‘Apositoló 25

Ko e Fili ‘e Paula ke Fakamāu‘i ia ‘e Sisa

1PEA kuo hoko leva ‘a Fesitō ki hono vahefonua, pea hili ‘a e ‘aho ‘e tolu na‘a ne ‘alu hake mei Sesalia ki Selusalema. 2Pea na‘e faka‘ilo foki ‘a Paula kiate ia ‘e he hou‘eiki taula‘eiki mo e kau tu‘ukimu‘a ‘o e kakai Siu. 3Pea nau fai ‘enau kole kiate ia, ‘o tangi ke ne lango kiate kinautolu, pea ke ne fekau ke ‘omi ia ki Selusalema; ka ko ‘enau teu ha malumu ke fakapoongi ia ‘i he hala. 4Ka ka tali ‘e Fesitō, ‘e tauhi pē ‘a Paula ‘i Sesalia, ka ‘e vave pē ‘ene ‘alu hifo ‘a‘ana ki ai. 5Na‘a ne me‘a foki, Pea ‘ilonga hamou ni‘ihi ma‘u tu‘unga, tuku ke nau ‘alu hifo mo au, ‘o talatalaaki‘i ‘a e matāpule, ‘o kapau ‘oku ‘i ai ha‘ane me‘a ta‘etaau.

6Pea kuo ne nofo mo kinautolu ‘i he ngaahi ‘aho si‘i, ‘e valu nai pe hongofulu, na‘a ne toki ‘alu hifo ki Sesalia; pea ‘i he ‘aho ‘apongipongi na‘a ne nofo ki he fakamāu‘anga, ‘o ne fekau ke taki mai ‘a Paula. 7Pea ‘i he‘ene hoko mai, na‘e kāpui ia ‘e he kau Siu kuo ‘alu hifo mei Selusalema: pea lahi ‘a e ngaahi me‘a mamafa na‘a nau talatalaaki ‘aki ia, ‘a ia na‘e ‘ikai te nau lava ke fakamo‘oni ki ai. 8He na‘e fakamatala ‘e Paula ‘o pehē, Kuo ‘ikai te u fai hala ‘i ha me‘a ki he Lao ‘a e kakai Siu, pe ki he Temipale, pe kia Sisa.

9Ka na‘e loto ‘a Fesitō ke fakava‘anganaki hano ‘ofeina ‘e he kakai Siu, ko ia na‘a ne tali kia Paula, ‘o ne me‘a mai, ‘Oku ke loto ke ‘alu ki Selusalema ke fakamaau ai koe ‘i he ngaahi me‘a ni, ka ‘i hoku ‘ao pē?

10Pea pehē ‘e Paula, Ko e fakamāu‘anga ‘o Sisa ‘oku te tu‘u ai kita, pea ko e potu ia ‘oku totonu ke te fakamaau ai: ko e me‘a ki he kakai Siu, kuo ‘ikai te u fai ha kovi ki ai; ka koe‘uma‘ā ‘ete lau ki ai, ka ‘oku ke mātu‘aki mea‘i. 11Pea kapau kuo u maumau lao, pe fai ha hiamatea, ‘oku ‘ikai te u fakafisinga ‘a e mate: ka ‘o kapau ko e launoa ‘a e ngaahi me‘a ‘oku talatalaaki‘i ai au ‘e kinautolu ni, tala‘ehai ‘oku ngofua ki ha taha ke me‘a‘ofa‘aki au kiate kinautolu. Te u unga au kia Sisa.

12Pea alea leva ‘a Fesitō mo e fakataha tokoni, ‘o ne toki tali, Kuo ke unga koā kia Sisa? lelei; te ke ‘alu kia Sisa.

Ko e Lea ‘a Paula kia ‘Ākilipa mo Pelenaise

13Pea kuo mole atu ha ngaahi ‘aho ni‘ihi, pea toki me‘a hifo ki Sesalia ‘a e tu‘i ko ‘Ākilipa pea mo Pelenaise, ko e fai ‘ena ‘a‘ahi kia Fesitō. 14Pea kuo fuofuoloa ‘ena nofo ai, pea fakaongo ‘e Fesitō ki he Tu‘i ‘a e ngaahi me‘a na‘e kau kia Paula, ‘o pehē, ‘Oku ‘i ai ha matāpule, ‘a ia na‘e tuku ‘i he pilīsone ‘e Filike ‘i he‘ene hiki. 15Pea ‘i he‘eku hoko ki Selusalema, na‘e faka‘ilo ‘a e toko taha ko ia ‘e he hou‘eiki taula‘eiki mo e kau mātu‘a ‘o e kakai Siu, ‘o nau kole hono fakamo‘ua. 16Ka na‘a ku fakahā kiate kinautolu, ‘Oku ‘ikai ko e anga ‘o e kakai Loma ke tukuange ha tangata ke tautea, neongo pe ko hai, kae‘oua mu‘a ke tu‘u fehangahangai ‘a ia ‘oku fakahopo pea mo hono kau tukuaki, pea ke ‘oua foki ke ai hano ava ke fakamatala ki he me‘a kuo lau kiate ia. 17Ko ia, ‘i he‘enau fakataha mai ki heni, na‘e ‘ikai te u fakatotoka, ka ‘i he ‘aho na‘e hoko na‘a ku nofo ki he fakamāu‘anga, ‘o u fekau ke taki mai ‘a e matāpule. 18Ka ‘i he hanga ‘o tu‘u ‘a e kau tukuaki, na‘e ‘ikai te nau ‘omi ha me‘a ki ai ‘o hangē ko ‘eku mahalo, ‘o pehē ko ha kovi: 19ka ko e me‘a kuo ha‘u mo kinautolu kiate ia, ko e koto me‘a pē ‘oku kau ki he‘enau tō‘onga fakalotu fakaekinautolu, ‘o kau ki ha toko taha, ko Sīsū tokua, ‘a ia kuo pekia, kae taukave pē ‘e Paula kuo ne mo‘ui. 20Pea te ape kita pe ‘e fēfee‘i ai hano ‘eke ‘o e ngaahi me‘a ko ia; pea u pehē ange, pe ‘oku ne loto ke ‘alu ki Selusalema, ‘o fakamaau ai ‘i he ngaahi me‘a ko ia. 21Ka ‘i he‘ene unga ‘e Paula, ‘o pehē ke ta‘ofi ia ki he fakamaau ‘a ‘Akosito, ko ia na‘a ku fekau ke tauhi ai pē ia kae‘oua ke toki tuku atu ia kia Sisa.

22Pea me‘a ‘a ‘Ākilipa kia Fesitō, ‘Ā, na‘a ku mei loto ke fanongo ‘e au foki ki he tangata ko ia.

Pea pehē ‘e ia, ‘Apongipongi te ke fanongo ki ai.

23Pea ‘i he ‘aho ‘apongipongi na‘e me‘a mai ‘a ‘Ākilipa mo Pelenaise, ‘o fakalaukau ‘aupito, ‘o hū ki he fale-tali-‘eiki: na‘e ‘i ai foki ‘a e ngaahi ‘eikitau, mo ha kau tangata ‘ilonga ‘o e kolo; pea ‘i he fekau ‘a Fesitō na‘e taki mai ‘a Paula. 24Pea me‘a ‘a Fesitō, ‘E Kingi ‘Ākilipa, mo kimoutolu Matāpule ‘oku tau haha‘o ni, ko e toko taha ko eni ‘oku mou me‘a ki ai, ko ia ia kuo fakafiu ai kiate au ‘e he kakai Siu kātokatoa ‘i Selusalema mo ‘eni foki, ko ‘enau kalanga ‘oku ‘ikai totonu ke ne mo‘ui. 25Ka ko au, na‘e ‘ikai te u tokanga‘i ha‘ane me‘a oku taau mo e mate; kae‘uma‘ā na‘e unga ‘e ia, ‘a e tangata ni, kia ‘Akosito: ko ia na‘a ku tu‘utu‘uni ke tuku atu ia ki ai. 26Ka ‘oku ‘ikai ha‘ane me‘a ‘oku ou ma‘u pau ke tohi ki hoku ‘eiki: ko ia, kuo u ‘omi ia kiate kimoutolu, kae‘uma‘ā kiate koe, ‘e Kingi ‘Ākilipa, hei‘ilo, ‘oka ‘osi ho‘omou ‘eke, pea ai ha‘aku me‘a ke tohi. 27He ‘oku hā matamata kehe kiate au, ke tuku atu ha pōpula, ‘o ‘ikai ‘alu mo ia ha ki‘i fakamatala ki he ngaahi me‘a ‘oku lau kiate ia.

Currently Selected:

‘Apositoló 25: TMB

Highlight

Copy