‘Apositoló 2

Ko e Hā‘ele Mai ‘a e Laumālie Mā‘oni‘oní

1PEA ‘i he hokosia ‘a e ‘aho Penitekosi, ‘oku nau tefua ‘i ha potu ‘e taha.#Lev 23.15-21; Teu 16.9-11 2Pea fakafokifā na‘e hoko mei he langi ha me‘a, ‘o hangē ko e mumuhu ‘o ha fu‘u tu‘oni matangi ‘oku tō mai, pea na‘e fā‘ofale ‘i he loki na‘a nau nofo ai. 3Pea na‘e hā, kiate kinautolu ha ngaahi ‘elelo hangē ha afi, ‘o mavahevahe, ‘o nofo hifo kiate kinautolu takitaha. 4Pea fā‘ofale ‘iate kinautolu kātokatoa ‘a e Laumālie Mā‘oni‘oni; pea nau hanga ‘o lea ‘i he ngaahi lea kehe, ‘o fakatatau ki he fakalea‘i kinautolu ‘e he Laumālie.

5Pea ‘i he taimi ko ia na‘e nofo ‘i Selusalema ha kakai Siu, ko e mātu‘a lotu mo‘oni mei he ngaahi fa‘ahinga kotoa pē ‘i lalo langi. 6Pea ‘i he hoko ‘a e longoa‘a ko ia, na‘e fakatahataha ki ai honau fu‘u tokolahi; pea na‘e hangē ha pepeli, he ko ‘enau ngaahi lea takitaha ‘oku nau ongo‘i hono lea‘aki mai ‘e kinautolu. 7Pea nau fakatumutumu mo ofoofo, ‘o nau pehē, Vakai ange; ‘ikai ko e kau Kāleli kotoa pē kotoa pē ‘a kinautolu na ‘oku lea? 8Pea ‘oku fakafēfē ai ‘etau fanongo ni ki he‘etau lea totonu na‘a tau takitaha tutupu ai? 9Ko kitautolu Pātia mo e Mītia mo e ‘Īlami, mo e nofo ki Mesopotēmia, ki Siutea foki mo Kapatōsia, ki Ponitō mo ‘Ēsia, 10ki Filisia foki mo Pamifilia, ki ‘Isipite mo e ngaahi feitu‘u ‘o ‘Āfilika ‘oku ofi ki Sailine, mo e nofo hili mai mei Loma, ‘a e Siu mo‘oni mo e ului ki ai, ‘a e Kēliti mo e ‘Ālepea, 11‘oku tau ongo‘i ‘enau fai ‘a e ngaahi lea ‘atautolu, he‘enau lea‘aki ‘a e ngaahi me‘a lalahi ‘a e ‘Otua. 12Pea nau fakatumutumu kotoa pē, mo tāla‘a, ‘o nau fepehē‘aki, Ko e hā nai ‘a e ‘uhinga ‘o e me‘a ni?

13Ka ka kata manuki ‘a e ni‘ihi, ‘o nau pehē, ‘Ā, ‘oku nau ki‘iki‘ia ‘i he uaine melie.

Ko e Lea ‘a Pita ki he Kakaí

14Ka ka hanga ‘a Pita, ‘o ne tu‘u hake mo e toko hongofulu-mā-taha, ‘o ne ofa‘aki ‘ene lea ‘o malanga kiate kinautolu, ‘o pehē, ‘A e tu‘unga Mātu‘a Siu, mo e taka Selusalema kotoa pē, ke mahino mu‘a ‘a e me‘a ni kiate kimoutolu, pea ke mou fakafanongo mai ki he‘eku lea: 15he ‘oku ‘ikai ke konā ‘a e kakai na, ‘o hangē ko ho‘omou mahalo, he ko hono tolu pē ‘eni ‘o e houa pongipongi. 16Ka ko eni ia na‘e folofola‘aki ‘i he palōfita ko Sioeli. 17‘Oku me‘a mai ‘a e ‘Otua,#Sioelí 2.28-32 (LXX) Pea ‘e hoko ‘o pehē ‘i he kuonga fakamui, te u lilingi ha me‘a mei hoku Laumālie ki he kakano kotoa pē; pea ‘e toki palofisai ‘e homou ngaahi foha mo homou ngaahi ‘ōfefine pea ko e kau talavou ‘omoutolu te nau mata vīsone, pea ko e mātu‘a ‘omoutolu te nau fa‘a misi: 18‘io, na‘a mo ‘eku kau tamaio‘eiki mo ‘eku kau kaunanga, te u lilingi ha me‘a mei hoku Laumālie kiate kinautolu foki ‘i he kuonga ko ia, pea te nau palofisai, 19pea te u ‘ai ha ngaahi me‘a fakaofo ‘i he langi ‘i ‘olunga, mo ha ngaahi faka‘ilonga ki māmani ‘i lalo, ko e toto, mo e afi, mo e ngaahi pou kohu: 20‘e liliu ‘a e la‘ā ‘o po‘uli, mo e māhina ‘o toto, ‘i he tei hoko ‘a e ‘aho ‘o e ‘Eiki, ‘a e ‘aho lahi mo ‘ilonga: 21pea ‘e hoko ai ‘o pehē, ko ia te ne tautapa ki he huafa ‘o e ‘Eiki ‘e fakamo‘ui.

22‘a e tu‘unga Mātu‘a ‘Isileli, mou fanongo ki he‘eku fakamatala ni: Ko Sīsū mei Nāsaleti, ko e tangata ia na‘e fakamo‘oni ma‘ana mei he ‘Otua kiate kimoutolu, ‘aki ha ngaahi mana mo e ngaahi me‘a fakaofo mo e ngaahi faka‘ilonga, ‘a ia ne fai ‘iate ia ‘e he ‘Otua ‘i homou lotolotonga, ‘o hangē ko ia ‘oku mou lāu‘ilo ki ai. 23Ko e toko taha ko ia ne tukuange, pea mou nima‘aki ha kau hīteni, ‘o tukifa‘oa mo fakapoongi; ka kuo loa hono ‘osi tālanga‘i ‘i he ‘Otua, mo hono mu‘aki ‘afio‘i.#Māt 27.35; Ma‘ake 15.24; Luk 23.33; Sioné 19.18 24Pea ne vete ‘e he ‘Otua hono kafai ‘e mate, ‘o toe fokotu‘u ia: kae fēfē, he na‘e ‘ikai lava ke mapuke ai ia.#Māt 28.5-6; Ma‘ake 16.6; Luk 24.5 25He ‘oku pehē ‘e Tēvita ‘i he‘ene lau kiate ia,#Saame 16.8-11 (LXX)

Ne u sio fakalaka ki he ‘amui,

‘Oku ma fe‘ao ma‘u pē mo e ‘Eiki,

He ‘oku ne tu‘u mei hoku to‘omata‘u

Ke ‘oua na‘a maue‘i au.

26Ko ia na‘e neka ai ‘a hoto loto ni,

Pea vīkiviki ‘a hoto ‘elelo ni,

Kae‘uma‘ā ‘e ‘apitanga ‘amanaki pē ‘a hoto kakano ni.

27He tala‘ehai te ke li‘aki hoto laumālie ‘i Hētesi,

‘Uma‘ā ha‘o tuku ho Toko Taha Toputapu

Ke ‘ilo ‘a e ‘au‘auha.

28Kuo ke faka‘ilo kiate au ha ngaahi hala ‘oku tau ki he mo‘ui;

Te ke ‘ai ke u fonu nēkeneka,

He feangai mo ho fofonga.

29Kāinga Mātu‘a; fakamolemole ka u lea atu pē ‘i he Pēteliake ko Tēvita; kuo pekia ia pea telio foki, kae‘uma‘ā ‘oku ‘iate kitautolu hono fonualoto ‘o a‘u ki he ‘aho ni. 30Ka ko e me‘a ‘i he‘ene palōfita, mo ‘ene ‘ilo kuo fuakava mo lea tuki kiate ia ‘e he ‘Otua, ‘e ai ha toko taha ‘i he kakano ‘o hono mānava, te ne ‘afio‘i hono taloni:#Saame 132.11; 2 Sām 7.12-13 31ko ia ‘i he‘ene sio fakalaka atu na‘a ne lea ki he toetu‘u ‘a e Mīsaia; he na‘e ‘ikai li‘aki ia ‘i Hētesi, pe ‘ilo ‘e hono kakano ‘a e ‘au‘auha. 32Ko e Sīsū ko eni na‘e toe fokotu‘u ia ‘e he ‘Otua: pea ko kimautolu kotoa pē ko e kau fakamo‘oni ki ai. 33‘Āua: pea ‘i hono hākeaki‘i leva ‘e he māfimafi ‘o e ‘Otua, mo ne ma‘u foki mei he Tamai ‘a e tala‘ofa ko e Laumālie Mā‘oni‘oni, na‘a ne lilingi mai ‘a e me‘a ni ‘a ia‘oku mou sio mo fanongo ki ai. 34He tala‘ehai ne ‘alu hake ‘a Tēvita ki he langi: kae‘uma‘ā ‘oku ne lau ‘e ia,

Ne folofola ‘e he ‘Eiki ki hoku ‘Eiki,#Saame 110.1

Nofo koe ‘i hoku to‘omata‘u.

35Kae‘oua ke u ngaohi ho ngaahi fili ko ho tu‘unga va‘e.

36Ko ia ke mātu‘aki ‘ilo ‘e ha‘a ‘Isileli kotoa pē, kuo fakanofo ‘e he ‘Otua ‘a e tangata ni ke ne ‘Eiki mo Mīsaia fakatou‘osi; ‘io, ‘a e Sīsū ko ia na‘a mou kalusefai‘i.

37Pea ‘i he‘enau fanongo ki ai, na‘e hūkia honau loto, pea nau pehē kia Pita mo e kau ‘Aposetolo kotoa pē, kāinga, ko e hā ‘amautolu ai ‘e fai?

38Pea pehē ‘e Pita kiate kinautolu, Mou fei mo fakatomala, pea takitaha papitaiso ‘i he huafa ‘o Sīsū ko e Mīsaia, ki he fakamolemole ‘o ho‘omou ngaahi angahala, pea te mou ma‘u ‘a e me‘a‘ofa ko e Laumālie Mā‘oni‘oni. 39He ‘oku ma‘amoutolu ‘a e tala‘ofa, pea mo ho‘omou fānau foki, mo kinautolu mama‘o, ‘io, ‘a kinautolu kotoa pē ‘e ui ange ‘e he ‘Eiki ko hotau ‘Otua.

40Pea na‘e lahi foki mo ‘ene ngaahi lea kehekehe na‘a ne fakamamafa ‘aki, mo ne toutou enginaki kinautolu, he‘ene pehē, Mou tuku kimoutolu ke fakamo‘ui mei he fa‘ahinga angakehe ko eni. 41Pea na‘a nau tali ‘ene lea, ‘o nau papitaiso, pea na‘e fakaului mai ‘i he ‘aho pē ko ia ha ngaahi laumālie, fe‘unga nai mo e toko tolu afe. 42Pea na‘a nau nofo faka‘utumauku ki he faiako ‘a e kau ‘Aposetolo, mo e fakakautaha, mo e pakipaki ‘o e mā, mo e ngaahi feingalotu.

Ko e Anga ‘o e Nofo ‘a e Kakai na‘e Tui ki he ‘Eikí

43Pea na‘e hoko ha ilifia ki he loto kotoa pē: na‘e lahi foki ‘a e ngaahi me‘a fakaofo mo e ngaahi faka‘ilonga na‘e hoko ‘i he kau ‘Aposetolo. 44Pea ko kinautolu kotoa pē na‘e tui na‘a nau fa‘a nofo fakataha, pea na‘a nau mātu‘aki me‘a taha.#Ngā 4.32-35 45Pea nau fakatau atu honau ngaahi tofi‘a mo e nga‘oto‘ota; mo nau tufa ‘a e pa‘anga na‘e ma‘u ai ki he kakai kehekehe, ‘o fakatatau ki he‘enau masiva. 46Pea ko e ‘aho kotoa pē na‘a nau faka‘utumauku ‘o loto taha he ‘alu ki he Temipale, mo nau pakipaki mā ‘i ‘api; pea na‘a nau kai honau ‘inasi ‘i he fiefia mo e loto hangamālie; 47‘o nau tuku kolōlia ki he ‘Otua, pea tokangaekina kinautolu ‘e he kakai kotoa. Pea na‘e fakaului ‘e he ‘Eiki ki he‘enau fakataha ‘i he ‘aho kotoa pē ‘a kinautolu kuo kamata mo‘ui.

Currently Selected:

‘Apositoló 2: TMB

Highlight

Copy