KO 1 TU‘I 21
21
Ko e Ngoue Vaine ‘a Nēpote
1PEA hili ‘a e ngaahi me‘a ko ia na‘e hoko ‘a e me‘a ni: Tokua na‘e ‘i ai ha ngoue vaine ‘a Nēpote ko e motu‘a Sisilili, pea na‘e tu‘u ‘i Sisilili, ‘o ofi ki he palasi ‘o ‘Ēhapi ko e Tu‘i Samēlia. 2Pea lea ‘a ‘Ēhapi kia Nēpote, ‘o pehē, Tuku mai mu‘a ho‘o ngoue vaine ma‘aku ngoue mohuku kai, he ‘oku hoko mo hoku fale: pea te u ‘atu ha ngoue vaine lelei hake mōno fetongi, pe te u ‘atu pa‘anga ki hono mahu‘inga, kapau ‘e lelei ia kiate koe.
3Pea tali ‘e Nēpote kia ‘Ēhapi, Mole ke mama‘o ha‘aku foaki ‘a e tofi‘a ‘o ‘eku ngaahi kui ki he ‘afiona.
4Pea ‘alu ‘a ‘Ēhapi ki hono fale ‘oku ne fakamāmāhu‘i mo ‘ita, koe‘uhi ko e lea ‘a Nēpote kuo fai, ‘a e motu‘a Sisilili, he‘ene pehē, ‘E ‘ikai te u ‘atu ki he ‘afiona ‘a e tofi‘a ‘o ‘eku ngaahi kui. Pea ne tokoto ‘i hono mohenga, ‘o ne hanga kehe, ‘o ‘ikai te ne tali ha me‘a taumafa, 5pea ha‘u kiate ia hono uaifi ko Sisipeli, ‘o ne pehē kiate ia Ko e hā ‘oku mamahi pehē ai ho loto, ‘o ‘ikai te ke fie tali ha me‘a taumafa?
6Pea ne tali kiate ia, Koe‘uhi na‘a ku lea ki he motu‘a Sisilili ko Nēpote, ‘o u pehē ki ai, Tuku mai ho‘o ngoue vaine ka u totongi, pe te u fetongi ‘aki ha ngoue vaine kehe, ‘o kapau ‘oku ke manako pehē: pea ne tali, ‘E ‘ikai te u ‘atu ‘eku ngoue vaine.
7Pea tali ange ‘e hono uaifi ko Sisipeli, Lau ‘e au ko koe ‘oku fai ‘a e pule‘anga ‘o ‘Isileli; Tu‘u, fai ho‘o taumafa, pea fiemālie ho loto; te u ‘atu ‘e au kiate koe ‘a e ngoue vaine ‘a e Sisilili ko Nēpote.
8Pea ne fai tohi ‘i he huafa ‘o ‘Ēhapi, ‘o ne sila‘i ‘aki ‘ene sila, ‘o ne ‘atu ‘a e ngaahi tohi ki he kau mātu‘a mo e hou‘eiki ‘i he‘ene kolo na‘e kaunga nonofo mo Nēpote. 9Pea ko e me‘a na‘a ne tu‘u ‘i he ngaahi tohi na‘e pehē, Fanongonongo ha ‘aukai, pea tuku ‘a Nēpote ke tāimu‘a ‘i he kakai, 10‘io, pea fakanofo ha ongo siana faka-Pileali ‘i hono ‘ao, pea ke na talatalaaki‘i ia ‘o pehē, Na‘a ke kape‘i ‘a e ‘Otua mo e tu‘i. Pea mou toki ‘ave ki tua‘ā ‘o tolomaka‘i ke ne mate.
11Pea fai ‘e he kau tangata ‘o hono kolo, ‘io, ‘a e kau mātu‘a mo e hou‘eiki na‘e nofo ‘i hono kolo, na‘a nau fai ‘o hangē ko honau fekau ‘e Sisipeli, ‘o tatau tofu pē mo e me‘a ne tu‘u ‘i he ngaahi tohi na‘e ‘omi meiate ia. 12Na‘a nau fanongonongo ha ‘aukai, pea nau fakanofo ‘a Nēpote ke tāimu‘a ‘i he kakai. 13Pea ha‘u ha ongo siana faka-Pileali, ‘o na nofo ‘i hono ‘ao: pea talatalaaki‘i ia ‘e he ongo siana faka-Pileali, ‘io, ‘a Nēpote, ‘i he ‘ao ‘o e kakai, ‘o pehē, Na‘e kape‘i ‘e Nēpote ‘a e ‘Otua mo e tu‘i. Pea nau toki ‘ave ia ki tua‘ā ‘o nau tolomaka‘i, ‘o ne pekia. 14Pea nau toki fekau kia Sisipeli ke fakahā kuo tolomaka‘i ‘a Nēpote, pea kuo pekia.
15Pea ‘i he fanongo leva ‘e Sisipeli kuo tolomaka‘i ‘a Nēpote, pea kuo ne pekia, pea ne pehē kia ‘Ēhapi, Tu‘u, pea ma‘u ‘a e ngoue vaine ‘a Nēpote, ‘a e motu‘a Sisilili, ‘a ia na‘a ne fakafisi hono fakatau; he ‘oku ‘ikai kei mo‘ui ‘a Nēpote, ka kuo pekia, 16pea ‘i he fanongo leva ‘e ‘Ēhapi kuo pekia ‘a Nēpote, na‘a ne tu‘u ke ‘alu hifo ki he ngoue vaine ‘a e Sisilili ko Nēpote ke ma‘u ia.
17Pea hoko ‘a e folofola ‘a e ‘Eiki kia ‘Ilaisiā ko e Tisipī, ‘o pehē, 18Tu‘u, ‘alu hifo ke fakafetaulaki kia ‘Ēhapi ko e Tu‘i ‘Isileli, ‘a ia ‘oku nofo ‘i Samēlia; vakai ‘oku ne ‘i he ngoue vaine ‘a Nēpote, ‘a ia kuo ne ‘alu hifo ki ai ke ma‘u. 19Pea te ke lea kiate ia, ‘o pehē, Ko e folofola eni ‘a Sihova, Kuo ke fakapoongi koā, mo to‘o ‘a e koloa foki? Pea te ke fai atu ho‘o lea ki ai, ‘o pehē, Ko e folofola eni ‘a Sihova, Ko e potu na‘e ‘emo ai ‘e he fanga kulī ‘a e toto ‘o Nēpote, ko e potu ko ia ‘e ‘emo ai ‘e he fanga kulī ho toto, ‘io, ‘o‘ou.
20Pea pehē ‘e ‘Ēhapi kia ‘Ilaisiā, Kuo ke ‘ilo au koā, hoku fili? Pea ne tali, Kuo u ‘ilo koe, koe‘uhi kuo ke fakatau li‘aki koe ke fai ‘a e me‘a ‘oku tau kovi ki he finangalo ‘o Sihova.
21Vakai, ko au eni ‘oku ou ‘omi ha mala kiate koe, pea te u tafi‘i atu koe, pea te u tu‘usi meia ‘Ēhapi na‘a mo e tamasi‘i tangata, pea mo ia ‘oku mo‘ua mo tau‘atāina ‘i ‘Isileli: 22pea te u tuku ho fale ke hangē ko e fale ‘o Selopoame foha ‘o Nīpati, pea hangē ko e fale ‘o Pā‘asa foha ‘o ‘Āhaia, koe‘uhi ko e pau‘u na‘a ke faka‘ita ‘aki au, pea mo ho‘o fakaangahala‘i ‘a ‘Isileli. 23Pea ko e me‘a kia Sisipeli foki na‘e folofola ai ‘a Sihova ‘o pehē, ‘E keina ‘a Sisipeli ‘i he fanga kulī ‘i he keli ‘o Sisilili.#2 Tu‘i 9.36 24Ko ha‘a ‘Ēhapi ‘oku pekia ‘i he kolo ‘e kai ‘e he fanga kulī, pea ko ia ‘oku mate ‘i he vao ‘e keina ‘e he manupuna ‘o e ‘atā.
25(Tala atu, na‘e ‘ikai ha taha ‘e tatau mo ‘Ēhapi ‘ene fakatau li‘aki ia ke fai ‘a e me‘a ‘oku tau kovi ki he finangalo ‘o Sihova, ‘a ia na‘e o‘i ia ‘e hono uaifi ko Sisipeli. 26‘Io, na‘a ne fai fakalielia ‘aupito he‘ene muimui ki he ngaahi ‘aitoli noa, ‘o tatau mātē mo e fai ‘a ha‘a ‘Āmoli, ‘a ia ne kapusi ‘e Sihova mei he ‘ao ‘o ha‘a ‘Isileli.)
27Pea ‘i he fanongo leva ‘e ‘Ēhapi ki he ngaahi lea ko ia, na‘a ne hae hifo hono kofu, ‘o ne ‘ai tauanga‘a ki hono kakano, mo ne ‘aukai, mo ne kafu ‘aki ‘a e tauanga‘a, mo ne laka faka‘ete‘ete pē.
28Pea hoko ‘a e folofola ‘a Sihova ki he Tisipī ko ‘Ilaisiā, ‘o pehē, 29Kuo ke vakai koā ‘a e fakavaivai‘i ia ‘e ‘Ēhapi ‘i hoku ‘ao? ko e me‘a ‘i he‘ene fakavaivai‘i pehē, ko ia ‘e ‘ikai te u ‘omi ai ‘a e mala ‘i hono taimi ‘o‘ona, ka ‘i he taimi ‘o hono foha te u ‘omi ‘a e mala ki hono fale.
Currently Selected:
KO 1 TU‘I 21: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
