مُرْقُسْ 16

المَسِيحْ قَامْ مِالمُوتْ

1وبَعْدْمَا تْعَدَّى السِّبْتْ، شْرَاتْ مَرْيِمْ المَجْدَلِيَّة ومَرْيِمْ أُمْ يَعْقُوبْ وسَالُومَة عْطُورَاتْ بَاشْ يِدْهْنُوا بِيهَا جُثِّةْ يَسُوعْ. 2ونْهَارْ الأَحَدْ، مْشَاوْ لِلْقْبَرْ فِي الصْبَاحْ بِكْرِي، قْبَلْ طْلُوعْ الشَّمْسْ. 3وكَانُوا يْقُولُوا لِبْعَضْهُمْ: «شْكُونْ بِشْ يْبَعْدِلْنَا الحَجْرَة مِنْ بَابْ القْبَرْ؟». 4ووَقْتِلِّي خَزْرُوا، لْقَاوْ الِّي الحَجْرَة تْنَحَّاتْ مِالبَابْ رَغْمِلِّي كَانِتْ كْبِيرَة بَرْشَة. 5وكِي دَخْلُوا فِي وِسْطْ القْبَرْ شَافُوا فِي الجِّيهَة اليْمِينْ وَاحِدْ قَاعِدْ ولَابِسْ بِالأَبْيِضْ، يَاخِي خَافُوا. 6قَالِلْهُمْ: «مَا تْخَافُوشْ. إِنْتُومَا تْلَوْجُوا عْلَى يَسُوعْ النَّاصْرِي الِّي تِصْلَبْ. رَاهُو قَامْ، هُوَّ مُشْ هُونِي. هَايْ البُقْعَة الِّي حَطُّوهْ فِيهَا. 7بَرَّاوْ قُولُوا لِتْلَامِذْتُو ولْبُطْرُسْ رَاهُو بِشْ يِسْبِقْكُمْ لِلْجَلِيلْ، وغَادِي بِشْ تْشُوفُوهْ كِيمَا قَالِلْكُمْ». 8يَاخِي خَلَّاوْ القْبَرْ وهَرْبُوا وهُومَا مَرْعُوبِينْ، ومَا قَالُوا حَتَّى شَيْ لْحَتَّى وَاحِدْ مِنْ كُثْرِةْ الخُوفْ.

ظْهُرْ لِتْلَامِذْتُو

9وبَعْدْمَا قَامْ يَسُوعْ مِالمُوتْ نْهَارْ الأَحَدْ الصْبَاحْ، أَوِّلْ مَا ظْهُرْ، ظْهُرْ لْمَرْيِمْ المَجْدَلِيَّة الِّي خَرِّجْ مِنْهَا سَبْعَة أَرْوَاحْ شِرِّيرَة. 10يَاخِي مْشَاتْ وبَشْرِتْ أَتْبَاعُو، الِّي كَانُوا يْنَوْحُوا ويِبْكِيوْ. 11وكِي سَمْعُوا الِّي هُوَّ حَيْ ولِّي هِيَّ شَافِتُّو، مَا صَدْقُوشْ.

12وبَعْدْهَا ظْهُرْ فِي هَيْئَة أُخْرَى لْزُوزْ مِنْ تْلَامِذْتُو وهُومَا مَاشِينْ لِلرِّيفْ. 13يَاخِي مْشَاوْ وبَشْرُوا البَقِيَّة، آمَا حَتَّى هُومَا مَا صَدْقُوهُمْشْ.

إِمْشِيوْ لِلْعَالِمْ أَجْمَعْ

14ومْبَعِّدْ ظْهُرْ لِلحْدَاشِنْ تِلْمِيذْ، وَقْتِلِّي كَانُوا يَاكْلُوا، ولَامْهُمْ عْلَى قِلِّةْ إِيمَانْهُمْ وكْسُوحِيِّةْ قْلُوبْهُمْ، كِي مَا صَدْقُوشْ النَّاسْ الِّي شَافُوهْ بَعْدْمَا قَامْ مِالمُوتْ. 15وقَالِلْهُمْ: «إِمْشِيوْ لِلْعَالِمْ أَجْمَعْ، ووَصّْلُوا البْشَارَة لِلنَّاسْ الكُلْ: 16الِّي يَمِّنْ ويِتْعَمِّدْ يِنْجَى، ولِّي مَا يَمِّنْشْ يِتَّحْكَمْ عْلِيهْ. 17ولِّي يَمْنُوا بِشْ تْكُونْ عَنْدْهُمْ المُعْجْزَاتْ هَاذِي: يْخَرْجُوا الشْوَاطِنْ بْإِسْمِي ويِتْكَلْمُوا بْلُوغَاتْ جْدِيدَة، 18ويْشِدُّوا حَتَّى اللْفَعْ بِيدِيهُمْ. وإِذَا شَرْبُوا حَاجَة سَامَّة مَا تْضُرْهُمْشْ، ويْحُطُّوا يْدِيهُمْ عَالمُرْضَى يَبْرَاوْ».

19وبَعْدْمَا الرَّبْ تْكَلِّمْ مْعَاهُمْ، تِرْفَعّْ لِلسْمَاء، وقْعَدْ عْلَى يْمِينْ اللَّهْ. 20وخَرْجُوا التْلَامْذَة يْبَشْرُوا فِي كُلْ بْلَاصَة، وكَانْ الرَّبْ يْعَاوِنْ فِيهُمْ ويْأَكِّدْ فِي كْلَامْهُمْ بِالمُعْجْزَاتْ.

Currently Selected:

مُرْقُسْ 16: بالتونسي

Highlight

Copy