Marc 4

Toli ti ale ti kobe

(Matt 13.1-9; Luc 8.4-8)

1 Jésus akiri ayeke fa ye na azo na yanga ti kota ngu ti Galile. Azo abongbi gbani gbani na tere ti lo. Tongaso lo ko na ya ti ngo, lo duti na ya ni. Gba ti azo ni angba ti ala na sese na yanga ti ngu ni. 2Lo fa na ala aye mingi na lege ti atoli. Na ya ti aye so lo fa, lo tene: 3“Ala ma! Mbeni zo ague na yaka ti lo ti bi ale ti kobe. 4So lo yeke bi ale ti kobe ni, ambeni atuku na tere ti lege; andeke aga si ate ni kue. 5Ambeni atuku na ndö ti sese so atêne ayeke daa, na ndo so sese ayeke daa mingi pepe. Ale ti kobe ni asigigi si akono hio, ngbanga ti so sese ni ali pepe. 6So lâ asu ngangu, lâ ni agbi ale ti kobe ni si ahole, ngbanga ti so agere ni ali mingi pepe. 7Ambeni le ni atuku na popo ti apere ti ki; apere ni alondo si akanga ndö ti ala kue, nilaa ala le pepe. 8Ambeni le ni atuku na nzoni sese, ala sigigi, ala kono si ale: ambeni ale baleota, ambeni ale baleomene si ambeni ale ngbangbo oko.” 9Jésus akiri atene: “Zo so ayeke na mê ti mango ndo, ayeke nzoni lo ma tënë so!”

Jésus atene tënë na lege ti atoli ngbanga ti nyen?

(Matt 13.10-17; Luc 8.9-10)

10So Jésus ahon yongoro na tere ti gba ti azo ni awe, adisiple baleoko na use na ambeni zo so ayeke na tere ti lo ahunda lo na nda ti atoli so. 11Lo tene na ala: “Ti ala azo ti mbi, Nzapa amu na ala lege ti hinga nda ti *Kodro-gbia ti Nzapa so angba na hondengo ni, me ti azo ti gigi, ala ma tënë ni na lege ti atoli 12 titene:

‘ala yeke baa ndo, me ala yeke baa ye pepe;

ala yeke ma ndo, me ala yeke ma ya ti atënë ni pepe,

ngbanga ti ala yeke zia ngbene lege ti sarango ye ti ala

si Nzapa azi tënë na li ti ala.’ ”

Jésus afa nda ti toli ti ale ti kobe

(Matt 13.18-23; Luc 8.11-15)

13Na pekoni, Jésus ahunda ala, atene: “Ala hinga nda ti toli so pepe? Fade ala yeke hinga nda ti tanga ti atoli ni kue tongana nyen? 14Zo ti bingo ale ti kobe na le ti yaka ayeke tongana zo so ayeke fa tënë ti Nzapa. 15Ambeni zo ayeke tongana tere ti lege so ale ti kobe atuku daa. So tënë ni ati na mê ti ala, Satan aga hio, lo zi tënë ni na be ti ala. 16Ambeni zo ayeke tongana sese so atêne ayeke daa; tongana ala ma tënë ni, ala yeda na ni hio na ngia, 17me tënë ni ali na ya ti be ti ala pepe, ala kpengba pepe. So ye ti ngangu asi na ala wala ye ti vundu asi na ala ndali ti tënë ni, fafade ala zia lege ti mabe. 18Ambeni zo ayeke tongana apere ti ki so ale ti kobe atuku daa; ala ma tënë ni, 19me be ti ala agi ala mingi na ndö ti aye ti dunia so; amosoro ahanda ala, nzara ti aye kue asara ala. Aye so kue akanga ndö ti tënë ni si ale pepe. 20Ambeni zo ayeke tongana ale ti kobe so atuku na nzoni sese; ala ma tënë ni, ala yeda na ni si ala le: ambeni ale baleota, ambeni ale baleomene si ambeni ale ngbangbo oko.”

Toli ti lamba

(Luc 8.16-18)

21 Jésus atene na ala: “Zo ayeke zia wâ na lamba ti zia na gbe ti ta wala na gbe ti gbogbo? Lo yeke zia ni na ndö ti mbeni ye na nduzu pepe? 22 Ye so kue angba na hondengo ni, fade ayeke sigigi polele na le ti azo; ye so kue angba na gbe mingo, fade azo ayeke hinga tënë ni. 23Zo so ayeke na mê ti mango ndo, ayeke nzoni lo ma tënë so!” 24 Lo kiri lo tene na ala: “Ala sara hange na tënë so ala yeke ma so! Ye so ala wani ayeke mu ti haka na ye na amba ti ala laa Nzapa ayeke mu ti haka na ye na ala; lo yeke zia mbeni na ndö ni. 25 Biani, zo so ayeke na ye, fade a yeke kiri ti mu mbeni na ndö ni na lo; me zo so ayeke na ye pepe, ataa kete ye so lo yeke na ni, fade a yeke zi ni na maboko ti lo.”

Toli ti le ti kobe so asigigi gi lo oko

26Jésus akiri atene: “*Kodro-gbia ti Nzapa ayeke tongana mbeni zo so abi le ti kobe na ya ti yaka. 27Ataa lo lango, ataa lo lango pepe, bi na lâ, le ti kobe ni ayeke sigigi, akono; me lo hinga lege so le ti kobe ni asigigi si akono so pepe. 28Gi sese wani laa asara si ye ni asigigi si akono. Kozoni gere ni akono, na pekoni, ale ni asigigi daa; ti hunzi na ni, le ti kobe ni akono nzoni. 29 Tongana ale ti kobe ni abe awe, zo ni amu nzenze ti lo ti gue ti fâ ni, ngbanga ti ngoi ti fango le ti kobe ni alingbi awe.”

Toli ti le ti mutarde

(Matt 13.31-32,34; Luc 13.18-19)

30Jésus akiri atene: “E lingbi ti haka *Kodro-gbia ti Nzapa na nyen? Toli wa laa e lingbi ti mu ti fa na nda ni? 31Kodro-gbia ti Nzapa ayeke tongana le ti keke so iri ni mutarde si a lu na sese; le ni ayeke kete kete ahon ale ti kobe ti dunia kue. 32So a lu ni awe, keke ni akono aga kota ahon ambeni kugbe ti kasa kue ti yaka. Amaboko ni akono mingi si andeke asara da ti ala na gbe ti de ti akugbe ni.”

33Jésus afa tënë mingi na azo na lege ti mara ti atoli tongaso. Lo fa na ala gi ye so ala lingbi ti ma ya ni. 34Lo fa tënë na azo na lege ti toli, me tongana lo yeke gi lo oko na adisiple ti lo, lo fa nda ti tënë ni kue na ala.

Jésus akai kota pupu

(Matt 8.23-27; Luc 8.22-25)

35Na lakui ni, Jésus atene na adisiple ti lo: “E fâ ngu, e gue na mbage ti ngu ni.” 36Tongaso ala zia gba ti azo ni, ala ko na ya ti ngo so Jésus ayeke na ya ni si ala na lo ahon. Ambeni ngo nga ayeke hon na tere ti ala. 37Me mbeni kota pupu alondo si ayeke ya ngangu. *Amapo alondo si ngu ayeke tuku na ya ti ngo ni; ngu aga nduru ti si ya ti ngo ni. 38Jésus ayeke lango na mbage ti ngbonda ti ngo ni; lo zia li ti lo na ndö ti koli. Adisiple ti lo azingo lo, atene: “Wafango-ye, kuâ so e yeke na ya ni so, ayeke senge na le ti mo?” 39Lo londo, lo suku ngangu na pupu ni, lo tene: “Kai! Duti kpoo!” Tongaso pupu ni akai si ndo ade ngii. 40Na pekoni, Jésus atene na adisiple ti lo: “Mbeto asara ala ngbanga ti nyen? Ala de ti duti na mabe pepe?” 41Me tere ti ala kue ado, ala hunda tere ti ala, atene: “Zo so ayeke zo wa si pupu na ngu kue ayeke ma yanga ti lo so?”

Currently Selected:

Marc 4: MNF2010

Highlight

Copy