Marc 14

Amakonzi ti azuife agi lege ti fâ Jésus

(Matt 26.1-5; Luc 22.1-2; Jean 11.45-53)

1 *Matanga ti Pake na ti Mapa so a sara na mama ni pepe angba lango use. Akota wayango-sandaga na awafango-ndia ayeke gi lege ti gbu Jésus na lege ti mbeni mayere titene ala fâ lo. 2Ala tene na popo ti ala: “Alingbi e gbu lo na lango ti matanga pepe, ngbanga ti azo atomboka.”

Mbeni wali atuku yombo na li ti Jésus

(Matt 26.6-13; Jean 12.1-8)

3 Jésus ayeke na Betanii, na ya ti da ti Simon, zo ti buruma. So lo duti si lo yeke te kobe, mbeni wali ali na mbeni ngbenda so a sara ni na mbeni têne so iri ni albatre si yombo ti ngangu ngere ayeke na ya ni. A sara yombo ni na ngu ti mbeni kete keke so iri ni nare. Lo fâ ya ti ngbenda ni si lo tuku yombo ni na li ti Jésus. 4Ambeni zo so ayeke kâ asara ngonzo si ala tene na popo ti ala: “Ngbanga ti nyen si a buba yombo so tongaso? 5A lingbi fade ti ka yombo so na ale ti nginza ngbangbo ota ti mu nginza ni na azo ti mawa!” Tongaso ala kasa wali so mingi. 6Me Jésus atene na ala: “Ala zia lo kpoo. Ngbanga ti nyen si ala yeke so li ti lo tongaso? Ye so lo sara na mbi so ayeke nzoni. 7 Azo ti mawa ayeke duti lakue na popo ti ala. Ala lingbi ti sara nzoni na ala na ya ti alango so kue be ti ala aye. Ti mbi, mbi yeke duti lakue na popo ti ala pepe. 8Lo sara ye so lo lingbi ti sara: lo tuku yombo na tere ti mbi kozoni ti ku na lango ti lungo kuâ ti mbi. 9Mbi tene na ala taa-tënë: na ndo so kue azo ayeke fa ande Nzoni Tënë daa, na ndö ti dunia kue, azo ayeke fa tënë ti ye so wali so asara si azo adabe ti ala na lo.”

Judas aye ti ka Jésus

(Matt 26.14-16; Luc 22.3-6)

10Tongaso Judas Iskariote, mbeni disiple oko na popo ti adisiple baleoko na use, ague, abaa akota wayango-sandaga ti ka Jésus na ala. 11Na mango tënë so, tere ti ala anzere mingi si ala mu zendo na lo atene, fade ala yeke mu na lo nginza. Tongaso Judas ayeke gi nzoni lege ti ka Jésus na ala.

Jésus na adisiple ti lo ate kobe ti Pake

(Matt 26.17-25; Luc 22.7-14,21-23; Jean 13.21-30)

12Na kozo lango ti matanga ti Mapa so a sara na mama ni pepe, lango so azo ayeke fâ akete taba ndali ti matanga ti *Pake, adisiple ti Jésus ahunda lo, atene: “Mo ye e gue, e leke na mo kobe ti Pake na ndo wa?” 13Tongaso Jésus atokua adisiple ti lo use si lo tene na ala: “Ala gue na ya ti gbata ni, fade ala yeke tengbi na mbeni koli so ayo ta ti ngu na li ti lo. Ala mu peko ti lo 14si da so lo yeke li daa, ala tene na wa ni, atene: ‘Wafango-ye atene: ndo titene mbi na adisiple ti mbi, e te kobe ti Pake daa ayeke na ndo wa?’ 15Fade lo yeke fa na ala mbeni kota kubu na nduzu so a leke ya ni na aye ti ya ni kue awe: na ndo so laa ala yeke leke kobe ni daa.” 16Adisiple amu lege ague na ya ti gbata ni; ala wara aye ni gi tongana ti so lo fa na ala si ala leke kobe ti Pake ni.

17Na lakui ni, Jésus na adisiple baleoko na use kue asi. 18 So ala yeke te kobe, Jésus atene na ala: “Mbi tene na ala taa-tënë: mbeni oko na popo ti ala so mbi na lo, e yeke te kobe oko, ayeke ka mbi.” 19Vundu agbu be ti ala si ala oko oko ahunda lo, atene: “Ayeke mbi?” 20Jésus atene na ala: “Ayeke mbeni oko ti adisiple baleoko na use, lo so mbi na lo, e yeke yoro maboko oko na ya ti sembe. 21Fade *Molenge ti Zo ayeke kui gi tongana ti so Mbeti ti Nzapa atene tënë ni na ndö ti lo. Me mawa na zo so ayeke ka Molenge ti Zo! Ti zo ni so, tongana a du lo fade pepe, ka ayeke nzoni mingi!”

Kobe ti Kota Gbia

(Matt 26.26-30; Luc 22.14-20; 1 Kor 11.23-25)

22So ala yeke te kobe, Jésus amu mapa, lo mu singila na Nzapa; na pekoni lo fâ ya ni, lo mu na adisiple si lo tene: “Ala mu ni ate, so ayeke tere ti mbi.” 23Na pekoni, lo mu kopo ti vin, lo mu singila na Nzapa, lo mu ni na ala si ala kue anyon ni. 24 Jésus atene na ala: “So ayeke mene ti mbi, mene so abongbi azo na Nzapa na ya ti *mbuki; mene so atuku ndali ti gba ti azo. 25Mbi tene na ala taa-tënë: mbi yeke kiri ti nyon ngu ti le ti *vinye mbeni pepe ngbii asi na lango so fade mbi yeke nyon fini vin na ya ti *Kodro-gbia ti Nzapa.” 26Na peko ti so ala he bia ti gondango Nzapa awe, ala mu lege ti gue na hoto ti a-olive.

Fade Pierre ayeke bere tënë ti Jésus

(Matt 26.31-35; Luc 22.31-34; Jean 13.36-38)

27 Jésus atene na adisiple ti lo: “Fade ala kue ayeke zia mbi ti hon, ngbanga ti so Mbeti ti Nzapa atene: ‘Fade mbi yeke fâ wabatango-taba si ataba ni ayeke kangbi kirikiri.’ 28 Me tongana mbi zingo ande na kuâ, mbi yeke hon kozo ti ala na Galile.” 29Pierre atene na lo: “Tongana azo kue azia mo ahon, fade mbi yeke zia mo pepe.” 30Jésus akiri tënë na lo: “Mbi tene na mo taa-tënë: laso, gi na bi so, kozo titene koli-kondo atoto fani use, fade mo yeke bere tënë ti mbi fani ota.” 31Me Pierre angba gi na ndö ti tënë ti lo si lo tene: “Tongana ayeke titene mbi na mo, e kui, mbi yeke bere tënë ti mo oko pepe!” Ala kue atene gi oko tënë so.

Jésus asambela na Getsemane

(Matt 26.36-46; Luc 22.39-46)

32Na pekoni, ala si na mbeni ndo so iri ni Getsemane; Jésus atene na adisiple ti lo: “Ala duti na ndo so, mbi yeke gue ti sambela.” 33Lo mu Pierre, Jacques na Jean na tere ti lo si lo na ala ague. Be ti lo ato nda ti do na mbeto si mbeto asara lo ahon ndoni. 34Lo tene na ala: “Be ti mbi ayeke na vundu mingi, mo baa mo tene, mbi ye ti kui kuingo; ala ngba na ndo so, ala lango pepe!” 35Lo gue yongoro kete, lo ti na sese si lo sambela titene tongana lege ayeke daa, ngbonga ti pasi so ahon yongoro na tere ti lo. 36Lo sambela, lo tene: “Babâ ti mbi, mo lingbi ti sara ye kue; mo zi kopo ti pasi so na tere ti mbi. Mbi ye pepe titene mo sara ye so be ti mbi aye, me mo sara gi ye so be ti mo aye.” 37Lo kiri lo ga na mbage ti adisiple ti lo ota si lo wara ala na lango. Lo tene na Pierre: “Simon, mo lango? Mo lingbi ti ngba na le ti mo tongaso na ya ti ngbonga oko pepe? 38Ala lango pepe! Ala sambela si ala ti na ya ti ye ti tarango be pepe. Yingo ti zo ayeke na nzara ti sarango nzoni ye, me zo ni ayeke na ngangu pepe.”

39Lo kiri lo gue yongoro si lo sambela, lo tene gi oko tënë so lo tene kozoni so. 40Lo kiri lo ga na mbage ti adisiple ti lo si lo wara ala na lango, ngbanga ti so lango ahon ndö ti ala. Ala hinga tënë so ala lingbi ti tene na lo pepe. 41So lo kiri lo ga ti fani ota ni, lo tene na ala: “Ala ngba ti lango? Ala ngba ti wu tere ti ala? Alingbi awe! Ngbonga ni alingbi awe; a yeke mu *Molenge ti Zo ti zia lo na maboko ti azo ti siokpari. 42Ala londo, e gue! Baa, zo ti kango mbi asi awe!”

Azo agbu Jésus

(Matt 26.47-56; Luc 22.47-53; Jean 18.3-12)

43Gi so Jésus angba ti tene tënë, Judas, mbeni oko ti adisiple baleoko na use asi; lo ga na gba ti azo na tere ti lo. Azo ni amu ayongoro zeme na akeke na maboko ti ala. Akota wayango-sandaga na awafango-ndia na *akangba laa atokua ala. 44Judas, zo ti kango Jésus afa na azo ni ye so fade lo yeke sara; lo tene: “Zo so mbi yeke su ande ngbangba ti lo, andaa lo laa. Ala gbu lo, ala bata lo nzoni si ala gue na lo.” 45Gi so Judas asi, lo ga nduru na tere ti Jésus; lo iri lo, lo tene: “Wafango-ye!” Na pekoni, lo su ngbangba ti lo. 46Tongaso azo ni aga, ala zia maboko na ndö ti Jésus si ala gbu lo. 47 Me oko ti azo so ayeke kâ agboto yongoro zeme ti lo, lo de mbeni zo ti kua ti kota wayango-sandaga si lo fâ mê ti lo. 48Jésus atene na ala: “Ala ga na ayongoro zeme na akeke ti gbu mbi, mo baa mo tene, mbi yeke zo ti nzi! 49 Lakue mbi yeke na popo ti ala na ya ti kota da ti Nzapa ti fa ye, me ala gbu mbi pepe. Ye so asi tongaso titene tënë ti Mbeti ti Nzapa aga taa-tënë.” 50Tongaso azo kue azia lo si ala kpe ahon. 51Mbeni maseka-koli amu peko ti Jésus, lo kanga gi mapia-bongo na tere ti lo. Ala ye ti gbu lo, 52me lo zi tere ti lo na ya ti bongo ni, lo kpe, lo hon, tere ti lo senge.

Jésus na gbe ti azo ti Kota Bongbi ti Fango Ngbanga

(Matt 26.57-68; Luc 22.54-55,63-71; Jean 18.13-14,19-24)

53Ala gue na Jésus na ndo ti kota wayango-sandaga. Andaa akota wayango-sandaga, *akangba na awafango-ndia abongbi tere ti ala kâ. 54Pierre ague na peko ti Jésus, me lo yeke gue nduru nduru pepe; lo gue ngbii lo li na ya ti gbagba ti kota wayango-sandaga ni. Kâ, lo na azo ti kua ayeke duti na tere ti wâ.

55Akota wayango-sandaga na azo kue ti *Kota Bongbi ti Fango Ngbanga ayeke gi mbeni tënë ti bi na li ti Jésus ti fâ ngbanga ti kuâ na li ti lo, me ala wara ni pepe. 56Biani, azo mingi atene mvene na li ti Jésus, me atënë ti ala ague nde nde. 57Ambeni zo alondo si ala tene tënë ti mvene na li ti lo, atene: 58 “E ma lo lani, lo tene: ‘Fade mbi yeke kungbi kota da ti Nzapa so azo laa asara si na ya ti lango ota, mbi yeke sara mbeni nde so zo laa asara ni pepe.’ ” 59Me na ndö ti tënë so, atënë ti ala akiri ague nde nde. 60Tongaso kota wayango-sandaga alondo na le ti azo kue si lo hunda Jésus, atene: “Mo yeke na tënë ti kiri na ni pepe? Tënë so azo so ayeke tene na tere ti mo so, mo tene ti mo daa nyen?” 61Me Jésus azi yanga pepe, lo kiri tënë oko pepe. Kota wayango-sandaga ni akiri ahunda lo, atene: “Mo laa mo yeke *Mesii, Molenge ti Nzapa, lo so azo ayeke gonda lo so?” 62 Jésus akiri tënë, atene: “Biani, mbi yeke lo. Fade ala yeke baa *Molenge ti Zo aduti na tere ti Nzapa so ngangu ti lo ahon angangu kue; lo yeke duti na mbage ti maboko ti lo ti koli. Lo yeke londo na yayu ti ga na ya ti ambinda.” 63Tongaso kota wayango-sandaga asuru ya ti bongo ti lo si lo tene: “E ye ti kiri ti hunda mbeni zo na tënë ngbanga ti nyen! 64 Ala ma zonga so lo zonga na Nzapa so awe! Ti be ti ala, ala tene nyen?” Ala kue atene: “Lo lingbi na kuâ.” 65 Ambeni zo ato nda ti tuku ngu ti yanga ti ala na tere ti lo, ala kanga le ti lo, ala kpo lo na gobo si ala tene na lo: “Sara tongana wayanga-Nzapa: fa na e zo so asara ye so na mo.” Azo ti kua ni amu Jésus si ala pika ngbangba ti lo fani mingi.

Pierre abere tënë ti Jésus

(Matt 26.69-75; Luc 22.56-62; Jean 18.15-18,25-27)

66So Pierre ayeke duti ti lo kâ na gbeni na ya ti gbagba ni, mbeni wali so ayeke sara kua na kota wayango-sandaga asi. 67Lo baa Pierre so ayeke duti na tere ti wâ, lo baa le ti Pierre si lo tene na lo: “Mo nga, mo yeke lani na tere ti Jésus, zo ti kodro ti Nazaret!” 68Me lo bere si lo tene: “Mbi hinga tënë so mo ye ti tene so pepe, mbi gi li ti mbi na ni gbaa!” Na pekoni, lo sigigi na ya ti gbagba ni ti gue na mbage ti yanga ti gbagba ni. Tongaso koli-kondo atoto. 69Wali so abaa Pierre si akiri atene na azo so ayeke kâ, atene: “Taa-tënë, koli so ayeke mbeni zo ti ala!” 70Pierre akiri abere. Kete na pekoni, azo so ayeke kâ, akiri atene na Pierre: “Biani, mo yeke mbeni zo ti ala, ngbanga ti so, mo nga, mo yeke zo ti Galile.” 71Tongaso Pierre ato nda ti deba yanga ti lo, atene: “Ayeke nzoni Nzapa afâ ngbanga na li ti mbi tongana mbi tene mvene! Mbi hinga koli so ala yeke tene tënë ti lo so pepe!” 72Gi na ndembe ni, koli-kondo atoto ti fani use. Tongaso Pierre adabe ti lo na tënë so lani Jésus atene na lo, atene: “Kozo titene koli-kondo atoto fani use, fade mo yeke bere tënë ti mbi fani ota.” Tongaso Pierre ati na toto.

Currently Selected:

Marc 14: MNF2010

Highlight

Copy