‘Apositoló 18

Ko Paula ‘i Kolinitō

1HILI ia na‘a ne hiki mei ‘Ātenisi, ‘o ne hoko ki Kolinitō. 2Pea ne ‘ilo ai ha motu‘a Siu na‘e hingoa ko ‘Akuila na‘e tupu ‘i Ponitō; kuo ne toki ha‘u mei ‘Ītali mo Pīsila ko hono uaifi, koe‘uhi kuo tu‘utu‘uni ‘e Kaloti ke hiki ‘a e Siu kotoa pē mei Loma. 3Pea ne ‘uhi kiate kinaua; pea ko e me‘a ‘i he‘enau faiva taha, ko ia na‘a ne nofo kiate kinaua ‘o ngāue: he ko hona faiva ko e tufunga tēniti. 4Pea na‘a ne fai ‘ene talanoa lotu ‘i he falelotu ‘i he Sāpate kotoa pē, ‘o ne fakatui‘i ha kau Siu mo ha kau Kalisi.

5Ka ‘i he hoko mai mei Masitōnia ‘a Sailosi mo Tīmote fakatou‘osi, na‘e kamata mo‘ua ‘a e loto ‘o Paula ki he‘ene malanga, ‘o ne fakamo‘oni ke ‘asi ki he kakai Siu, Ko e Mīsaia ‘a Sīsū. 6Pea ‘i he‘enau tali tu‘u ki ai mo lau kovi, na‘a ne tuu‘i hono kofu, ‘o ne pehē kiate kinautolu, Ko homou toto ‘e ‘eke ki he tumu‘aki ‘omoutolu pē; kuo u ‘ata‘atā au: hili ‘eni te u ‘alu ki he Senitaile. 7Pea ne hiki mei ai, ‘o ne hū ki he ‘api ‘o ha motu‘a na‘e hingoa ko Siusitasi, ko e toko taha kuo tafoki ‘o lotu ki he ‘Otua, pea ko hono ‘api na‘e vāofi mo e falelotu. 8Pea ko Kalisipo, ko e pule ‘o e falelotu, na‘e lotu ia ki he ‘Eiki mo hono fāmili kātoa; pea na‘e hokohoko tu‘u ‘a e tafoki mai mo e papitaiso ‘a e ni‘ihi Kolinitō ‘i he‘enau fanongo malanga.

9Pea na‘e folofola mai ‘a e ‘Eiki kia Paula ‘i ha vīsone ‘i he pō, ‘o pehē, ‘Oua ‘e manavahē, ka ke lea pē, ‘o ‘oua ‘e momo‘i fakalongo: 10he vakai ko au ‘eni ‘oku ou kau mo koe, pea ‘e ‘ikai ala ha taha kiate koe ke fai hao ngaohikovi‘i: he vakai ‘oku ‘a‘aku ha fu‘u kakai ‘i he kolo ko eni. 11Pea ne nofo ai ko e ta‘u kātoa mo e māhina ‘e ono, ‘o ne fai ‘i honau lotolotonga ‘ene ako‘aki ‘a e folofola ‘a e ‘Otua.

12Pea lolotonga na‘e kōvana ‘a Kalio ‘i ‘Akeia, na‘e kautaha ‘a e kakai Siu, ‘o nau tu‘u ke lolomi ‘a Paula, ‘o nau taki ia ki he fakamāu‘anga, 13‘o nau pehē, Ko e siana ni ‘oku ne fakaloto‘i ‘a e kakai, ke fai ‘enau lotu ki he ‘otua ‘o makehe mo e Lao.

14Pea ‘i he fai ‘e Paula ‘o ofa‘aki ‘ene lea, na‘e me‘a ‘a Kalio ki he kakai Siu, ‘a e kau Siu, ka ne ‘i ai ha maumau lao, pe ha kākā kovi, pehē na‘a ku mei kātaki, ‘o tali ho‘omou me‘a: 15ka ‘o kapau ko e koto lau pē ki ha akonaki, mo ha ngaahi hingoa, mo e lao fakaekimoutolu, pe‘i mou tokanga ki ai ‘e kimoutolu; kuo pau hoku loto ‘e ‘ikai te u fakamaau ha ngaahi alā me‘a pehē. 16Pea ne kapusi kinautolu mei he fakamāu‘anga. 17Pea hanga ai ‘a e kakai kotoa pē, ‘o nau puke ‘a Sositene, ko e pule ‘o e falelotu, ‘o nau haha ‘i he ‘ao ‘o e fakamāu‘anga. Ka na‘e ‘ikai momo‘i tokanga ‘a Kalio ki he ngaahi me‘a ko ia.

Ko e Foki ‘a Paula ki ‘Aniteoke ‘i Sīlia

18Pea na‘e kei nofo atu ‘a Paula ‘o fuofuoloa, pea ne toki fai ‘ene tatau ki he kāinga, ‘o ne kamata folau atu ki Sīlia, ‘o ne ‘alu mo ia ‘a Pīsila mo ‘Akuila: he kuo ne fafai hono ‘ulu ‘i Senikelea: he na‘e ai ‘ene tukumo‘ui.#18.18 tukumo‘ui; pe ko e tukupā. Ko e lau eni ki he tukufakaholo faka-Siu ko e fafaí ko e faka‘ilonga ‘o ha‘ate tukupā kuó te fai ki ai. #Nōm 6.18 19Pea nau hoko ki ‘Efesō, pea ne tuku hifo kinaua ‘i ai: ka ka ‘alu ‘e ia ki he fale lotu, ‘o fai ‘ene talanoa lotu mo e kakai Siu. 20Pea ‘i he‘enau tala ke ne ‘ofa ‘o nofonofo hifo mu‘a, na‘e ‘ikai te ne tali: 21ka ne fai ‘ene tatau, mo ne pehē, Te u foki mai kiate kimoutolu, ‘o kapau ko e finangalo ‘o e ‘Otua. Pea ne toki tuku folau atu mei ‘Efesō.

22Pea ‘i he‘ene hoko ki Sesalia, na‘a ne ‘alu hake ‘o fetapa ki he siasi, pea ne toki ‘alu hifo ki ‘Aniteoke. 23Pea kuo fuofuoloa ‘ene nofo ai, na‘a ne ‘alu atu ‘o ‘a‘ahi hokohoko ki he fonua ‘o Kalētia mo Filisia, ‘o ne poupou ‘a e kau ako kotoa pē.

Ko ‘Āpolosi ‘i ‘Efesō

24Pea na‘e hoko ki ‘Efesō ha motu‘a Siu na‘e hingoa ko ‘Āpolosi, ko e toko taha na‘e tupu ‘i ‘Ālekisānitia, ko e tangata tufunga lea, ‘o ne mafai ‘aupito ‘i he Tohitapu. 25Ko e tangata ia kuo akonekina ki he ‘alunga ‘o e lotu ‘a e ‘Eiki, pea ko e toko taha loto māfana; ko ia na‘a ne lea‘aki mo ako-totonu-‘aki ‘a e ngaahi me‘a na‘e kau kia Sīsū, neongo ko e papitaiso pē ‘a Sione na‘a ne ‘ilo ki ai. 26Na‘a ne kamata foki ke malanga mālohi ‘i he fale lotu: pea ‘i he fanongo ‘a Pīsila mo ‘Akuila ki ai, na‘a na fakaafe ia, ‘o na fakamatala kiate ia ‘a e ‘alunga ‘o e lotu ‘a e ‘Otua ke mahu‘ingamālie. 27Pea ‘i he‘ene tokanga ke ‘a‘ahi ki ‘Akeia, na‘e tohi ‘a e kāinga ki he kau ako, ‘o enginaki ke nau tali lelei ia: pea ‘i he‘ene hoko ki ai, na‘a ne ‘aonga lahi ki he kakai kuo lotu, ko e me‘a ‘i he kelesi na‘e ‘iate ia: 28he na‘a ne tōtōivi ‘a e fai fakakikihi mo e kau Siu ‘i he ‘ao ‘o e kakai, kae‘oua ke nau longo, ‘o ne fakamahino mei he Tohitapu ko e Mīsaia ‘a Sīsū.

Currently Selected:

‘Apositoló 18: TMB

Highlight

Copy