Marukusu 13

Yesu u danai uteku u na Urishelima u kuyikpa̱

(Mat. 24:1-2; Luk. 21:5-6)

1Yesu a̱ kuta̱ punu a̱ A̱Ꞌisa̱ a Gbayin, ɗa vuza yoku punu a̱ ka̱tsuma̱ ka̱ mukumitoni n ni u danai ni, “Malum, inda biꞋi, uteku u na kumaꞋa ku singai ku a nan ɗe ki, n atali a feu.”

2Ɗa wu ushuki, “Yi ta̱ e kene kumaꞋa ku singai ku nan ɗe? Ko katali ke te ko kokpo u kiyangi a gaɗi vu toku ba. I ta̱ a̱ kufa̱da̱ a ɗa dem.”

Ugiti wa atakaci

(Mat. 24:3-14; Luk. 21:7-19)

3A̱yi lo ida̱shi a Kusan ku Zaitun ku na ki a kinda A̱Ꞌisa̱ a Gbayin, Biturusu n Yakubu n Yahaya koɓolo n Andarawu a̱ ta̱wa̱i wa̱ ni n ka̱bini ɗa e ecei ni, 4“Dana tsu wana ɗai a kuyaꞋan ili i nan lo dem. Yi ɗa̱i kpamu iyoci i na ce kene adama a na ci yeve ayin a na ili i nan lo ya yi a̱ kugita̱?”

5Ɗa Yesu u danai le, “YaꞋin mayin, adama a na ka̱ta̱ vuza u ta̱wa̱ u ya̱nsa̱ ɗa̱ ba. 6Uma n a̱bunda̱i i ta̱ a̱ kuta̱wa̱ wa̱ ɗa̱ n kula ku va̱, ka̱ta̱ a dana ele ɗa Kirisiti Kishi. I ta̱ kpamu a̱ kuya̱nsa̱ uma n a̱bunda̱i. 7I gita̱ baci kupana arabali o kuvon n ukuna u kuvon, ka̱ta̱ asuvu a̱ ɗa̱ a̱ muɗa̱ ba, ili i nam pa i kuyaꞋan ta̱ ra̱ka̱ amma ka̱ta̱ uteku u ɗa ba. 8Iɗika yi ta̱ a̱ kushilika̱ n iɗika i yoku. Tsugono kpamu a̱ kushilika̱ n tsugono ci yoku. Iɗika yi ta̱ a̱ kugba̱ɗa̱sa̱ a̱ ubuta̱ kakau. Kambulu ki ta̱ kpamu a kuyaꞋan n a̱bunda̱i. Ili i nam pa dem yi ta̱ tsu kugita̱ ka̱ a̱ga̱nda̱ a limata.

9“Amma ka̱ta̱ i yongo n ugboji, i ta̱ e kureme ɗa̱ a banka a̱ ubuta̱ wa afada, ka̱ta̱ a lapa ɗa̱ a̱ unu a avasa. I ta̱ a kubanka ɗa̱ ubuta̱ wu ngono n anan gomuna adama a̱ va̱, ka̱ta̱ i dana le ukuna u va̱ ɗe. 10Amma kafu aduniyan o kotso, sai a dana umaci dem Arabali a Singai ra̱ka̱. 11E reme ɗa̱ baci, ɗa a̱ tuka̱i ɗa̱ a̱ ubuta̱ wa afada, ka̱ta̱ a̱ɗu a̱ ɗa̱ a̱ muɗa̱ adama a ili i na i kudansa ba. Danai le ili i na Ka̱shile ka danai ɗa̱ a ayin a nan lo a, adama a na a̱ɗa̱ ɗa yi a kadanshi ka ba, amma Ayinviki a̱ Ka̱shile† a ɗa.

12“Ayin a nan lo vuza wi ta̱ e kuneke vuza ni adama a na a una yi. Kesheku kpamu ki ta̱ a kuyaꞋan nannai m maku ma̱ ni. Muku kpamu i ta̱ a̱ kuɗengusa̱ vishili n isheku i le, ali a zuwa a una le. 13Uma n a̱bunda̱i i ta̱ a kuꞋiwan ɗa̱, adama a̱ va̱, amma vuza na baci de dem u gbamai asuvu sai a uteku wi ta̱ a̱ kuciya̱ wishi.

Atakaci a gbangam

(Mat. 24:15-28; Luk. 21:20-24)

14“Ayin i ta̱ a̱ kuta̱wa̱ a na a ili yu unata i na i tsu la̱nga̱sa̱ ili ra̱ka̱ i na yi punu o Mololo ma Ciɗa. (U gaꞋan ta̱ vuza vu kukece u yeve.) Aza a na i Yahuda a suma a kubana a nsasan. 15Vuza na wi kpamu a̱ kunu gaɗi vu kukpa̱Ꞌa̱ ulivanki, ka̱ta̱ u cipa̱ adama a na u bono u ɗika ili i yoku punu ba. 16Vuza na wi ɗe a kashina ka̱ta̱ u bono adama a na u ɗika ogbodo a̱ ni ba.

17“Ayin a nan lo, ili ya asuvayali i ɗa wa̱ a̱ma̱ci a na i n a̱tsuma̱, koɓolo n aza a na i o kuwoꞋo muku. 18YaꞋin kavasa, ka̱ta̱ ayin a nan lo a yawa a gaꞋaka n lyushi ba. 19Ayin a nan lo atakaci i ta̱ a kuyimkpa n a̱bunda̱i a na a saꞋwai kuyaꞋan ba, ali n ayin a na a yaꞋin aduniyan a nam pa. O kudoku kpamu a yaꞋan a ɗa ba. 20Ishi baci Ka̱shile Vuzavaguɗu u jebe ayin a nan lo ba, babu vuza na u kubuwa n wuma. Amma adama a uma a na u zagbai, ɗa u jebei ayin a.

21“Ayin a nan lo a vuza na baci u danai ɗa̱, ‘La̱na̱i, Kishi ka ɗa na, ko a̱yi ɗa na ɗe!’, ka̱ta̱ yu ushuku ba. 22Adama a na a kuyawa ayin a nan lo Kishi ka aꞋuwa n eneki a aꞋuwa i ta̱ a̱ kuta̱wa̱, ka̱ta̱ a̱ ka̱na̱ kuyaꞋanka ɗa̱ ili i mereve. Adama a na a̱ a̱ ya̱nsa̱ aza na Ka̱shile ka zagbai i baci a kufuɗa. 23Yongoi n ugboji, gogo na m ɓarangu ɗa̱ ta̱ ɗe adama a kakuna ka nam pa kafu ka̱ gita̱.

Kubono ku Maku ma Vuma

(Mat. 24:29-31; Luk. 21:25-28)

24“Ayin a nan lo, ayin a na atakaci a nan lo a lazai dem, kanna ki ta̱ o okpo ulima̱, wotoi kpamu wo kudoku wa kakana ba. 25Azangata i ta̱ a̱ kuta̱ gaɗi ka̱ta̱ a̱ yikpa̱, utsura u na kpamu wi a̱ a̱da̱nga̱shile wi ta̱ a̱ kugba̱ɗa̱. 26Ayin a nan lo a ɗa yaba dem u kene Maku ma Vuma o kubono e eleshu n utsura u tsugbayin n tsugono. 27Ka̱ta̱ u suku alingata a̱ ni adama a na o ɓolongu a̱ ubuta̱ u te aza a na u zagbai, ele na i daꞋin a̱ ubuta̱ dem a uteku wi iɗika ya aduniyan.

Uma a yaꞋan cicoꞋo m ma̱biri

(Mat. 24:32-35; Luk. 21:29-33)

28“Mi ta̱ a kuciga i yeve ili i yoku ubuta̱ u maɗanga ma̱ ma̱biri. Ayin a na baci acaka a̱ ni o topoi a̱vuku a savu, i yeve ta̱ lyushi i yawa ta̱ ɗevu. 29Nannai kpamu e yene baci ili i nan lo dem i gita̱i, yevei ayin a̱ gita̱ ta̱ kuyawa, i ta̱ lo ɗevu n utsutsu. 30Mayun ɗa mi a kudana ɗa̱, aduniyan a nam pa o kukotso ba, sai ili i na a danai na ra̱ka̱ i shana. 31Gaɗi n iɗika yi ta̱ o kukotso, amma kadanshi ka̱ va̱ ki o kukotso ba.

Babu vuza na u yevei kanna ko ayin

(Mat. 24:36-44; Luk. 17:26-30, 34-36)

32“Amma kanna ka nan lo, ko ayin babu vuza na u yevei, ko alingata a gaɗi, ko Maku ma, sai Esheku a̱ ni endeꞋen. 33I yongo n ugboji n ufoɓushi kpamu, adama a na i yeve kanna ka ba. 34Kubono ku Maku ma Vuma ki ta̱ uteku u na vuma u yaꞋin nwalu a kubana a̱ ubuta̱, ɗa u ka̱sa̱kpa̱i agbashi a̱ ni n ili i na yaba dem u kuyaꞋan, ɗa u danai vuza na wi a kinda utsutsu wa u yongo ufoɓushi. 35Amma a̱ɗa̱ i yongo ufoɓushi, adama a na i yeve ayin a na vuza kpaꞋa va u kubono ba, ko n kulivi ku ɗa, ko n kayin ka gbayin, ko ntoku isali, ko n usana u ɗa. 36Ka̱ta̱ i ka̱sa̱kpa̱ u bono u cina ɗa̱ alavu ba. 37Ili i na mi a kudana ɗa̱ na, mi ta̱ a kudana uma dem. Mi ta̱ a kudana ɗa̱, ‘Yongoi ufoɓushi!’ ”

Currently Selected:

Marukusu 13: asgNT

Highlight

Copy