KO 1 TU‘I 11
11
Ko e Afe ‘a Solomone mei he ‘Otuá
1KA na‘e ‘ofa ‘a Kingi Solomone ki he kau fefine muli tokolahi, fakataha mo e ‘ōfefine ‘o Felo, ‘ani fafine Moape, ‘Āmoni, ‘Ītomi, Saitoni, mo Heti;#Teu 17.17 2‘a e ngaahi pule‘anga ‘a ia na‘e folofola ‘a Sihova ki ha‘a ‘Isileli, ‘Oua te mou ‘alu kiate kinautolu, pea ‘oua te nau omi kiate kimoutolu: kuo pau te nau fakaafe homou loto ke muimui ki honau ‘otua–ko kinautolu ia na‘e piki ki ai ‘a Solomone, ‘o ‘ofa ki ai.#‘Eki 34.16; Teu 7.3-4 3Pea na‘a ne ma‘u ha uaifi ‘e fitungeau na‘e ‘eiki, mo e sinifu ‘e toko tolungeau: pea na‘e fakaafe hono loto ‘e hono ngaahi uaifi. 4He ‘i he faifai ‘o motu‘a ‘a Solomone, na‘e fakaafe ‘e hono ngaahi uaifi hono loto ke muimui ki he ngaahi ‘otua kehe: pea na‘e ‘ikai haohaoa hono loto ‘i he‘ene fakafeangai kia Sihova ko hono ‘Otua, ‘o hangē ko e loto ‘o Tēvita ko ‘ene tamai. 5He na‘e muimui ‘a Solomone kia ‘Asiteloti ko e ‘otua ‘o e kau Saitoni, pea kia Milikomi ko e ‘otua fakalielia ‘o ‘Āmoni. 6Pea fai ‘e Solomone ‘a e me‘a na‘e tau kovi ki he finangalo ‘o Sihova, ‘o ‘ikai te ne molomolomuiva‘e ki he ‘Eiki, ‘o hangē ko Tēvita ko ‘ene tamai. 7Toki ngaohi ‘e Solomone ha ‘esi mo‘o Kīmosi ko e ‘otua fakalielia ‘o Moape ‘i he mo‘unga ‘oku hanga mai ki Selusalema, pea kia Moloke ko e ‘otua fakalielia ‘o ‘Āmoni. 8Pea pehē mo ‘ene fai ma‘a hono ngaahi uaifi muli kotoa pē, ‘a ia na‘a nau tutu ‘inisēnisi mo fai feilaulau ki honau ngaahi ‘otua.
9Pea tuputāmaki ‘a e ‘Eiki kia Solomone, koe‘uhi ko e afe hono loto meia Sihova ko e ‘Otua ‘o ‘Isileli, ‘a ia kuo hā kiate ia tu‘o ua, 10pea kuo ne kouna ia ‘i he me‘a ni, ke ‘oua te ne muimui ‘otua kehe: ka kuo ‘ikai te ne tauhi ‘a e me‘a na‘e tu‘utu‘uni ‘e Sihova. 11Pea folofola ‘a Sihova kia Solomone, Ko e me‘a ‘i ho‘o pehē, mo e ‘ikai te ke tauhi ‘eku kovinānite mo e ngaahi fekau kuo u tu‘utu‘uni atu, te u mātu‘aki hae ‘a e pule‘anga meiate koe, ‘o ‘atu ki ho‘o tamaio‘eiki. 12Ka ‘e ‘ikai te u fai ia ‘i ho taimi ‘o‘ou, koe‘uhi ko ho‘o tamai ko Tēvita: ka te u hae mei he nima ‘o ho foha. 13Ka ‘e ‘ikai te u hae mai hono kotoa ‘o e pule‘anga; te u ‘atu ha matakali ‘e taha ki ho foha, telia ‘eku tamaio‘eiki ko Tēvita, pea telia ‘a Selusalema, ‘a ia kuo fili.
Ko e ngaahi Fili ‘o Solomone
14Pea langa‘i ‘e he ‘Eiki ha fili kia Solomone, ‘a e ‘Ītomi ko Hētati: ko e taha ia na‘e kau ki he hako ‘o e tu‘i ‘i ‘Ītomi. 15He ‘i he nofo ‘a Tēvita ‘i ‘Ītomi, kuo ‘alu ‘a Sioape ko e ‘eiki ‘o e hōsitē ke tanu ‘a e pekia, pea kuo ne taa‘i ‘a e tangata fua pē ‘i ‘Ītomi; 16(he na‘e ono māhina ‘a e nofo ai ‘a Sioape mo e kau ‘Isileli, kae‘oua ke ‘osi ‘ene taa‘i ‘a e tangata fua pē ‘o ‘Ītomi); 17ka ka hola ‘a ‘Ētati, ‘a ia moni ‘Ītomi, ko e kau tamaio‘eiki ‘a ‘ene tamai, ko e ‘alu ki ‘Isipite; pea ko e momo‘i tamasi‘i pē ‘a Hētati. 18Pea nau tuku fononga mai mei Mitiani, ‘o nau a‘u ki Pēlana, pea nau ma‘u ha kau tangata ke ō mo kinautolu mei Pēlana, pea nau a‘u ki ‘Isipite kia Felo ko e Tu‘i ‘Isipite, ‘a ia na‘a ne ‘ange hano fale, mo ne tu‘utu‘uni ha‘ane me‘a tokoni, ‘o ne foaki ha konga kelekele ki ai. 19Pea ta‘imālie ‘ofa lahi ‘a Hētati meia Felo, ‘o ne foaki kiate ia mōno ‘unoho ‘a e tokoua ‘o hono uaifi ‘o‘ona, ‘io, ‘a e tokoua ‘o Tapanesi ko e ma‘itaki. 20Pea fā‘ele‘i kiate ia ‘e he tokoua ‘o Tapanesi ha foha ko Kenupate, pea na‘e fai hono fakamāvae ‘e Tapanesi ‘i he fale ‘o Felo: pea na‘e tupu ‘a Kenupate ‘i he fale ‘o Felo fakataha mo e fale‘alo ‘o Felo.
21Pea ‘i he fanongo ‘e Hētati ‘i ‘Isipite kuo toka ‘a Tēvita mo ‘ene ngaahi kui, pea kuo pekia ‘a Sioape ko e ‘eiki ‘o e hōsitē, pea fakatau folofola ai ‘a Hētati kia Felo, ‘o pehē, Tuku mai au ke u ‘alu ki hoku fonua.
22Pea folofola ki ai ‘a Felo, Ko e hā ha me‘a kuo ke masiva ai ‘i he‘eta nonofo, kae fokifā ‘oku ke tangi ke ‘alu ki ho fonua ‘o‘ou? Pea tali ‘e ia, ‘Oku ‘ikai; kaekehe ke ke tuku au ke u ‘alu.#11.22 Pea tali… ‘alu; Ko hono faka-Hepeluú ia, ka ‘oku pehē he hiki fuoloa ‘e taha: Peá ne foki ki hono fonuá. ‘I he hiki fuoloa ‘e taha ‘oku tānaki mai mo e pehē: ‘I he‘ene Tu‘i ‘Ītomí ko e fili kovi mo loto kona ia ‘o ‘Isileli. I he hiki faka-Hepeluú ‘oku tu‘u ‘a e meimei kupu‘i lea tatau ‘i he ‘osi ‘a e veesi 25.
23Pea langa‘i ‘e he ‘Otua mo hano fili ko Lēsoni ko e foha ‘o ‘Eliata, ‘a ia kuo hola mei hono ‘eiki ko Hetatesa ko e Tu‘i Sopa: 24pea ne tānaki mai ha kau tangata ‘o ne hoko ia ko e ‘eiki ‘o ha kongakau, ‘i he taa‘i ‘e Tēvita ‘a e fa‘ahinga ko ē: pea nau ‘alu ki Tāmasikusi, ‘o nofo ai, ‘o hau ‘i Tāmasikusi. 25Pea ko e fili ia ‘o ‘Isileli ‘i he taimi kotoa ‘o Solomone, ‘o ua‘aki ‘a e kovi na‘e fai ‘e Hētati: pea ne fehi‘a ki ‘Isileli, ‘o ne tu‘i ki Sīlia.
26Pea ko Selopoame foha ‘o Nīpati, ko e motu‘a ‘Ifalemi mei Sāleta, ko ha tamaio‘eiki ‘a Solomone, na‘e ala‘aki mo ia foki ki he tu‘i. (Ko e hingoa ‘o ‘ene fa‘ē ko Sīlua, (ko e fefine kuo uitou). 27Pea ko hono ‘uhinga eni ‘o ‘ene ala‘aki ki he tu‘i. Ne ngaohi ‘e Solomone ‘a Milo, ‘o ne fakamā‘opo‘opo ‘a e me‘a na‘e ava ‘i he ‘ā ‘i he kolo ‘o Tēvita ko ‘ene tamai.
28Pea ko e tangata ko Selopoame ko e fu‘u to‘a: pea vakai ‘e Solomone ‘a e talavou ‘oku fiefie ngāue ia, ‘o ne fakanofo ia ke pule ki he fatongia kotoa ‘o e fale ‘o Siosifa. 29Pea ‘i he taimi ko ia, ‘i he ‘alu kitu‘a ‘a Selopoame mei Selusalema, pea ‘iloange na‘e ma‘u ia ‘e he motu‘a Sailo ko ‘Āhaia na‘e palōfita; pea kuo ‘ai ‘e he palōfita ha kofu fo‘ou; pea na‘a na fakaekinaua pē ‘i he vao. 30Pea puke ‘e ‘Āhaia ‘a e kofu fo‘ou kuo ne ‘ai, ‘o ne haehae ke konga ‘e hongofulu mā ua. 31Pea ne pehē kia Selopoame, Ma‘u ‘e koe ha konga ‘e hongofulu: he ko eni ‘a e folofola ‘a Sihova ko e ‘Otua ‘o ‘Isileli; Vakai, te u hae ‘a e pule‘anga mei he nima ‘o Solomone, pea te u ‘atu ha matakali ‘e hongofulu kiate koe: 32(ka te ne ma‘u ha matakali ‘e taha, telia ‘eku tamaio‘eiki ko Tēvita, pea telia ‘a Selusalema, ‘a e kolo kuo u fili ki ai mei he ngaahi matakali ‘Isileli): 33koe‘uhiā kuo nau li‘aki au, pea kuo nau#11.33 kuo nau… nau; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: kuo li‘aki au ‘e Solomone, pea kuó ne. lotu kia ‘Asiteloti, ko e ‘otua ‘o e kau Saitoni, kia Kīmosi ko e ‘otua ‘o Moape, pea kia Milikomi ko e ‘otua ‘o ha‘a ‘Āmoni; pea kuo ‘ikai te nau#11.33 pea kuo… fou; Ko hono faka-Hepeluú ia, ka ‘oku pehē he ngaahi hiki fuoloa ‘e ni‘ihi: Kuo ‘ikai ke fou ‘a Solomone. ‘i hoku ngaahi hala, ke fai ‘a e me‘a ‘oku hā totonu, kiate au, mo e ngaahi tu‘utu‘uni mo konisitūtone ‘a‘aku, ‘o hangē ko Tēvita ko ‘ene tamai. 34Ka ‘e ‘ikai te u to‘o ‘a e pule‘anga kotoa mei hono nima, ka te u fokotu‘u ia ke ‘eiki lolotonga ‘ene mo‘ui, telia ‘eku tamaio‘eiki ko Tēvita, ‘a ia na‘a ku fili, ‘a ia na‘a ne tauhi ‘eku ngaahi tu‘utu‘uni mo fekau: 35ka te u to‘o ‘a e pule‘anga mei he nima ‘o hono foha, pea te u tuku ia kiate koe, ‘io, ha hongofulu‘i matakali. 36Ka te u ‘atu ki hono foha ha matakali ‘e taha, koe‘uhi ke ‘i ai ma‘u pē ha maama ‘a ‘eku tamaio‘eiki ko Tēvita ‘i hoku ‘ao ‘i Selusalema, ‘a e kolo kuo u fili mo‘oku, ke ‘ai ki ai hoku hingoa. 37Pea te u to‘o koe, pea te ke pule, ‘o hangē ko ia kotoa ‘oku holi ki ai ho loto, pea te ke hoko ko e Tu‘i ‘Isileli. 38Pea kapau te ke fakaongo ki he me‘a kotoa kuo u tu‘utu‘uni atu, pea ke fou ‘i hoku ngaahi hala, mo fai ‘a e me‘a ‘oku hā totonu kiate au, ke tauhi ‘eku ngaahi fekau mo tu‘utu‘uni, ‘o hangē ko e fai ‘e Tēvita ko ‘eku tamaio‘eiki, pea te u toki ‘iate koe, pea te u langa mo‘ou ha fale tu‘u ma‘u, hangē ko ‘eku langa mo‘o Tēvita, pea te u ‘atu ‘a ‘Isileli kiate koe. 39‘Io, te u fakavaivai‘i ‘a e hako ‘o Tēvita ko e me‘a ni, ka ‘e ‘ikai ke pehē ‘o ta‘engata.
40Ko ia, na‘e feinga ‘a Solomone ke tāmate‘i ‘a Selopoame: ka ka tu‘u ‘a Selopoame ‘o hola ki ‘Isipite kia Sīsake ko e Tu‘i ‘Isipite, pea na‘a ne ‘i ‘Isipite ‘o a‘u ki he pekia ‘a Solomone.
Ko e Pekia ‘a Solomoné
(2 Kal 9.29-31)
41Pea ko e toe ‘o e ngāue ‘a Solomone, mo e ngaahi me‘a na‘a ne fai, mo ‘ene poto, ‘ikai kuo tohi ia ‘i he Puka ‘o e Ngāue ‘a Solomone 42Pea ko e fuoloa ‘o e tu‘i ‘a Solomone ki ‘Isileli kātoa ‘i Selusalema ko e fāngofulu‘i ta‘u. 43Pea toka ‘a Solomone mo ‘ene ngaahi kui, pea na‘e telio ia ‘i he kolo ‘o Tēvita ko ‘ene tamai: pea na‘e fetongi ia ‘i he pule ‘e hono foha ko Lehopoame.
Currently Selected:
KO 1 TU‘I 11: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
