Azusuki 10

Biturusu n Koniliyu

1Vuma vi yoku ɗa a Kasariya, kula ku ni Koniliyu, vuza na wi ishi jagaba vo osoji#10:1 Jagaba vo osoji vu Roma a̱yi ɗa u tsu tono n osoji amangatawun (100). a̱ ka̱tsuma̱ ko osoji a na e ci ɗeke Osoji a Italiya. 2A̱yi vuza ciɗa ɗa, n aza a kpaꞋa a̱ ni dem, Ka̱shile ka gaɗi kaꞋa i o kutono. U yongo ta̱ kpamu a̱ kuɓa̱nga̱ aza a unambi n a̱bunda̱i ali n u yaꞋin kavasa ayin dem. 3Ɗevu n iyum i tatsu i kanna ko yoku ana we enei ili tsalatani tsu na we enei kalingata ka̱ Ka̱shile mayin ka̱ ta̱wa̱i ka danai, “Koniliyu.”

4U gbatai kalingata ka n a̱shi n wovon, ɗa u danai kpamu, “Yi ɗa̱i, Vuzagbayin?”

Ɗa kalingata ka ku ushuki, “Ka̱shile ka pana ta̱ uyoꞋo n kavasa ka̱ nu n ulinga u singai a kubana wa aza a unambi. 5Gogo na, suku uma o yoku a Japa. Uma a nam pa e ece vuma vi yoku, vuza na wi n kula Sima Biturusu, ka̱ta̱ a̱ ta̱wa̱ n a̱yi. 6A̱yi komoci kaꞋa ka kpaꞋa ku Sima kawima, wi ta̱ a̱ ka̱kina̱ ka mala.” 7Kalingata ka lazai, ɗa Koniliyu u ɗekei agbashi a̱ ni e re n kosoji, vuza ciɗa ka na ki a kinda yi. 8U danai le ili i na yi lo ra̱ka̱, ɗa u suki le a Japa.

9Kanna ke ire, kanna a kaci, ele a uye a̱ kuta̱wa̱ ɗevu n Japa, Biturusu u kumbai gaɗi vu kukpa̱Ꞌa̱ adama a na u yaꞋan kavasa. 10Kambulu ka̱ ka̱na̱i ni, ali ɗa u cigai ilikulyaꞋa. A ayin a na i o kufoɓuso ilikulyaꞋa, ɗa ta na we enei ili tsalatani. 11We enei gaɗi u ɓa̱yuwa̱i, ɗa ili yu uta̱i ɗe a̱ kucipa̱ wanshi an kalaba sawu nu ngon n na̱shi a kuyawa a iɗika. 12Punu a ili i na yi i tsu kalaba tsa, icuꞋu yi nnama i ɗa punu kakau: Punu asuvu a nnama n na mi n ene a̱ na̱shi, nu n na mi a̱ nkuɗa̱ru, nu nnu dem.#10:12 Ayahuda e pece ta̱ nnama, aza a singai n aza a na a̱ kpa̱ɗa̱i kugaꞋan kutakuma adama a̱ wila̱. Punu a kalaba ka nnama mi ta̱ punu n na n gaꞋin kutakuma ba. 13Ka̱la̱ka̱tsu ka danai ni, “Ɗenga̱ Biturusu, vi kiɗa ka̱ta̱ vu takuma.”

14Amma ɗa Biturusu u danai, “Mayun ka̱ta̱ n saꞋwa kutakuma ili i na yi m ma̱biꞋin ba.”

15Ka̱la̱ka̱tsu ko doki ka yaꞋankai ni kadanshi kpamu, “Ka̱ta̱ vu bonoko ili i na Ka̱shile ka dana i gaꞋan ta̱ ka̱ta̱ ili ya yo okpo i gbani-gbani ba.”

16Ili i nam pa i yaꞋan ta̱ ali kutatsu, ɗa gogo lo ɗa i ɗenga̱i i bonoi gaɗi.

17Ayin a na Biturusu wi e mereve mi ili i nam pa, uma a na Koniliyu u suki wana ɗai e yeve ubuta̱ u na kpaꞋa ku Sima ki. Ɗa ta na a shamgbai a utsutsu u kpaꞋa wa. 18A yaꞋin aza a kpaꞋa, ɗa e ecei, “Komoci ki ta̱ punu a kpaꞋa ku nam pa, vuza vu kula Sima Biturusu?”

19A̱yi Biturusu biꞋi a kataci adama a na u yeve ili i na tsalatani ya i danai, ɗa ta na Ayinviki a̱ Ka̱shile a danai, “Pana. Uma a tatsu a̱ ta̱wa̱ ta̱ na kula̱nsa̱ wu. 20Foɓuso vu bana koɓolo n ele. Pana wovon ba, adama a na mpa ɗa n suki le.”

21Biturusu u banai u cinai le, ɗa u danai, “Mpa ɗa vuza na yi a̱ kula̱nsa̱. Yi ɗa̱i i ta̱wa̱i kuyaꞋan?”

22Ɗaɗa a̱ ushuki, “Jagaba† vo osoji Koniliyu ɗa u suki tsu. Vuma vu usuɓi ɗa vu na vi o kutono Ka̱shile. Ayahuda kpamu a ciga yi ta̱. Kalingata ka ciɗa ko yoku ka danai Koniliyu u ɗeke wu, vu ta̱wa̱ vu dana yi ili i na vi n i ɗa.” 23Ana Biturusu u panai nannai, ɗa u folonoi le a asaka yi n kayin ka nan lo.

Biturusu u banai a kpaꞋa ku Koniliyu

Ana kayin ka asai, Biturusu n aza o Kutoni o yoku a na i Japa a yaꞋin nwalu ma koɓolo n uma o Koniliyu. 24A kanna ke ire kpamu, a yawai a Kasariya. Ana a yawai, a cinai Koniliyu a kuvana le. U ɗekei aza a̱ ni n umaci u ni dem ɗa a̱ ta̱wa̱i. 25Ana Biturusu u uwai a kpaꞋa ku Koniliyu, ɗa Koniliyu u kuɗa̱ngi a iɗika u cigai kucikpa Biturusu. 26Amma Biturusu wu ushuku n ukuna u nan lo ba, ɗa u danai ni, “Ɗenga̱, mpa a̱ ka̱ci ka̱ va̱ vuma ɗa mi.” 27Koniliyu u ɗenga̱i, ɗa a walai n a dansai koɓolo, ɗa e yevei a uwai a̱ kunu, a̱ ubuta̱ u na uma o yoku i. 28Biturusu u danai le, “A̱ɗa̱ i yeve ta̱ a̱tsu Ayahuda a̱ tsu ka̱sa̱kpa̱ tsu tsu ɓolongu n umaci u yoku ba. Ka̱shile ko yotsongu mu ta̱ n dana umaci u yoku a̱ kpa̱ɗa̱ ta̱ kugaꞋan ba. 29Ana vu danai n ta̱wa̱, n ta̱wa̱ ta̱ babu korono n ka̱ca̱pa̱. Gogo na, dana mu wo, yi ɗa̱i vi ɗekekei mu?”

30Ɗaɗa Koniliyu u danai, “A ayin a̱ na̱shi a na a lazai ɗe derere viyum vu tatsu vu kanna, mpa a kavasa a kpaꞋa ku va̱. Gogo va lo ɗa vuma nu ntogu a kutasa akina u shamgbai kelime ka̱ va̱. 31U danai, ‘Koniliyu, Ka̱shile ka pana ta̱ uyoꞋo u kavasa ka̱ nu, u yeve ta̱ kpamu i na vi nekei a kubana wa aza a unambi. 32Adama a nannai, sai vu suku a kubana a Japa e ɗekeke wu Sima, vuza na e ci ɗeke Biturusu. U cipa̱ ta̱ a kpaꞋa ku Sima kawima, vuza na kpaꞋa ku ni ki a̱ ka̱kina̱ ka mala.’ 33Adama nannai n suku ta̱ e ɗeke wu gogoꞋo, u gaꞋan ta̱ ta na an vu ta̱wa̱i. Gogo na a̱tsu ɗa na, e ekiye a̱ Ka̱shile a kuvana vu dana tsu akaka a na Vuzagbayin u danai nu vu dana tsu.”

Kadanshi ka̱ Biturusu

34Ɗa Biturusu wu ushuki, “Gogo na mu ushuku ta̱ an Ka̱shile ka tsu wala n uma dem derere. 35U ci isa ta̱ uma a iɗika dem, aza a na baci o tonoi ni mayun, n e nekei ni tsugbayin. 36N yeve ta̱ i saꞋwa ta̱ ɗe kupana Arabali a Singai a̱ ubuta̱ wi Israila, u na u danai ma̱ta̱na̱ ma̱ Ka̱shile mi ta̱ u Yesu Kishi, Vuzagbayin vi yaba dem. 37Mayun i yeve ta̱ ili i na i yaꞋin a uɓon u Yahuda ra̱ka̱. Ili i iyain i ɗaɗa, Yahaya u danai yaba dem u yaꞋan kusumbu ka akucina. Ɗa ta na ili i nam pa i gita̱i kuyaꞋan a̱ Ga̱lili. 38I yeve ta̱ ta na mayun Ka̱shile ke neke ta̱ utsura u ni u Yesu vu Nazara. Ayinviki a̱ Ka̱shile kpamu i ta̱ koɓolo n a̱yi. Ɗa ta na u ciya̱i utsura n a̱bunda̱i. Ɗa u ka̱ra̱Ꞌi n u yaꞋin ili i singai n u potsokpoi aza a na Kalijani ka̱ ka̱na̱i, adama a na Ka̱shile ki ta̱ koɓolo n a̱yi. 39Ra̱ka̱ vu tsu ce ene ta̱ ili i na Yesu u yaꞋin a iɗika yi Israila koɓolo n ubirini u Urishelima.

“A unai ni a maɗanga ma atakaci. 40Amma Ka̱shile ka̱ ɗengusa̱i ni n wuma a kanna ka tatsu. Ɗaɗa Ka̱shile ka̱ ka̱sa̱kpa̱i ni wu uta̱i wa̱ tsu. A̱tsu na ci lyaꞋi ɗa tsu soꞋi n a̱yi, ayin a na u ɗenga̱i n wuma. 41A̱tsu ɗa aza a na Ka̱shile ka zagbai tsu dana ukuna u ni, amma u yotsongu ka̱ci ka̱ ni u uma n a̱bunda̱i ba. 42Ka̱shile ka danai tsu tsu dana uma a na Yesu ɗa vuma na Ka̱shile ka zagbai u yaꞋanka aza a wuma n a̱kpisa̱ afada. Tsu kuneke ta̱ uma kutashi ku nam pa hawun. 43A̱yi ɗa vuza na eneki ra̱ka̱ a yaꞋin kadanshi ukuna u ni. A danai vuza na baci u nekei ka̱ɗu wa̱ ni, i ta̱ a kucinukpaka yi n unushi u ni a̱ ubuta̱ u kula ku Kishi.”

Aza̱ka̱yimbi a isai Ayinviki a̱ Ka̱shile

44Ayin a na Biturusu wi biꞋi a kadanshi, ɗa Ayinviki a̱ Ka̱shile o tonoi n yaba dem vu na wi lo a kupana. 45Ayahuda aza o Kutoni ku Yesu aza a na a̱ ta̱wa̱i koɓolo m Biturusu a yaꞋin mereve a na a̱ tsuwa̱nka̱i aza a na i Ayahuda ba kuneꞋe ka Ayinviki a̱ Ka̱shile feu. 46E sheshe ta̱ nannai adama a na a pana ta̱ uma a nam pa a a kudansa n elentsu o yoku n a cikpai Ka̱shile.

Biturusu u yaꞋin kadanshi u danai, 47“Aza̱ka̱yimbi a nam pa a̱ ciya̱ ta̱ Ayinviki a̱ Ka̱shile tsu na a̱tsu feu ci ciya̱i. Mu ushuku ta̱ n ka̱ɗu ka̱ va̱ yayi vuza na u kusa̱nga̱ tsu kuyaꞋanka le kusumbu ka akucina.” 48Ɗaɗa u nekei le utsura a yaꞋanka Aza̱ka̱yimbi a kusumbu ka akucina n kula ku Yesu Kishi. Ɗaɗa Koniliyu u folonoi Biturusu u shamgba biꞋi n ele ali ayin e re.

Currently Selected:

Azusuki 10: asgNT

Highlight

Copy