Marc 16

Jésus azingo na kuâ

(Matt 28.1-8; Luc 24.1-12; Jean 20.1-10)

1So *lango ti wungo tere ahon awe, Marie ti kodro ti Magdala na Marie, mama ti Jacques na ti Salome avo ayombo titene ala gue, azia na tere ti kuâ ti Jésus. 2Na kota ndaperere ti layenga, so lâ alondo awe, ala gue na du ti kuâ ni. 3Ala yeke hunda tere ti ala, atene: “Zo wa laa ayeke pusu ande na e têne ti yanga ti du ti kuâ ni?” 4So ala yo le ti ala na nduzu, ala baa so a pusu têne ni si a zi ni awe, andaa têne ni akono fade mingi. 5Ala li na ya ti du ti kuâ ni, ala baa mbeni maseka-koli so aduti na mbage ti maboko ti ala ti koli, lo yu yongoro vuru bongo; mbeto asara ala. 6Maseka-koli ni atene na ala: “Mbeto asara ala pepe! Ala yeke gi Jésus ti Nazaret, lo so a fâ lo na ndö ti keke ti kroa; lo zingo na kuâ awe, lo yeke na ndo so pepe. Baa, ndo so a zia lo lani daa laa. 7 Ala gue fadeso atene na adisiple ti lo nga na Pierre atene, lo hon kozo ti ala na Galile awe. Kâ laa ala yeke baa ande lo tongana ti so lo tene tënë ni na ala.” 8Tongaso ala sigigi na ya ti du ti kuâ ni si ala kpe, ngbanga ti so ala kue ayeke do na mbeto. Ala tene tënë ni na zo oko pepe, ngbanga ti so mbeto asara ala.

Jésus asi na Marie ti kodro ti Magdala

(Matt 28.9-10; Jean 20.11-18)

[ 9 Na peko ti so Jésus azingo na kuâ awe, na ndaperere ti layenga, lo si kozoni na Marie ti kodro ti Magdala, wali so lo tumba lani asioni yingo mbarambara na ya ti lo. 10Marie ague, lo tene tënë ni na azo so ayeke lani na tere ti Jésus. Andaa vundu agbu be ti ala mingi si ala yeke toto. 11So ala ma a tene, Jésus ayeke na fini si Marie abaa lo, ala yeda na tënë ti lo pepe.

Jésus afa tere ti lo na adisiple ti lo use

(Luc 24.13-35)

12Na pekoni, Jésus amu mbeni tere nde si lo fa tere ti lo na adisiple ti lo use so amu lege ti gue na yaka. 13Ala kiri si ala tene tënë ni na tanga ti adisiple ni, me ala yeda na tënë ti adisiple use so pepe.

Jésus afa tere ti lo na adisiple ti lo

(Matt 28.16-20; Luc 24.36-49; Jean 20.19-23; Awat 1.6-8)

14Ti hunzi na ni, Jésus afa tere ti lo na adisiple ti lo baleoko na oko na ndembe so ala yeke te kobe. Lo suku na ala, ngbanga ti so ala dekite, ala kpengba be ti ala si ala ke ti yeda na tënë ti azo so abaa lo na peko ti so lo zingo na kuâ. 15 Na pekoni, lo tene na ala: “Ala gue na ndö ti dunia kue, ala fa Nzoni Tënë na azo kue. 16Zo so ama na be si awara bateme, fade lo yeke soo kuâ, me zo so ama na be pepe, fade a yeke fâ ngbanga na li ti lo. 17Azo so ama na be, aye ti kpene so ala yeke sara ande ayeke so: na iri ti mbi, ala yeke tumba asioni yingo, ala yeke tene tënë na ayanga nde so ala hinga ni pepe; 18ala yeke gbu angbo na maboko ti ala wala ala yeke nyon sioni yoro, me sioni ye oko ayeke si na ala pepe; ala yeke zia maboko ti ala na ndö ti azo ti kobela si kobela ti azo ni ayeke kai.”

Jésus akiri na yayu

(Luc 24.50-53; Awat 1.9-11)

19 Na peko ti so *Kota Gbia Jésus atene tënë so na ala awe, a mu lo, a gue na lo na yayu si lo duti na tere ti Nzapa na mbage ti maboko ti lo ti koli. 20Adisiple ague ti fa Nzoni Tënë na ndo kue. Kota Gbia ayeke sara aye ti kpene na lege ti ala ti fa na azo so tënë ti Nzapa ayeke taa-tënë.]

Currently Selected:

Marc 16: MNF2010

Highlight

Copy