‘Apositoló 14

Ko Paula mo Pānepasa ‘i ‘Aikoniume

1PEA lolotonga ‘ena ‘i ‘Aikoniume, na‘a na hū fakataha ki he falelotu ‘o e Kakai Siu: pea na‘e pehē ‘ena malanga, ko ia na‘e tui ai ha fu‘u tokolahi ‘o e kakai Siu mo e kakai Kalisi fakatou‘osi. 2Ka ko e kau Siu na‘e ‘ikai tui, na‘a nau o‘i mo fakakovi‘i ‘a e loto ‘o e kau Senitaile ke tu‘u ki he kāinga lotu. 3Pea ko ia na‘e fuoloa ‘ena nofo ai, ‘o na malanga mālohi ko ‘ena falala ki he ‘Eiki; ‘a ia na‘a ne poupou ‘a e tala ‘o ‘ene ‘alo‘ofa, he‘ene tuku ke hoko ‘i he‘ena ngāue ‘a e ngaahi me‘a mana mo fakaofo. 4Pea na‘e mavahe ua ‘a e kakai ‘o e kolo, pea kau ha ni‘ihi mo ha‘a Siu, ka ko e ni‘ihi mo e ongo ‘aposetolo.

5Pea ‘i he fai ke ‘ohofi kinaua ‘e he kau Senitaile, kae‘uma‘ā ‘e ha‘a Siu mo honau kau pule, koe‘uhi ke ngaohikovi‘i mo tolongi kinaua, 6na‘a na sinaki ‘ilo ki ai, ‘o na feholaki ki he ngaahi kolo ‘o Lākonia, ‘a Līsita mo Teape mo e feitu‘u ko ia: 7pea nau nofo ‘o malanga‘aki ‘a e Kōsipeli ‘i he potu ko ia.

Ko Paula mo Pānepasa ‘i Līsita mo Teape

8Pea na‘e ai ha tangata ‘i Līsita tokua, na‘e ve‘e mate, kuo heke ta‘utu mei hono fanau‘i, ‘o ‘ikai si‘i te ne momo‘i ha‘ele. 9Pea na‘e fa‘a fanongo malanga ‘e he toko taha ko ia ‘ia Paula; pea ‘i he sio fakamama‘u ‘a Paula kiate ia, mo ne vakai ‘oku ne tui ‘e lava hono fakamo‘ui, 10na‘a ne ‘ai ‘ene fu‘u lea, ‘o ne pehē, Tu‘u ‘aki ho va‘e, ‘o kēvekeva tonu. Pea hopo hake ia ‘o ha‘ele. 11Pea ‘i he mamata ‘a e kakai ki he me‘a kuo fai ‘e Paula, na‘a nau hiki tuē, ‘o nau kalanga faka-Lākonia mai, Kuo hifo fakatangata mai ha ongo ‘otua! 12Pea nau ui ‘a Pānepasa ko Siupita, pea ko Paula ko Meakuli, he ko ia ia na‘e takimu‘a ‘i he lea. 13Pea ko e taula ‘o Siupita, ko e ‘otua na‘e ‘afio ‘i he matanikolo, na‘a ne ‘omi, ‘e ia mo e kakai, ha fanga pulu mo e ngaahi tuinga kakala ki he ngaahi matapā ‘o e fale hū‘anga, ko ‘enau fai ke feilaulau kiate kinaua.

14Pea ‘i he ongo mai ‘a e me‘a ki he ongo ‘aposetolo ko Pānepasa mo Paula, na‘a na hae hifo hona kofu, ‘o na ‘oho atu mei he fale ki he kakai, ‘o na kalanga, 15‘o pehē, ‘A matāpule, ko e hā ‘oku mou fai pehē ai? He ‘oku ma alāanga mo kimoutolu, ko e ongo tangata pē; ‘o ma tala atu ‘a e fekau lelei, ke mou tafoki mei he ngaahi ‘otua noa ni ki he ‘Otua Mo‘ui, ‘a ia na‘a ne ngaohi ‘a e langi mo e fonua mo e tahi, mo e ngaahi me‘a kehekehe ‘oku ‘i ai.#‘Eki 20.11; Saame 146.6 16Mo‘oni ‘i he ngaahi kuonga mu‘a na‘a ne tuku ai pē ‘a e kakai kehekehe ke nau fou ‘i he ngaahi founga ‘onautolu. 17Ka na‘a mo ia, ka tala‘ehai na‘a ne nofo ta‘eha faka‘ilonga; he na‘a ne ngāue ‘aonga, ‘o ne ‘atu kiate kimoutolu mei langi ‘a e ngaahi ‘uha, mo e ngaahi ta‘u mahu, ‘o ne ‘ai ke fonu ngutungutu homou loto ‘i he me‘a tokoni mo e fakafiefia. 18Pea na‘a mo ‘ena lea pehē, na‘e ‘ikai ke meimei lava ‘ena ta‘ofi ‘a e kakai mei he fai feilaulau kiate kinaua.

19Ka na‘e hoko hifo ha tu‘unga Siu mei ‘Aniteoke mo ‘Aikoniume, ‘o nau fakahinga ‘a e kakai kiate kinautolu; pea nau tolongi ‘a Paula, ‘o nau toho kitua‘ā kolo ko ‘enau mahalo kuo ne pekia. 20Pea lolotonga ‘a e tu‘u takai kiate ia ‘e he kau ako, na‘a ne tu‘u hake ‘o hū ki he kolo: pea pongipongi hake na‘a na ō atu mei ai mo Pānepasa ki Teape.

Ko e Foki ‘a Paula mo Pānepasa ki ‘Aniteoke ‘i Sīlia

21Pea hili ‘ena malanga‘aki ‘a e Kōsipeli ‘i he kolo ko ia, mo fakaului ha tokolahi ki he kau ako, na‘a na foki ki Līsita mo ‘Aikoniume mo ‘Aniteoke, 22‘o na poupou ‘a e loto ‘o e kau ako, ‘o na tokoni kinautolu ke nau nofo ma‘u ‘i he lotu, ‘o na pehē foki, Ko ‘etau hū ki he Pule‘anga ‘o e ‘Otua, kuo pau ke tau fou ‘i he ngaahi mamahi lahi. 23Pea ‘i he siasi kotoa pē na‘a na fili ‘i he hikinima ha kau faifekau ma‘anautolu; pea na fai ha hūfia faka‘aukai, ‘o na toki tuku kinautolu ki he ‘Eiki kuo nau tui ki ai.

24Pea na ‘asi atu ‘i Pisitia, ‘o na hoko ki Pamifilia: 25pea hili ‘ena malanga‘aki ‘a e folofola ‘i Peaka, na‘a na hifo ki ‘Atalaia: 26pea na folau mei ai ki ‘Aniteoke, ‘a ia ko e potu ne fua tukuange ai kinaua ki he ‘ofa ‘a e ‘Eiki, ke na fai ‘a e ngāue kuo na ‘osi ni.

27Pea ‘i he‘ena lava ki ai na‘a na fakataha ‘a e siasi, ‘o na fakamatala ki he ngaahi fu‘u me‘a kuo fai ‘e he ‘Otua ‘i he‘ene kau mo kinaua, pea mo ‘ene fakaava ki he Senitaile ha matapā ki he lotu. 28Pea na nofo ai mo e kau ako, ‘o fuofuoloa.

Currently Selected:

‘Apositoló 14: TMB

Highlight

Copy