Marc 10

Tënë ti kangbingo tere ti koli na wali

(Matt 19.1-12; Luc 16.18)

1Na pekoni, Jésus alondo na ndo so si lo gue na sese ti Judée, na mbage ti ngu ti Jourdain. Gba ti azo akiri abongbi na tere ti lo si lo to nda ti fa ye na ala tongana ti so lo yeke sara lakue. 2Ambeni *farizien aga nduru na tere ti lo, ala ye ti sara si lo ti na ya ti gbanda ti ala; ala hunda lo, atene: “*Ndia ti e amu lege na koli ti tumba wali ti lo?” 3Jésus akiri tënë na ala: “Nyen laa Moïse amu yanga na ala ti sarango ni?” 4 Ala tene: “Moïse amu yanga atene, koli alingbi ti sara mbeti ti kangbingo tere si lo tumba wali ti lo.” 5Tongaso Jésus atene na ala: “Moïse asu ndia so na mbeti ndali ti kpengbango li ti ala. 6 Me na tongo nda ti dunia, ‘Nzapa asara koli na wali. 7Ndani laa, fade koli ayeke londo na gbe ti babâ na mama ti lo ti bongbi oko na wali ti lo 8 si ala use kue ayeke ga gi tere oko.’ Tongaso ala ngba azo use pepe, me ala ga gi tere oko. 9Ye so Nzapa abongbi awe, alingbi zo akangbi ni pepe.” 10So ala kiri na da, adisiple ti lo akiri ahunda lo na ndö ti tënë so. 11Lo tene na ala: “Tongana mbeni koli atumba wali ti lo si lo mu mbeni nde, lo sara nzi na tere ti kozo wali ni awe. 12 Tongana wali atumba koli ti lo si lo mu mbeni koli nde, lo sara nzi na tere ti kozo koli ti lo ni awe.”

Jésus asara tufa na ndö ti akete molenge

(Matt 19.13-15; Luc 18.15-17)

13Azo amu akete molenge aga na ala na Jésus titene lo zia maboko ti lo na ndö ti ala, me adisiple asuku ngangu na azo ni. 14So Jésus abaa ye so, ngonzo agbu lo si lo tene na adisiple ni, lo tene: “Ala zia akete molenge aga na mbi! Ala kanga lege na ala pepe, ngbanga ti so *Kodro-gbia ti Nzapa ayeke ndali ti azo so ayeke tongana amolenge so. 15 Mbi tene na ala taa-tënë: zo so ayamba Kodro-gbia ti Nzapa tongana molenge pepe, lo yeke li ande na ya ni oko pepe.” 16Na pekoni, lo gbu amolenge ni na ya ti maboko ti lo, lo zia maboko na ndö ti ala si lo sara tufa na ndö ti ala.

Zo ti mosoro

(Matt 19.16-30; Luc 18.18-30)

17So Jésus amu lege ti gue, mbeni koli aga gi na loro, akuku na gbe ti lo si ahunda lo, atene: “Nzoni wafango-ye, nyen laa mbi lingbi ti sara ti wara fini so angba lakue lakue?” 18Jésus atene na lo: “Ngbanga ti nyen si mo iri mbi zo ti nzoni? Zo ti nzoni ayeke daa pepe, gi Nzapa oko. 19 Mo hinga akota tënë ti *Ndia so atene: ‘Alingbi mo fâ zo pepe; alingbi mo gi wali wala koli ti zo pepe; alingbi mo nzi pepe; alingbi mo tene mvene na le ti ngbanga pepe; alingbi mo handa zo ti mu ye ti lo pepe; alingbi mo ne babâ na mama ti mo.’ ” 20Koli ni atene na lo: “Wafango-ye, mbi to nda ti sara ye so kue gi na ndembe so mbi de molenge.” 21Jésus abaa lo, lo ye lo si lo tene na lo: “Mbeni ye oko angba na mo ti sarango ni: gue, mo ka aye ti mo kue, mo mu nginza ni na awayere si fade mo yeke wara mosoro na yayu. Na pekoni, mo ga, mo mu peko ti mbi.” 22Me so koli ni ama atënë so, tere ti lo kue ade si lo gue na vundu na be ti lo, ngbanga ti so lo yeke na mosoro mingi.

23Jésus abaa adisiple ti lo so angoro lo kue si lo tene na ala: “Ayeke ngangu na zo ti mosoro ti li na ya ti *Kodro-gbia ti Nzapa!” 24Na ndö ti tënë so, li ti adisiple ni kue akpe, me Jésus akiri tënë na ala: “Amolenge ti mbi, ayeke ngangu mingi ti li na ya ti Kodro-gbia ti Nzapa! 25Lingo ti zo ti mosoro na ya ti Kodro-gbia ti Nzapa ayeke ngangu ahon lingo ti *zambala na ya ti du ti sua.” 26Na ndö ti tënë so, li ti adisiple ti Jésus akiri akpe kue si ala hunda tere na popo ti ala, atene: “So ye ni ayeke tongaso so, zo wa laa alingbi ti soo kuâ, zo wa?” 27Jésus abaa ala si lo tene na ala: “Ye ni ahon ngangu ti zo, me ahon ngangu ti Nzapa pepe, ngbanga ti so Nzapa alingbi ti sara ye kue.” 28Tongaso Pierre atene na lo: “Baa, e zia aye ti e kue si e mu peko ti mo!” 29Jésus atene na lo: “Mbi tene na ala taa-tënë: zo so azia da ti lo, a-ita ti lo ti koli na ti wali, mama ti lo, babâ ti lo, amolenge ti lo wala ayaka ti lo ndali ti mbi nga ndali ti Nzoni Tënë, 30fade lo yeke wara ada, a-ita ti koli na ti wali, amama, amolenge na ayaka fani ngbangbo oko na ya ti ngoi so e yeke daa so. Fade azo ayeke sara ngangu na lo si na ya ti ngoi so ayeke ga, lo yeke wara fini so angba lakue lakue. 31Me mingi ti azo so ayeke na li ni ayeke ga ande azo ti ndani. Mingi ti azo so ayeke na ndani ayeke ga ande azo ti li ni.”

Jésus akiri atene tënë ti kuâ ti lo na ti zingongo ti lo na kuâ

(Matt 20.17-19; Luc 18.31-34)

32Jésus na adisiple ti lo ayeke na lege ti gue na Jérusalem; lo yeke tambula na dawa ti ala. Be ti ala ado, mbeto agbu azo so kue amu peko ti ala. Jésus akiri amu adisiple baleoko na use na tere ti lo si lo to nda ti fa na ala tënë ti ye so fade ayeke si na lo. 33Lo tene na ala: “Ala ma! E yeke gue na Jérusalem. Kâ, fade azo ayeke zia *Molenge ti Zo na maboko ti akota wayango-sandaga na awafango-ndia. Ala yeke fâ ngbanga ti kuâ na li ti lo si ala yeke zia lo na maboko ti azo ti mbeni mara nde. 34Ala yeke he lo, ala yeke tuku ngu ti yanga ti ala na tere ti lo, ala yeke pika lo na fimbo si ala yeke fâ lo. Lango ota na pekoni, fade lo yeke zingo na kuâ.”

Hundango ndo ti Jacques na Jean

(Matt 20.20-28)

35Na pekoni, Jacques na Jean, amolenge ti Zebede aga na tere ti Jésus si ala tene na lo: “Wafango-ye, e ye si mo sara ande na e ye so e yeke hunda na mo.” 36Jésus ahunda ala, atene: “Nyen laa ala ye mbi sara na ala?” 37Ala kiri tënë na lo: “Na lango so mo yeke duti ande na ndö ti mbata ti gonda ti mo ti gbia, ayeke nzoni mo zia e duti na tere ti mo, mbeni na mbage ti maboko ti mo ti koli, mbeni na mbage ti maboko ti mo ti wali.” 38 Me Jésus atene na ala: “Ala hinga ye so ala yeke hunda so pepe. Ala lingbi ti nyon kopo ti pasi so fade mbi yeke nyon, wala ti wara bateme ti pasi so mbi yeke wara so?” 39 Ala kiri tënë na lo: “E lingbi ti nyon ni.” Jésus atene na ala: “Biani, fade ala yeke nyon kopo so mbi yeke nyon si ala yeke wara bateme so mbi yeke wara. 40Me tënë ti dutingo na mbage ti maboko ti mbi ti koli wala na mbage ti maboko ti mbi ti wali, mbi laa mbi yeke mu ni na zo pepe. Ndo ni ayeke ti azo so Nzapa aleke ni ndali ti ala.”

41So tanga ti adisiple baleoko ama tënë so, be ti ala aso na Jacques na Jean. 42Tongaso Jésus airi ala kue na tere ti lo si lo tene na ala: “Ala hinga so, azo so amba ti ala ayeke baa ala tongana amakonzi ti amara nde ayeke sara komandema na ndö ti amara ni. Akota zo ayeke na ngangu na ndö ti azo ti ala. 43 Ti ala azo ti mbi, ayeke nzoni ye ni aduti tongaso pepe na popo ti ala. Me tongana mbeni zo aye ti ga kota zo na popo ti ala, ayeke nzoni lo ga zo ti sarango kua na ala kue. 44 Tongana mbeni zo na popo ti ala aye ti ga zo ti li ni, ayeke nzoni lo ga ngbaa ti ala kue, 45ngbanga ti so *Molenge ti Zo aga titene azo asara kua na lo pepe, me lo ga ti sara kua na azo, ti ka tere ti lo na kuâ ti soo gba ti azo.”

Jésus azi le ti waziba Bartime

(Matt 20.29-34; Luc 18.35-43)

46Ala si na Jéricho. So Jésus na adisiple ti lo na gba ti azo ayeke sigigi ti hon, mbeni waziba, so iri ti lo Bartime, molenge ti Time, aduti na yanga ti lege si lo yeke iri ye na maboko ti azo. 47Gi so lo ma a tene, Jésus ti Nazaret laa ayeke hon so, lo dekongo ngangu, lo tene: “Jésus, Molenge ti David, baa mawa ti mbi!” 48Azo mingi asuku na lo titene lo kanga yanga ti lo, me lo kiri lo dekongo ngangu, atene: “Molenge ti David, baa mawa ti mbi!” 49Jésus aluti si lo tene: “Ala iri lo.” Azo ni airi waziba ni si ala tene na lo: “De be ti mo, mo londo! Lo yeke iri mo!” 50Tongaso lo bi kota bongo ti lo ti de, lo huru lo luti na ndö ti gere ti lo si lo ga na tere ti Jésus. 51Jésus ahunda lo, atene: “Mo ye mbi sara nyen na mo?” Waziba ni akiri tënë na lo: “Wafango-ye, sara si mbi kiri mbi baa ndo.” 52Jésus atene na lo: “Mo gue, mabe ti mo asoo mo awe!” Gi hio na pekoni, waziba ni ato nda ti baa ndo si lo mu peko ti Jésus.

Currently Selected:

Marc 10: MNF2010

Highlight

Copy