KOHELETI 2
2
1NE u pehē ‘i hoku loto, Ha‘u mu‘a, ka u sivi koe ‘aki ‘a e ngaahi fiefia: ko ia ke ke ‘ilo mu‘a ha koto lelei. Pea tā ko e muna pē mo ia foki. 2Ne u pehē kia Kata, Ko e vale ‘u‘ua ē; pea kia Fiefia, Ko e hā ‘a e fua ‘o e siana ni? 3Pea u fai atu ‘a e fakatotolo ‘i hoku loto, ‘o u pehē ke tohoaki hoku kakano ‘a e uaine, kae faka‘uli poto pē ‘e hoku ‘atamai, pea u puke ai ki he vale; ke u vakai pe ko e hā ‘oku lelei ke fai ‘e he hako ‘o e tangata ‘i he lalo langi, kae‘oua ke kakato ‘a e ngaahi ‘aho ‘o ‘enau mo‘ui.
4Ne u fai ‘a e ngaahi ngāue lalahi; na‘a ku langa haku ngaahi fale; na‘a ku tō ha‘aku ngaahi ngoue vaine;#1 Tu‘i 10.23-27; 2 Kal 9.22-27 5na‘a ku ngaohi ha‘aku ngaahi ngouetapu mo hauhau, pea u tō ai ‘a e ‘akau fua kehekehe; 6na‘a ku ngaohi ha‘aku ngaahi fu‘u tānekinga vai ke fakaviviku mei ai ‘a e vao ngoue ‘akau. 7Na‘a ku fakatau tamaio‘eiki mo kaunanga, pea na‘e tupu mo ha kakai ‘i hoku ‘api; ko e me‘a tokolahi foki ‘eku monumanu, ‘a e pulu mo e sipi mo e kosi, ‘o hulu atu ‘iate kinautolu kotoa na‘e tomu‘a ‘iate au ‘i Selusalema;#1 Tu‘i 4.23 8na‘a ku tānaki foki ma‘aku ‘a e siliva mo e koula, pea mo e hā ‘a e koloa kānokato ‘o e ngaahi tu‘i mo e ngaahi vahefonua. Na‘a ku ma‘u mai ha kau hiva tangata mo ha kau hiva fefine, mo e ngaahi mālie ‘o e hako‘i tangata–ha sinifu, ‘io, ko e kau sinifu.#1 Tu‘i 10.10,14-22
9Ko ia, ne u hoko ‘o lahi, ‘o fakautuutu ai pē, ‘o hulu ‘iate kinautolu kotoa na‘e tomu‘a ‘iate au ‘i Selusalema: kae‘uma‘ā na‘e kei tu‘u mo au ‘eku poto.#1 Kal 29.25 10Pea neongo pe ko e hā na‘e holi ki ai ‘a hoku mata, na‘e ‘ikai te u ta‘ofi mei ai; na‘e ‘ikai te u fakafisi ki hoku loto ha momo‘i fiefia ‘e taha: seuke, na‘e ma‘u fiefia ‘e hoku loto mei he‘eku ngāue kotoa; ‘io, ko hoku ‘inasi ia mei he‘eku ngaahi ngāue kehekehe. 11Pea u toki hanga ki he me‘a kehekehe kuo fai ‘e hoku nima, mo e ngāue kuo u fakafitefita‘a ke fai, pea tā ko e muna pē hono kotoa mo e kai matangi, pea ‘ikai hano fua ‘i he lalo la‘ā. 12Pea u tafoki ke vakai ‘a e poto mo e vale ‘u‘ua mo e fakasesele. (He ko e hā ‘e lava ‘e ha tangata ‘oku hoko mai hili ‘a e tu‘i?–‘a ia pē kuo loa kālivu hono fai.#2.12 Ko e fakamahalo pē, he ‘oku fihi ‘aupito.)
13Pea u vakai ‘oku hulu ‘a e poto ‘i he fakasesele hangē ‘oku hulu ‘a e maama la‘ā ‘i he po‘uli: 14ko e ongo fo‘i mata ‘o e poto ‘oku ‘i hono ‘ulu, ka ko e fakasesele ‘oku ha‘ele ‘i he po‘uli: ka na‘e e‘a kiate au foki ‘oku ai ha iku‘anga pē taha kiate kinaua ‘osi pē. 15Pea u pehē ‘i hoku loto, Hangē ko e iku‘anga ‘o e vale, ‘e pehē ‘ene hoko kiate au foki; pea koe‘uma‘aki ‘eku hulu atu ‘i he poto? Pea u pehē ‘i hoku loto. 16Ko e muna mo eni foki. He ‘e ‘ikai ha manatu ki he poto tatau mo e vale ‘i he ‘amui; he ‘i he ngaahi ‘aho kaha‘u kuo loa he ngalo hono kotoa. Pea vakai ange ‘a e mate tatau ‘a e poto mo e vale! 17Ko ia, na‘a ku fehi‘a ki he mo‘ui; he na‘a ku kovi‘ia ‘i he me‘a ‘oku fai ‘i he lalo la‘ā: he ko e muna hono kotoa, mo e kai matangi.
18Pea u fehi‘a ki he ngāue kehekehe kuo u fakafita‘a ai ‘i he lalo la‘ā: koe‘uhi ke u tuku ia ki he tangata ‘e hoko mo au, 19pea na‘e ‘ilo ‘e hai pe ko e poto ia pe ko e vale? Ka te ne pule pē ki he me‘a kotoa kuo u fakafitefita‘a ai, mo fai‘aki ‘eku poto ‘i he lalo la‘ā. Ko e muna mo eni foki. 20Ko ia na‘a ku foki mei ai ke fakatu‘atamaki hoku loto ki he ngāue kehekehe kuo u fakafita‘a ai ‘i he lalo la‘ā. 21He ‘oku ai ha tangata, ‘a ia ko ‘ene ngāue na‘e fai poto, pea na‘e fai ‘ilo pea na‘e fai ke mafai; ka te ne tuku ia ki ha tangata na‘e ‘ikai te ne ngāue ki ai mōno tofi‘a. Ko e muna mo ia foki mo e kovi lahi. 22He ko e hā ‘oku ma‘u ‘e ha tangata ‘i he‘ene kikivi kotoa, mo e ngao‘i ‘a hono loto ‘a ia kuo ne fakaongosia ai ‘i he lalo la‘ā? 23He ko hono ngaahi ‘aho kotoa ko e koto mamahi, pea ko ‘ene ngāue ko e mafasia; na‘a mo e po‘uli ‘oku ‘ikai ke mālōlō ‘a hono ‘atamai. Ko e muna mo eni foki.#Siope 5.7; 14.1
24‘Oku ‘ikai ha lelei ‘i he nofo, ka ko ‘ete kai pē mo inu, mo fafanga ‘aki hoku loto ‘a e lelei ‘oku ma‘u ‘i he‘ete ngāue. Na‘a mo ia na‘a ku vakai ‘oku meia ‘Elohimi pē.#Koh 3.13; 5.18; 9.7; Luk 12.19; 1 Kol 15.32 25He ko hai te ne lava ke kai, pea ko hai te ne lava ke ongo‘i mālie, ‘o ‘atā mei He‘ene ‘Afio?#2.25 ‘o ‘atā… ‘Afió? ‘Oku hiki ‘e he ni‘ihi: ‘o lahi ‘iate au. 26He ko e tangata ‘oku ne lelei‘ia ai, ‘oku foaki ‘e he ‘Afio ki ai ‘a e poto mo e ‘ilo mo e fiefia: ka ki he angahala ‘oku foaki ‘e ‘Elohimi ‘a e fakaongosia; ke ne tānaki mo fokotu‘utu‘u ke ‘ange kiate ia ‘oku lelei‘ia ai ‘a ‘Ene ‘Afio. Ko e muna mo ia foki, mo e kai matangi.#Siope 32.8; Pal 2.6
Currently Selected:
KOHELETI 2: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
