Marc Kete tënë na ndö ti Nzoni Tënë so Marc asu na mbeti
Kete tënë na ndö ti Nzoni Tënë so Marc asu na mbeti
Nzoni Tënë so Marc asu na mbeti ayeke ndali ti azo ti Christ so ala kue ayeke azuife pepe. Nzoni Tënë ti Marc ayeke ti lo nduru ahon atanga ni. Ngoi so Jésus ade molenge, ye so lo sara wala ye so asi na lo, mo yeke wara tënë ni na ya ti mbeti so pepe, mo yeke wara nga ayongoro fango tënë ti Jésus na ya ni pepe. Mingi ni, mo yeke wara tënë ti azo so atengbi na lo, tënë ti kaingo kobela nga na tënë ti *bingbingo tënë. Na ambeni ndo, mo yeke wara ambeni kete kete tënë so mo lingbi ti wara ni na ya ti atanga ti Nzoni Tënë pepe.
Na tongo nda ti tënë ti lo, Marc afa so Jésus ayeke Molenge ti Nzapa (1.1). Na hunzingo Nzoni Tënë ti lo, Marc afa tënë ti Jésus so azo afâ lo na ndö ti keke ti kroa (15.39).
Akota ye so ayeke na ya ti mbeti so:
Na ya ti kozo mbage ti mbeti ni (1.1 – 8.26), Jésus ake titene azo ahinga lo yeke zo wa. Lo kai kobela na tere ti azo, lo tumba asioni yingo, lo tene tënë tongana zo ti komandema. Azo ahunda tere ti ala, atene: “Koli so ayeke zo wa?” Me Jésus atene na azo so atene, ala hinga lo so, atene: “Ala fa tënë ti mbi na zo oko pepe.”
Use mbage ti mbeti ni (8.27 – 16) afa na azo lege so Jésus ayeke Molenge ti Nzapa.
Na kodro ti Rome, ambeni zo ayeke baa ambeni kota zo ti kodro tongana anzapa, ngbanga ti so na ya ti akodro so kue akota zo ni atiri bira daa, ala yeke so benda; ala sara akota ye ti dongo be mingi, mbeni ye ti kara ala ayeke daa pepe.
Andaa Jésus ayeke Molenge ti Nzapa, lo zia kota ndo ti lo si lo yeda ti mu tere ti zo, lo ma yanga ti Nzapa, lo baa pasi si lo kui. Ye ni aga mbeni ye ti ndima na azo; ataa adisiple ti Jésus ama ya ni hio pepe. Nilaa na ngoi so a gue na Jésus ti fâ ngbanga ti kuâ na li ti lo, adisiple ni ado lo azia. Me so Jésus aga nduru ti kui, mbeni turugu ti kota kamba oko ti kodro ti Rome, atene: “Taa-tënë, koli so ayeke Molenge ti Nzapa!”
Tongana Jésus ayeke tene tënë na ndö ti lo wani, lo yeke tene, ni yeke “*Molenge ti Zo”. Tënë so aye ti tene, zo so Nzapa amu na lo ngangu kue; ataa ngangu ti fâ ngbanga ti azo na ngangu ti zi tënë na li ti azo. Tënë so aye nga ti tene, Jésus ayeke zo biani. Tënë so afa kota tënë na ndö ti lo nga na kua so Nzapa atokua lo ti sara.
Na ya ti Nzoni Tënë so Marc asu na mbeti, e yeke wara mbeni hundango ndo so atene: “Jésus ayeke zo wa?” Mbeni zo ti kiri tënë na ndö ti tënë so hio ayeke daa pepe. Na dikongo Nzoni Tënë ti Marc, mo yeke wara lege ti hinga Jésus kete na kete si mo mu peko ti lo.
Currently Selected:
Marc Kete tënë na ndö ti Nzoni Tënë so Marc asu na mbeti: MNF2010
Highlight
Share
Copy
Want to have your highlights saved across all your devices? Sign up or sign in
© La Société Biblique de Centrafrique 2010