‘Apositoló 12

Ko e fakatanga‘i ‘e Hēlota ‘a e Siasí

1PEA lolotonga ia ne ala ‘e he Tu‘i ko Hēlota#12.1 Tu‘i ko Hēlota; Ko Hēlota ‘Ākilipa ia, ko e pule ‘o Palesitaine kātoa. ki ha ni‘ihi ‘i he siasi ke ngaohikovi‘i: 2pea na‘a ne tāmate‘i heletā ‘a Sēmisi ko e ta‘okete ‘o Sione. 3Pea ‘i he‘ene vakai ‘oku lelei‘ia ai ‘a e kakai Siu, na‘a ne mōia atu ‘o puke mo Pita, pea ko e ngaahi ‘aho ia ‘o e tapu lēvani. 4Pea kuo ne ma‘u ia, na‘a ne ‘ai pilīsone, ‘o ne tuku hono le‘ohi ki ha hoa ‘e fā, ‘o taki toko fā ‘a e sōtia ki he hoa; ‘o ne tu‘utu‘uni ke ‘oua ke hili ‘a e Pāsova pea ne toki taki atu ia, ‘o fokotu‘u ‘i he ‘ao ‘o e kakai.#‘Eki 12.1-27 5Ko ia, na‘e le‘ohi pē ‘a si‘i Pita ‘i he pilīsone; ka na‘e ai ha hūfia na‘e fai tōtōaki ki he ‘Otua ‘e he siasi koe‘uhi ko ia.

Ko e fakahaofi ‘o Pita

6Pea ‘i he hoko ki he pō kae taki atu pongipongi ia ‘e Hēlota, na‘e mohe ‘a Pita ‘i he vaha‘a ‘o ha ongo sōtia, kuo kii‘i ‘aki ha seini ‘e ua, pea tutu‘u ‘a e ongo le‘o ‘i he tu‘a matapā ‘o tauhi ‘a e pilīsone. 7Mo e ‘iloange na‘e tu‘u mai ha ‘āngelo ‘a e ‘Eiki, pea malama mai ha maama ‘i he loki; pea na‘a ne taa‘i ‘a e vakavaka ‘o Pita, ‘o ne langa‘i hake, ‘o ne pehē, Tu‘u ke vave. Pea na‘e ngangana mei hono ongo nima ‘a e ongo seini na‘e ha‘i ‘aki ia. 8Pea me‘a ‘a e ‘āngelo kiate ia, ‘Ai ho no‘o, pea fakama‘u ho teka. Pea ne fai. Pea pehē mai ‘e ia, Kahoa ho pulupulu, ‘o muimui mai. 9Pea ne hū atu ‘o muimui ki ai; pea na‘e ‘ikai te ne ‘ilo ko e mo‘oni ‘a e me‘a ‘oku fai ‘e he ‘āngelo, ka ne mahalo ko e vīsone ‘oku ne mamata ki ai. 10Pea kuo na tuku ki mui ‘a e ‘uluaki le‘o mo hono ua, pea na a‘u ki he matapā ukamea, ‘a ia ko e hū‘anga mei kolo; pea mato‘o ia kiate kinaua ‘iate ia pē: pea kuo na hū kitu‘a na‘a na laka atu, ‘o ‘osi mai ha hala ‘e taha; pea toki mole ‘a e ‘āngelo meiate ia.

11Pea ‘i he matala ‘a e loto ‘o Pita, na‘a ne pehē, Tā ‘oku toki e‘a ni kiate au, kuo fekau mo‘oni ‘e he ‘Eiki ‘ene ‘āngelo, pea kuo ne hamusi au mei he nima ‘o Hēlota, mo e fu‘u ‘amanaki ‘a e kakai Siu.

12Pea ‘i he o‘o kiate ia ‘a e me‘a, na‘a ne ‘alu ki he fale ‘o Mele ko e fa‘ē ‘a Sione (ko hono hingoa ‘e taha ko Ma‘ake), ‘a ia na‘e lolotonga ‘i ai ha tokolahi kuo fakataha ke hūfia. 13Pea ‘i he‘ene tukituki ki he matapā ‘o e fale hū‘anga, na‘e ha‘u ha kaunanga na‘e hingoa ko Lota ke fehu‘i. 14Pea ‘i he‘ene ‘ilo ko e le‘o ‘o Pita, na‘e pehē ‘ene fiefia na‘e ‘ikai te ne to‘o ‘a e matapā, ka ka lele ia ki loto fale, ‘o fakahā ‘oku tu‘u ‘a Pita ‘i he matapā. 15Pea nau pehē kiate ia, ‘Oku ke sesele. Ka ka taukave pē ‘a e ta‘ahine, ko ia pē.

Pea nau pehē, Tā ko hono ‘āngelo ia.

16Ka ka hanganaki pē ‘a Pita ‘ene tukituki: pea ‘i he‘enau to‘o ‘a e matapā, ‘o ‘ilo ia, na‘a nau fakatumutumu. 17Pea ta‘alo atu ‘e ia ke nau fakalongo pē, ‘o ne fakamatala kiate kinautolu ‘a hono fakahaofi ia ‘e he ‘Eiki mei he pilīsone. Na‘a ne pehē foki, Mou tala ‘a e me‘a kia Sēmisi mo e kāinga. Pea ne hū atu ‘o ‘alu ki ha potu kehe.

18Pea ‘i he‘ene ‘aho hake, ko e me‘a ngei ‘a e puputu‘u ‘a e kau tau, ‘Oiauē! kuo hā ‘a Pita? 19Pea kuo kumi ‘a Hēlota kiate ia, ‘o ‘ikai ‘ilo, na‘a ne ‘eke ‘a e kau le‘o, ‘o fekau ke taki atu ‘o tāmate‘i.

Pea ne ‘alu hifo mei Siutea ki Sesalia, ‘o nofo si‘i ai.

Ko e Pekia ‘a Hēlotá

20Pea ko e taimi ko ia na‘e fai ai hono tuputāmaki ki he kakai ‘o Taia mo Saitoni: ka na‘a nau kautaha ‘o ha‘u kiate ia, pea nau fakaloto‘i ‘a Palasito ko e tauhi ‘o e fale mohe ‘o e Tu‘i mo‘onau fotufotuaki, ‘o nau kole ke fakalelei; koe‘uhi na‘e kai ‘utungaki honau fonua mei he fonua ‘o e Tu‘i.

21Pea ‘i he hokosia ‘a e ‘aho na‘e kotofa, na‘e ‘ai ‘e Hēlota ha kofu fakatu‘i, ‘o ne nofo ‘i he taloni, ‘o ne fai ha fu‘u malanga kiate kinautolu ‘i he ‘ao ‘o e kakai. 22Pea kalanga ‘a e kakai, Ko e folofola ‘a ha ‘Otua, ‘o ‘ikai ko ha tangata. 23Pea te‘ia leva ia ‘e ha ‘āngelo ‘a e ‘Eiki, ko e ‘inanga ‘o e ‘ikai te ne tuku ‘a e kolōlia ki he ‘Otua: pea na‘e keina ia ‘e he ponu, ‘o ne hala.

24Ka ko e folofola ‘a e ‘Otua na‘e tuputupu ma‘u pē, ‘o fakatokolahi.

25Pea ko Pānepasa mo Saula na‘a na foki mei#12.25 mei: Ko hono fakalea ‘i hono ngaahi hiki fuoloa ‘e ni‘ihi: ki. Selusalema ‘i he ‘osi ‘ena fekau, ‘o na ‘ave ‘a Sione, ‘a ia na‘e fakahingoa ko Ma‘ake.

Currently Selected:

‘Apositoló 12: TMB

Highlight

Copy