Yunus 3
3
Yunus bekin iko Tuhan pung parenta
1Ais itu, TUHAN Allah baꞌomong deng Yunus ulang lai. Dia suru bilang, 2“Sakarang lu kaluar dari sini ko pi negara Asiria pung kota bésar, andia Niniwe. Pi kasi tau sang dong samua pasán yang Beta su kasi tau sang lu.”#Yunus 1:2 3Ais Yunus bangun memang, ko pi kota Niniwe, iko TUHAN Allah pung parenta sang dia.
(Naa, kota Niniwe tu, talalu bésar. Kalo orang jalan kaki dari sablá pi sablá, itu makan waktu tiga hari.) 4Waktu Yunus su sampe di sana, dia mulai jalan kuliling dalam kota. Dia jalan satu hari anteru. Ais ju dia mulai batarea ko kasi tau orang Niniwe dong bilang, “Bosong orang Niniwe dong, dengar bae-bae! 40 hari lai, Tuhan Allah mau kasi ancor buang sang bosong deng ini kota Niniwe ni!”
5Dengar bagitu, ju orang kota Niniwe dong parcaya Tuhan pung pasán kasi sang dong. Ais dong putus bilang, “Aduuu! Kotong su calaka ni, ma! Mari ko kotong samua puasa deng sambayang.” Jadi samua orang, kici-bésar, pake karong goni ko jadi tanda bilang, dong su manyasal deng tobat dari dong pung jahat.#Mateos 12:41; Lukas 11:32
6Ais waktu Niniwe pung raja dengar samua yang jadi tu, ju dia turun dari dia pung korsi parenta, ais dia buka dia pung pakean raja, ko ganti pake karong goni. Ais dia pi dudu di abu raꞌo ko kasi tunju dia pung rasa manyasal. 7Ais itu, ju raja kirim orang pi di kota Niniwe anteru ko suru dia pung rakyat datang bakumpul. Ais dia kasi tau sang dong samua bilang, “Bagini. Kotong pung idop jahat su bekin kotong calaka. Jadi beta, bosong pung raja ni, deng pagawe tinggi dong su putus bagini: samua orang musti puasa ko biar kotong bisa sambayang minta ampon. Jang makan, jang minum. Binatang dong ju bagitu. 8Samua orang musti pake karong goni. Binatang dong ju bagitu. Deng bagitu kotong kasi tunju kotong pung rasa manyasal. Samua orang musti batarea ko minta tolong sang Tuhan dari hati yang barisi. Samua orang musti barenti kasi tenga dong pung idop bekin jahat. Samua orang musti barenti maen tendes, barenti siksa deng bekin sangsara orang laen. 9Kalo kotong samua bekin bagitu, jang sampe Tuhan lia deng dengar sang kotong, ais Dia pung hati yang panas bisa dingin, ko biar Dia kasi tunju Dia pung rasa kasian deng sonde kasi ancor buang sang kotong!”
10Waktu Tuhan lia kalo dong su rasa manyasal deng barenti dari idop bekin jahat bagitu, ju Dia rasa kasian, deng Dia pung hati panas jadi dingin. Ais Dia sonde kasi ancor buang sang dong.
Currently Selected:
Yunus 3: mknNTPO
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.
