ငဝ်ႈ 23

ၸႃႇရႃႇတၢႆလႄႈဢႃႇပြႃႇႁၢမ်ႇသိုဝ်ႉလိၼ်ပႃႇႁဵဝ်ႈ

1 ၸႃႇရႃႇ၊ဢသၢၵ်ႈယိုၼ်းယၢဝ်းထိုင်ပၢၵ်ႇပၢႆသၢဝ်းၸဵတ်းပီဢေႃႈ။- 2မၼ်းတၢႆၵႂႃႇၵႃႈတီႈဝဵင်းၵိရိယႃႉဢႃႇပႃႇ၊ (ႁေႇပရုၼ်ႇ) မိူင်းၶႃႇၼၼ်ႇ၊လႄႈ ဢႃႇပြႃႇႁၢမ်ႇ၊ၵေႃႈမႆႈၸႂ်ၶီၸႂ်လႄႈႁွင်ႉႁႆႈၵွပ်ႈပိူဝ်ႈၸႃႇရႃႇ၊တၢႆၵႂႃႇၼၼ်ႉဢေႃႈ။

3မၼ်းၸင်ႇလုၵ်ႉသေၵႃႈတီႈႁိမ်းတူဝ်တၢႆၼၼ်ႉလႄႈၵႂႃႇလၢတ်ႈတီႈၵူၼ်းမဵဝ်းႁိတ်ႉတိ၊#23:3 “ႁိတ်ႉတိ” ၵျၢမ်းမူႇၵဝ်ႇၵဝ်ႇႁွင်ႉဝႃႈ၊ “ၵူၼ်းႁေႇသႃႉ” ဢေႃႈ ၶဝ်လႄႈဝႃႈ၊- 4“ၵဝ်ပဵၼ်ၶႅၵ်ႇဢၼ်သွၼ်ႈယူႇၵႃႈတီႈသူၼႆႉလႄႈႁႂ်ႈၵဝ်လႆႈသၢင်းၵျူဝ်ႇမေးၵဝ်ၸိုင်၊ၶၢႆပၼ်တီႈလိၼ်ပႃႇႁဵဝ်ႈၵႂၢၵ်ႈၼိုင်ႈသေၵမ်း၊” ဝႃႈၼင်ႇၼႆဢေႃႈ။-

5-6ၶဝ်ၶိုၼ်းလၢတ်ႈလႄႈဝႃႈ၊- “ၸဝ်ႈႁဝ်းတီႈၶႃႈ။ ထွမ်ႇသေၵမ်းၶႃႈ။ ႁဝ်းဢိင်ပိုင်ႈၸဝ်ႈၸိူဝ်ႉၼင်ႇၶုၼ်ဢၼ်ဢွၼ်ႁူဝ်ဢွၼ်ၵၼ်ႁဝ်းၼၼ်ႉဢေႃႈ။ သၢင်းၵျူဝ်ႇမေးၸဝ်ႈၵႃႈၼႂ်းပႃႇႁဵဝ်ႈဢၼ်ၶႅမ်ႉၼႃႇၵႃႈတီႈၵႂၢၵ်ႈလိၼ်ႁဝ်းၼႆႉတႃႉ။ ၵႃႈၼႂ်းႁဝ်းၼႆႉၽူႈလႂ်ၵေႃႈတၵ်းသိူဝ်းပျေႃႇပၼ်ၵႂၢၵ်ႈလိၼ်ပုၼ်ႈတႃႇပႃႇႁဵဝ်ႈယူႇဢေႃႈ၊” ဝႃႈၼင်ႇၼႆဢေႃႈ။

7မိူဝ်ႈၼၼ်ႉ၊ဢႃႇပြႃႇႁၢမ်ႇ၊ၵူမ်ႈႁူဝ်ၵႃႈတီႈၽၢႆႇၼႃႈၶဝ်သေလႄႈ၊- 8လၢတ်ႈဝႃႈ၊ “ပေႃးသူမီးၸႂ်ဢၼ်ပၼ်ဢၶႂၢင်ႉႁႂ်ႈၵဝ်လႆႈၽင်မေးၵဝ်တီႈၼႆႈၸိုင်၊ဢွၼ်ၵၼ်ယွၼ်းႁႂ်ႈဢေႇၽရုၼ်ႇ၊လုၵ်ႈၸၢႆးၸေႃးႁႃႇ၊ၼၼ်ႉ။- 9ၶၢႆႁူးထမ်ႈမၵ်ႉပေႇလႃႉ၊ဢၼ်မီးႁိမ်းလႅၼ်ၼႃးမၼ်းၼၼ်ႉပၼ်သေၵမ်း။ ၸွမ်းၼင်ႇၵႃႈၶၼ်မၼ်းထိူၵ်ႈတၢၼ်ႇၼၼ်ႉဢွၼ်ၵၼ်ယွၼ်းႁႂ်ႈမၼ်းၶၢႆပၼ်တီႈၵဝ်ၵႃႈတီႈၽၢႆႇၼႃႈသူၵူၼ်းတင်းလၢႆ၊ပုၼ်ႈဢၼ်ၵဝ်တၵ်းပိူင်ႇလိၼ်ၵႂၢၵ်ႈၼိုင်ႈပုၼ်ႈပႃႇႁဵဝ်ႈသေၵမ်း၊” ဝႃႈၼင်ႇၼႆဢေႃႈ။

10 ဢေႇၽရုၼ်ႇ၊ၵေႃႈတူဝ်မၼ်းၼင်ႈယူႇၵႃႈၼႂ်းၵႄႈၵူၼ်းႁိတ်ႉတိ၊ၸိူဝ်းဢၼ်မီးယူႇၵႃႈၼႂ်းပၢင်ၵုမ်ၵႃႈတီႈၽၵ်းတူဝဵင်းၼၼ်ႉယူႇလႄႈလႆႈထွမ်ႇၸွမ်းငိၼ်းၸွမ်းသေလႄႈလၢတ်ႈလႄႈဝႃႈ၊- 11“ၸဝ်ႈႁဝ်းတီႈၶႃႈ။ ထွမ်ႇသေၵမ်း။ ၵဝ်ၶႃႈပၼ်တူင်ႈၼႃးတင်းတူင်ႈပႃးၸဵမ်တင်းႁူးထမ်ႈၼၼ်ႉတီႈၸဝ်ႈႁဝ်းယူႇဢေႃႈ။ ၵႃႈတီႈၽၢႆႇၼႃႈၵူၼ်းမဵဝ်းၵဝ်ၶႃႈၸိူဝ်းၼႆႉၵဝ်ၶႃႈပၼ်ႁႂ်ႈၸဝ်ႈႁဝ်းလႆႈၽင်တူဝ်တၢႆမေးၸဝ်ႈႁဝ်းၶႃႈဢေႃႈ၊” ဝႃႈၼင်ႇၼႆဢေႃႈ။

12 ဢႃႇပြႃႇႁၢမ်ႇ၊သမ်ႉၵူမ်ႈႁူဝ်ၵႃႈတီႈၽၢႆႇၼႃႈၵူၼ်းမဵဝ်းႁိတ်ႉတိ၊ၸိူဝ်းၼၼ်ႉသေယဝ်ႉ၊- 13လၢတ်ႈတီႈဢေႇၽရုၼ်ႇ၊လႄႈဝႃႈ၊ “ထွမ်ႇသေၵမ်း။ ႁႂ်ႈၵဝ်လႆႈယွၼ်းလၢတ်ႈသေၵမ်း။ ၵဝ်တၵ်းသိုဝ်ႉဢဝ်တူင်ႈၼႃးၼၼ်ႉတင်းတူင်ႈဢေႃႈ။ ႁပ်ႉတုင်းဢဝ်ၵႃႈၶၼ်မၼ်းတီႈၵဝ်သေၵမ်း။ ႁဵတ်းၼၼ်ၸင်ႇၵဝ်တၵ်းၽင်တူဝ်တၢႆမေးၵဝ်ဢေႃႈ၊” ဝႃႈၼင်ႇၼႆႁႂ်ႈပရိၵ်ႈသၢတ်ႈလႆႈငိၼ်းဢေႃႈ။

14-15 ဢေႇၽရုၼ်ႇ၊ၵေႃႈၶိုၼ်းလၢတ်ႈလႄႈဝႃႈ၊- “ၸဝ်ႈႁဝ်း။ ၵႂၢၵ်ႈလိၼ်ၼၼ်ႉတၢၼ်ႇငိုၼ်းသီႇပၢၵ်ႇၶႅပ်းၵူၺ်းလႄႈတၵ်းပွင်ႇလွင်ႈၵႃႈသင်ပုၼ်ႈႁဝ်းၶႃႈသွင်ၵေႃႉ။ ၽင်တူဝ်တၢႆမေးၸဝ်ႈၵႃႈတီႈၼၼ်ႈသေၵမ်းၶႃႈ၊” ဝႃႈၼင်ႇၼႆလႄႈ၊- 16ဢႃႇပြႃႇႁၢမ်ႇ၊ၵေႃႈၽွမ်ႉသေယဝ်ႉ၊ၸင်ႇပၼ်ငိုၼ်းသီႇပၢၵ်ႇၶႅပ်းၵႃႈၼင်ႇဢၼ်ဢေႇၽရုၼ်ႇ၊တႅပ်းတတ်းၵႃႈၶၼ်ၽၢႆႇၼႃႈၶဝ်ၸိူဝ်းဢၼ်ထွမ်ႇၸွမ်းငိၼ်းၸွမ်းၼၼ်ႉ၊ပၼ်ၸွမ်းၼင်ႇၼမ်ႉၼၵ်းဢၼ်မၢၼ်ႇဢၼ်ၵူၼ်းၵႃႉၵူၼ်းၶၢႆၶဝ်သုင်းၼၼ်ႉဢေႃႈ။

17ၵွပ်ႈၼႆလႄႈ၊တူင်ႈၼႃးမၵ်ႉပေႇလႃႉ၊ဢၼ်ဢေႇၽရုၼ်ႇ၊ပိူင်ႇဢၼ်မီးၽၢႆႇဝၼ်းဢွၵ်ႇမမ်ႇရေႇ၊ၸႃႉၸဵမ်တူင်ႈၼႃးတင်းႁူးထမ်ႈဢၼ်မီးၵႃႈၼႂ်းမၼ်းဢိၵ်ႇတင်းတူၼ်ႈမႆႉဢၼ်မီးၸွမ်းႁိမ်းမၼ်းတင်းသဵင်ႈတင်းလူင်ၼၼ်ႉဢၢပ်ႈပၼ်ဢႃႇပြႃႇႁၢမ်ႇ၊- 18ၽၢႆႇၼႃႈပရိၵ်ႈသၢတ်ႈၵူၼ်းမဵဝ်းႁိတ်ႉတိ၊ၸိူဝ်းဢၼ်ၶဝ်ႈပႃးၵႃႈၼႂ်းပၢင်ၵုမ်ၼၼ်ႉယဝ်ႉလီလီငၢမ်းငၢမ်းဢေႃႈ။

19ၼင်ႇၼၼ်လႄႈဢႃႇပြႃႇႁၢမ်ႇ၊ၽင်တူဝ်တၢႆမေးမၼ်းၸႃႇရႃႇ၊ၵႃႈတီႈႁူးထမ်ႈၵႃႈၼႂ်းမိူင်းၶႃႇၼၼ်ႇ၊ၼၼ်ႉဢေႃႈ။- 20ၵွပ်ႈပိူဝ်ႈၸိူဝ်ႉၼင်ႇၼႆလႄႈၵႂၢၵ်ႈလိၼ်ဢၼ်ၵူၼ်းမဵဝ်းႁိတ်ႉတိ၊ၶဝ်ပိူင်ႇတင်းႁူးထမ်ႈဢၼ်မီးတီႈၼၼ်ႈမႃးပဵၼ်ၵႂၢၵ်ႈလိၼ်ဢၼ်ဢႃႇပြႃႇႁၢမ်ႇ၊ပိူင်ႇပုၼ်ႈတႃႇတေဢဝ်ႁဵတ်းပဵၼ်ပႃႇႁဵဝ်ႈဢေႃႈ။

Currently Selected:

ငဝ်ႈ 23: SHNCL

Highlight

Copy