘a ki ha me‘a, ka ke kaiha‘a pē, mo tāmate‘i, mo maumau: ko au kuo u ha‘u koe‘uhi ke nau ma‘u mo‘ui, pea ke nau ma‘u ‘o lahi ‘aupito.

11Ko au ko e Tauhi Lelei, Ko e anga ‘o e tauhi lelei ke ‘atu ‘ene mo‘ui koe‘uhi ko e fanga sipi. 12Ka ko ia ‘oku ngāue totongi pē, pea ‘oku ‘ikai ko ha tauhi sipi, ko e toko taha ‘oku ‘ikai ‘a‘ana totonu ‘a e fanga sipi, ka sio ia ko e ulofi ‘ena ‘oku ha‘u, pea ne li‘aki ‘a e fanga sipi, ‘o ne hola: pea ‘oku pō kinautolu ‘e he ulofi, ‘o fakamovetevete: 13koe‘uhiā ko e toko taha ia ‘oku ngāue ki he totongi, pea ‘oku ‘ikai mamafa kiate ia ‘a e fanga sipi. 14Ko au ko e Tauhi Lelei: pea ‘oku te ‘ilo ‘a e ngaahi me‘a ‘a‘ata, pea ‘oku ‘ilo kita ‘e he ngaahi me‘a ‘a‘ata, 15‘o hangē ‘oku ‘ilo au ‘e he Tamai, pea mo ‘eku ‘ilo ‘a e Tamai ‘e au. Pea ‘oku ou ‘atu ‘eku mo‘ui koe‘uhi ko e fanga sipi.#Māt 11.27; Luk 10.22 16Pea ‘oku ai mo ‘eku fanga sipi kehe, ‘a ia ‘oku ‘ikai kau ki he loto‘ā ko eni: kuo pau ke u taki ‘a e fa‘ahinga ko ia foki: pea te nau tokanga ki hoku le‘o; pea te nau hoko ko e#10.16 te nau hoko ko e; ‘Oku pehē ‘i hono ngaahi hiki fuoloa ‘e ni‘ihi: ‘e ‘i ai leva ‘a e. tākanga pē taha, pea taha pē ‘a e tauhi.

17Ko hono ‘uhinga ia ‘o e ‘ofa‘i au ‘e he Tamai, koe‘uhi ‘oku ou ‘atu ‘eku mo‘ui kau toe to‘o ia. 18Tala‘ehai ko e fa‘ao ia ‘e ha taha meiate au, ka ko ‘eku ‘atu ia ‘e au. ‘Oku ou fa‘iteliha ki hano ‘atu; pea ‘oku ou fa‘iteliha ki hano toe to‘o. Ko ia ia ‘a e tu‘utu‘uni ne u ma‘u mei he‘eku Tamai.

19Pea toe hoko ha mavahevahe ‘i ha‘a Siu ‘i he ngaahi lea ko ia. 20Pea na‘e pehē ‘e honau tokolahi, ‘Oku ‘iate ia ha tēvolo, pea ‘oku ne faha: ko e hā ‘oku mou tokanga ai kiate ia?

21Ka ka pehē ‘e ha ni‘ihi, Tala‘ehai ‘oku hoa mo ha ‘āvea ha alā lea pehē: ‘o mafai koa ‘e ha tēvolo ke faka‘ā ‘a e mata ‘o e kui?

Ko e Fakasītu‘a‘i ‘o Sīsū

22Pea faifai pea hoko ‘i Selusalema ‘a e kātoanga, ko e fakamanatu ki he huufi fo‘ou ‘o e Temipale. 23Ko e fa‘ahita‘u momoko ia, pea na‘e hā‘ele ‘a Sīsū ‘i he Temipale ‘i he falehala ‘o Solomone. 24Ko ia na‘e kapui ia ‘e ha‘a Siu, ‘O nau pehē ki ai, Ko futu mo ho‘o fakamanganga homau loto! kapau ko e Mīsaia koe, pea tala fakapatonu mai.

25Pea tali ‘e Sīsū kiate kinautolu, Kuo u tala atu, pea ‘oku ‘ikai te mou tui ki ai: ko e ngaahi ngāue ‘oku ou fai ‘i he huafa ‘o ‘eku Tamai, ko ia ia ‘oku fakahaa‘i au: 26ka neongo ia, ka ‘oku ‘ikai te mou tui; koe‘uhi ‘oku ‘ikai te mou ‘i he fanga sipi ‘a‘ata. 27Ko ‘ete fanga sipi ‘a‘ata ‘oku nau tokanga ki hoto le‘o, pea ‘oku ou ‘ilo kinautolu; pea ‘oku nau muimui kiate au, pea ‘oku ou ‘atu kiate kinautolu ‘a e mo‘ui ta‘engata; 28pea ‘e ‘ikai ‘aupito te nau ‘auha ‘o lauikuonga, pea ‘e ‘ikai hamusi kinautolu ‘e ha taha mei hoku nima. 29Ko ‘eku Tamai, ‘a ia na‘a ne foaki kinautolu kiate au,#10.29 Ko ‘eku… lahi ia: ‘Oku pehē ‘i hono ngaahi hiki fuoloa ‘e ni‘ihi: Ko e me‘a kuo foaki mai ‘e he‘eku Tamaí. ‘oku lahi ia ‘i he me‘a kotoa pē; pea tala‘ehai ‘e lava ‘e ha taha ke hamusi mei he nima ‘o e Tamai. 30Ko au mo e Tamai ‘oku ma taha.

31Pea to‘o maka leva ‘e ha‘a Siu, ‘o hapai ke pe‘ehi kiate ia. 32Tali leva ‘e Sīsū kiate kinautolu, Kuo lahi ‘a e ngaahi ngāue lelei kuo u faka‘ali‘ali kiate kimoutolu mei he Tamai; ko e fē ia ‘i he ngaahi ngāue ko ia ‘oku mou fai ke tolongi ai au?

33Pea tali kiate ia ‘e ha‘a Siu, ‘Oku ‘ikai ko ha ngāue lelei ‘oku mau tolongi ai koe, ka ko e lea fie-‘Otua: ‘osi, ko e tangata koe, ka ‘oku ke lau fola, tokua ko e ‘Otua koe.#Lev 24.16

34Pea tali ‘e Sīsū kiate kinautolu, ‘Ikai kuo tohi ‘i ho‘omou Lao, ‘o pehē, Na‘a ku lau ko e ngaahi ‘otua kimoutolu?#Saame 82.6 35Kapau na‘a ne lau ko e ngaahi ‘otua ‘a kinautolu na‘e hoko ki ai ‘a e folofola ‘a e ‘Otua, (pea tala‘ehai ‘e ala tāmate‘i ‘a e potu Tohitapu ko ia) 36Pea ko ho‘omou lau koā ki he toko taha na‘e fakanofo ‘e he Tamai, mo fekau ki māmani, ‘o mou pehē, ‘Oku ke lea fie‘otua, koe‘uhiā ko ‘eku pehē, Ko e ‘Alo ‘o e ‘Otua au! 37Kapau ‘oku ‘ikai te u feia ‘a e ngaahi ngāue ‘a ‘eku Tamai, pea ‘oua te mou tui kiate au, 38Ka ‘o kapau ‘oku ou fai ia; pea neongo ‘oku ‘ikai te mou tui kiate au, tui pē ā ki he ngaahi ngāue: koe‘uhi ke mou vakai ‘o ‘ilo, ‘oku ‘iate au ‘a e Tamai, mo au ‘oku ou ‘i he Tamai.

39Pea nau toe feinga ke puke ia; ka ka mole atu pē ia mei honau nima.

40‘O ne toe ‘alu ki Tu‘a-Soatani, ki he potu na‘e fai papitaiso ai ‘a Sione–‘a ia ‘i he kamata‘anga–pea ne nofo ‘i he potu ko ia.#Sioné 1.28 41Pea na‘e ha‘u ha tokolahi kiate ia, pea ko ‘enau lau na‘e pehē, Ko Sione na‘e ‘ikai te ne momo‘i fai ha mana ‘e taha: ka ko e ngaahi me‘a na‘e fakahā ‘e Sione ki he toko taha ni, tā ‘oku mo‘oni hono kotoa, 42pea na‘e tui ha tokolahi kiate ia ‘i he potu ko ia.#Luk 10.38-39

Currently Selected:

Sioné 10: TMB

Highlight

Copy