Luka 15

Agisana o mokyon ma na ma̱ puwa̱nka̱i

(Mat. 18:12-14)

1Ayin a nan lo, ishi a utafu n aza a̱ unushi o ɓolongi ka̱ci ke le ra̱ka̱ a kupanaka yi. 2Amma Afarishi nu nlum n Wila̱ a yaꞋin mololo, “Vuma vu nam pa wi ta̱ o kuyongo n aza a̱ unushi n u lyaꞋi kpamu n ele.”

3Ɗa Yesu u danai le agisana a nam pa: 4“A̱ ka̱tsuma̱ ka̱ ɗa̱, vuza yoku wi baci nu nlala amangatawun, ɗa me te ma̱ puwa̱nka̱i ni. Yi ɗa̱i u kuyaꞋan? Wi ta̱ a̱ kuka̱sa̱kpa̱ amanga̱na̱shinkupa n kuci a̱ ubuta̱ wu ushiga n uma, ka̱ta̱ u bana kula̱nsa̱ ma nan lo ma, sai ayin a na we enei maꞋa. 5We ene baci maꞋa ka̱ta̱ u ɗika maꞋa a avangatsu a̱ ni a kubana a kpaꞋa m ma̱za̱nga̱. 6Ka̱ta̱ u ɗeke a̱ja̱Ꞌa̱ a̱ ni n aza a na i lo ɗevu ɗevu dem, ka̱ta̱ u dana, ‘Ɓa̱nka̱i mu m ma̱za̱nga̱, n ciya̱ ta̱ malala ma na ma̱ puwa̱nka̱i va.’ 7N dana ɗa̱ tsu nan lo tsa, ma̱za̱nga̱ ma̱ a̱bunda̱i ma kuyaꞋan ta̱ na ɗe gaɗi adama a vuza vu unushi vi te vu na u shika̱i unushi u ni. U laꞋi kpamu uma amanga̱na̱shinkupa n kuci a na i n usuɓi, babu kpamu kula̱nsa̱ kushika̱ unushi u le.

Agisana e vikebe vu na vu puwa̱nka̱i

8“Vuka vi baci n ikebe ya azurufa#15:8 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Darakama” a̱ Ubuta̱ wi ili i Kuyeve. kupa, ɗa u vakangi vi te. Yi ɗa̱i u kuyaꞋan? Wi ta̱ a kudyaɓa ma̱kuni adama a na we ene ubuta̱, ka̱ta̱ u pura̱ngu kpaꞋa ka n u la̱nsa̱i mayin, ali sai ayin a na we enei vu ɗa. 9Ayin a na baci we enei vu ɗa, ka̱ta̱ u ɗeke a̱ja̱Ꞌa̱ a̱ ni n aza a na i lo ɗevu ɗevu koɓolo dem, ka̱ta̱ u dana, ‘YaꞋin ma̱za̱nga̱ nu mpa. Me ene ta̱ vikebe vu na vu puwa̱nka̱i mu va.’ 10N dana ɗa̱ kpamu, ma̱za̱nga̱ mi ta̱ a kuyaꞋan a̱ ubuta̱ wa alingata a̱ Ka̱shile, adama a vuma vu unushi vi te vu na u shika̱i unushi u ni.”

Agisana a maku ma na ma̱ puwa̱nka̱i

11Yesu u lyaꞋi kelime, u danai, “A yaꞋan ta̱ vuma vi yoku wi ta̱ n olobo e re. 12Vuza kenu u danai esheku a, ‘Dada, neke mu kawalatsu ka̱ va̱.’ Ɗa ta na u pecekei le kaꞋa n ucanuku wa, aza e re e le.

13“A yaꞋan megeshe ba, ɗa vuza kenu va u ɓolongi ra̱ka̱ ili i na u ciya̱i. Ɗa u ɗenga̱i nwalu a kubana a̱ likuci i yoku daꞋin, ta ɗe ta na u la̱nga̱sa̱i uciyi u ni a̱ ubuta̱ u kuyongo ku ketepu n ku kavama. 14U la̱nga̱sa̱i ili i ni ra̱ka̱, kambulu ta na lo a̱ likuci ya, ɗa u nambai ili i na u kulyaꞋa kpamu. 15Ɗaɗa u banai kuyaꞋanka vuza yoku punu a̱ likuci ya zamalinga, ɗa u zuwai ni kaguɓa ka̱ ngurusunu. 16Ana kambulu ka̱ ka̱na̱i ni ka̱u, ɗa u cigai kulyaꞋa ilikulyaꞋa yi ngurusunu, amma babu vuza na u neꞋi ni ili.

17“Ana kaci ka̱ ni ko bonoi ushiyi, ɗa u danai, ‘Ko aza a na dada vu va̱ u ɗikai ulinga, a̱ ciya̱ ta̱ tsuwaꞋa n a̱bunda̱i ali a zuwa biꞋi ci yoku paki, amma mpa ɗa na a̱ kukuwa̱ n kambulu. 18Mi ta̱ o kubono a kpaꞋa u dada, ka̱ta̱ n dana, “Dada, n yaꞋanka ta̱ Ka̱shile n avu dem unushi. 19N yawa o doku e ɗeke mu maku ma̱ nu ba, bonoko mu tsu vuza vu zamalinga vu nu vi yoku.” ’ 20U ɗenga̱i, ɗa u lazai a kubana we esheku.

“Ayin a na a̱yi biꞋi babu u yawa a kpaꞋa, ɗa esheku a̱ ni e enei ni daꞋin. Asuvayali a̱ ka̱na̱i ni, ɗa u sumai u banai u maku wa, u bapai ekiye a̱ ni ɗa wo oɓongi ni.

21“Ɗa maku ma danai, ‘Dada, n yaꞋanka ta̱ Ka̱shile n avu dem unushi. N yawa e ɗeke mu maku ma̱ nu ba.’

22“Ɗa esheku a a danai agbashi a̱ ni, ‘tuka̱i mu m motogu ma singai gogoꞋo, ka̱ta̱ i uka yi. I uka yi makawani kpamu a̱ ka̱jivu, n ataka e ene. 23Tuka̱i m medendem mi ikyamba, ka̱ta̱ i kiɗa. Ka̱ta̱ ci yaꞋin biꞋi ka̱ɗiva̱. 24Adama a na maku ma̱ va̱ ma nam pa mi ishi ta̱ ma̱ kuwa̱, amma gogo na u bono ta̱ n wuma kpamu. Wi ishi ta̱ u puwa̱nka̱, amma a̱ ciya̱ yi ta̱.’ Ɗa a̱ ka̱na̱i kuyaꞋan ka̱ɗiva̱.

25“N ayin a nan lo a, kolobo ka gbayin ka ɗe a kashina, ana u yawai ɗevu m kpaꞋa ka, ɗa u panai tsuwaꞋi n kujeꞋe. 26Ɗa u ɗekei biꞋi kagbashi ko yoku, ɗa we ecei ili i na a̱ ciya̱i punu a kpaꞋa ka. 27Ɗa wu ushuki ni, ‘Ambu ɗa wi punu u bonoi. Ɗa esheku a̱ ɗa̱ a kiɗai medendem ma na ma laꞋi n ikyamba, adama a na u bono yi ta̱ m ma̱ta̱na̱ kpamu.’

28“Kolobo ka gbayin ka ka yaꞋin wupa, ɗa u iwain kuꞋuwa a kpaꞋa ka. Ɗa esheku a̱ ni a̱ uta̱i ɗa o folonoi ni. 29Ɗa ta na wu ushuki esheku a, ‘La̱na̱ ali n ayin a na mi a kuyaꞋanka wu tsugbashi, n goyo kadanshi ka̱ nu ba. Amma vu saꞋwa kuneke mu ko maku ma malala n yaꞋan ka̱ɗiva̱ n a̱ja̱Ꞌa̱ a̱ va̱ ba. 30Amma ana maku ma̱ nu ma nam pa, vuza na u la̱nga̱sa̱i uciyi u nu a̱ ubuta̱ wa̱ a̱ma̱ci, u bonoi a kpaꞋa, ɗa ali vi kiɗakai ni medendem.’

31“Ɗa esheku a a danai, ‘Maku ma̱ va̱, avu vi ta̱ koɓolo nu mpa ko wanai, ili i na kpamu mi n i ɗa ra̱ka̱ i nu i ɗa. 32Amma u gaꞋan ta̱ ci yaꞋan ka̱ɗiva̱ m ma̱za̱nga̱, adama a ambu vu na wi ishi u kuwa̱i, ɗa u bonoi n wuma kpamu, wi ishi u puwa̱nka̱i, ɗa a̱ ciya̱i ni.’ ”

Currently Selected:

Luka 15: asgNT

Highlight

Copy