မႃႇ 13

ၸဝ်ႈယေႇသုႁေႃးထႃႈၵျွင်းပိၵ်ႈမၢၼ်ႇၸဝ်ႈ

(တူၺ်း၊ မတ်ႈ 24:1-2။ လု 21:5-6)

1ယၢမ်းမိူဝ်ႈဢၼ်ၸဝ်ႈယေႇသု၊ယင်းတိုၵ်ႉဢွၵ်ႇၵျွင်းပိၵ်ႈမၢၼ်ႇၸဝ်ႈမႃးယူႇၼၼ်ႉ၊ၼႂ်းတပႄးၸဝ်ႈတင်းလၢႆၼၼ်ႉၵေႃႉၼိုင်ႈလဝ်ႈထၢမ်လႄႈဝႃႈ၊ “တူၺ်းၶႃႈလူး၊သြႃႇၸဝ်ႈ။ မၢၵ်ႇႁိၼ်ၸိူဝ်းၼၼ်ႉပဵၼ်မၢၵ်ႇႁိၼ်ယႂ်ႇမၢၵ်ႇႁိၼ်လူင်လႄႈ၊ႁိူၼ်းတိူၵ်ႈတင်းလၢႆၵေႃႈပဵၼ်တိူၵ်ႈယႂ်ႇတိူၵ်ႈလူင်ၶႃႈဢေႃႈ။” ဝႃႈၼင်ႇၼႆဢေႃႈ။

2မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊ “မႂ်းႁၼ်တိူၵ်ႈယႂ်ႇတိူၵ်ႈလူင်ၸိူဝ်းၼႆႉယူႇယဝ်ႉဢမ်ႇၸႂ်ႈႁိုဝ်း။ မၢၵ်ႇႁိၼ်ၸိူဝ်းၼႆႉႁူၺ်ႇၼိုင်ႈလႄႈႁူၺ်ႇၼိုင်ႈတေဢမ်ႇလႆႈၵေႃႇၵၼ်ဝႆႉ။ တၵ်းလႆႈလုလႅဝ်ၵၢၼ်ႉတူၵ်းၵူႈႁူၺ်ႇဢေႃႈ၊” ဝႃႈၼင်ႇၼႆဢေႃႈ။

ၽေးတုၵ်ႉၶႃႉၵူႈမဵဝ်းမဵဝ်း

(တူၺ်း၊ မတ်ႈ 24:3-14။ လု 21:7-19)

3ၼႂ်းမိူဝ်ႈဢၼ်ၸဝ်ႈယေႇသု၊ၼင်ႇယူႇၵႃႈၼိူဝ်လွႆသၢၼ်ႇလုၼ်ႇ၊လႄႈဝၢႆႇၼႃႈတေႃႇၵျွင်းပိၵ်ႈမၢၼ်ႇၸဝ်ႈယူႇၼၼ်ႉ၊ပေႇတရု၊ယႃႇၵုပ်ႈ၊ယူဝ်းႁၢၼ်ႇ၊ဢိၵ်ႇတင်းဢၼ်ႇတရေႇ၊မႃးလဝ်ႈထၢမ်မၼ်းၸဝ်ႈတဵတ်ႇတဵတ်ႇလႄႈဝႃႈ၊- 4“လွင်ႈတၢင်းၸိူဝ်းၼႆႉတေပဵၼ်မႃးမိူဝ်ႈလႂ်ၶႃႈ။ မိူဝ်ႈဢၼ်လွင်ႈတၢင်းၸိူဝ်းၼႆႉတင်းသဵင်ႈတင်းလူင်ၸမ်တၵ်းပဵၼ်မႃးၼၼ်ႉၸိုင်၊တေမီးလၢၵ်ႈၶၼႃႇဢၼ်လႂ်ၶႃႈ။ ၸဝ်ႈႁဝ်းၶႅၼ်းတေႃႈလၢတ်ႈပၼ်တီႈႁဝ်းၶႃႈသေၵမ်းၶႃႈ၊” ဝႃႈၼင်ႇၼႆဢေႃႈ။

5 ၸဝ်ႈယေႇသု၊ၵေႃႈၶိုၼ်းလၢတ်ႈလႄႈဝႃႈ၊ “ႁဵတ်းသတိတႃႉ။ ယႃႇပေႁႂ်ႈပိူၼ်ႈလႆႈပႅတ်ႉလႅၼ်ၸူဝ်းဢဝ်သူ။- 6ၵူၼ်းၼမ်ၼႃႇတၵ်းပေႃႇမႃးလႄႈႁိမ်ဢဝ်ၸိုဝ်ႈသဵင်ၵဝ်သေလႄႈလၢတ်ႈဝႃႈ၊ ‘ၵဝ်ၼႆႉပဵၼ်ၸဝ်ႈၼၼ်ႉဢေႃႈ၊’ ဝႃႈၼင်ႇၼႆသေယဝ်ႉ၊ပႅတ်ႉလႅၼ်ၸူဝ်းဢဝ်ၵူၼ်းၼမ်ၼႃႇဢေႃႈ။- 7ၼင်ႇၼၼ်လႄႈပေႃးသူလႆႈငိၼ်းသဵင်တိုၵ်းသိုၵ်းတီႈၸမ်လႂ်၊ဢိၵ်ႇတင်းၶၢဝ်ႇငၢဝ်းသိုၵ်းတီႈၵႆလႂ်ၸိုင်၊ယႃႇပေတူၵ်းၸႂ်။ လွင်ႈတၢင်းၸိူဝ်းၼႆႉတၵ်းလႆႈပဵၼ်မႃးဢေႃႈ။ ၼႂ်းဝႃႈၼၼ်သေၵေႃႈဢမ်ႇပႆႇပဵၼ်တီႈသုတ်းတီႈၵွႆ။- 8ၵူၼ်းမဵဝ်းၼိုင်ႈလႄႈမဵဝ်းၼိုင်ႈ၊မိူင်းၼိုင်ႈလႄႈမိူင်းၼိုင်ႈတၵ်းလုၵ်ႉၽိုၼ်ႉၶတ်းတႃႉၵၼ်ဢေႃႈ။ တၵ်းပဵၼ်တၢင်းဢၼ်ဢိင်ႇသၼ်ႇၵူႈတီႈၵူႈလႅၼ်၊ဢိၵ်ႇတင်းတၢင်းဢၼ်ဢိုပ်းတၢင်းၵိၼ်လႂ်ဢေႃႈ။ လွင်ႈတၢင်းၸိူဝ်းၼႆႉပဵၼ်တၢင်းဢၼ်တႄႇၸႃႉတုၵ်ႉၶႃႉတၢင်းမႆႈၸႂ်ၶီၸႂ်ဢေႃႈ။

9“သူႁဵတ်းသတိတီႈတူဝ်သူတႃႉ။ ၵွပ်ႈပိူဝ်ႈၸိူဝ်ႉႁိုဝ်လႄႈဝႃႈၼႆ၊ပိူၼ်ႈတၵ်းတိဢဝ်သူလႄႈဢၢပ်ႈၵႃႈၼႂ်းလုမ်းလူင်လႂ်၊တၵ်းပေႃႉယႅၼ်ႉသူၵႃႈၼႂ်းၸရွပ်ႈႁေႃးတြႃးလႂ်ဢေႃႈ။ ၵွပ်ႈပိူဝ်ႈၵဝ်လႄႈ၊သူတၵ်းလႆႈၸုၵ်းယူႇၽၢႆႇၼႃႈဢမၢတ်ႈၽွင်းမိူင်းလႂ်၊ဢိၵ်ႇတင်းၶုၼ်ႁေႃၶမ်းလႂ်၊ႁႂ်ႈသူလႆႈၶၢမ်ႇသၢၵ်ႈသေႇၽၢႆႇၼႃႈၶဝ်ၼၼ်ႉဢေႃႈ။- 10ၼႂ်းဝႃႈၼၼ်သေၵေႃႈ၊ၸူဝ်ႈဢၼ်ၶိင်ႇယၢမ်းသုတ်းသဵင်ႈဢမ်ႇပႆႇႁွတ်ႈထိုင်ၼႆႉ၊ၶၢဝ်ႇတြႃးသိူဝ်းပျေႃႇတၵ်းလႆႈႁေႃးလၢတ်ႈၸွတ်ႇၵႂႃႇထိုင်တီႈၵူၼ်းမဵဝ်းတင်းသဵင်ႈတင်းလူင်ဢွၼ်တၢင်းဢေႃႈ။- 11မိူဝ်ႈဢၼ်သူလႆႈၶၢမ်ႇတၢင်းဢၼ်တိၵႂႃႇဢၢပ်ႈၵႃႈၼႂ်းလုမ်းလူင်ၸိုင်၊ယႃႇပေမႆႈၸႂ်လူၺ်ႈလွင်ႈဢၼ်သူတၵ်းလႆႈလၢတ်ႈၵႂၢမ်းၵႃႈသင်ၼၼ်ႉ။ လၢတ်ႈၵႂၢမ်းဢၼ်သူလႆႈႁပ်ႉဢဝ်မိူဝ်ႈၶိင်ႇၼၼ်ႉၵူၺ်းတႃႉ။ ၵႂၢမ်းၼၼ်ႉပဵၼ်ၵႂၢမ်းဢၼ်သူလၢတ်ႈဢမ်ႇၸႂ်ႈ။ ပဵၼ်ၵႂၢမ်းဢၼ်ဝိၺိၺ်ႇမူတ်းၸၢင်ႇၸဝ်ႈလၢတ်ႈဢေႃႈ။- 12ၶိင်ႇမိူဝ်ႈယၢမ်းၼၼ်ႉ၊ပီႈၼွင်ႉၼင်ႇၵၼ်ၵၼ်ၵေႃႉၼိုင်ႈတၵ်းဢဝ်ၵေႃႉၼိုင်ႈဢၢပ်ႈႁႂ်ႈလႆႈဢဝ်တၢႆဢေႃႈ။ ပေႃႈတၵ်းဢဝ်လုၵ်ႈလၢင်းဢၢပ်ႈဢေႃႈ။ လုၵ်ႈလၢင်းၵေႃႈတၵ်းလုၵ်ႉၽိုၼ်ႉတေႃႇပေႃႈမႄႈလႄႈႁဵတ်းႁႂ်ႈတၢႆဢေႃႈ။- 13ၵွပ်ႈပိူဝ်ႈၵဝ်လႄႈၵူၼ်းၵူႈၵေႃႉတၵ်းၸင်းသူဢေႃႈ။ ၼႂ်းဝႃႈၼၼ်သေၵေႃႈၵေႃႉလႂ်သေဢမ်ႇဝႃႈ၊ၵေႃႉဢၼ်မၼ်ႈၶိူင်ႇတေႃႇထိုင်ႁွတ်ႈတီႈသုတ်းတီႈၵွႆၼၼ်ႉ၊ၵေႃႉၼၼ်ႉတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ။

တၢင်းဢၼ်ယႃႉလုဢၼ်လီႁင်ႈဢဵတ်ႇသဵတ်ႇ

(တူၺ်း၊ မတ်ႈ 24:15-28။ လု 21:20-24)

14“သူတၵ်းလႆႈႁၼ်၊ ‘လွင်ႈတၢင်းဢၼ်ယႃႉလုဢၼ်လီႁင်းဢဵတ်ႇသဵတ်ႇ၊’ ၼၼ်ႉၸုၵ်းယူႇၵႃႈၼႂ်းတီႈဢၼ်ဢမ်ႇထုၵ်ႇလီယူႇၼၼ်ႉဢေႃႈ။ (ၵေႃႉဢၼ်ၽတ်းဢၢၼ်ႇတြႃးၼႆႉၼၼ်ႉၸိုင်၊ၶႂ်ႈဝႃႈသင်ၼႆႁႂ်ႈမၼ်းႁုထွမ်ႇတႃႉ။) မိူဝ်ႈဢၼ်လႆႈႁၼ်ၸိူဝ်ႉၼင်ႇၼၼ်ၸိုင်၊ႁႂ်ႈၶဝ်ၸိူဝ်းဢၼ်မီးၼႂ်းမိူင်းယုတႃႉ၊ၼႆႉပၢႆႈၶိုၼ်ႈၵႂႃႇၵႃႈတီႈၼိူဝ်လွႆပုၼ်ႉတႃႉ။- 15ယႃႇႁႂ်ႈၵေႃႉဢၼ်မီးၵႃႈၼိူဝ်လင်ၶႃးႁိူၼ်း#13:15 “လင်ၶႃးႁိူၼ်း” - လင်ၶႃးႁိူၼ်းၵူၼ်းမိူင်းဢိသရေးၶဝ်ႁဵတ်းပဵင်းဝႆႉပဵၼ်တီႈလိုဝ်ႈႁိူဝ်ႉယၢမ်းမိူဝ်ႈယဝ်ႉၵၢၼ်ငၢၼ်းဢေႃႈ။ ၼၼ်ႉလူင်းၶဝ်ႈႁိူၼ်းၵႂႃႇဢဝ်သေၸိူဝ်ႉသေပိူင်။- 16ယႃႇႁႂ်ႈၵေႃႉဢၼ်မီးၵႃႈတီႈတူင်ႈၼႃးၼၼ်ႉၶိုၼ်းမိူဝ်းၵႃႈတီႈႁိူၼ်းၵႂႃႇဢဝ်ၶူဝ်းၼုင်ႈတၢင်းမႆမၼ်း။- 17ၼႂ်းဝၼ်းၼၼ်ႉ၊မႄႈယိင်းဢၼ်ပႃးပတိၵ်ႈသၼ်ႇထေႇတင်းမႄႈယိင်းဢၼ်မီးလုၵ်ႈဢွၼ်ႇလႅင်၊ဢၼ်ဢမ်ႇပႆႇၽၢတ်ႇၼူမ်းတင်းလၢႆ၊တေပဵၼ်ဢၼ်ၵိၼ်းၸႂ်ၼႃႇလူင်လၢင်ဢေႃႈ။- 18သူးတွင်းတီႈၽြႃးပဵၼ်ၸဝ်ႈ၊ၼင်ႇႁိုဝ်လွင်ႈတၢင်းၸိူဝ်းၼၼ်ႉတၵ်းဢမ်ႇလႆႈတူၵ်းမိူဝ်ႈၶိင်ႇႁိူဝ်ႉၶိင်ႇၽူၼ်ၼၼ်ႉတႃႉ။- 19လွင်ႈမၼ်းၸမ်ႉ၊ၽေးတုၵ်ႉၶႃႉမဵဝ်းၼႆႉ၊ၸႃႉၸဵမ်မိူဝ်ႈတႄႇၸႃႉၵမ်ႇၽႃႇဢၼ်ၽြႃးပဵၼ်ၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉ၊ႁၢၼ်ႉတေႃႇမိူဝ်ႈလဵဝ်ၼႆႉဢမ်ႇတွၼ်ႉပဵၼ်သေပွၵ်ႈလႄႈၵမ်းလိုၼ်းၵေႃႈတၵ်းဢမ်ႇပဵၼ်ဢေႃႈ။- 20ၵူၺ်းၵႃႈ၊ၽြႃးပဵၼ်ၸဝ်ႈႁႂ်ႈမိုဝ်ႉဝၼ်းၶိင်ႇၵႃႇလႃႉၸိူဝ်းၼၼ်ႉပွတ်းဢေႃႈ။ ပေႃးမၼ်းၸဝ်ႈယင်းဢမ်ႇႁႂ်ႈၶိင်ႇၵႃႇလႃႉၼၼ်ႉပွတ်းၸိုင်၊ၽူႈလႂ်ဢမ်ႇလွတ်ႈလႆႈသေၵေႃႉသေၵူၼ်း။ ထွၵ်ႈလူၺ်ႈၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ဝႆႉၼၼ်ႉလႄႈမၼ်းၸဝ်ႈႁႂ်ႈမိုဝ်ႉဝၼ်းၸိူဝ်းၼၼ်ႉပွတ်းဢေႃႈ။

21“မိူဝ်ႈၼၼ်ႉ၊ပေႃးသေၵေႃႉသေၵူၼ်းလၢတ်ႈတီႈသူလႄႈဝႃႈ၊ ‘တူၺ်းလူး။ ၸဝ်ႈၶရိၸ်ႈ၊မီးတီႈၼႆႈဢေႃႈ။ မီးတီႈၼၼ်ႈဢေႃႈ၊’ ဝႃႈၼင်ႇၼႆၸိုင်၊ယႃႇပေယုမ်ႇၵႂၢမ်းမၼ်း။- 22ၵူၼ်းဢၼ်ႁဵတ်းႁၢင်ႈၸဝ်ႈၶရိၸ်ႈ၊ဢိၵ်ႇတင်းသြႃႇႁဵတ်းႁၢင်ႈပရေႃးၽႅတ်ႈတင်းလၢႆတၵ်းပေႃႇမႃးသေလႄႈႁဵတ်းၼႄၼိမိၵ်ႈလၢၵ်ႈၶၼႃႇဢၼ်လၢၵ်ႇဢၼ်လၢႆးဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆလႄႈပႅတ်ႉလႅၼ်ဢမ်ႇၵႃး၊ပေႃးပဵၼ်လႆႈၸိုင်၊တၵ်းပႅတ်ႉလႅၼ်ၶဝ်ၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်တင်းလၢႆၼၼ်ႉဢေႃႈ။- 23ႁဵတ်းသတိတီႈတူဝ်သူတႃႉ။ တူၺ်းလူး။ ၸူဝ်ႈဢၼ်လွင်ႈတၢင်းၸိူဝ်းၼႆႉဢမ်ႇပႆႇပဵၼ်ၸိုင်၊ၵဝ်လၢတ်ႈဝႆႉဢွၼ်တၢင်းယဝ်ႉဢေႃႈ။

လုၵ်ႈၵူၼ်းတၵ်းႁွတ်ႈမႃး

(တူၺ်း၊ မတ်ႈ 24:29-30။ လု 21:25-28)

24“ၼႂ်းၶိင်ႇမိုဝ်ႉဝၼ်းဝၢႆးသေၽေးတုၵ်ႉၶႃႉပူၼ်ႉယဝ်ႉၼၼ်ႉ၊ၵၢင်ဝၼ်းတၵ်းလပ်းသိင်ႇၵႂႃႇ၊လိူၼ်ၵေႃႈတၵ်းဢမ်ႇပၼ်ဢၼ်လႅင်းမၼ်းယဝ်ႉ။- 25လၢဝ်တင်းလၢႆတၵ်းႁူင်ႈတၵ်းတူၵ်းသေတွင်ႉၽႃႉလႄႈတၼ်းၶူဝ်းၵၢင်ႁၢဝ်တင်းလၢႆၵေႃႈတၵ်းသၼ်ႇၶွၼ်းဢေႃႈ။- 26မိူဝ်ႈၼၼ်ႉ၊ၸဝ်ႈလုၵ်ႈၵူၼ်း၊တၵ်းပေႃႇမႃး၊ပႃးတင်းမုၼ်ၽုင်းတၼ်းၶူဝ်းဢႃႇၼုၽေႃႇၸဝ်ႈဢၼ်ယႂ်ႇၼႃႇ၊မႃးၵႃႈၼိူဝ်မွၵ်ႇၵုမ်ႈဢေႃႈ။- 27မၼ်းၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈတင်းလၢႆ၊ၵႂႃႇၵႃႈတီႈသီႇၸဵင်ႇပႅတ်ႇၼႃႈလေႃးၵႃႉ၊ႁႂ်ႈလႆႈႁွင်ႉဢဝ်ၶဝ်ၸိူဝ်းဢၼ်ၽြႃးပဵၼ်ၸဝ်ႈလိူၵ်ႈၵဵပ်းဢဝ်ဝႆႉၼၼ်ႉ၊လုၵ်ႉသေၵူႈတီႈၵူႈလႅၼ်တႂ်ႈၽႃႉၵၢင်ႁၢဝ်မႃးၸုတုမ်ၵၼ်ဢေႃႈ။

ၵႂၢမ်းဢုပမႃႇလွင်ႈတူၼ်ႈမၢၵ်ႇလိူဝ်ႇ

(တူၺ်း၊ မတ်ႈ 24:32-35။ လု 21:29-33)

28“သွၼ်ဢဝ်တီႈလွင်ႈတၢင်းဢၼ်ပဵၼ်မႃးၵႃႈတီႈတူၼ်ႈမၢၵ်ႇလိူဝ်ႇၵၼ်တႃႉ။ မိူဝ်ႈဢၼ်ၵိင်ႇမၼ်းၶႃႈမၼ်းပူင်ႇၽိူဝ်လႄႈဢွၵ်ႇမႂ်ၼုမ်ႇမႃးယူႇၼၼ်ႉၸိုင်၊သူႁုလွင်ႈဢၼ်ၶိင်ႇႁႅင်ႈၸမ်ႁွတ်ႈမႃးယဝ်ႉၼၼ်ႉဢေႃႈ။- 29မိူၼ်ၼင်ႇၼၼ်၊မိူဝ်ႈဢၼ်သူလႆႈႁၼ်လွင်ႈတၢင်းၸိူဝ်းၼႆႉပဵၼ်မႃးယူႇၼၼ်ႉၸိုင်၊ႁုလွင်ႈၶိင်ႇဢၼ်ၸဝ်ႈလုၵ်ႈၵူၼ်း၊ႁွတ်ႈၸမ်မႃးထိုင်ႁိမ်းႁူးၽၵ်းတူယဝ်ႉၼၼ်ႉတႃႉ။- 30ၵဝ်ဝႃႈတီႈၸိုဝ်ႈၸႂ်ႈမၼ်းၸမ်ႉ၊ၸိူဝ်ႉၵူၼ်းၶိူဝ်းၵူၼ်းမဵဝ်းၼႆႉ၊တၵ်းဢမ်ႇလႆႈသုတ်းလႆႈႁၢႆတေႃႇထိုင်လွင်ႈတၢင်းၸိူဝ်းၼႆႉ၊လႆႈပဵၼ်မႃးၸေးမူတ်းယဝ်ႉၼၼ်ႉဢေႃႈ။ 31ၵၢင်ႁၢဝ်တင်းလိၼ်မိူင်းတၵ်းပူၼ်ႉၵႂႃႇဢေႃႈ။ ၵႂၢမ်းၵဝ်ၼႆႉတၵ်းဢမ်ႇႁၢႆလၢႆ။

ၽူႈလႂ်ဢမ်ႇႁုၶိင်ႇမိုဝ်ႉဝၼ်းၼၼ်ႉ

(တူၺ်း၊ မတ်ႈ 24:36-44)

32“ၶိင်ႇၼႃႇရီႇဝၼ်းဢၼ်တၵ်းမႃးၼၼ်ႉဢမ်ႇမီးၽူႈလႂ်ႁုလႆႈ။ တမၢၼ်ႇၵၢင်ႁၢဝ်တင်းလၢႆဢမ်ႇႁု။ လုၵ်ႈၸဝ်ႈၵေႃႈဢမ်ႇႁု။ ပေႃႈၸဝ်ႈၵူၺ်းႁုဢေႃႈ။- 33ပိူဝ်ႈဢၼ်သူဢမ်ႇႁုလွင်ႈဢၼ်ၶိင်ႇမိုဝ်ႉဝၼ်းၼၼ်ႉ၊တၵ်းပဵၼ်မိူဝ်ႈလႂ်ၼၼ်ႉလႄႈတူင်ႉတိုၼ်ႇပႂ်ႉထႃႈယူႇတႃႉ။- 34ဢုပမႃႇၸမ်ႉ၊လွင်ႈတၢင်းၼႆႉမိူၼ်ၸိူဝ်ႉၼင်ႇဢၼ်ၵူၼ်းၵေႃႉၼိုင်ႈ၊မၼ်းဢဝ်ဢၶႂၢင်ႉဢႃႇၼႃႇမၼ်းဢၢပ်ႈပၼ်ဝႆႉတီႈၵူၼ်းဢွၼ်ႇမၼ်းတင်းလၢႆ၊ၶၢၼ်းဝႆႉပၼ်ၼႃႈၵၢၼ်ပုၼ်ႈဢၼ်တၵ်းႁဵတ်းႁင်းၽႂ်ႁင်းမၼ်းလႄႈသင်ႇလၢတ်ႈဝႆႉတီႈၵူၼ်းပႂ်ႉၽၵ်းတူႁႂ်ႈပႂ်ႉယူႇလီလီသေယဝ်ႉ၊ဢွၵ်ႇတႃႈဢွၵ်ႇတၢင်းၵႂႃႇၼၼ်ႉဢေႃႈ။- 35ပိူဝ်ႈၼႆလႄႈပိူဝ်ႈဢၼ်သူဢမ်ႇႁုၸဝ်ႈႁိူၼ်းတၵ်းမႃးၶိုၼ်းၶိင်ႇလႂ်၊တၵ်းပဵၼ်ၶိင်ႇႁူဝ်ၶမ်ႈႁိုဝ်း၊တၵ်းပဵၼ်ၶိင်ႇတဵင်ႈၶိုၼ်းႁိုဝ်း၊တၵ်းပဵၼ်ၶိင်ႇၵႆႇၶၼ်ႁိုဝ်း၊တၵ်းပဵၼ်ၶိင်ႇႁူဝ်မိူင်းသႂ်ႁိုဝ်းဢမ်ႇႁုၼၼ်ႉလႄႈတူင်ႉတိုၼ်ႇပႂ်ႉထႃႈယူႇတႃႉ။- 36ၵူဝ်မၼ်းၽုတ်းၽၢတ်းပေႃႇမႃးလႄႈထူပ်းႁၼ်သူၼွၼ်းလပ်းယူႇၼၼ်ႉဢေႃႈ။- 37ဢၼ်ၵဝ်ဝႃႈတီႈသူလႄႈဝႃႈ၊ ‘ပႂ်ႉထႃႈယူႇတႃႉ၊’ ဝႃႈၼႆၼၼ်ႉၵဝ်ဝႃႈတီႈၵူၼ်းတင်းသဵင်ႈတင်းလူင်ဢေႃႈ၊” ဝႃႈၼင်ႇၼႆဢေႃႈ။

Currently Selected:

မႃႇ 13: SHNCL

Highlight

Copy