KO ‘AISEA 30
30
Ko ha Aleapau Ta‘e‘aonga mo ‘Isipite
1‘OIAUĒ ‘a e fānau pau‘u–ko Sihova ia mei he Ta‘ehāmai–‘enau fa‘u fakakaukau, ka ‘oku ‘ikai ko e me‘a meiate au; mo nau fī kakai, ka ‘oku ‘ikai ke kau hoku laumālie, koe‘uhi pē ke fehilihili‘i ‘a e angahala: 2‘a e fa‘ahinga ‘oku fononga ko ‘enau ‘alu hifo ki ‘Isipite, kae ‘ikai te nau huhū ke ma‘u ‘eku lea; ‘enau hola ki he hūfanga ‘o Felo, mo ‘enau toi ‘i he malu ‘o ‘Isipite! 3Ko ia, ‘e hoko ‘a e hūfanga ‘o Felo ko homou mā‘anga, pea ko e toi ‘i he malu ‘o ‘Isipite ko e me‘a te mou laea ai. 4He ka hoko hono hou‘eiki ki Soani, pea a‘u hono kau fakafofonga ki Hānesi, 5te nau maa‘i kotoa ha kakai ‘oku ‘ikai ‘aonga kiate kinautolu, ‘a e fa‘ahinga ‘oku ‘ikai ke tokoni, pea ‘oku ‘ikai ko e ‘aonga, ka ko e mā‘anga; ‘io, mo e me‘a fakatupu manuki foki.
6Ko e kavenga mei he Ta‘ehāmai ‘a e Pi‘imoti ‘o e Saute.
‘I ha fonua faingata‘a mo ‘efihia,
‘Oku mei ai ‘a e laione fefine mo e laione tangata,
‘A e ata mo e ngata vela ‘oku puna,
‘Oku nau ‘ave ‘enau nga‘oto‘ota ‘i he tu‘a ‘o e fanga ki‘i ‘asi,
Mo ‘enau koloa ‘i he funga hula ‘o e kāmeli,
Ki ha kakai ‘e ‘ikai ‘aonga kiate kinautolu.
7Pea ko ‘Isipite ko e muna, mo e nge‘esi ‘enau tokoni:
Ko ia kuo u ui ai ‘a e fonua na ko Lēhapi-nofo-pē.
Ko e Kakai Talangata‘á
8Ha‘u ange mu‘a, tohi ia ‘i ha lau‘i me‘a, ‘oku nau ‘i ai, pea ‘ai ‘i ha tohi, ke hoko ko e fakamo‘oni ki he ‘amui, ki he ta‘engata. 9He ko e kakai pau‘u eni, ko e fānau loi, ko e fānau ‘oku ‘ikai ke fie fanongo ki he akonaki ‘a Sihova. 10‘A ia ‘oku nau pehē ki he kau matalōloa, ‘Oua te mou sio me‘a; pea ki he kau mata vīsone, ‘Oua te mou vavalo mai ‘a e ngaahi me‘a totonu; lea‘aki mai ‘a e ngaahi me‘a molemole, vavalo ‘aki mai ‘a e ngaahi muna. 11Hiki mei he hala, afe mei he ‘alunga, ‘ai ke puli mei homau ‘ao ‘a e Tāpuhā ‘o ‘Isileli.
12Ko ia, ko eni ‘a e folofola ‘a e Tāpuhā ‘o ‘Isileli: Ko e me‘a ‘i ho‘omou fakatale‘i ‘a e lea ko eni, ka mou tui ki he mamio mo e olo, ‘o mou falala ki ai; 13ko ia, ‘e hoko ‘a e kovi ni kiate kimoutolu hangē ha konga ‘ā ‘oku ene ke tō, ‘oku maneke mai ‘i he ‘ā mā‘olunga, ‘a ia ko ‘ene tō ‘oku hoko fakafokifā, fakafokifā ‘aupito. 14Pea te ne laiki ia ‘o hangē ko e laiki ha ipu ‘umea, ko e laiki ta‘emamae; ko ia, ‘e ‘ikai ma‘u mai hano momo, ha mafoa‘i me‘a ke hikofi ‘aki ha afi mei he matanavu, pe ke ‘utu ‘aki ha vai mei ha lepa.
15He ko eni ‘a e folofola ‘a ‘Ātonai Sihova, ko e Tāpuhā ‘o ‘Isileli: Ko e foki mo e nofo te mou mo‘ui ai; ko e nonga mo e falala ko homou mālohinga ia: ka na‘e ‘ikai te mou fie fai. 16Ka na‘a mou pehē, ‘Ikai, ka te mau heka hoosi, ‘o hola; lelei, te mou hola. Pea na‘a mou pehē, Ko e manu lele te mau heka ki ai. 17Lelei, ‘e manu lele ‘a e kau tuli. Neongo ko e taha afe, te mou hola ‘i he fakamana ‘a ha toko taha; kaekehe ‘e fakamana ‘e he toko nima: kae‘oua ke mou hoko ko e ki‘i toenga hangē ha niu-vākai ‘i ha funga mo‘unga, pea hangē ha fuka ‘i ha fo‘i mā‘olunga. 18Pea ko ia, ‘e tatali ‘e Sihova, kae toki fai ha ‘ofa kiate kimoutolu, pea ko ia te ne nofo ‘i ‘olunga, kae toki ‘alo‘ofa atu: he ko e ‘Otua fai ki he lao ‘a Sihova; monū‘ia ā ka ko kinautolu ‘oku tatali kiate ia.
‘E Tāpuaki‘i ‘e he ‘Otuá ‘a Hono Kakaí
19He ai ha kakai ‘e nofo ‘i Saione ‘i Selusalema; ‘e ‘ikai ‘aupito te ke toe tangi; kuo pau te ne ‘ofa kiate koe, ‘i he ongo mai ho‘o tautapa: ko ‘ene ongo‘i leva te ne tali koe. 20Pea neongo ‘e ‘atu kiate kimoutolu ‘e ‘Ātonai ke fakama‘anga tauhi ‘aki ‘a e me‘akai mo e vai, kae ‘ikai kei fufū kinautolu ‘e ho kau akonaki, ka ‘e sio ma‘u ho mata ki ho kau akonaki. 21Pea ‘e fanongo ‘e ho telinga ki ha lea mei ho tu‘a, Ko eni ‘a e hala, fou ai; ka ai ha‘o afe ki to‘omata‘u, pe ka ai ha‘o afe ki to‘ohema. 22Pea te mou ‘uli‘i ‘a e ‘ufi‘ufi ‘o ho‘o ngaahi tamapua siliva, pea mo e kofu ‘o ho ngaahi ‘īmisi koula: te ke laku noa kinautolu hangē ko ha tupenu pani toto; “Puna ‘o ‘alu!” ko ho‘o lea ia ki ai. 23Pea te ne ‘omi ‘uha ki he tenga kuo ke tōkaki ‘i he kelekele, mo e me‘akai mei he fua ‘o ho kelekele; ‘e hangē ha vao fue, ‘o kano lelei. ‘I he taimi ko ia ‘e kaikai ho‘o monumanu ‘i ha fu‘u vao ‘atā; 24pea ko e fanga pulu mo e fanga ‘asi ‘oku ngāue‘i ‘a e kelekele te nau kai ‘a e tenga kuo fefiofi, ‘a e me‘a kuo sivi ‘aki ha fohe mo e hua vangavanga. 25Pea ‘i he funga mo‘unga mā‘olunga kotoa, pea ‘i he ngaahi fo‘i mā‘olunga ‘oku hopo hake, ‘oku ai ‘ani vai, ko e ngaahi tafenga vai ‘i he ‘aho ‘o e fu‘u tapalea na‘e holo ai ‘a e ngaahi taua. 26Pea ko e maama ‘o e māhina ‘e tatau mo e maama ‘o e la‘ā; pea ko e maama ‘o e la‘ā ‘e hoko ‘o tu‘o fitu, ‘o hangē ko ha maama ‘o ha fitu‘i ‘aho, ‘i he ‘aho ‘e ha‘iha‘i ai ‘e Sihova ‘a e lavea ‘o hono kakai, mo faito‘o ‘a e havehave ‘o ‘ene tā.
‘E Tautea ‘e he ‘Otuá ‘a ‘Āsiliá
27Vakai, ko e huafa ‘o Sihova ‘oku ha‘u mei he mama‘o, ‘oku ulo ‘ene houhau, pea lahi ‘a e kohu: ‘oku koa hono loungutu ‘i he tuputāmaki, pea ko hono ‘elelo ‘oku hangē ko e afi faka‘auha: 28pea ko ‘ene mānava ‘oku hangē ha vaitafe kuo mahua ‘o lōmekina, ko e kia pe ‘oku hā, ko ‘ene hā‘ele mai ke sivi ‘a e ngaahi pule‘anga ‘aki ‘a e sivi ‘a Faka‘auha: pea ‘e a‘u ki he kaungao ‘o e kakai ‘a e piti taki hē. 29‘E toki tatau ho‘omou hiva mo e hiva ‘i he pō ‘oku fai ai ‘a e kātoanga tapu; pea ko e fiefia ‘a homou loto ‘oku tatau mo e kakai ‘oku hā‘ele mo e fangufangu, ke ‘alu ki he mo‘unga ‘o Sihova, ki he Makatu‘u ‘o ‘Isileli.
30Pea ‘oku tuku ‘e Sihova ke ongo ‘a e ha‘aha‘a ‘o hono le‘o, pea ke hā ‘a e hifo ‘a hono nima, ‘ene ō mo e māfulu ‘o hono houhau, mo e ulo ‘a e afi faka‘auha, mo e pā ‘a e ‘ao, mo e lolo ‘a e ‘uha maka. 31He ‘e mo‘utāfu‘ua ‘a ‘Āsilia ‘i he le‘o ‘o Sihova ‘i he‘ene tā ‘aki ‘ene sēpita. 32Pea ‘e hoko ‘o pehē, ko e hapo kotoa ‘o e ‘akau sauni, ‘a ia ‘e tuku hifo ‘e Sihova ki ai, ‘e ō mo e tā lali mo e ha‘ape: pea ko e tau te ne fai ki ai ko e tau fufue. 33He ‘oku ai ha Tōfeti kuo teu fuoloa!#30.33 kuo teu fuoloa; pe na‘e teu ‘aneafi. na‘e teuteu ma‘a e tu‘i foki; kuo ne ‘ai ke loloto mo laulahi: ‘oku lahi ‘a e afi mo e fefie ‘i hono faka‘afu; ko e hō ‘a Sihova ‘oku falala ki ai hangē ha tafenga sūlifa, ‘o fakapuho ia.
Currently Selected:
KO ‘AISEA 30: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
