လု 6

လွင်ႈဝၼ်းၵမ်သိၼ်

(တူၺ်း၊ မတ်ႈ 12:1-8။ မႃႇ 2:23-28)

1ၼႂ်းဝၼ်းၵမ်သိၼ်ဝၼ်းၼိုင်ႈ၊မိူဝ်ႈဢၼ်ၸဝ်ႈယေႇသု၊ပႆၽႃႇလတ်းႁႆႈၶဝ်ႈၵျုင်ႇၵႂႃႇယူႇၼၼ်ႉ၊တပႄးၸဝ်ႈတင်းလၢႆယၵ်းႁူင်းၶဝ်ႈၵျုင်ႇသေယဝ်ႉ၊ၶိုတ်ႈပွတ်ႈၼႂ်းဢူင်ႈမိုဝ်းၶဝ်လႄႈၵိၼ်သၢၼ်ၶဝ်ႈၵျုင်ႇဢေႃႈ။- 2ၵူၼ်းၵိူင်းၽႃႇရိသႄး၊ၶဝ်တၵ်ႉလႄႈလၢတ်ႈဝႃႈ၊ “ႁဵတ်းသင်လႄႈသူပူၼ်ႉလိူဝ်တြႃးပိင်းၺၢပ်ႈဝၼ်းၵမ်သိၼ်ၼၼ်ႉ၊” ဝႃႈၼင်ႇၼႆလႄႈ။

3 ၸဝ်ႈယေႇသု၊ၶိုၼ်းတွပ်ႇလႄႈလၢတ်ႈဝႃႈ၊ “သူဢမ်ႇယၢမ်ႈလႆႈၽတ်းဢၢၼ်ႇလွင်ႈဢၼ်ၶုၼ်ႁေႃၶမ်းတႃႇဝိတ်ႈ၊ႁဵတ်းၼႂ်းမိူဝ်ႈဢၼ်မၼ်းတင်းၵူၼ်းဢွၼ်ႇမၼ်းတင်းလၢႆဢိုပ်းတၢင်းၵိၼ်ၼၼ်ႉႁိုဝ်း။- 4မၼ်းၶဝ်ႈၵႂႃႇၼႂ်းႁိူၼ်းၽြႃးပဵၼ်ၸဝ်ႈလႄႈ ဢဝ်ၵိၼ်ၶဝ်ႈမုၼ်းဢၼ်တမ်းၵႃႈတီႈၽၢႆႇၼႃႈၸဝ်ႈၽြႃးဢၼ်ယဵၸ်ႈပရေႃးႁဵၵ်ႈ#6:4 “ယဵၸ်ႈပရေႃးႁဵၵ်ႈ” - ၽူႈတၢင်တူဝ်ႁဵတ်းဝၢတ်ႈသၢၵ်ႈၵၢပ်ႈတၢင်းလူႇတီႈၽြႃးပဵၼ်ၸဝ်ႈၶဝ်ၵူၺ်းထုၵ်ႇလီၵိၼ်ၼၼ်သေယဝ်ႉ၊သမ်ႉဢဝ်ပၼ်တီႈၵူၼ်းဢွၼ်ႇမၼ်းၸိူဝ်းၼၼ်ႉၵိၼ်ၼၼ်ႉဢေႃႈ၊” ဝႃႈၼင်ႇၼႆယဝ်ႉၸင်ႇ။

5သမ်ႉလၢတ်ႈထႅင်ႈလႄႈဝႃႈ၊ “လုၵ်ႈၵူၼ်း၊ပဵၼ်ၸဝ်ႈဝၼ်းၵမ်သိၼ်ဢေႃႈ၊” ဝႃႈၼင်ႇၼႆဢေႃႈ။

ၵူၼ်းဢၼ်မိုဝ်းႁဵဝ်ႇၶွၼ်ၼိုင်ႈ

(တူၺ်း၊ မတ်ႈ 12:9-14။ မႃႇ 3:1-6)

6ဝၢႆးၼၼ်ႉထႅင်ႈသိၼ်ၼိုင်ႈ၊ၸဝ်ႈယေႇသု၊ၶဝ်ႈၵႃႈၼႂ်းၸရွပ်ႈႁေႃးတြႃးလႄႈ သင်ႇသွၼ်ပၼ်ယူႇဢေႃႈ။ ၼႂ်းတီႈၼၼ်ႈမီးၵူၼ်းၵေႃႉၼိုင်ႈဢၼ်မိုဝ်းၶွၼ်ၶႂႃမၼ်းႁဵဝ်ႇဝႆႉၼၼ်ႉဢေႃႈ။- 7ၸွင်ႇမၼ်းၸဝ်ႈတေႁဵတ်းႁႂ်ႈတၢင်းပဵၼ်မၼ်းႁၢႆၼႂ်းဝၼ်းၵမ်သိၼ်ႁိုဝ်း၊ဢမ်ႇႁဵတ်းႁိုဝ်းဝႃႈၼႆ၊သြႃႇမေႃၵျၢမ်းထမ်ႇမႃႉၶဝ်တင်းၵူၼ်းၵိူင်းၽႃႇရိသႄး၊ၶဝ်တင်းလၢႆ ႁႃလွင်ႈတၢင်းဢၼ်တၵ်းလႆႈတၢင်ႇဢပျတ်ႈတီႈၸဝ်ႈယေႇသု၊လူၺ်ႈတၢင်းဢၼ်ၽိတ်းပိူင်ႈၼၼ်ႉၸိုင်၊လွမ်ပႂ်ႉတူၺ်းယူႇဢေႃႈ။- 8ၸဝ်ႈယေႇသု၊ႁုလွင်ႈတၢင်းဢၼ်ၶဝ်ၵျၢမ်ႇၼႂ်းၸႂ်ၶဝ်ၼၼ်ႉသေလႄႈ လၢတ်ႈတီႈၵူၼ်းမိုဝ်းႁဵဝ်ႇၼၼ်ႉလႄႈဝႃႈ၊ “မႃးတႃႉ။ မႃးၸုၵ်းၵႃႈၼႆႈတႃႉ၊” ဝႃႈၼႆ၊ၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉၵေႃႉၼၼ်ႉၵႂႃႇၸုၵ်းယူႇၵႃႈတီႈၼၼ်ႈဢေႃႈ။- 9မိူဝ်ႈၼၼ်ႉ၊မၼ်းၸဝ်ႈလၢတ်ႈတီႈၶဝ်ၸိူဝ်းၼၼ်ႉလႄႈဝႃႈ၊ “ၵဝ်ထၢမ်သူလူး။ ပုၼ်ႈဢၼ်ထုၵ်ႇလီႁဵတ်းၼႂ်းဝၼ်းၵမ်သိၼ်ၼၼ်ႉ၊တြႃးႁဝ်းပိင်းၺၢပ်ႈဝႆႉၸိူဝ်ႉၼင်ႇႁိုဝ်။ ထုၵ်ႇလီႁဵတ်းၵျေးၸူးႁိုဝ်း။ ထုၵ်ႇလီယႃႉဢၵျူဝ်းပိူၼ်ႈႁိုဝ်း။ ထုၵ်ႇလီၵႄႇသႄႇဢဝ်ဢသၢၵ်ႈႁိုဝ်း။ ထုၵ်ႇလီယႃႉပႅတ်ႈဢသၢၵ်ႈႁိုဝ်း၊” ဝႃႈၼင်ႇၼႆသေယဝ်ႉ၊- 10မၼ်းၸဝ်ႈယႅၵ်ႉတူၺ်းလဵပ်ႈႁွပ်ႈၶဝ်တင်းသဵင်ႈတင်းလူင်ယဝ်ႉၸင်ႇ၊လၢတ်ႈတီႈၵေႃႉၼၼ်ႉလႄႈဝႃႈ၊ “ယဵတ်ႇမိုဝ်းမႂ်းတႃႉ၊” ဝႃႈၼင်ႇၼႆလႄႈ၊ၵေႃႉၼၼ်ႉၵေႃႈယဵတ်ႇမိုဝ်းမၼ်းလႄႈမိုဝ်းမၼ်းၵေႃႈလီမႃးဢေႃႈ။

11ၶဝ်ၸိူဝ်းၼၼ်ႉဢွၵ်ႇတေႃးသႃႉၶႂ်ႈၸႃႉၼႃႇလႄႈ၊တၵ်းလႆႈႁဵတ်းၸိူဝ်ႉၼင်ႇႁိုဝ်တီႈၸဝ်ႈယေႇသု၊ဝႃႈၼႆၶဝ်ၼင်ႇၵၼ်ၵၼ်တိူင်ႇပၢင်ႇလၢတ်ႈၸႃၵၼ်ဢေႃႈ။

ၸဝ်ႈယေႇသုလိူၵ်ႈတမၢၼ်ႇၸဝ်ႈသိပ်းသွင်ပႃး

(တူၺ်း၊ မတ်ႈ 10:1-4။ မႃႇ 3:13-19)

12ၼႂ်းမိူဝ်ႈၶိင်ႇၼၼ်ႉၸဝ်ႈယေႇသု၊ၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈႁဵတ်းသူးတွင်းပထၼႃႇလႄႈမၼ်းၸဝ်ႈသူးတွင်းတီႈၽြႃးပဵၼ်ၸဝ်ႈတင်းၶိုၼ်းဢေႃႈ။- 13မိူဝ်ႈဢၼ်မိူင်းလႅင်းမႃးၸိုင်၊မၼ်းၸဝ်ႈႁွင်ႉဢဝ်တပႄးၸဝ်ႈတင်းလၢႆမႃးသေယဝ်ႉ၊ၵႃႈၼႂ်းၶဝ်ၼၼ်ႉလိူၵ်ႈၵဵပ်းဢဝ်သိပ်းသွင်ပႃးယဝ်ႉၸင်ႇ၊ႁွင်ႉၶဝ်ဝႃႈတမၢၼ်ႇၸဝ်ႈဢေႃႈ။- 14ၶဝ်ၸိူဝ်းၼၼ်ႉပဵၼ်သိမုၼ်ႇ၊ၵေႃႉဢၼ်ၸဝ်ႈယေႇသု၊ႁွင်ႉဝႃႈ၊ပေႇတရု၊တင်းၼွင်ႉၸၢႆးမၼ်းဢၼ်ႇတရေႇ၊ယႃႇၵုပ်ႈ၊ဢိၵ်ႇတင်းယူဝ်းႁၢၼ်ႇ၊ၽိလိပ်ႉပု၊ဢိၵ်ႇတင်းပႃႇထေႃးလမႄး၊- 15မတ်ႈထႄႇ၊ဢိၵ်ႇတင်းထူဝ်းမႃႉ၊ယႃႇၵုပ်ႈ၊လုၵ်ႈၸၢႆးဢႃႇလၽေး၊ဢိၵ်ႇတင်းသိမုၼ်ႇ၊ဢၼ်ႁွင်ႉဝႃႈ၊ၸေႇလုတ်ႉ၊- 16ယုတႃႉ၊လုၵ်ႈၸၢႆးယႃႇၵုပ်ႈ၊ဢိၵ်ႇတင်းယုတႃႉဢိသၵႃႇရေႇဢုတ်ႈ၊ပဵၼ်ၵေႃႉဢၼ်ဝၢႆးလိုၼ်းမႃးဢဝ်မၼ်းၸဝ်ႈဢၢပ်ႈၵႃႈတီႈရၢၼ်ႇသူႇၼၼ်ႉဢေႃႈ။

ၸဝ်ႈယေႇသုသင်ႇသွၼ်လႄႈယူတ်းယႃ

(တူၺ်း၊ မတ်ႈ 4:23-25)

17မိူဝ်ႈဢၼ်ၸဝ်ႈယေႇသု၊လူင်းလွႆမႃးၸွမ်းၵၼ်တင်းတမၢၼ်ႇၸဝ်ႈၸိူဝ်းသေလႄႈ မၼ်းၸဝ်ႈၸုၵ်းၵႃႈတီႈပၢင်ႇပဵင်းႁူမ်ႈလူၺ်ႈၵၼ်တင်းတပႄးၸဝ်ႈၼမ်ၼႃႇဢေႃႈ။ မူႇၵူၼ်းဢၼ်ၼမ်ၵိုၼ်းၼႃႇၸိူဝ်းဢၼ်လုၵ်ႉသေၵႃႈတီႈမိူင်းယုတႃႉ၊ဝဵင်းယေႇရုသလႅမ်ႇ၊တင်းဝဵင်းၸိူဝ်းဢၼ်မီးႁိမ်းသၢပ်ႇပၢင်ႇလၢႆႇဢၼ်ပဵၼ်ဝဵင်းတုရု၊တင်းဝဵင်းၸိတုၼ်ႇ၊ၵူႈတီႈၵူႈလႅၼ်မႃးမီးယူႇၵႃႈတီႈၼၼ်ႈ၊- 18ႁႂ်ႈလႆႈၶၢမ်ႇဢဝ်တၢင်းဢၼ်ယုၵ်ႉယႃတၢင်းၶႆႈတၢင်းပဵၼ်ၶဝ်တင်းလၢႆႁႂ်ႈလႆႈၸိုၼ်ႈႁၢႆၼၼ်ႉဢေႃႈ။ ၵူၼ်းဢၼ်ၽီၶဝ်ႈၽိူဝ်ႉၶဝ်ႈတၢင်းလၢႆၵေႃႈမႃးလႄႈလႆႈၵတ်းယဵၼ်ၶျၢမ်းသႃႇဢေႃႈ။- 19ပိူဝ်ႈဢၼ်တၼ်းၶူဝ်းဢွၵ်ႇသေၵႃႈၼႂ်းမၼ်းၸဝ်ႈလႄႈႁဵတ်းႁႂ်ႈတၢင်းၶႆႈတၢင်းပဵၼ်ၶဝ်ၵူႈၸိူဝ်ႉၵူႈမဵဝ်းၸိုၼ်ႈႁၢႆၼၼ်ႉလႄႈၵူၼ်းတၢင်းလၢႆၶတ်းၸႂ်ၵျၢမ်ႇဢၢင်ႈယိပ်းတိူဝ်ႉတူဝ်မၼ်းၸဝ်ႈဢေႃႈ။

မၢင်ႇၵလႃႇဢိၵ်ႇတင်းဢႃႉမၢင်ႇၵလႃႇ

(တူၺ်း၊ မတ်ႈ 5:1-12)

20 ၸဝ်ႈယေႇသု၊ယႅၵ်ႉတူၺ်းတပႄးၸဝ်ႈတင်းလၢႆလႄႈလၢတ်ႈဝႃႈ၊

“သူၸိူဝ်းဢၼ်ယၢၵ်ႈၽၢၼ်ၼၼ်ႉ

မီးမၢင်ႇၵလႃႇလႄႈ

မိူင်းၽြႃးပဵၼ်ၸဝ်ႈပဵၼ်မိူင်းသူဢေႃႈ။

21သူၸိူဝ်းဢၼ်ဢိုပ်းယၢၵ်ႈတေႃႈလဵဝ်ၼႆႉၼၼ်ႉ

မီးမၢင်ႇၵလႃႇလႄႈ၊

သူတၵ်းလႆႈႁွတ်ႈထိုင်တၢင်းဢၼ်

ဢိမ်ႇတဵမ်ဢေႃႈ။

သူၸိူဝ်းဢၼ်ႁွင်ႉႁႆႈတေႃႈလဵဝ်ၼႆႉၼၼ်ႉ

မီးမၢင်ႇၵလႃႇလႄႈသူတၵ်းလႆႈၶူဝ်ဢေႃႈ။

22“ၵွပ်ႈပိူဝ်ႈလုၵ်ႈၵူၼ်း၊လႄႈမိူဝ်ႈဢၼ်ပိူၼ်ႈၸင်းသူ၊ပႄႇပႅတ်ႈသူ၊ယႃႉယူၵ်ႉသူလႄႈသႄႉသွမ်းယႃႉသရေႇသူၼၼ်ႉၸိုင်၊သူမီးမၢင်ႇၵလႃႇဢေႃႈ။- 23ၼႂ်းဝၼ်းၸိူဝ်းၼၼ်ႉၸိုင်၊မီးတၢင်းဢၼ်သိူဝ်းပျေႃႇတႃႉ။ မီးၸႂ်ဢၼ်သိူဝ်းၸူမ်းလႄႈၵႃႈဝႅၼ်တႃႉ။ ၵွပ်ႈလွင်ႈၸိူဝ်ႉၼင်ႇႁိုဝ်လႄႈဝႃႈၸမ်ႉ၊ဢၵျူဝ်းဢၼ်ယႂ်ႇၼႃႇၼၼ်ႉသိမ်းပႅင်းဝႆႉပုၼ်ႈသူၵႃႈတီႈမိူင်းၵၢင်ႁၢဝ်ဢေႃႈ။ ပူႇမွၼ်ႇၶဝ်ၼၼ်ႉႁဵတ်းတီႈပရေႃးၽႅတ်ႈ#6:23 “ပရေႃးၽႅတ်ႈ” - ၽူႈႁေႃးလၢတ်ႈၵႂၢမ်းၽြႃးပဵၼ်ၸဝ်ႈလွင်ႈတၢင်းဢၼ်တၵ်းပဵၼ်မႃးတေႃႈလဵဝ်လႄႈဝၼ်းမိူဝ်းၼႃႈတင်းလၢႆၸိူဝ်ႉၼင်ႇၼၼ်ယဝ်ႉဢေႃႈ။

24“ၵူၺ်းၵႃႈ၊သူၸိူဝ်းဢၼ်ၸၢင်ႈမၢၵ်ႈၸၢင်ႈ

မီးတေႃႈလဵဝ်ၼႆႉၼၼ်ႉမီးဢႃႉမၢင်ႇၵလႃႇဢေႃႈ။

လွင်ႈမၼ်းၸမ်ႉ၊သူလႆႈသၢၵ်ႈသႃႇယဝ်ႉယဝ်ႉ။

25သူၸိူဝ်းဢၼ်လႆႈၵိၼ်ဢိမ်ႇၵိၼ်တဵမ်တေႃႈလဵဝ်ၼႆႉၼၼ်ႉမီးဢႃႉမၢင်ႇၵလႃႇဢေႃႈ။

လွင်ႈမၼ်းၸမ်ႉ၊သူတၵ်းလႆႈႁွတ်ႈထိုင်တၢင်းဢၼ်ဢိုပ်းယၢၵ်ႈဢေႃႈ။

သူၸိူဝ်းဢၼ်ၶူဝ်တေႃႈလဵဝ်ၼႆႉၼၼ်ႉမီးဢႃႉမၢင်ႇၵလႃႇဢေႃႈ။

လွင်ႈမၼ်းၸမ်ႉ၊သူတၵ်းလႆႈၶၢင်းၶီၶၢင်းၽၢၼ်လႄႈႁွင်ႉႁႆႈဢေႃႈ။

26“မိူဝ်ႈဢၼ်ပိူၼ်ႈယွင်ႈယေႃးသူၼၼ်ႉသူမီးဢႃႉမၢင်ႇၵလႃႇဢေႃႈ။ လွင်ႈမၼ်းၸမ်ႉ၊ပူႇမွၼ်ႇၶဝ်ႁဵတ်းတီႈမိၵ်ႉသႃႇပရေႃးၽႅတ်ႈ#6:26 “မိၵ်ႉသႃႇပရေႃးၽႅတ်ႈ” - ၽူႈႁေႃးလၢတ်ႈၵႂၢမ်းၽြႃးၽိတ်းလႄႈ သွၼ်ၽိတ်းသွၼ်ပိူင်ႈတင်းလၢႆၸိူဝ်ႉၼင်ႇၼၼ်ယဝ်ႉဢေႃႈ။

သင်ႇသွၼ်ႁႂ်ႈႁၵ်ႉရၢၼ်ႇသူႇ

(တူၺ်း၊ မတ်ႈ 5:38-48။ မတ်ႈ 7:12)

27“ၵဝ်ဝႃႈတီႈသူၸိူဝ်းဢၼ်ငိၼ်းၵႂၢမ်းၵဝ်ၼႆႉၸမ်ႉ၊ႁၵ်ႉရၢၼ်ႇသူႇသူတႃႉ။ ႁဵတ်းၵျေးၸူးတီႈၶဝ်ၸိူဝ်းဢၼ်ၸင်းသူၼၼ်ႉတႃႉ။- 28သူင်ႇမႅတ်ႈတႃႇတီႈၶဝ်ၸိူဝ်းဢၼ်ၵိၼ်ႇလႃႇသူၼၼ်ႉတႃႉ။ သူးတွင်းပုၼ်ႈၶဝ်ၸိူဝ်းဢၼ်ယႃႉၵဝ်းသူၼၼ်ႉတႃႉ။- 29ပေႃးသေၵေႃႉၵေႃႉတူပ်းၵႅမ်ႈမႂ်းၽၢႆႇၼိုင်ႈၸိုင်၊ဝၢႆႇပၼ်ထႅင်ႈၵႅမ်ႈၽၢႆႇၼိုင်ႈတီႈမၼ်းတႃႉ။ ပေႃးသေၵေႃႉၵေႃႉႁိမ်ဢဝ်သိူဝ်ႈသွၼ်ႉမႂ်းၸိုင်၊ယင်းဢမ်ႇႁၢမ်ႈဢမ်ႇၶႅၼ်လႄႈထွတ်ႇလွၼ်ႈပၼ်သိူဝ်ႈတၢင်းၼႂ်းမႂ်းထႅင်ႈတႃႉ။- 30တီႈၵေႃႉဢၼ်ယွၼ်းသေၸိူဝ်ႉသေပိူင်တီႈမႂ်းၼၼ်ႉပၼ်တႃႉ။ မိူဝ်ႈဢၼ်ပိူၼ်ႈႁိမ်ဢဝ်ဢုၵ်ႉၸႃႇၶူဝ်းလဵင်းမႂ်းၼၼ်ႉယႃႇပေယွၼ်းဢဝ်ၶိုၼ်း။- 31မဵဝ်းဢၼ်သူၶႂ်ႈႁႂ်ႈပိူၼ်ႈႁဵတ်းတီႈသူၼၼ်ႉ၊သူၵႂႃႇႁဵတ်းတီႈပိူၼ်ႈၸိူဝ်ႉၼင်ႇၼၼ်တႃႉ။

32“ပေႃးသူႁၵ်ႉၵေႃႉဢၼ်ႁၵ်ႉသူၼၼ်ႉၵူၺ်းၸိုင်၊တေမီးဢၵျူဝ်းၵျေးၸူးၵႃႈသင်။ ၵူၼ်းႁၢႆႉၶဝ်ၵေႃႈယင်းၸၢင်ႈႁၵ်ႉၵေႃႉဢၼ်ႁၵ်ႉၶဝ်ၼၼ်ႉယူႇဢေႃႈ။- 33ပေႃးသူႁဵတ်းၵျေးၸူးတီႈၵေႃႉဢၼ်ႁဵတ်းၵျေးၸူးပၼ်တီႈသူၼၼ်ႉၵူၺ်းၸိုင်၊တေမီးဢၵျူဝ်းၵျေးၸူးၵႃႈသင်။ ၵူၼ်းႁၢႆႉၶဝ်ၵေႃႈယင်းၸၢင်ႈႁဵတ်းၸိူဝ်ႉၼင်ႇၼၼ်ႉဢေႃႈ။- 34ပေႃးသူၵူႈပၼ်ယိမ်ပၼ်တီႈၵေႃႉဢၼ်သူမုင်ႈမွင်းဝႃႈ၊မၼ်းတၵ်းတႅၼ်းၶိုၼ်းလႆႈၼၼ်ႉၵူၺ်းၸိုင်၊တေမီးဢၵျူဝ်းၵျေးၸူးၵႃႈသင်။ ၵူၼ်းႁၢႆႉၶဝ်ၵေႃႈယင်းၸၢင်ႈပၼ်ၵူႈပၼ်ယိမ်တီႈၵူၼ်းႁၢႆႉၶဝ်ၼင်ႇၵၼ်ၵၼ်ၼၼ်ႉႁႂ်ႈလႆႈၶၢမ်ႇဢဝ်ဢၵျူဝ်းၵျေးၸူးတၢင်းဢၼ်တႅၼ်းၶိုၼ်းၼၼ်ႉယူႇဢေႃႈ။- 35သူၸမ်ႉ၊ႁၵ်ႉရၢၼ်ႇသူႇသူလႄႈႁဵတ်းၵျေးၸူးတီႈၶဝ်တႃႉ။ ယင်းဢမ်ႇမုင်ႈမွင်းသေၸိူဝ်ႉသေပိူင်လႄႈၵူႈပၼ်ယိမ်ပၼ်တႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈၵျေးၸူးဢၼ်ယႂ်ႇၼႃႇလႄႈသူတၵ်းလႆႈပဵၼ်လုၵ်ႈၽြႃးပဵၼ်ၸဝ်ႈ၊ၸဝ်ႈဢၼ်သုင်မျၢတ်ႈၼႃႇၼၼ်ႉဢေႃႈ။ လွင်ႈမၼ်းၸမ်ႉ၊မၼ်းၸဝ်ႈႁဵတ်းၵျေးၸူးတီႈၶဝ်ၸိူဝ်းဢၼ်ဢမ်ႇႁုၵျေးၸူးၸဝ်ႈလႄႈမီးသၽေႃးဢၼ်ႁၢႆႉႁုၵ်းၼၼ်ႉဢေႃႈ။- 36ပိူဝ်ႈၼႆလႄႈၸိူဝ်ႉၼင်ႇဢၼ်ပေႃႈၸဝ်ႈသူၸၢင်ႈႁၵ်ႉဢဵတ်းလူၼၼ်ႉ၊သူၵေႃႈၸၢင်ႈႁၵ်ႉဢဵတ်းလူတႃႉ။

လွင်ႈတၢင်းဢၼ်တႅပ်းတတ်းတြႃး

(တူၺ်း၊ မတ်ႈ 7:1-5)

37“ယႃႇပေတႅပ်းတတ်းတြႃးတၢင်းၽိတ်းပိူၼ်ႈ။ သူတေၵၢင်းလွတ်ႈတင်းတၢင်းဢၼ်ၸီႇယၢင်ႇတြႃးဢေႃႈ။ ယႃႇပေတၢင်ႇဢပျတ်ႈတီႈပိူၼ်ႈ။ သူတေၵၢင်းလွတ်ႈတင်းတၢင်းဢၼ်ၸီႇယၢင်ႇဢပျတ်ႈဢေႃႈ။ ပွႆႇလွတ်ႈဢပျတ်ႈပိူၼ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ဢပျတ်ႈသူတၵ်းလႆႈၶၢမ်ႇတၢင်းဢၼ်ပွႆႇလွတ်ႈဢေႃႈ။- 38ပၼ်တီႈပိူၼ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊သူတၵ်းလႆႈၶၢမ်ႇတၢင်းဢၼ်ပိူၼ်ႈပၼ်ဢေႃႈ။ သူတၵ်းလႆႈၶၢမ်ႇဢဝ်တၢင်းဢၼ်တူင်တဵမ်တဵမ်ဢမ်ႇၵႃး၊တၢင်းဢၼ်သတ်ႉဢၼ်တဵၵ်းသႂ်ႇ၊တၢင်းဢၼ်ၶဝ်ႇဢၼ်ၶွၼ်းသႂ်ႇ၊တၢင်းဢၼ်ပၼ်လူၼ်ႉပၼ်သူတ်ႇ၊ၵႃႈၼင်ႇဢၼ်သူႁွပ်ႇဢဝ်လႆႈၼႂ်းဝၢင်ႈႁူဝ်ဢူၵ်းသူၼၼ်ႉဢေႃႈ။ လွင်ႈမၼ်းၸမ်ႉ၊ၸိူဝ်ႉၼင်ႇဢၼ်သူတူင်ပၼ်တီႈပိူၼ်ႈၼၼ်ႉပိူၼ်ႈတၵ်းတူင်ပၼ်တီႈသူၶိုၼ်းဢေႃႈ၊” ဝႃႈၼင်ႇၼႆဢေႃႈ။

39 ၸဝ်ႈယေႇသု၊သမ်ႉလၢတ်ႈၵႂၢမ်းဢုပမႃႇလႄႈဝႃႈၸမ်ႉ၊ “ၵူၼ်းတႃမွတ်ႇၵေႃႉၼိုင်ႈဢမ်ႇၸၢင်ႈၸုင်သူင်ႇၼႄတၢင်းၵူၼ်းတႃမွတ်ႇတၢင်ႇၵေႃႉၵူၺ်း။ ပေႃးၼႄတၢင်းၵၼ်ၸိုင်၊တင်းသွင်ၵေႃႉတၵ်းတူၵ်းၶုမ်တူၵ်းလုၵ်းဢေႃႈ။- 40တပႄးဢမ်ႇၸၢင်ႈပူၼ်ႉပႅၼ်သေသြႃႇလႆႈ။ ၵူၺ်းၵႃႈ၊တပႄးဢၼ်သွၼ်ဢဝ်ၸေးၸေးယဝ်ႉၼၼ်ႉ၊တေပဵၼ်ၸိူဝ်ႉၼင်ႇသြႃႇမၼ်းဢေႃႈ။

41“ယင်းဢမ်ႇဝႆႉဢယေးသဵၼ်ႈမႆႉဢၼ်မီးၼႂ်းမၢၵ်ႇတႃမႂ်းလႄႈ၊ႁဵတ်းသင်မႂ်းတူၺ်းႁၼ်မုၼ်ႈၽွင်ဢွၼ်ႇဢၼ်မီးၼႂ်းမၢၵ်ႇတႃပီႈၼွင်ႉမႂ်းၼၼ်ႉၸိူဝ်ႉၼင်ႇႁိုဝ်။- 42ယင်းဢမ်ႇၸၢင်ႈႁၼ်သဵၼ်ႈမႆႉၵႃႈၼႂ်းမၢၵ်ႇတႃတူဝ်ၸဝ်ႈၵဝ်ႇလႄႈ၊တၵ်းလၢတ်ႈတီႈပီႈၼွင်ႉမႂ်းလႄႈဝႃႈ၊ ‘ၼွင်ႉ႟။ ႁႂ်ႈၵဝ်လႆႈဢဝ်မုၼ်ႈၽွင်ဢွၼ်ႇဢၼ်မီးၼႂ်းမၢၵ်ႇတႃမႂ်းၼႆႉဢွၵ်ႇသေၵမ်း၊’ ဝႃႈၼင်ႇၼႆၼင်ႇႁိုဝ်။ ၵူၼ်းဢၼ်ၼႃႈသိုဝ်ႈၸႂ်ၵူတ်ႉၼႆႉ႟။ ဢဝ်သဵၼ်ႈမႆႉၼႂ်းမၢၵ်ႇတႃတူဝ်ၸဝ်ႈၵဝ်ႇဢွၵ်ႇဢွၼ်တၢင်းယဝ်ႉၸင်ႇ၊မႂ်းတၵ်းၸၢင်ႈဢဝ်မုၼ်ႈၽွင်ဢၼ်မီးၼႂ်းမၢၵ်ႇတႃပီႈၼွင်ႉမႂ်းၼၼ်ႉဢွၵ်ႇလႆႈဢေႃႈ။

လွင်ႈတူၼ်ႈတင်းမၢၵ်ႇမၼ်း

(တူၺ်း၊ မတ်ႈ 7:16-20။ မတ်ႈ 12:33-35)

43“တူၼ်ႈဢၼ်လီၼၼ်ႉဢမ်ႇၸၢင်ႈမၢၵ်ႇမၢၵ်ႇဢၼ်ဢမ်ႇလီမႃးလႆႈ။ ၼႄးၼိုင်ႈၸမ်ႉ၊တူၼ်ႈဢၼ်ဢမ်ႇလီၼၼ်ႉဢမ်ႇၸၢင်ႈမၢၵ်ႇမၢၵ်ႇဢၼ်လီမႃးလႆႈ။- 44တူၼ်ႈလႂ်သေဢမ်ႇဝႃႈ၊ႁၼ်မၢၵ်ႇမၼ်းလႄႈႁုလွင်ႈတူၼ်ႈမၼ်းဢေႃႈ။ ၵႃႈတီႈတူၼ်ႈၼၢမ်ၼၼ်ႉ၊တေဝိတ်းဢဝ်မၢၵ်ႇလိူဝ်ႇလႆႈဢမ်ႇၸႂ်ႈ။ ၵႃႈတီႈၶိူဝ်းၼၢမ်ၵေႃႈတေဝိတ်းဢဝ်မၢၵ်ႇၸပိတ်ႉလႆႈဢမ်ႇၸႂ်ႈ။- 45ၵူၼ်းလီၸိုင်၊ၸၢင်ႈဢဝ်ဢၼ်လီဢၼ်မီးၼႂ်းတိူၵ်ႈၽၢၼ်ႇတႃႇႁူဝ်ၸႂ်ဢၼ်လီမၼ်းၼၼ်ႉဢွၵ်ႇၼႄဢေႃႈ။ ၵွပ်ႈသင်လႄႈဝႃႈၸမ်ႉ၊သူပ်းၵူၼ်းၸၢင်ႈလၢတ်ႈဢွၵ်ႇၸွမ်းၵႃႈၼင်ႇဢၼ်မီးတဵမ်ဝႆႉၵႃႈၼႂ်းႁူဝ်ၸႂ်မၼ်းၼၼ်ႉဢေႃႈ။

လွင်ႈၵူၼ်းသွင်ၵေႃႉဢၼ်ႁဵတ်းႁိူၼ်း

(တူၺ်း၊ မတ်ႈ 7:24-27)

46“ႁဵတ်းသင်လႄႈသူႁွင်ႉၵဝ်ဝႃႈ၊ ‘ၸဝ်ႈႁဝ်း၊ၸဝ်ႈႁဝ်း’ ဝႃႈၼင်ႇၼႆသေယဝ်ႉ၊သမ်ႉဢမ်ႇၵမ်ၵျၢင်ႉၸွမ်းတြႃးၵဝ်ၼင်ႇႁိုဝ်။- 47ၵေႃႉဢၼ်မႃးၵႃႈတီႈၵဝ်လႄႈ ငိၼ်းတြႃးၵဝ်သေယဝ်ႉ၊ၵမ်ၵျၢင်ႉၸွမ်းၼၼ်ႉမၼ်းမိူၼ်ၽူႈလႂ်ဝႃႈၼႆၸမ်ႉ၊- 48မၼ်းမိူၼ်ၸိူဝ်ႉၼင်ႇၵူၼ်းၵေႃႉၼိုင်ႈယၢမ်းမိူဝ်ႈဢၼ်မၼ်းႁဵတ်းႁိူၼ်းတိူၵ်ႈၼၼ်ႉၸိုင်၊ၶုတ်းလိုၵ်ႉလိုၵ်ႉသေလႄႈၶျႃးငဝ်ႈႁၢၵ်ႈတိူၵ်ႈၵႃႈၼိူဝ်မၢၵ်ႇႁိၼ်ၼၼ်ႉဢေႃႈ။ ၼမ်ႉၼွင်းလႄႈထိပ်ႇၽင်ႈႁိူၼ်းတိူၵ်ႈၼၼ်ႉသေၵေႃႈ၊ပိူဝ်ႈဢၼ်တင်ႈဝႆႉမၼ်ႈၶိူင်ႇၼႃႇၼၼ်ႉလႄႈဢမ်ႇၶွၼ်းဢမ်ႇဝႆလႃးလႃး။- 49ၵေႃႉဢၼ်ငိၼ်းတြႃးၵဝ်သေယဝ်ႉ၊ဢမ်ႇၵမ်ဢမ်ႇၵျၢင်ႉၸွမ်းၼၼ်ႉၸမ်ႉ၊မိူၼ်ၸိူဝ်ႉၼင်ႇၵေႃႉဢၼ်ႁဵတ်းႁိူၼ်းတိူၵ်ႈၵႃႈၼိူဝ်လိၼ်ဢၼ်ယင်းဢမ်ႇမီးငဝ်ႈႁၢၵ်ႈၼၼ်ႉဢေႃႈ။ မိူဝ်ႈဢၼ်ၼမ်ႉၼွင်းလႄႈထိပ်ႇၽင်ႈႁိူၼ်းတိူၵ်ႈၼၼ်ႉၸိုင်၊လူမ်ႉပင်းၵႂႃႇၵမ်းလဵဝ်ဢေႃႈ။ တၢင်းဢၼ်လူမ်ႉဢၼ်ပင်းၼၼ်ႉႁႅင်းၼႃႇလူင်လၢင်ဢေႃႈ၊” ဝႃႈၼင်ႇၼႆမၼ်းၸဝ်ႈႁေႃးလၢတ်ႈဢေႃႈ။

Currently Selected:

လု 6: SHNCL

Highlight

Copy